ეტყოდა უფალი მოსეს და ჰრქუა: აჰა-ეგერა მიგცე შენ ღმრთად ფარაოს, და აჰრონ, ძმაჲ შენი, იყოს შენდა წინაწარმეტყუელად.
შენ ეტყოდე მას ყოველსავე, რავდენსაცა გამცნებ შენ, და აჰრონ, ძმაჲ შენი, ეტყოდის ფარაოს, რაჲთა გამოავლინნეს ძენი ისრაჱლისანი ქუეყანით ეგჳპტით.
ხოლო მე განვაფიცხო გული ფარაოჲსი და განვამრავლნე სასწაულნი და ნიშნი ჩემნი ქუეყანასა ეგჳპტისასა.
და არა ისმინოს თქუენი ფარაო. და მივყო ჴელი ჩემი ეგჳპტესა ზედა და განვიყვანო ძალითა ჩემითა ერი ჩემი, ძენი ისრაჱლისანი, ქუეყანით ეგჳპტით შურის-გებითა დიდითა.
და ცნან ყოველთა ეგჳპტელთა, რამეთუ მე ვარ უფალი, რომელმან მივყავ ჴელი ჩემი ეგჳპტესა ზედა და გამოვიყვანენ ძენი ისრაჱლისანი შოვრის მათსა.
და ყვეს მოსე და აჰრონ ეგრე, ვითარცა ამცნო მათ უფალმან, Page of ms. O: 80r ეგრეცა ყვეს.
მოსე იყო ოთხმეოც წლის, ხოლო აჰრონ ოთხმეოც და სამ წლის იყო, რაჟამს-იგი ეტყოდეს ფარაოს.
ეტყოდა უფალი მოსეს და აჰრონს და ჰრქუა:
უკუეთუ გეტყოდის თქუენ ფარაო და გრქუას: ყავთ სასწაული ანუ ნიში, და ჰრქუა აჰრონს ძმასა შენსა: მიიღე კუერთხი ეგე და მიაგდე ქუეყანასა წინაშე ფარაოჲსსა და წინაშე მსახურთა მისთა და იქმნას იგი ვეშაპ.
შევიდეს მოსე და აჰრონ წინაშე ფარაოჲსსა და ყვეს ეგრეთ, ვითარცა უბრძანა მათ უფალმან. მიაგდო აჰრონ კუერთხი იგი წინაშე ფარაოჲსსა და მსახურთა მისთა და იქმნა იგი ვეშაპ.
მოუწოდა ფარაო ბრძენთა მათ ეგჳპტისათა და გრძნეულთა. და ყვეს გრძნეულთა მათ ეგჳპტისათა გრძნებითა მათითა ეგრევე:
და მიაგდო კაცად-კაცადმან კუერთხი თჳსი და იქმნნეს ვეშაპებ. და შთანთქნა კუერთხმან აჰრონისმან კუერთხები იგი მათი.
და განიმტკიცა გული თჳსი ფარაო და არა ისმინა მათი, ვითარცა ეტყოდა მათ უფალი.
ჰრქუა უფალმან მოსეს: დამძიმებულ არს გული ფარაოჲსი არა გამოვლინებად ერისა ჩემისა.
მივედ ფარაოჲსა ხვალე. აჰა-ეგერა გამოვალს მდინარესა მას წყალთასა და შეემთხჳე მას მდინარის კიდესა მას. და კუერთხი ეგე, რომელ Page of ms. O: 80v გარდაიქცა გუელად, მიიღე ჴელითა შენითა.
და არქუ მას: უფალმან ღმერთმან ებრაელთამან მომავლინა მე შენდა და თქუა: გამოავლინე ერი ჩემი, რაჲთა მმსახურებდენ მე უდაბნოსა ზედა. და აჰა-ეგერა არა ისმინე აქამომდე.
ამას იტყჳს უფალი: ამით სცნა, რამეთუ მე ვარ უფალი: აჰა-ესერა მე ვსცე კუერთხითა ამით, რომელ არს ჴელსა ჩემსა, წყალსა ამას მდინარისასა და გარდაიქცეს სისხლად,
და თევზნი იგი მდინარისანი მოწყდენ და დაყროლდენ მდინარენი იგი და ვერ ეფლოს მეეგჳპტელთა მათ სუმად.
ჰრქუა უფალმან მოსეს: არქუ შენ აჰრონს, ძმასა შენსა: მოიღე კუერთხი ეგე შენი და და [!] განირთხ წყალთა ზედა ეგჳპტისათა და მდინარეთა ზედა მათთა და გამოსადინელთა წყალთა მათთასა. და იყვნენ სისხლ, და იყოს სისხლი ყოველსა ქუეყანასა ეგჳპტისასა ხეთა და ქვათა.
და ყვეს მოსე და აჰრონ ეგრე, ვითარცა უბრძანა მათ უფალმან. და განიპყრა აჰრონ კუერთხი იგი მისი და სცა წყალსა მას მდინარისასა წინაშე ფარაოჲსსა და წინაშე მსახურთა მისთა, და გარდაიქცეს ყოველნი წყალნი მდინარისანი სისხლად.
და თევზნი მდინარისანი მოწყდეს და დაყროლდა მდინარჱ იგი და ვერ ეძლო ეგჳპტელთა მათ წყალი იგი მდინარისაჲ მის სუმად, და იყო სისხლი ყოველსა ქუეყანასა ეგჳპტისასა.
Page of ms. O: 81r ყვეს ეგრეთვე გრძნეულთა მათ ეგჳპტისათა გრძნებითა მათითა. და განიფიცხა გული თჳსი ფარაო და არა გამოავლინა ერი იგი, ვითარცა ჰრქუა მას უფალმან.
მიიქცა ფარაო და შევიდა სახიდ თჳსა და არა დააყენა გონებაჲ თჳსი არცა ამას ზედა.
თხარეს ყოველთა ეგჳპტელთა გარემო მდინარესა მას, რაჲთამცა სუეს წყალი, და ვერ ეძლო სუმად წყალი მდინარისა მისგან.
აღესრულნეს შჳდნი დღენი შემდგომად გუემისა მის მდინარისა უფლისა მიერ.
