ჰრქუა უფალმან მოსეს: აწ იხილე, რაჲ-იგი უყო მე ფარაოს, რამეთუ ჴელითა მტკიცითა გამოავლინნეს იგინი და მკლავითა მაღლითა გამოასხნეს იგინი ქუეყანით მისით.
ეტყოდა ღმერთი მოსეს და ჰრქუა: მე ვარ უფალი,
რომელი ვეჩუენე აბრაჰამს, ისაკს და იაკობს, რომელთაჲ ღმერთი მე ვარ, და სახელი ჩემი უფალ არა ვაუწყე მათ.
და დავამტკიცე აღთქუმაჲ ჩემი მათ თანა მიცემად მათა ქუეყანაჲ იგი ქანანელთაჲ. ქუეყანასა მას, რომელსა მწირობდეს, რომელსა იყოფოდეს მას ზედა.
და მესმნეს სულთ-თქუმანი ძეთა ისრაჱლისათანი, რომლითა ეგჳპტელნი იგი დაიმონებდეს მათ, და მოვიჴსენე აღთქუმაჲ იგი თქუენი.
წარვედ, ეტყოდე ძეთა ისრაჱლისათა და არქუ: მე ვარ უფალი და გამოგიყვანნე თქუენ მძლავრებისაგან ეგჳპტელთაჲსა და გიჴსნნე თქუენ კირთებისაგან მათისა და განგარინნე თქუენ მკლავითა მაღლითა და საშჯელითა დიდითა.
და მოგიყვანნე თქუენ ერად ჩემდა და მე ვიყო თქუენდა ღმერთ და სცნათ, რამეთუ მე ვარ უფალი ღმერთი თქუენი, რომელმან გამოგიყვანენ თქუენ ქუეყანით ეგჳპტით მძლავოებისაგან ეგჳპტელთაჲსა.
Page of ms. O: 78v და შეგიყვანნე თქუენ ქუეყანასა მას, რომელსა განვირთხ ჴელი ჩემი მიცემად იგი აბრაჰამს, ისაკს და იაკობს, მიგცე იგი თქუენ ნაწილად მე უფალმან.
ეტყოდა მოსე ესრჱთ ძეთა ისრაჱლისათა და არა ისმინეს მოსესი სულმოკლებისაგან და საქმეთა მათგან ფიცხელთა.
ჰრქუა უფალმან მოსეს:
შევედ და ეტყოდე ფარაოს, მეფესა ეგჳპტისასა, რაჲთა გამოავლინნეს ძენი ისრაჱლისანი ქუეყანით ეგჳპტით.
იტყოდა მოსე წინაშე ღმრთისა და თქუა: აჰა-ესერა ძეთა ისრაჱლისათა არა ისმინეს ჩემი და ვითარ ისმინოს ჩემი ფარაო, რამეთუ მე უტყუ ვარ?!
ეტყოდა უფალი მოსეს და აჰრონს და ჰრქუა და უბრძანა მათ ფარაოჲსა მიმართ მეფისა ეგჳპტელთაჲსა, რაჲთა გამოუტევნეს ძენი ისრაჱლისანი ქუეყანით ეგჳპტით.
და ესე არიან მთავარნი სახლთა მამულთა მათთანი: ძენი რუბენისნი, პირმშოჲსა ისრაჱლისანი: ენუქ და ფალუს, ასრონ და ქარმი. ესე არიან ნათესავნი რუბენისნი.
ძენი სჳმეონისნი: იემოელ და იამინ და იუდ, იაქიმ და სარ და საულ, რომელი ესუა ზღჳს-კიდელისა მისგან. ესე არიან ტომნი ძეთა სჳმეონისთანი.
და ესე სახელები არს ძეთა ლევისთაჲ ნათესავებისაებრ მათისა: გეთსონ, კაათ, მერარი. და წელნი ცხორებისა ლევისნი ას ოც და ჩჳდმეტ.
და ესე არიან Page of ms. O: 79r ძენი გეთსონისნი: თობელი და სელმეი, სახლისა მამულისა მათისანი.
ძენი კაათისნი: ამბრამ და ისარ, ქებრო და ოზიელ. და წელნი ცხორებისა კაათისნი ას ოც და ათ წელ.
ძენი მერარისნი: მოლი და ომოსი. ესე სახლისა მამულისა ლევისნი ნათესავად-ნათესავადი მათი.
და მოიყვანა ამრამ იოქაბეტ, ასული მამის ძმისა თჳსისაჲ, თავისა თჳსისა ცოლად და უშვნა მას აჰრონ და მოსე და მარიამ, დაჲ მათი. ხოლო წელნი ცხორებისა ამრამისნი ას ოც და თექუსმეტ წელ.
ძენი ისაარისნი: კორე და აფეკ და ზიქრი.
ძენი იოზიელისნი: მისალ, ელისაფან და სეგრი.
და მოიყვანა აჰრონ ელისაბეთ, ასული ამინადარისი, დაჲ ნაასონისი, თჳსა ცოლად და უშვნა მას ნაბად და აბიუდ, ელიაზარ და იოთარამ.
ძენი კორესნი: ასირ, ელნანა და აბიათარ. ესე შობანი კორესნი.
და ელიაზარ, ძემან აჰრონისმან, მოიყვანა ასულთაგან ფოტიელისთაჲ თჳსა ცოლად და უშვა მას ფინეეზ. ესე მთავარნი ტომთა ლევისთანი მსგავსად შობისა მათისა.
ესე არიან მოსე და აჰრონ, რომელთა-იგი ჰრქუა ღმერთმან გამოყვანებაჲ Page of ms. O: 79v ძეთა ისრაჱლისათაჲ ეგჳპტით ძალითურთ მათით.
ესენი არიან, რომელნი ეტყოდეს ფარაოს, მეფესა ეგჳპტისასა. და გამოიყვანნეს ძენი ისრაჱლისანი ეგჳპტით, ესე არიან აჰრონ და მოსე.
დღესა მას, რომელსა ეტყოდა უფალი მოსეს ქუეყანასა ეგჳპტისასა
და ჰრქუა: მე ვარ უფალი; ეტყოდე ფარაოს, მეფესა ეგჳპტისასა, რაოდენი გრქუა შენ.
და თქუა მოსე წინაშე უფლისა: აჰა-ესერა მე ჴმა-წულილ ვარ. ვითარ ისმინოს ჩემი ფარაო?
