Աղաչեմ զձեզ ե́ղբարք գթութ(եամ)բքն ա(ստուածո)յ՝ պատրաստել զմարմինս ձեր պատարա́գ կենդանի, սուրբ, հաճո́յ ա(ստուածո)յ, զխօսո́ւն պաշտօնդ ձեր։
եւ մի́ կերպարանիք կերպարանօք աշխարհիս այսորիկ. այլ նորոգեցարո́ւք ՛ի նորոգութի(ւն) մտաց ձերոց, առ ՛ի քննել ձեզ զլա́ւն, եւ եթէ զինչ են կամքն ա(ստուածո)յ, բարին եւ հաճոյն եւ կատարեալ։
Զայս ասեմ շնորհօ́քն ա(ստուածո)յ որ տուեալ են ինձ՝ ամ(ենայն)ի որ է ՛ի ձեզ, մի́ առաւել ինչ խորհել քան զարժանն խորհելոյ. այլ ՛ի խորհելն զգաստանա́լ իւրաքանչիւր, ո(ր)պ(էս) բաժանեաց ա(ստուա)ծ չա́փ հաւատոց.
Որպէս ՛ի միում մարմնի անդամս բազումս ունիմք. եւ անդա́մքն ամ(ենայն) ո́չ զնոյն գործ ունին։
նո́յնպէս եւ բազումքս մի մարմին եմք ՛ի ք(րիստո)ս. այլ իւրաքանչիւր միմեանց անդամք եմք։
Բայց ունիմք մեք շնո́րհս ըստ շնորհացն, որ տուեալ են մեզ ազգս ազգս. եթէ մարգարէու(թ)ի(ւն) ըստ չափո́յն հաւատոց,
եթէ պաշտօն՝ ըստ պաշտամանն, եթէ որ ուսուցանէն՝ ըստ վարդապետութե(ա)ն.
եթէ որ մխիթարէն՝ ըստ մխիթարու(թ)ե(ան)ն. որ առա́տն է՝ զուարթու(թեամ)բ, որ վերակացուն է՝ փութով, որ ողորմին՝ լրջմտութ(եամ)բ։
Սէր՝ առա́նց կեղծաւորութե(ան), ատեա́լ զչար, զհե́տ երթալ բարեա́ց.
յեղբայրսիրու(թ)ե(ան) առ միմեա́նս գթա́ծք. ՛ի պատիւ զմիմեա́մբք ելանել։
՛Ի փոյթ՝ մի́ վեհերոտք. հոգւո́վ եռացէ́ք, տ(եառ)ն ծառայեցէ́ք։
յուսով խնդացէ́ք, նեղու(թ)ե(ան) համբերեցէ́ք, աղօթից ստէպ կացէք,
՛ի պէտս սրբոց հաղորդեցարո́ւք. զհիւրասիրութե(ան) զհե́տ երթայք։
օրհնեցէք զանիծիչս ձեր, օրհնեցէ́ք եւ մի́ անիծանէք։
Խնդալ ընդ խնդացօ́ղս, լա́լ ընդ լացօղս.
զնո́յն միմեանց խորհիջի́ք. մի́ ամբարտաւանէք՝ այլ ընդ խոնա́րհս զիջանիցիք։ Մի́ լինիք իմաստունք յանձինս ձեր.
մի́ ումեք չարի չար հատուցանէք։ Խորհեցարո́ւք զբարի́ս առաջի ամ(ենայն) մարդկան։
եթէ հնար ինչ իցէ ձեզ՝ ը(ստ) ամ(ենայն) մարդկան զխաղաղու(թ)ի(ւն) կալջիք։
Մի́ զանձանց վրէժխնդրէք սի́րելիք, այլ տո́ւք տեղի բարկութե(ան)։ քանզի գրեա́լ է. իմ է վրէժխնդրու(թ)ի(ւն), եւ ես հատուցից՝ ասէ տ(է)ր։
Այլ եթէ քաղցեալ է թշնամին քո, հա́ց տուր նմ(ա), եւ եթէ ծարաւի, ջո́ւր տուր նմ(ա). զայս աբարեալ՝ կայծակունս հրոյ կուտեսցես ՛ի գլուխ ն(ո)ր(ա)։
Մի́ յաղթիր ՛ի չարէ. այլ յաղթեա́ բարեա́ւն չարին։
