TITUS
Armenian NT (Zohrab Bible)
Part No. 87
Previous part

Chapter: 19  
(Ժ՜Թ)


Verse: 1   Link to gnt   Յայնժամ առ Պեղատոս զՅիսուս, եւ գան* եհար։

Verse: 2   Link to gnt   Եւ զինուորացն արարեալ պսակ ի փշոց՝ եդին ի գլուխ նորա, եւ զգեցուցին նմա հանդերձ ծիրանի.

Verse: 3   Link to gnt   Եւ գային առ նա՝ եւ ասէին, ողջ եր արքայ Հրէից։ եւ հանէին նմա ապտակս։

Verse: 4   Link to gnt   Ել դարձեալ Պեղատոս արտաքս եւ ասէ ցնոսա. ահա ածեմ զնա արտաքս առ ձեզ, զի գիտասջիք թէ ես՝ վնաս ինչ ի նմա ոչ գտանեմ։

Verse: 5   Link to gnt   Ել Յիսուս արտաքս, եւ ունէր պսակ ի փշոց՝ եւ հանդերձ ծիրանի։ Եւ ասէ ցնոսա. ահա այրդ՝ ցձեզ։

Verse: 6   Link to gnt   Իբրեւ տեսին զնա քահանայապետքն եւ սպասաւորք, զաղաղակ բարձին՝ եւ ասեն. ի խաչ հան՝ ի խաչ հան զդա։ Ասէ ցնոսա Պեղատոս. առէք զդա ի ձեզ, եւ ձեզէն հանէք ի խաչ. զի ես՝ ի դմա վնաս ինչ ոչ գտանեմ։

Verse: 7   Link to gnt   Պատասխանի ետուն նմա Հրէայքն. մեք օրէնս ունիմք. եւ ըստ օրինաց մերոց պարտի մեռանել. զի զանձն իւր որդի Աստուծոյ արար։

Verse: 8   Link to gnt   Իբրեւ լուաւ զբանս զայսոսիկ Պեղատոս, առաւել եւս երկեաւ։

Verse: 9   Link to gnt   Եմուտ դարձեալ անդրէն յապարանսն, եւ ասէ ցՅիսուս. ուստի ես դու։ Եւ Յիսուս ոչ ետ նմա պատասխանի։

Verse: 10   Link to gnt   Ասէ ցնա Պեղատոս. Ընդ իս ոչ խօսիս, ոչ գիտես եթէ իշխանութիւն ունիմ հանել զքեզ ի խաչ, եւ իշխանութիւն ունիմ արձակել զքեզ։

Verse: 11   Link to gnt   Պատասխանի ետ Յիսուս. ոչ ունէիր դու իշխանութիւն ի վերայ իմ՝ եւ ոչ մի, եթէ ոչ էր տուեալ քեզ ի վերուստ. վասն այնորիկ որ մատնեաց զիս քեզ, նորա մեծ մեղք են։

Verse: 12   Link to gnt   Եւ յայնմանէ Պեղատոս խնդրէր արձակել զնա, եւ Հրեայքն աղաղակէին՝ եւ ասէին. եթէ զդա՝ արձակես, չես բարեկամ կայսեր։ Ամենայն ոք որ թագաւոր կոչէ զանձն իւր, հակառակ է կայսեր։

Verse: 13   Link to gnt   Իսկ Պեղատոս իբրեւ լուաւ զբանս զայսոսիկ, ած զՅիսուս արտաքս՝ եւ նստաւ ի վերայ բեմին ի տեղւոջն որ կոչէր Քարայատակ, եւ Եբրայեցերէն Կապ Պաթա։

Verse: 14   Link to gnt   Էր ուրբաթն զատկի. եւ էր ժամ իբրեւ վեցերորդ, եւ ասէ ցՀրեայսն ահա թագաւորդ ձեր՝ ցձեզ։

Verse: 15   Link to gnt   Եւ նոքա աղաղակէին, բարձ ի մէնջ բարձ ի մէնջ՝ եւ հան զդա ի խաչ։ Ասէ ցնոսա Պեղատոս. ես զթագաւորդ ձեր ի խաչ հանիցեմ, պատասխանի ետուն Քահանայապետքն չիք մեր թագաւոր՝ բաց ի կայսերէ։

Verse: 16   Link to gnt   Յայնժամ ետ զնա ի ձեռս նոցա, զի ի խաչ ելանիցէ։

Section: 35 
Verse: 17   Link to gnt   Եւ նոքա առեալ տանէին զնա. եւ բարձեալ էր ինքնին զխաչափայտն, եւ ելանէր ի տեղին՝ որ անուանէր Գագաթան, եւ կոչէր Եբրայեցերէն Գողգոթա։

Verse: 18   Link to gnt   Ուր եւ ի խաչն իսկ հանին զնա. եւ ընդ նմա երկուս եւս այլ աստի եւ անտի, եւ ի միջի զՅիսուս։

Verse: 19   Link to gnt   Գրեաց եւ տախտակ Պեղատոս, եւ եդ ի վերայ խաչին. եւ էր գրեալ. Յիսուս Նազովրեցի Թագաւոր Հրէից։

Verse: 20   Link to gnt   Զայս տախտակ ընթերցան բազումք ի Հրէից, զի մօտ էր ի քաղաք անդր տեղին՝ ուր խաչեցաւն Յիսուս. եւ էր գրեալ Եբրայեցերէն՝ Դաղմատարէն՝ եւ Յունարէն։

Verse: 21   Link to gnt   Ասեն ցՊեղատոս քահանայապետքն Հրէից. մի գրեր թագաւոր Հրէից, այլ թէ նա ասաց՝ թագաւոր եմ Հրէից։

Verse: 22   Link to gnt   Պատասխանի ետ Պեղատոս. զոր ինչ գրեցին՝ գրեցի։

Verse: 23   Link to gnt   Իսկ զինուորքն իբրեւ հանին ի խաչ զՅիսուս, առին զհանդերձս նորա՝ եւ արարին չորս մասունս, իւրաքանչիւր զինուորի մասն։ Իսկ զպատմուճանն քանզի էր առանց կարանի ի վերուստ՝ փոր անկեալ ամենեւին։

Verse: 24   Link to gnt   Ասեն ցմիմեանս. մի պատառեսցուք զայդ, այլ արկցուք վիճակս ի վերայ դորա ում եւ ելցէ։ Զի լցցի գիրն որ ասէ. բաժանեցան զհանդերձս իմ յիւրեանս, եւ ի վերայ պատմուճանի իմոյ վիճակ արկին։ Զինուորքն՝ զայն ինչ գործեցին։

Verse: 25   Link to gnt   Եւ կային առ խաչին Յիսուսի մայրն նորա, եւ քոյր մօր նորա մարիամ Կղէովպայ, եւ Մարիամ Մագդաղենացի։

Verse: 26   Link to gnt   Յիսուս իբրեւ ետես զմայրն եւ զաշակերտն զոր սիրէր՝ զի կայր մօտ. ասէ ցմայրն, կին դու՝ ահա որդի քո։

Verse: 27   Link to gnt   Ապա ասէ ցաշակերտն. ահա մայր քո։ Եւ յայնմ ժամանակէ առ աշակերտն զնա՝ առ իւր։

Verse: 28   Link to gnt   Յետ այսորիկ իբրեւ գիտաց Յիսուս, եթէ ահա ամենայն ինչ կատարեալ է. զի կատարեսցի գիրն. ասէ՝ ծարաւի եմ։

Verse: 29   Link to gnt   Եւ անդ կայր աման ինչ լի քացախով. եւ նոցա սպունգ լցեալ քացախով ընդ լեղւոյ՝ շուրջ եդեալ զմշտկաւ զոպայի, մատուցին ի բերան նորայ։

Verse: 30   Link to gnt   Իբրեւ առ Յիսուս զքացախն հանդերձ լեղւովն՝ ասէ. ամենայն ինչ կատարեալ է։
Section: 36 
   Եւ խոնարհեցուցեալ զգլուխ՝ աւանդեաց զոգին։

Verse: 31   Link to gnt   Իսկ Հրէայքն՝ քանզի ուրբաթ էր, զի մի անդէն ի խաչին ագանիցին մարմինքն մինչ ցշաբաթն, զի էր օր մեծ շաբաթուն այնորիկ. աղաչեցին զՊեղատոս զի խորտակեսցեն զբարձս նոցա, եւ բարձցին։

Verse: 32   Link to gnt   Եկին զինուորքն, եւ զառաջնոյն խորտակեցին զբարձս, նոյնպէս եւ զմիւսոյն որ ընդ նմա ի խաչն ելեալ էր։

Verse: 33   Link to gnt   Բայց իբրեւ եկին առ Յիսուս, եւ տեսին զի այն ինչ մեռեալ էր, ոչ խորտակեցին զբարձս նորա։

Verse: 34   Link to gnt   Այլ մի ոմն ի զինուորացն տիգաւ խոցեաց զկողս նորա, եւ վաղվաղակի ել արիւն եւ ջուր։

Verse: 35   Link to gnt   Եւ որ ետեսն վկայեաց, եւ ճշմարիտ է վկայութիւն նորա. եւ նա գիտէ՝ թէ ճշմարիտ ասէ. զի եւ դուք հաւատասջիք։

Verse: 36   Link to gnt   Այս եղեւ, զի լցցի գիրն, եթէ ոսկր նորա մի փշրեսցի։

Verse: 37   Link to gnt   Եւ դարձեալ մեւս գիր ասէ, եթէ հայեսցին ի նա՝ յոր խոցեցինն։

Section: 37 
Verse: 38   Link to gnt   Յետ այսորիկ աղաչեաց զՊեղատոս Յովսէփ որ Յարեմաթեայ էր, աշակերտ Յիսուսի ի ծածուկ վասն ահին Հրէից, զի բարձցէ զմարմինն Յիսուսի, եւ հրամայեաց Պեղատոս, եկին եւ բարձին զնա։

Section: 38 
Verse: 39   Link to gnt   Եկն եւ Նիկոդեմոս որ եկեալն էր առ Յիսուս ի գիշերի զառաջինն, եւ եբեր զմուռս խառն ընդ հալուէս՝ իբրեւ լտերս հարեւր։

Verse: 40   Link to gnt   Առին զմարմինն Յիսուսի, եւ պատեցին կտաւովք՝ խնկովքն հանդերձ, որպէս օրէն էր Հրէից պատել։

Verse: 41   Link to gnt   Եւ էր ի տեղւոջն յորում խաչեցաւ՝ պարտէզ. եւ ի պարտիզի անդ գերեզման նոր, յորում ոչ ոք երբէք էր եդեալ։

Verse: 42   Link to gnt   Անդ վասն ուրբաթուն Հրէից, զի մօտ էր գերեզմանն՝ եդին զՅիսուս։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.