TITUS
Armenian NT (Zohrab Bible)
Part No. 86
Previous part

Chapter: 18  
(Ժ՜Ը)


Verse: 1   Link to gnt   Զայս իբրեւ ասաց Յիսուս, ել աշակերտօքն հանդերձ յայն կոյս ձորոյն Կեդրովնի՝ ուր էր պարտէզ, յոր եմուտ ինքն եւ աշակերտքն իւր։

Verse: 2   Link to gnt   Գիտէր եւ Յուդա, որ զնայն մատնելոց էր՝ զտեղին. զի բազում անգամ ժողովեալ էր անդր Յիսուսի աշակերտօքն հանդերձ։

Verse: 3   Link to gnt   Եւ Յուդայի առեալ ընդ իւր զգունդն, եւ ի քահանայապետիցն եւ ի փարիսեցւոց սպասաւորս, գայ անդր ջահիւք եւ լապտերօք եւ զինուք։

Verse: 4   Link to gnt   Իսկ Յիսուս իբրեւ ետես զայն ամենայն եկեալ ի վերայ նորա. ել եւ ասէ ցնոսա. զո խնդրէք։

Verse: 5   Link to gnt   Պատասխանի ետուն նմա. զՅիսուս Նազովրեցի։ Ասէ ցնոսա Յիսուս. ես եմ։ Կայր ընդ նոսա եւ Յուդա՝ որ մատնէրն զնա։

Verse: 6   Link to gnt   Իբրեւ ասաց՝ թէ ես եմ, յետս յետս չոգան՝ եւ զարկան զգետնի։

Verse: 7   Link to gnt   Դարձեալ եհարց զնոսա զո խնդրէք։ Եւ նոքա ասեն զՅիսուս Նազովրեցի։

Verse: 8   Link to gnt   Պատասխանի ետ նոցա Յիսուս. ասացի ձեզ թէ ես եմ. արդ՝ եթէ զիս խնդրէք՝ թոյլ տուք դոցա երթալ։

Verse: 9   Link to gnt   Զի լցցի բանն՝ զոր ասաց. թէ զորս ետուրն ցիս, ոչ կորուսից ի նոցանէ եւ ոչ զոք։

Verse: 10   Link to gnt   Իսկ Սիմովն Պետրոս քանզի ունէր սուր, ձգեաց զնա՝ եւ եհար զքահանայապետին ծառայ, եւ ի բաց առ զունկն նորա զաջոյ։ Եւ էր անուն ծառային Մաղքոս։

Verse: 11   Link to gnt   Ասէ Յիսուս ցՊետրոս.արկ զսուրդ անդրէն ի պատեանս իւր. զբաժակն զոր ետ ինձ հայր ոչ ըմպիցեմ զնա։

Verse: 12   Link to gnt   Իսկ գունդն եւ հազարապետն եւ սպասաւորքն Հրէիցն կալան զՅիսուս՝ եւ կապեցին։

Verse: 13   Link to gnt   Եւ ածին զնա նախ՝ առ Անա, որ էր աներ Կայիափայի. որ քահանայապետն էր տարւոյն այնորիկ։

Verse: 14   Link to gnt   Այս՝ այն Կայիափա էր՝ որ խրատ ետ Հրէից, թէ լաւ է առն միում մեռանիլ ի վերայ ժողովրդեանն։

Verse: 15   Link to gnt   Եւ երթային զհետ Յիսուսի Սիմովն Պետրոս եւ մեւս աշակերտն։ Եւ աշակերտն այն քանզի ծանօթ էր քահանայապետին՝ եմուտ ընդ Յիսուսի ի գաւիթ քահանայապետին։

Verse: 16   Link to gnt   Եւ Պետրոս կայր առ դրանն արտաքոյ։ Ել մեւս աշակերտն՝ որ էր ծանօթ քահանայապետին, եւ ասաց ցդռնապանն՝ եւ եմոյծ ի ներքս զՊետրոս։

Verse: 17   Link to gnt   Ասէ աղջիկն որ դռնապանն էր՝ ցՊետրոս. միթէ՝ եւ դու յաշակերտաց առնն այնորիկ իցես։ Եւ նա ասէ՝ ոչ եմ։

Verse: 18   Link to gnt   Կային անդ ծառայքն եւ սպասաւորք, խարոյկ արկեալ՝ քանզի ցուրտ էր, եւ ջեռնուին. կայր ընդ նոսա եւ Պետրոս՝ եւ ջեռնոյր։

Verse: 19   Link to gnt   Եւ քահանայապետն եհարց ցՅիսուս վասն աշակերտացն՝ եւ վասն վարդապետութեան նորա։

Verse: 20   Link to gnt   Պատասխանի ետ նմա Յիսուս. ես՝ յայտնապէս խօսեցայ յաշխարհի. ես յամենայն ժամ ուսուցի ի ժողովրդեանն, եւ ի տաճարի անդ՝ ուր ամենայն Հրեայք ժողովեալ էին, եւ ի ծածուկ ինչ ոչ խօսեցայ։

Verse: 21   Link to gnt   Զի հարցանես զիս. հարց զայնոսիկ՝ որ լուանն, թէ զինչ խօսեցայ ընդ նոսա. ահաւասիկ նոքա գիտեն զինչ խօսեցայ։

Verse: 22   Link to gnt   Իբրեւ նա զայն ասաց, մի ոմն ի սպասաւորացն որ անդ կայր, ած ապտակ Յիսուսի՝ եւ ասէ. այդպէս պատասխանի տաս քահանայապետիդ։

Verse: 23   Link to gnt   Եւ Յիսուս ասէ ցնա. եթէ չար ինչ խօսեցայ, վկայեա վասն չարին, իսկ եթէ բարի ընդէր հարկանես զիս։

Verse: 24   Link to gnt   Եւ առաքեաց զնա Անա կապեալ առ Կայիափա քանայապետ։

Section: 33 
Verse: 25   Link to gnt   Եւ Սիմովն Պետրոս կայր անդ՝ եւ ջեռնոյր. ասեն ցնա՝ միթէ՝ եւ դու յաշակերտաց անտի նորա իցես։ նա՝ ուրացաւ եւ ասէ՝ թէ չեմ։

Verse: 26   Link to gnt   Եւ ասէ մի ոմն ի ծառայից քահանայապետին՝ ազգական այնորիկ, զորոյ զունկն եհատ Պետրոս. Ոչ ես իսկ տեսի զքեզ ի պարտիզի անդ ընդ նմա։

Verse: 27   Link to gnt   Դարձեալ ուրացաւ Պետրոս. եւ վաղվաղակի հաւ խօսեցաւ։

Section: 34 
Verse: 28   Link to gnt   Եւ ածեն զՅիսուս ի վանացն Կայիափայ յապարանս դատաւորին. եւ էր այգուց։ Եւ նոքա ոչ մտին յապարանսն, զի մի պղծիցին, այլ զի ուտիցեն զզատիկն։

Verse: 29   Link to gnt   Ել առ նոսա Պեղատոս արտաքս՝ եւ ասէ. զինչ չարախօսութիւն մատուցանէք զառնէն զայնմանէ։

Verse: 30   Link to gnt   Պատասխանի ետուն եւ ասեն ցնա. եթէ չէր չարագործ այրն այն, ապա ոչ մատնէաք զնա քեզ։

Verse: 31   Link to gnt   Ասէ ցնոսա Պեղատոս. առէք զնա դուք, եւ ըստ ձերոց օրինացն դատեցարուք։ Ասեն ցնա Հրեայքն. մեզ չէ արժան սպանանել զոք։

Verse: 32   Link to gnt   Զի լցցի բանն Յիսուսի զոր ասաց, նշանակեալ թէ որով մահու մեռանելոց իցէ։

Verse: 33   Link to gnt   Եմուտ միւսանգամ յապարանսն Պեղատոս, կոչեաց ցՅիսուս եւ ասէ ցնա. Դու ես թագաւորն Հրէից։

Verse: 34   Link to gnt   Պատասխանի ետ Յիսուս. ի քէն ասես զայդ, եթէ այլք ասացին քեզ զինէն։

Verse: 35   Link to gnt   Պատասխանի ետ Պեղատոս. միթէ եւ ես Հրեայ իցեմ. ազգն քո եւ քահանայապետք մատնեցին զքեզ ինձ, զինչ գործ գործեալ է քո։

Verse: 36   Link to gnt   Պատասխանի ետ Յիսուս. իմ արքայութիւն չէ յայսմ աշխարհէ. եթէ յաշխարհէ աստի էր արքայութիւնն իմ, սպասաւորքն իմ մարտնչէին արդեւք՝ զի մի մատնեցայց Հրէից. բայց արդ թագաւորութիւն իմ չէ աստի։

Verse: 37   Link to gnt   Ասէ ցնա Պեղատոս. ապա թէ այդպէս իցէ, թագաւոր ոմն ես դու։ Պատասխանի ետ Յիսուս. դու ասես՝ թէ թագաւոր իցեմ. բայց ես յայդ իսկ ծնեալ եմ, եւ ի գոյն իսկ եկեալ եմ յաշխարհ, զի վկայեցից ճշմարտութեանն. ամենայն որ ի ճշմարտութենէ է, լսէ բարբառոյ իմոյ։

Verse: 38   Link to gnt   Ասէ ցնա Պեղատոս. զինչ է ճշմարտութիւն։ Զայս իբրեւ ասաց, դարձեալ ել առ Հրէայսն՝ եւ ասէ ցնոսա. ես՝ եւ ոչ մի ինչ պատճառս գտանեմ ի նմա։

Verse: 39   Link to gnt   Բայց է ձեր սովորութիւն զի զմի ոք արձակեցից ձեզ ի զատիկս. արդ կամիք զի արձակեցից ձեզ զթագաւորն Հրէից։

Verse: 40   Link to gnt   Աղաղակեցին ամենեքեան՝ եւ ասէին. մի զդա, այլ զԲարաբբա, եւ էր Բարաբբայն այն աւազակ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.