TITUS
Armenian NT (Zohrab Bible)
Part No. 75
Previous part

Chapter: 7  
(Է՜)


Section: 18  
Passage: 4-7 
Verse: 1   Link to gnt   Եւ յետ այսորիկ շրջէր Յիսուս ի Գալիլեա. քանզի ոչ կամէր ի Հրէաստանի շրջել, զի խնդրէին զնա Հրէայքն սպանանել։

Verse: 2   Link to gnt   Եւ էր մերձ տօնն Հրէից տաղաւարահարաց։

Verse: 3   Link to gnt   Ասեն ցնա եղբարքն նորա. գնա աստի եւ երթ ի Հրէաստան, զի եւ աշակերտքն քո տեսցեն զգործսդ քո զոր գործես։

Verse: 4   Link to gnt   Զի ոչ ոք է որ ի ծածուկ ինչ գործէ, եւ խնդրէ ինքն համարձակ լինել. եթէ զայդ գործես. յայտնեա զանձն քո աշխարհի։

Verse: 5   Link to gnt   Քանզի եւ եղբարքն իսկ՝ չէին հաւատացեալ ի նա։

Verse: 6   Link to gnt   Ասէ ցնոսա Յիսուս. ժամանակ իմ չեւ է հասեալ. բայց ձեր ժամանակ՝ յամենայն ժամու պատրաստ է։

Verse: 7   Link to gnt   Ոչ կարէ աշխարհ ատել զձեզ. բայց զիս ատեայ. զի ես վկայեմ վասն նորա՝ եթէ գործքն իւր չարութեան են։

Verse: 8   Link to gnt   Դուք երթայք ի տօնն յայն, ես ոչ երթամ՝ ի տօնն յայն. զի իմ ժամանակ՝ չեւ է լցեալ։

Verse: 9   Link to gnt   Զայս իբրեւ ասաց, ինքն մնաց անդէն ի Գալիլեա։

Verse: 10   Link to gnt   Իբրեւ ելին եղբարքն նորա, ապա՝ եւ ինքն ել ի տօնն՝ ոչ յայտնի, այլ իբրեւ ի ծածուկ։

Verse: 11   Link to gnt   Եւ Հրէայքն խնդրէին զնա ի տօնի անդ՝ եւ ասէին, ուր իցէ նա։

Verse: 12   Link to gnt   Եւ քրթմնջիւն էր զնմանէ ի ժողովուրդսն։ Կէսքն ասէին՝ թէ բարւոք է։ այլք ասէին՝ ոչ, այլ մոլորեցուցանէ զժողովուրդն։

Verse: 13   Link to gnt   Եւ ոչ ոք համարձակ խօսէր զնմանէ վասն երկիւղին Հրէից։

Passage: 5-1 
Verse: 14   Link to gnt   Իբրեւ տօնն ընդմիջեցաւ, ել Յիսուս ի տաճարն՝ եւ ուսուցանէր։

Verse: 15   Link to gnt   Զարմանային Հրէայքն եւ ասէին. Զիարդ զգիրս գիտէ սա, զի ուսեալ բնաւ չիք։

Verse: 16   Link to gnt   Պատասխանի ետ նոցա Յիսուս՝ եւ ասէ. իմ վարդապետութիւնս չէ իմ, այլ այնորիկ որ առաքեացն զիս։

Verse: 17   Link to gnt   Եթէ ոք կամի զկամս նորա առնել, գիտասցէ վասն վարդապետութեանս, յԱստուծոյ իցէ արդեւք՝ եթէ ես ինչ յանձնէ իմմէ խօսիմ։

Verse: 18   Link to gnt   Որ յանձնէ իւրմէ խօսի, փառս անձին իւրում խնդրէ. իսկ որ խնդրէ զփառս այնորիկ որ առաքեացն զնա՝ նա ճշմարիտ է, եւ անիրաւութիւն ոչ գոյ ի նմա։

Verse: 19   Link to gnt   Ոչ Մովսէս ետ ձեզ զօրէնսն, եւ ոչ ոք ի ձէնջ առնէ զօրէնսն։

Verse: 20   Link to gnt   Զի խնդրէք զիս սպանանել։ Պատասխանի ետ ժողովուրդն՝ եւ ասէ. դեւ գոյ ի քեզ. ով խնդրէ զքեզ սպանանել։

Verse: 21   Link to gnt   Պատասխանի ետ նոցա Յիսուս եւ ասէ. գործ մի գործեցի, եւ ամենեքին զարմացեալ էք։

Verse: 22   Link to gnt   Վասն այնորիկ Մովսէս ետ ձեզ թլփատութիւն. զի ոչ եթէ ի Մովսիսէ էր, այլ ի հարց անտի. եւ ի շաբաթու թլփատէք զմարդ։

Verse: 23   Link to gnt   Իսկ արդ՝ եթէ թլփատութիւն՝ առնու մարդ ի շաբաթու, զի մի օրէնքն Մովսիսի լուծցին. ընդ իս ցասուցեալ էք՝ զի ողջոյն իսկ մարդ բժշկեցի ի շաբաթու։

Passage: 5-2 
Verse: 24   Link to gnt   Մի ըստ աչս դատիք, այլ ուղիղ դատաստան արարէք։

Verse: 25   Link to gnt   Ասէին ոմանք յԵրուսաղեմացւոց անտի. ոչ նա է սա զոր խնդրէին սպանանել։

Verse: 26   Link to gnt   Եւ աւասիկ յայտնապէս խօսի, եւ չասեն ինչ դմա. գուցէ արդեւք եւ իշխանքն գիտացին՝ թէ սա իցէ Քրիստոսն։

Verse: 27   Link to gnt   Այլ՝ զսա գիտեմք ուստի է. իսկ Քրիստոսն յորժամ գայցէ, ոչ ոք գիտէ ուստի է։

Verse: 28   Link to gnt   Աղաղակեաց Յիսուս ի տաճարին, ուսուցանէր՝ եւ ասէր։ Եւ զիս գիտէք, եւ ուստի եմ գիտէք. եւ յանձնէ իմմէ ոչ եմ եկեալ, այլ է ճշմարիտ որ առաքեացն զիս. զոր դուքն ոչ գիտէք։

Verse: 29   Link to gnt   Ես գիտեմ զնա. զի ի նմանէ իսկ եմ, եւ նա առաքեաց զիս։

Section: 19  
Verse: 30   Link to gnt   Խնդրէին զնա ունել, եւ ել ի ձեռաց նոցա. եւ ոչ ոք արկ ի նա ձեռն, զի չեւ էր հասեալ ժամ նորա։

Verse: 31   Link to gnt   Եւ բազումք ի ժողովրդենէն հաւատացին ի նա, եւ ասէին. Քրիստոսն յորժամ գայցէ միթէ աւելի ինչ նշանս առնիցէ՝ քան զոր սայս առնէ։

Verse: 32   Link to gnt   Եւ լուան Փարիսեցիքն զտրտունջ ժողովրդեանն զնմանէ։ Եւ առաքեցին քահանայապետքն եւ Փարիսեցիքն սպասաւորս՝ զի կալցին զնա։

Verse: 33   Link to gnt   Ասէ Յիսուս. փոքր մեւս եւս ժամանակ ընդ ձեզ եմ. երթամ առ այն՝ որ առաքեացն զիս։

Verse: 34   Link to gnt   Խնդրեցէք զիս՝ եւ ոչ գտանիցէք. եւ ուր եսն երթամ՝ դուք ոչ կարէք գալ։

Verse: 35   Link to gnt   Ասեն Հրէայքն ընդ միմեանս. իսկ յո երթայցէ դա՝ զի մեք ոչ գտանիցեմք զդա. միթէ ի սփիռս հեթանոսաց երթիցէ՝ եւ ուսուցանիցէ զհեթանոսս։

Verse: 36   Link to gnt   Զինչ է բանն այն զոր ասաց. խնդրեցէք զիս՝ եւ ոչ գտանիցէք. եւ ուր եսն երթամ, դուք ոչ կարիցէք գալ։

Passage: 5-3 
Verse: 37   Link to gnt   Ի վերջնում աւուր մեծի տօնին, կայր Յիսուս՝ աղաղակէր եւ ասէր. եթէ ոք ծարաւի իցէ, եկեսցէ առ իս՝ եւ արբցէ։

Verse: 38   Link to gnt   Որ հաւատայ յիս՝ որպէս եւ ասեն գիրք, գետք յորովայնէ նորա բղխեսցեն ջրոց կենդանութեան։

Verse: 39   Link to gnt   Զայս ասէր՝ վասն հոգւոյն զոր ընդունելոց էին որ հաւատային ի նա. զի չեւ էր հոգի, քան զի Յիսուս չեւ էր փառաւորեալ։

Verse: 40   Link to gnt   Ոմանք ի ժողովրդենէն իբրեւ լսէին զբանս զայս, ասէին. սա է ճշմարիտ մարգարէն։

Verse: 41   Link to gnt   Այլքն ասէին՝ սա է Քրիստոսն։ Իսկ կէսքն ասէին՝ միթէ ի Գալիլեէ գալոց իցէ Քրիստոս։

Verse: 42   Link to gnt   Ոչ գիրք ասեն՝ եթէ ի զաւակէ Դաւթի, եւ ի Բեթղահէմ գեղջէ՝ ուր Դաւիթն էր, գալոց է Քրիստոս։

Verse: 43   Link to gnt   Եւ եղեւ հերձուած ի մէջ ժողովրդեանն վասն նորա։

Verse: 44   Link to gnt   Եւ ոմանք ի նոցանէ կամեցան ունել զնա. այլ ոչ ոք մխեաց ի նա ձեռն։

Verse: 45   Link to gnt   Եւ եկին անդրէն սպասաւորքն առ քահանայապետսն եւ Փարիսեցիս. եւ ասեն սոքա ցնոսա. ընդէր ոչ ածէք զնա այսր.

Verse: 46   Link to gnt   Պատասխանի ետուն սպասաւորքն՝ եւ ասեն. ոչ երբէք խօսեցաւ մարդ, որպէս այրն այն։

Verse: 47   Link to gnt   Պատասխանի ետուն Փարիսեցիքն՝ եւ ասեն. միթէ՝ եւ դուք մոլորեցարուք։

Verse: 48   Link to gnt   Միթէ ոք յիշխանացն հաւատաց ի նա՝ կամ ի Փարիսեցւոցն.

Verse: 49   Link to gnt   Այլ այն խաժամուժ ամբոխ՝ որ ոչ գիտէ զօրէնս, եւ նզովեալք են։

Verse: 50   Link to gnt   Ասէ Նիկոդեմոս ցնոսա՝ որ եկեալն էր առ նա ի գիշերին յառաջագոյն՝ եւ մի էր ի նոցանէ։

Verse: 51   Link to gnt   Միթէ օրէնքն մեր՝ դատին զմարդ՝ եթէ ոչ լսեն ինչ նախ ի նմանէ, կամ գիտեն զինչ գործէ։

Verse: 52   Link to gnt   Պատասխանի ետուն նմա եւ ասեն. միթէ՝ եւ դու եւս ի Գալիլեէ իցես. քննեա եւ տես, զի մարգարէ ի Գալիլեէ ոչ յառնէ։

Verse: 53   Link to gnt   Գնացին իւրաքանչիւր ոք ի տեղի իւր։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.