TITUS
Armenian NT (Zohrab Bible)
Part No. 73
Previous part

Chapter: 5  
(Ե՜)


Passage: 3-7 
Verse: 1   Link to gnt   Յետ այսորիկ տօն էր Հրէից, եւ ել Յիսուս յԵրուսաղէմ։

Verse: 2   Link to gnt   Եւ էր յԵրուսաղէմ ի Պրոբատիկէ աւազանին՝ որ կոչէր Եբրայեցերէն Բեթհեղդա, հինգ սրահ։

Verse: 3   Link to gnt   Յորս անկեալ դնէր բազմութիւն յոյժ հիւանաց, կուրաց կաղաց գոսացելոց, որ ակն ունէին ջրոցն յուզելոյ։

Verse: 4   Link to gnt   Եւ հրեշտակ տեառն ըստ ժամանակի իջանէր յաւազանն՝ եւ յուզէր զջուրսն. եւ որ նախ ի շարժումն ջուրց իջանէր՝ բժշկէր, ոչ ունելով նշան հիւանդութեան։

Section: 13  
Verse: 5   Link to gnt   Եւ անդ էր այր մի՝ որոյ երեսուն եւ ութ ամ էր ի հիւանդութեան իւրում։

Verse: 6   Link to gnt   Զնա իբրեւ ետես Յիսուս՝ զի անկեալ դնէր, եւ գիտաց թէ բազում ժամանակք են այնուհետեւ, ասէ ցնա. կամիս ողջ լինել։

Verse: 7   Link to gnt   Պատասխանի ետ նմա հիւանդն. Տէր՝ ոչ զոք ունիմ, թէ յորժամ ջուրքն յուզիցին՝ արկցէ զիս յաւազանն. եւ մինչ ես դանդաղիմ, այլ ոք քան զիս յառաջագոյն իջանէ։

Verse: 8   Link to gnt   Ասէ ցնա Յիսուս. արի առ զմահիճս քո՝ եւ գնա։

Verse: 9   Link to gnt   Եւ ողջացաւ այրն. եւ յարեաւ, առ զմահիճս իւր՝ եւ շրջէր՝ եւ էր շաբաթ յաւուրն յայնմիկ։

Verse: 10   Link to gnt   Ասեն Հրեայքն ցբժշկեալն. շաբաթ է, եւ ոչ էր արժան առնուլ քեզ զմահիճս քո։

Verse: 11   Link to gnt   Պատասխանի ետ նոցա՝ եւ ասէ. որ բժշկեացն զիս, նա ասաց ցիս՝ առ զմահիճս քո եւ գնա։

Verse: 12   Link to gnt   Հարցին ցնա՝ եւ ասեն. ով է այրն որ ասացն ցքեզ՝ առ զմահիճս քո եւ շրջեաց։

Verse: 13   Link to gnt   Եւ բժշկեալն ոչ գիտէր թէ ով իցէ. քանզի Յիսուս խոյս ետ վասն ամբոխին ի տեղւոջէ անտի։

Verse: 14   Link to gnt   Յետ այսորիկ գտանէ զնա Յիսուս ի տաճարին, եւ ասէ ցնա. ահաւադիկ ողջացար, մի եւս մեղանչեր. զի մի չար եւս ինչ լինիցի քեզ։

Verse: 15   Link to gnt   Գնաց այրն՝ եւ պատմեաց Հրէիցն, եթէ Յիսուս էր որ բժշկեացն զիս։

Verse: 16   Link to gnt   Եւ վասն այնորիկ հալածէին զՅիսուս Հրէայք, զի զայն առնէր ի շաբաթու։

Verse: 17   Link to gnt   Եւ Յիսուս պատասխանի ետ նոցա. հայր իմ մինչեւ ցայժմ գործէ, եւ ես գործեմ։

Verse: 18   Link to gnt   Վասն այնորիկ առաւել խնդրէին Հրէայքն սպանանել զնա. զի ոչ միայն լուծանէր զշաբաթս, այլ եւ հայր իւր կոչէր զԱստուած, եւ հաւասար առնէր զանձն Աստուծոյ։

Section: 14  
Passage: 4-1 
Verse: 19   Link to gnt   Պատասխանի ետ Յիսուս եւ ասէ ցնոսա. ամէն ամէն ասեմ ձեզ. ոչ կարէ որդի մարդոյ առնել յանձնէ եւ ոչինչ, եթէ ոչ տեսանիցէ զհայրն զի առնէ. զի զոր նայն առնէ, զնոյն եւ որդին նմին նման գործէ։

Verse: 20   Link to gnt   Զի հայր սիրէ զորդի, եւ զամենայն ինչ ցուցանէ նմա՝ զոր ինքն առնէ։ Եւ մեծամեծս եւս քան զսոյնս ցուցանէ նմա զգործս, ընդ որ դուքդ զարմանայք։

Verse: 21   Link to gnt   Զի որպէս հայր յարուցանէ զմեռեալս եւ կենդանի առնէ, նոյնպէս եւ որդի զորս կամի կենդանի առնէ։

Verse: 22   Link to gnt   Եւ ոչ եթէ հայր դատի զոք՝ այլ զամենայն դատաստանն ետ որդւոյ իւրոյ.

Verse: 23   Link to gnt   Զի ամենեքեան պատուեսցեն զորդի, որպէս պատուեն զհայրն։ Որ ոչ պատուէ զորդին, ոչ պատուէ զհայր զառաքիչն նորա։

Verse: 24   Link to gnt   Ամէն ամէն ասեմ ձեզ. զի որ զբանն իմ լսէ, եւ հաւատայ այնմ որ առաքեացն զիս, ընդունի զկեանսն յաւիտենականս. եւ ի դատաստան ոչ մտանէ, այլ փոխեցաւ ի մահուանէ ի կեանս։

Verse: 25   Link to gnt   Ամէն ամէն ասեմ ձեզ. զի գայ ժամանակ՝ եւ արդէն իսկ է, յորժամ մեռեալք լսիցեն ձայնի որդւոյն Աստուծոյ. եւ որք լսիցեն՝ կեցցեն։

Verse: 26   Link to gnt   Զի որպէս հայր ունի կեանս յանձին իւրում, նոյնպէս ետ եւ որդւոյ ունել կեանս յանձին իւրում։

Verse: 27   Link to gnt   Եւ իշխանութիւն ետ նմա դատաստան առնել։ Եւ զի որդի մարդոյ է,

Verse: 28   Link to gnt   Ընդ այն զի զարմանայք։ Զի եկեսցէ ժամանակ՝ յորում ամենեքին որ ի գերեզմանս կայցեն, լուիցեն ձայնի նորա,

Verse: 29   Link to gnt   Եւ եկեսցեն արտաքս. որոց զբարիս գործեալ իցէ ի յարութեան կենաց, եւ որոց զչար արարեալ իցէ՝ ի յարութիւն դատաստանաց։

Verse: 30   Link to gnt   Ոչ կարեմ ես յանձնէ առնել՝ եւ ոչինչ. այլ որպէս լսեմ՝ դատիմ եւ դատաստանն իմ արդար է։ Զի ոչ խնդրեմ զկամս իմ, այլ զկամս այնորիկ՝ որ առաքեացն զիս։

Passage: 4-2 
Verse: 31   Link to gnt   Եթէ ես վկայեմ վասն իմ, վկայութիւն իմ չէ ճշմարիտ։

Verse: 32   Link to gnt   Այլ է որ վկայէ վասն իմ. եւ դուք գիտէք եթէ ճշմարիտ է վկայութիւնն զոր վկայեաց վասն իմ։

Verse: 33   Link to gnt   Դուք առաքեցէք առ Յովհաննէս, եւ վկայեաց ճշմարտութեանն։

Verse: 34   Link to gnt   Այլ ես ոչ եթէ ի մարդկանէ առնում վկայութիւն. այլ զայս ասեմ զի դուք ապրեսջիք։

Verse: 35   Link to gnt   Նա էր ճրագն՝ որ լուցեալ էր եւ ծագէր. եւ դուք կամեցարուք ցնծալ առ ժամանակ մի ի լոյս նորա։

Verse: 36   Link to gnt   Այլ ես ունիմ վկայութիւն մեծ եւս քան զՅովհաննու. զգործսն՝ զոր ետ ցիս հայր՝ զի կատարեցից զնոսա, նոքին իսկ գործքն զոր գործեմ՝ վկայեն վասն իմ, եթէ հայր առաքեաց զիս։

Verse: 37   Link to gnt   Եւ որ առաքեացն զիս հայր, նա վկայեաց վասն իմ։ Դուք ոչ զձայն նորա երբէք լուարուք. եւ ոչ զտեսիլ նորա տեսէք։

Verse: 38   Link to gnt   Եւ ոչ զբան նորա ունիք ի ձեզ բնակեալ. զի զոր նա առաքեաց, դուք նմա ոչ հաւատայք։

Verse: 39   Link to gnt   Քննեցէք զգիրս. զի դուք համարիք նոքօք ունել զկեանսն յաւիտենականս։ Եւ նոքին իսկ են որ վկայեն վասն իմ, որովք համարիքն ունել կեանս։

Verse: 40   Link to gnt   Եւ դուք ոչ կամիք գալ առ իս, զի զկեանսն ունիցիք։

Verse: 41   Link to gnt   Ես փառս ի մարդկանէ ոչ առնում։

Verse: 42   Link to gnt   Այլ գիտեմ զձեզ՝ զի զսէրն Աստուծոյ ոչ ունիք յանձինս.

Verse: 43   Link to gnt   Ես եկի յանուն հօր իմոյ, եւ ոչ ընդունիք զիս. եթէ այլ ոք եկեսցէ յիւր անուն, զնա ընդունիցիք.

Verse: 44   Link to gnt   Զիարդ կարէք դուք հաւատալ. զի փառս ի միմեանց առնուք, եւ զփառս զառ ի միոյն Աստուծոյ ոչ խնդրէք։

Verse: 45   Link to gnt   Մի համարիք եթէ ես չարախօս ինչ իցեմ զձէնջ՝ առ հօր. գոյ որ չարախօս կայ զձէնջ՝ Մովսէս. յոր դուքն յուսացեալ էք։

Verse: 46   Link to gnt   Զի եթէ հաւատայիք դուք Մովսիսի, հաւատայիք արդեւք եւ ինձ. զի նա վասն իմ իսկ գրեաց։

Verse: 47   Link to gnt   Զի եթէ նորա գրոցն ոչ հաւատայք, զիարդ իմոց բանիցս հաւատայցէք։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.