TITUS
Armenian NT (Zohrab Bible)
Part No. 63
Previous part

Chapter: 19  
(Ժ՜Թ)


Section: 65  
Verse: 1   Link to gnt   Եւ մտեալ շրջէր ընդ Երիքով։

Verse: 2   Link to gnt   Եւ ահա այր մի անուն կոչեցեալ Զակքէոս. եւ նա էր մաքսապետ. եւ ինքն մեծատուն.

Verse: 3   Link to gnt   Եւ խնդրէր տեսանել՝ թէ ով իցէ Յիսուս, եւ ոչ կարէր ի բազմութենէն, զի կարճ էր հասակաւ։

Verse: 4   Link to gnt   Եւ ընթացեալ յառաջս, ել ի ժանտաթզենին զի տեսանիցէ զնա. քանզի ընդ այն իսկ անցանելոց էր։

Verse: 5   Link to gnt   Իբրեւ եկն ի տեղին. հայեցաւ ի վեր Յիսուս եւ ասէ ցնա. Զակքէ փութա՝ էջ այտի, զի այսօր ի տան քում արժան է ինձ ագանել։

Verse: 6   Link to gnt   Փութացաւ եւ էջ՝ եւ ընկալաւ զնա ուրախութեամբ։

Verse: 7   Link to gnt   Իբրեւ տեսին ամենեքին, տրտնջէին եւ ասէին՝ թէ առ առն մեղաւորի եմուտ լուծանել։

Verse: 8   Link to gnt   Եկն՝ եկաց Զակքէոս՝ եւ ասէ ցտէր. Տէր ահա զկէս ընչից իմոց տաց աղքատաց. եւ եթէ զոք զրկիցի, հատուցից չորեքկին։

Verse: 9   Link to gnt   Եւ ասէ ցնա Յիսուս. այսօր եղեւ փրկութիւն տանս այսմիկ. քանզի եւ սա որդի Աբրահամու էր։

Verse: 10   Link to gnt   Զի եկն որդի մարդոյ խնդրել եւ կեցուցանել զկորուսեալն։

Verse: 11   Link to gnt   Եւ մինչդեռ նոքա զայն լսէին, յաւել առակ մի՝ եւ ասէ, վասն մերձենալոյ նորա յԵրուսաղէմ, եւ համարելոյ նոցա թէ առժամայն յայտնելոց է արքայութիւն Աստուծոյ։

Section: 66  
Verse: 12   Link to gnt   Ասէ. այր ոմն՝ ազնուական գնաց յաշխարհ հեռի՝ առնուլ իւր թագաւորութիւն. եւ դառնալ։

Section: 67  
Verse: 13   Link to gnt   Եւ կոչեցեալ զծառայս իւր՝ ետ նոցա տասն մնաս, եւ ասէ ցնոսա. յարգեցէք զայդ՝ մինչեւ եկից։

Verse: 14   Link to gnt   Եւ քաղաքացիքն նորա ատէին զնա, առաքեցին հրեշտակս զկնի նորա՝ եւ ասեն, թէ ոչ կամիմք թագաւորել դմա ի վերայ մեր։

Verse: 15   Link to gnt   Եւ եղեւ դառնալ նմա՝ առեալ զթագաւորութիւնն. եւ կոչեալ զծառայսն՝ որոց տուեալ էր զարծաթն, զի գիտասցէ թէ ո զինչ շահեցաւ։

Verse: 16   Link to gnt   Եկն առաջինն եւ ասէ. տէր, մնասն քո՝ տասն մնաս արար։

Verse: 17   Link to gnt   Եւ ասէ ցնա. ազնիւ ծառայ եւ բարի, զի ի փոքուդ հաւատարիմ եղեր, լիջիր իշխանութիւն ունել ի վերայ տասն քաղաքի։

Verse: 18   Link to gnt   Եկն երկրորդն՝ եւ ասէ. տէր մնասն քո՝ արար հինգ մնաս։

Verse: 19   Link to gnt   Ասէ ցնա. եւ դու լիջիր ի վերայ հինգ քաղաքաց։

Verse: 20   Link to gnt   Եկն մեւսն եւ ասէ. տէր՝ ահա մնասն քո զոր ունէի, ծրարեալ ի վարշամակի.

Verse: 21   Link to gnt   Երկնչէի ի քէն, զի այր ստամբակ ես. բառնաս՝ զոր ոչ եդիր, եւ հնձես՝ զոր ոչ սերմանեցեր։

Verse: 22   Link to gnt   Եւ ասէ ցնա. ի բերանոյ քումմէ դատեցայց զքեզ ծառայ անհաւատ. գիտէիր թէ ես այր մի ստամբակ եմ, բառնամ զոր ոչ եդի, եւ հնձեմ՝ ուր ոչ սերմանեցի։

Verse: 23   Link to gnt   Եւ ընդէր ոչ ետուր զարծաթն իմ ի սեղանաւորս, եւ եկեալ ես տոկոսեօք պահանջէի։

Verse: 24   Link to gnt   Եւ ասէ ցսպասաւորսն. առէք ի դմանէ զմնասն, եւ տարայք տուք այնմ՝ որ ունիցի զտասն մնասն։

Verse: 25   Link to gnt   Եւ ասեն ցնա. տէր՝ ունի տասն մնաս։

Verse: 26   Link to gnt   Ասեմ ձեզ, եթէ ամենայնի որ ունիցի՝ տացի. եւ յայնմանէ որ ոչն ունիցի, եւ զոր ունիցին՝ բարձցի ի նմանէ։

Verse: 27   Link to gnt   Բայց զթշնամիսն իմ զայնոսիկ. որ ոչն կամէին զիս թագաւորել ի վերայ նոցա, ածէք այսր,եւ սպանէք առաջի իմ։

Verse: 28   Link to gnt   Եւ իբրեւ զայս ասաց, գնաց յառաջ՝ ելանել յԵրուսաղէմ։

Section: 68  
Passage: 7-1 
Verse: 29   Link to gnt   Եւ եղեւ իբրեւ մերձեցաւ ի Բեթփագէ եւ ի Բեթանիա մօտ ի լեառնն որ կոչի ձիթենեաց, առաքեաց երկուս յաշակերտացն իւրոց՝ եւ ասէ։

Verse: 30   Link to gnt   Երթայք դուք ի գեղն՝ որ հանդէպ մեր կայ. յոր իբրեւ մտանէք՝ գտանիցէք յաւանակ կապեալ, յորում ոք ի մարդկանէ երբէք ոչ նստաւ. լուծէք զնա եւ ածէք։

Verse: 31   Link to gnt   Եւ եթէ ոք հարցանիցէ զձեզ՝ եթէ ընդէր լուծանէք, այսպէս ասասջիք ցնա, թէ տեառն իւրում պիտոյ է։

Verse: 32   Link to gnt   Իբրեւ չոգան որ առաքեցանն, գտին որպէս ասացն ցնոսա, կայր յաւանակն։

Verse: 33   Link to gnt   Եւ մինչ դեռ լուծանէին զյաւանակն, ասեն տեարքն նորա ցնոսա. զի լուծանէք, զյաւանակդ։

Verse: 34   Link to gnt   Եւ նոքա ասեն. տեառն իւրում պիտոյ է։

Verse: 35   Link to gnt   Եւ ածին զնա առ Յիսուս։ Եւ արկին զնովաւ զհանդերձս եւ հեծուցին զՅիսուս։

Verse: 36   Link to gnt   Եւ մինչ դեռ երթայր, զհանդերձս իւրեանց տարածանէին զճանապարհաւն։

Verse: 37   Link to gnt   Եւ իբրեւ այն ինչ՝ մերձ եղեւ ի զառ ի վայր լերինն ձիթենեաց, սկսաւ ամենայն բազմութիւն աշակերտացն ուրախութեամբ օրհնել զԱստուած ի ձայն մեծ՝ վասն ամենայն եղելոց զօրութեանցն զոր տեսին,

Verse: 38   Link to gnt   Եւ ասէին. օրհնեալ որ գայ թագաւորդ յանուն տեառն. խաղաղութիւն յերկինս, եւ փառք ի բարձունս։

Verse: 39   Link to gnt   Եւ ոմանք ի Փարիսեցւոցն յամբոխէ անտի՝ ասեն ցնա. Վարդապետ՝ սաստեա աշակերտացդ քոց։

Verse: 40   Link to gnt   Պատասխանի ետ՝ եւ ասէ. ասեմ ձեզ՝ զի եւ թէ դոքա լռեսցեն՝ քարինքդ աղաղակեսցեն։

Verse: 41   Link to gnt   Եւ իբրեւ մերձեցաւ, տեսեալ զքաղաքն ելաց ի վերայ նորա, եւ ասէ.

Verse: 42   Link to gnt   Եթէ գիտէիր դու գոնէ յաւուրս յայսմիկ զխաղաղութիւնն քո. բայց այժմ ծածկեցաւ յերեսաց քոց։

Verse: 43   Link to gnt   Զի եկեսցեն աւուրք ի վերայ քո, եւ պատեսցեն զքեւ թշնամիք քո պատնէշ. եւ պաշարեսցեն զքեզ, եւ նեղեսցեն զքեզ յամենայն կողմանց.

Verse: 44   Link to gnt   Եւ յատակեսցեն զքեզ. եւ զորդիս քո ի քեզ. եւ ոչ թողուցուն քար ի վերայ քարի յամենայն ի քեզ. փոխանակ զի ոչ ծանեար զժամանակ այցելութեան քոյ։

Verse: 45   Link to gnt   Եւ մտեալ ի տաճարն սկսաւ հանել զաղաւնէվաճառսն, եւ զգնօղս. եւ զսեղանս հատավաճառացն ցրուեաց.

Verse: 46   Link to gnt   Եւ ասէ ցնոսա. գրեալ է՝ եւ եղիցի տուն իմ տուն աղօթից, եւ դուք արարէք զդա՝ այրս աւազակաց։

Verse: 47   Link to gnt   Եւ ուսուցանէր զնոսա հանապազ ի տաճարին։ Իսկ քահանայապետքն եւ դպիրք՝ եւ գլխաւորք ժողովրդեանն խնդրէին զնա կորուսանել,

Verse: 48   Link to gnt   Եւ ոչ գտանէին թէ զինչ արասցն. զի ժողովուրդն ամենայն կախեալ կային զնմանէ ի լսել։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.