TITUS
Armenian NT (Zohrab Bible)
Part No. 61
Previous part

Chapter: 17  
(Ժ՜Է)


Passage: 6-3 
Verse: 1   Link to gnt   Ասաց եւ առ աշակերտսն իւր. ոչ է մարթ չգալ գայթագղութեան. բայց վայ այնմիկ է՝ յոյր ձեռն գայցէ։

Verse: 2   Link to gnt   Լաւ էր նմա՝ թէ վէմ երկանաքար կախէր զպարանոցէ նորա, եւ անկանէր ի ծով, քան թէ գայթագղեցուցանիցէ զմի ոք ի փոքրկանցս յայսցանէ։

Verse: 3   Link to gnt   Զգոյշ կացէք անձանց։ Եթէ մեղիցէ եղբայր քո, սաստեա նմա։ եւ եթէ ապաշխարիցէ, թող նմա։

Verse: 4   Link to gnt   Եւ Եթէ եւթն անգամ մեղիցէ քեզ, եւ եւթն անգամ դարձցի ի քեզ եւ ասիցէ՝ ապաշխարեմ, թողցես նմա։

Verse: 5   Link to gnt   Եւ ասեն առաքեալքն ցտէր. յաւել մեզ հաւատս։

Verse: 6   Link to gnt   Եւ ասէ տէր. եթէ ունիցիք հաւատս քան զհատ մանանխոյ, եւ ասիցէք թթենւոյս այսմիկ. խլեաց եւ անկեաց ի ծովու, եւ հնազանդեսցի ձեզ։

Verse: 7   Link to gnt   Իսկ ով ոք ի ձէնջ որ ունիցի ծառայ հողագործ կամ հովիւ, որ իբրեւ մտանիցէ յագարակէ՝ ասիցէ ցնա վաղվաղակի, թէ անց բազմեաց։

Verse: 8   Link to gnt   Այլ ոչ ասիցէ ցնա, թէ պատրաստեա զինչ ընթրելոց իցեմ, եւ գօտի ածեալ պաշտեա զիս՝ մինչեւ կերայց եւ արբից, եւ ապա կերիցես եւ արբցես դու։

Verse: 9   Link to gnt   Միթէ շնորհ ունիցի ծառային այնմիկ, զի արար զամենայն հրամանսն։

Verse: 10   Link to gnt   Նոյնպէս եւ դուք՝ յորժամ առիցէք զամենայն հրամայեալսն ձեզ, ասասջիք՝ թէ ծառայք անպիտանք եմք, զոր պարտեաքն առնել՝ արարաք։

Section: 60  
Verse: 11   Link to gnt   Եւ եղեւ մինչեւ երթայր նա յերուսաղեմ, եւ ինքն անցանէր ընդ մէջ Սամարեայ եւ Գալիլեացւոց։

Verse: 12   Link to gnt   Եւ մինչ դեռ մտանէր ի գեղ ուրեմն, պատահեցան նմա տասն այր բորոտ, որք կացին ի հեռաստանէ։

Verse: 13   Link to gnt   Բարձին զձայնս՝ եւ ասեն. Յիսուս Վարդապետ՝ ողորմեաց մեզ։

Verse: 14   Link to gnt   Եւ իբրեւ ետես զնոսա, ասէ ցնոսա. երթայք ցուցէք զանձինս քահանայիցն։ Եւ եղեւ իբրեւ գնացին, առժամայն սրբեցան։

Verse: 15   Link to gnt   Մի ոմն ի նոցանէ իբրեւ ետես՝ թէ բժշկեցաւ, դարձաւ անդրէն՝ ի ձայն մեծ փառաւոր առնէր զԱստուած։

Verse: 16   Link to gnt   Անկաւ ի վերայ երեսաց իւրոց առ ոտս նորա՝ եւ գոհանայր զնմանէ. եւ ինքն էր Սամարացի։

Verse: 17   Link to gnt   Պատասխանի ետ Յիսուս՝ եւ ասէ. ոչ տասն սոքա սրբեցան, իսկ արդ՝ ինունքն ուր են.

Verse: 18   Link to gnt   Զի ոչ գտան դառնալ տալ փառս Աստուծոյ, բայց միայն այլազգիս այս։

Verse: 19   Link to gnt   Եւ ասէ ցնա. արի գնա, զի հաւատք քո կեցուցին զքեզ։

Passage: 6-4 
Verse: 20   Link to gnt   Իբրեւ հարցաւ ի Փարիսեցւոցն՝ թէ երբ գայցէ արքայութիւնն Աստուծոյ. պատասխանի ետ նոցա՝ եւ ասէ. ոչ գայ արքայութիւն Աստուծոյ խտրանօք.

Verse: 21   Link to gnt   Եւ չասիցեն թէ ահաւասիկ աստ է՝ կամ անդ, զի ահա արքայութիւն Աստուծոյ ի ներքս ի ձեզ է։

Verse: 22   Link to gnt   Ասաց եւ առ աշակերտսն. եկեսցեն աւուրք ցանկանալոյ ձեզ մի յաւուրցն որդւոյ մարդոյ տեսանել, եւ ոչ տեսանիցէք։

Verse: 23   Link to gnt   Եւ եթէ ասիցեն ձեզ՝ եթէ ահաւասիկ է՝ կամ անդ մի երթայցէք զհետ։

Verse: 24   Link to gnt   Զի որպէս փայլակն փայլատակեալ ի ներքոյ երկնից՝ ընդ երկնիւք ծագիցէ, Նոյնպէս եւ որդի մարդոյ յաւուրն իւրում։

Verse: 25   Link to gnt   Բայց նախ պարտ է նմա բազումս չարչարել՝ եւ խոտել յազգէս յայսմանէ։

Verse: 26   Link to gnt   Եւ որպէս եղեւ յաւուրսն Նոյի, նոյնպէս եղիցի եւ յաւուրս որդւոյ մարդոյ։

Verse: 27   Link to gnt   Ուտէին՝ ըմպէին՝ կանայս առնէին եւ արանց լինէին, մինչեւ յօրն յորում եմուտ Նոյ ի տապանն, եւ եկն ջրհեղեղն՝ եւ կորոյս զամենեսին։

Verse: 28   Link to gnt   Նոյնպէս՝ եւ որպէս յաւուրսն Ղովտայ եղեւ, ուտէին ըմպէին, գնէին, վաճառէին, տնկէին, շինէին.

Verse: 29   Link to gnt   Եւ յորում աւուր ել Ղովտ ի Սոդովմայ, տեղաց հուր եւ ծծումբ յերկնից՝ եւ կորոյս զամենեսին։

Verse: 30   Link to gnt   Ըստ նմին օրինակի եղիցի եւ յաւուրն յորում որդի մարդոյ յայտնելոց է։

Verse: 31   Link to gnt   Յայնմ աւուր որ կայցէ ի տանիս՝ եւ կարասի իւր ի տան, մի իջցէ առնուլ զայն. եւ որ յանդի իցէ, նոյնպէս մի դարձցի յետս։

Verse: 32   Link to gnt   Յիշեցէք զկինն Ղովտայ։

Verse: 33   Link to gnt   Որ խնդրիցէ զանձն իւր ապրեցուցանել, կորուսցէ զնա. եւ որ կորուսցէ, ապրեցուսցէ զնա։

Verse: 34   Link to gnt   Ասեմ ձեզ. յայնմ գիշերի՝ թէ եղիցի երկու ի մի մահիճս, մին՝ առցի, եւ մեւսն թողցի.

Verse: 35   Link to gnt   Եւ Եթէ եղիցին երկու՝ աղալ ի միասին, մին՝ առցի, եւ մեւսն թողցի. եւ եթէ իցեն երկու յանդի, մին՝ առցի եւ մեւսն թողցի։

Verse: 36   Link to gnt   Պատասխանի ետուն եւ ասեն ցնա. յո տէր։

Verse: 37   Link to gnt   Եւ նա ասէ ցնոսա. ուր մարմին է, անդր եւ արծուիք ժողովեսցին։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.