TITUS
Armenian NT (Zohrab Bible)
Part No. 58
Previous part

Chapter: 14  
(Ժ՜Դ)


Section: 52  
Passage: 5-7 
Verse: 1   Link to gnt   Եւ եղեւ ի մտանելն նորա ի տուն ուրումն իշխանացն Փարիսեցւոց ի շաբաթու՝ ուտել հաց. եւ նոքա սպասէին նմա։

Verse: 2   Link to gnt   Եւ ահա՝ այր ոմն էր անդ ջրգողեալ առաջի նոր։

Verse: 3   Link to gnt   Պատասխանի ետ Յիսուս՝ եւ ասէ ցօրինաւորսն եւ ցՓարիսեցիսն. եթէ արժան իցէ ի շաբաթու բժշկել։

Verse: 4   Link to gnt   Եւ նոքա լուռ եղեն։ Եւ բուռն հարեալ զնմանէ՝ բժշկեաց զնա, եւ արձակեաց։

Verse: 5   Link to gnt   Եւ ասէ ցնոսա. ոյր ուրուք ի ձէնջ էշ կամ եզն անկանիցի ի ջրհոր, եւ ոչ վաղվաղակի հանիցէ զնա յաւուր շաբաթու։

Verse: 6   Link to gnt   Եւ ոչ կարացին տալ նմա պատասխանի առ այն։

Section: 53  
Verse: 7   Link to gnt   Ասաց եւ առ կոչնականսն՝ առակ մի, հայեցեալ թէ զիարդ բարձընտիր լինէին, ասէ ցնոսա։

Verse: 8   Link to gnt   Յորժամ կոչիցէ ոք զքեզ ի հարսանիս՝ կամ ի կոչունս, մի բազմիցիս յառաջին բարձին. գուցէ պատուականագոյն եւս քան զքեզ իցէ կոչեցեալն ի նմանէ.

Verse: 9   Link to gnt   Եւ եկեալ՝ որ զքեզն եւ զնա կոչեաց. ասիցէ ցքեզ՝ տուր սմա տեղի. եւ ապա սկսանիցիս ամօթով զյետին տեղին ունել։

Verse: 10   Link to gnt   Այլ յորժամ կոչիցիս, երթիջիր՝ բազմիջիր ի յետին տեղւոջ. զի յորժամ գայցէ որ կոչեացն զքեզ, ասիցէ ցքեզ. բարեկամ ի վեր մատիր. յայնժամ եղիցին քեզ փառք առաջի բարձակցացն քոց։

Verse: 11   Link to gnt   Զի ամենայն որ բարձրացուցանէ զանձն, խոնարհեսցի. եւ որ խոնարհեցուցանէ զանձն, բարձրասցի։

Verse: 12   Link to gnt   Ասէ եւ ցկոչնատէրն. յորժամ առնիցես ճաշ կամ ընթրիս, մի կոչեր զբարեկամս քո, եւ մի զեղբարս քո, եւ մի զազգականս քո, եւ մի զդրացիս քո, եւ մի զմեծամեծս. զի մի եւ նոքա փոխարէն կոչեսցեն զքեզ, եւ լինիցի քեզ հատուցումն։

Verse: 13   Link to gnt   Այլ յորժամ առնիցես ընդունելութիւն, կոչեա զաղքատս, եւ զխեղս, զկաղս եւ զկոյրս։

Verse: 14   Link to gnt   Եւ երանելի լինիցիս. զի ոչ ունին փոխարէն հատուցանելոյ քեզ. եւ հատուսցի քեզ փոխարէն ի յարութեան արդարոց։

Verse: 15   Link to gnt   Իբրեւ լուաւ զայս ոմն ի բազմականացն՝ ասէ ցնա. երանի որ կերիցէ ճաշ յարքայութեան Աստուծոյ։

Section: 54  
Verse: 16   Link to gnt   Եւ նա ասէ. այր ոմն գործեաց ընթրիս, եւ հրաւիրեաց զբազումս։

Verse: 17   Link to gnt   Եւ առաքեաց զծառայս իւր ի ժամու ընթրեացն կոչել զհրաւիրեալսն՝ թէ եկայք, զի ահաւասիկ պատրաստ է ամենայն ինչ։

Verse: 18   Link to gnt   Եւ սկսան մի ըստ միոջէ՝ ամենեքեան հրաժարել։ Առաջինն ասէ. ագարակ գնեցի, եւ հարկ է ելանել տեսանել զնա, աղաչեմ զքեզ՝ կալ զիս հրաժարեալ։

Verse: 19   Link to gnt   Եւ մեւսն ասէ. լուծս հինգ եզանց գնեցի, եւ երթամ փորձել զնոսա, աղաչեմ զքեզ՝ կալ զիս հրաժարեալ։

Verse: 20   Link to gnt   Եւ մեւսն ասէ. կին ածի, եւ վասն այնորիկ ոչ կարեմ գալ։

Verse: 21   Link to gnt   Եւ եկեալ ծառայն՝ պատմեաց զայն տեառն իւրում։ Յայնժամ բարկացեալ տանուտէրն, ասէ ցծառայն իւր. ել վաղվաղակի ի հրապարակս եւ ի փողոցս քաղաքիդ, եւ զաղքատս, եւ զխեղս, եւ զկաղս, եւ զկոյրս մոյծ այսր։

Verse: 22   Link to gnt   Եւ ասէ ծառայն տէր՝ եղեւ զոր հրամայեցերն, եւ կայ եւս տեղի։

Verse: 23   Link to gnt   Եւ ասէ տէրն ցծառայն, ել ի ճանապարհս եւ ի ցանգս,եւ արա այսր մտանել, զի լցցի տունս իմ։

Verse: 24   Link to gnt   Ասեմ ձեզ, զի ոչ ոք յայնց կոչեցելոց ճաշակեսցէ յընթրեաց իմոց։

Passage: 6-1 
Verse: 25   Link to gnt   Եւ երթային ընդ նմա ժողովուրդք բազումք դարձաւ՝ եւ ասէ ցնոսա։

Verse: 26   Link to gnt   Եթէ ոք գայ առ իս, եւ ոչ ատեայ զհայր իւր եւ զմայր, եւ զկին եւ զորդիս, եւ զեղբարս եւ զքորս, նա՝ եւ զանձն եւս իւր, ոչ կարէ իմ աշակերտ լինել.

Verse: 27   Link to gnt   Զի որ ոչ բառնայ զխաչ իւր՝ եւ գայ զկնի իմ, ոչ կարէ իմ աշակերտ լինել։

Section: 55  
Verse: 28   Link to gnt   Ով ոք ի ձէնջ կամիցի շինել աշտարակ, եւ ոչ նախ նստեալ համարիցի զծախսն՝ եւ եթէ ունիցի բաւական ի կատարումն։

Verse: 29   Link to gnt   Զի գուցէ իբրեւ արկանիցէ հիմն՝ եւ ոչ կարիցէ կատարել, ամենեքին որ տեսանիցեն՝ սկսանիցին ծաղր առնել զնա։

Verse: 30   Link to gnt   Եւ ասել. թէ այս այր սկսաւ շինել՝ եւ ոչ կարաց կատարել։

Verse: 31   Link to gnt   Կամ որ թագաւոր՝ երթեալ տայցէ պատերազմ ընդ այլում թագաւորի. եւ ոչ նստեալ նախ խորհիցի, եթէ կարող իցէ տասն հազարաւ զդէմ ունել զայնորիկ որ գայցէ ի վերայ նորա քսան հազարաւ։

Verse: 32   Link to gnt   Ապա թէ ոչ՝ մինչդեռ հեռագոյն իցէ, հրեշտակութիւն առաքեալ՝ աղաչեսցէ ի խաղաղութիւն։

Verse: 33   Link to gnt   Արդ այսպէս ամենայն ոք ի ձէնջ, որ ոչ հրաժարեսցէ յամենայն ընչից իւրոց, ոչ կարէ իմ աշակերտ լինել։

Verse: 34   Link to gnt   Բարւոք է աղ. ապա թէ աղն անհամեսցի, իւ համեմեսցի։

Verse: 35   Link to gnt   Ոչ յերկիր՝ եւ ոչ յաղբ է պիտանացու, այլ ընկենուլ զնա արտաքս. որ ունիցի ականջս լսելոյ՝ լուիցէ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.