TITUS
Armenian NT (Zohrab Bible)
Part No. 57
Previous part

Chapter: 13  
(Ժ՜Գ)


Section: 47  
Verse: 1   Link to gnt   Եկին ոմանք ի նմին ժամանակի, եւ պատմեցին նմա վասն Գալիլեացւոցն, որոց զարիւնն Պեղատոս խառնեաց ընդ զոհսն նոցա։

Verse: 2   Link to gnt   Պատասխանի ետ՝ եւ ասէ ցնոսա. համարիք եթէ այն Գալիլեացիք եղեն մեղաւորք քան զամենայն Գալիլեացիս, զի այնպիսի անցս կրեցին։

Verse: 3   Link to gnt   Ոչ ասեմ ձեզ, այլ եթէ ոչ ապաշխարիցէք՝ ամենեքին նոյնպէս կորնչիջիք։

Verse: 4   Link to gnt   Կամ նոքա ութուտասանքն, յորոց վերայ աշտարակն անկաւ ի Սիլովամ, եւ սպան զնոսա. համարիք թէ նոքա պարտապանք եղեն քան զամենայն մարդիկ որ բնակեալ են յԵրուսաղէմ։

Verse: 5   Link to gnt   Ոչ ասեմ ձեզ, այլ թէ ոչ ապաշխարիցէք՝ ամենեքեան նոյնպէս կորնչիջիք։

Verse: 6   Link to gnt   Ասաց եւ զառակս զայս։ թզենի մի էր ուրումն տնկեալ յայգւոջ իւրում. եւ եկն խնդրել պտուղ ի նմանէ՝ եւ ոչ եգիտ։

Verse: 7   Link to gnt   Ասէ ցայգեգործն. ահա՝ երեք ամք են՝ յորմէ հետէ գամ խնդրել պտուղ ի թզենւոջդ՝ եւ ոչ գտանեմ. արդ կտրեա զդա, ընդէր եւ զերկիրդ խափանէ։

Verse: 8   Link to gnt   Նա՝ պատասխանի ետ՝ եւ ասէ. տէր, թող զդա՝ այս ամ եւս, մինչեւ շուրջ զդովաւ բրեցից՝ եւ արկից աղբ.

Verse: 9   Link to gnt   Թերեւս արասցէ պտուղ. ապա թէ ոչ յամէ եւս հատցես զդա։

Section: 48  
Passage: 5-5 
Verse: 10   Link to gnt   Եւ ուսուցանէր ի միում ժողովրդանոցացն ի շաբաթս։

Verse: 11   Link to gnt   Եւ ահա կին մի՝ զոր ունէր այս հիւանդութեան ամս ութուտասն. եւ էր կարկամեալ, եւ ոչ կարէր ամենեւին ի վեր հայել։

Verse: 12   Link to gnt   Եւ տեսեալ զնա Յիսուսի, կոչեաց առ ինքն՝ եւ ասէ ցնա. կին դու արձակեալ ես ի հիւանդութենէ քումմէ։

Verse: 13   Link to gnt   Եւ եդ ի վերայ նորա ձեռն. եւ առժամայն ուղղեցաւ, եւ փառաւոր առնէր զԱստուած։

Verse: 14   Link to gnt   Պատասխանի ետ ժողովրդապետն՝ ցասուցեալ թէ ընդէր ի շաբաթու բժշկեաց Յիսուս, եւ ասէ ցժողովուրդն. վեց օր է յորս արժան է գործել, յայնս եկայք բժշկեցարուք, եւ մի յաւուր շաբաթու։

Verse: 15   Link to gnt   Պատասխանի ետ նմա տէր՝ եւ ասէ. կեղծաւորք, իւրաքանչիւր ոք ի ձէնջ ի շաբաթու ոչ արձակէ զեզն իւր կամ զէշ ի մսրոյ, եւ տանի տայ ջուր։

Verse: 16   Link to gnt   Իսկ այս՝ դուստր Աբրահամու էր՝ զոր կապեաց սատանայ՝ ահաւասիկ ութուտասն ամ, ոչ արժան էր արձակել ի կապանաց անտի ի շաբաթու։

Verse: 17   Link to gnt   Եւ զայս իբրեւ ասաց, յամօթ լինէին ամենեքին որ հակառակն կային նմա։ եւ ամենայն ժողովուրդն ուրախ լինէր ի վերայ ամենայն փառաւորութեանցն՝ որ գործէին ի նմանէ։

Section: 49  
Verse: 18   Link to gnt   Եւ ասէր. ում նման է արքայութիւն Աստուծոյ, եւ որում նմանութեան նմանեցուցից զնա։

Verse: 19   Link to gnt   Նման է հատոյ մանանխոյ, զոր առեալ մարդոյ արկ ի պարտէզ իւր. աճեաց եւ եղեւ ծառ, եւ թռչունք երկնից բնակեալ էին յոստս նորա։

Verse: 20   Link to gnt   Եւ դարձեալ ասէ. ում նմանեցուցից զարքայութիւն Աստուծոյ։

Verse: 21   Link to gnt   Նման է խմորոյ, զոր առեալ կնոջ թաքոյց յալեր երից գրուաց՝ մինչեւ ամենայն խմորեցաւ։

Section: 50  
Passage: 5-6 
Verse: 22   Link to gnt   Եւ շրջէր ընդ քաղաքս եւ ընդ գեղս, ուսուցանէր. եւ ճանապարհ արարեալ յԵրուսաղէմ։

Verse: 23   Link to gnt   Ասէ ոմն ցնա. տէր եթէ սակաւք իցեն՝ որ ապրելոց իցեն։ Եւ նա ասէ ցնոսա։

Verse: 24   Link to gnt   Ջանացարուք մտանել ընդ դուռն նեղ. ասեմ ձեզ, զի բազումք խնդրեսցեն մտանել՝ եւ ոչ կարասցեն։

Verse: 25   Link to gnt   Յորմէ հետէ մտցէ տանուտէրն, եւ փակեսցէ զդուռնն. եւ սկսանիցիք կալ արտաքոյ՝ եւ բախեալ զդուռնն, եւ ասել. տէր, տէր՝ բաց մեզ. եւ պատասխանի տուեալ ասիցէ ձեզ. ոչ գիտեմ զձեզ ուստի էք։

Verse: 26   Link to gnt   Յայնժամ սկսանիջիք ասել. կերաք առաջի քոյ եւ արբաք, եւ ի հրապարակս մեր ուսուցեր։

Verse: 27   Link to gnt   Եւ ասիցէ. ասեմ ձեզ, ոչ գիտեմ զձեզ ուստի էք. ի բաց կացէք յինէն ամենայն մշակդ անիրաւութեան։

Verse: 28   Link to gnt   Անդ եղիցի լալ եւ կրճել ատամանց, յորժամ տեսանիցէք զԱբրահամ եւ զԻսահակ եւ զՅակովբ՝ եւ զամենայն մարգարէս յարքայութեան Աստուծոյ, եւ զձեզ հանեալ արտաքս։

Verse: 29   Link to gnt   Եւ եկեսցեն յարեւելից եւ յարեւմտից, եւ ի հիւսւսոյ եւ ի հարաւոյ, եւ բազմեսցին յարքայութեան Աստուծոյ։

Verse: 30   Link to gnt   Եւ ահա յետինք՝ որ եղիցին առաջինք, եւ իցեն առաջինք՝ որ լինիցին յետինք։

Section: 51  
Verse: 31   Link to gnt   Ի նմին աւուր մատեան ոմանք Փարիսեցիք՝ եւ ասեն ցնա. ել եւ գնա աստի, զի Հերովդէս կամի սպանանել զքեզ։

Verse: 32   Link to gnt   Եւ ասէ ցնոսա. երթայք ասացէք աղուեսուն այնմիկ. ահաւասիկ հանեմ դեւս՝ եւ բժշկութիւնս կատարեմ այսօր եւ վաղիւ, եւ յերիր աւուր կատարիմ։

Verse: 33   Link to gnt   Բայց պարտ է այսօր եւ վաղիւ եւ ի միւսում աւուր գնալ. զի ոչ է մարթ մարգարէի կորնչել արտաքոյ քան զԵրուսաղէմ։

Verse: 34   Link to gnt   Երուսաղէմ՝ Երուսաղէմ՝ որ կոտորէիր զմարգարէս, եւ քարկոծ առնէիր զառաքեալսն առ քեզ. քանիցս անգամ կամեցայ ժողովել զորդիս քո, որպէս հաւ զձագս իւր ընդ թեւովք, եւ ոչ կամեցարուք։

Verse: 35   Link to gnt   Ահա թողեալ լիցի ձեզ տունդ ձեր։ Բայց ասեմ ձեզ, եթէ ոչ եւս տեսանիցէք զիս, մինչեւ ասիցէք՝ օրհնեալ եկեալն յանուն Տեառն։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.