TITUS
Armenian NT (Zohrab Bible)
Part No. 56
Previous part

Chapter: 12  
(Ժ՜Բ)


Verse: 1   Link to gnt   Որովք ի կուտել բիւրաւորաց ժողովրդեանն՝ մինչեւ կոխել զմիմեանս։
Section: 44  
   
Սկսաւ ասել ցաշակերտսն իւր. նախ՝ զգոյշ լերուք անձանց ի խմորոյ Սադուկեցւոցն, որ է կեղծաւորութիւն։

Verse: 2   Link to gnt   
Զի ոչինչ է ի ծածուկ՝ որ ոչ յայտնեսցի, եւ գաղտնի՝ որ ոչ ծանիցի։

Verse: 3   Link to gnt   
Վասն զի զոր ինչ ասիցէք ի խաւարի, լսելի լիցի ի լոյս. եւ զոր յունկանէն խօսեցարուք ի շտեմարանս, քարոզեսցի ի վերայ տանեաց։

Verse: 4   Link to gnt   
Բայց ձեզ ասեմ սիրելեաց իմոց. մի զարհուրիցիք յայնցանէ որ սպանանեն զմարմին, եւ յետ այնորիկ աւելի ինչ ոչ ունիցին առնել։

Verse: 5   Link to gnt   
Այլ ցուցից ձեզ յումմէ երկնչիցիք. երկնչիջիք յայնմանէ որ յետ սպանանելոյ ունի իշխանութիւն արկանել ի գեհեն. այո ասեմ ձեզ, յայնմանէ երկնչիջիք։

Verse: 6   Link to gnt   
Ոչ ապաքէն հինգ ձագ՝ երկուց դանգաց վաճառի, եւ մի ի նոցանէ ոչ է մոռացեալ առաջի Աստուծոյ։

Verse: 7   Link to gnt   
Այլ ձեր եւ ամենայն իսկ հեր գլխոյ թուեալ է. մի երկնչիք, զի քան զբազում ձագս լաւ էք դուք։

Verse: 8   Link to gnt   
Ասեմ ձեզ. զի ամենայն որ խոստովանեսցի յիս առաջի մարդկան, եւ որդի մարդոյ խոստովանեսցի զնմանէ առաջի հրեշտակաց Աստուծոյ։

Verse: 9   Link to gnt   
Եւ որ ուրասցի զիս առաջի մարդկան, ուրացեալ լիցի առաջի հրեշտակաց Աստուծոյ։

Verse: 10   Link to gnt   
Եւ ամենայն որ ասէ բան զորդւոյ մարդոյ, թողցի նմա. բայց որ զհոգին սուրբ հայհոյիցէ, մի թողցի նմա։

Verse: 11   Link to gnt   
Այլ յորժամ տանիցին զձեզ ի ժողովուրդս, եւ ի պետութիւնս, եւ յիշխանութիւնս, մի հոգայցէք որպէս թէ զինչ պատասխանի տայցէք, կամ զինչ ասիցէք։

Verse: 12   Link to gnt   
Զի հոգին սուրբ ուսուսցէ ձեզ ի նմին ժամու՝ զինչ պարտ իցէ խօսել։

Section: 45  
Passage: 5-2 
Verse: 13   Link to gnt   
Ասէ ոմն ի ժողովրդենէն ցնա. վարդապետ՝ ասա ցեղբայր իմ՝ բաժանել ընդ իս զժառանգութիւնն։

Verse: 14   Link to gnt   
Եւ նա՝ ասէ ցնա. այր դու ո կացոյց զիս դատաւոր կամ բաժանարար ի վերայ ձեր։

Verse: 15   Link to gnt   
Եւ ասէ ցնոսա. տեսէք եւ զգոյշ լերուք յամենայն ագահութենէ, զի ոչ եթէ ի մթերից ընչից ուրուք իցեն կեանք նորա։

Section: 46  
Verse: 16   Link to gnt   
Խօսեցաւ առ նոսա առակ մի՝ եւ ասէ. առն ուրումն մեծատան ետուն անդք տոհմականս։

Verse: 17   Link to gnt   
Եւ խորհէր ի միտս իւր՝ եւ ասէր. զի գործեցից՝ զի ոչ գոյ տեղի ուր ժողովեցից զարդիւնս իմ։

Verse: 18   Link to gnt   
Եւ ասէ. գիտեմ զինչ արարից. քակեցից զշտեմարանս իմ՝ եւ եւս մեծամեծս շինեցից. եւ անդր ժողովեցից զցորեան եւ զամենայն բարութիւնս իմ.

Verse: 19   Link to gnt   
Եւ ասացից ցանձն իմ. անձն՝ ունիս բազում բարութիւնս համբարեալ ամաց բազմաց. հանգիր՝ կեր արբ՝ եւ ուրախ լեր։

Verse: 20   Link to gnt   
Ասէ ցնա Աստուած. անմիտ յայսմ գիշերի զոգիդ ի քէն ի բաց պահանջիցեն, իսկ զոր պատրաստեցերն՝ ում լինիցի։

Verse: 21   Link to gnt   
Նոյնպէս եւ որ գանձէ անձին, եւ ոչ յԱստուծոյ մեծանայցէ։

Verse: 22   Link to gnt   
Ասէ ցաշակետսն իւր. վասն այդորիկ ասեմ ձեզ. մի հոգայք ընդ ոգւոյ թէ զինչ ուտիցէք, եւ մի ընդ մարմնոյ՝ թէ զինչ զգենուցուք.

Verse: 23   Link to gnt   
Զի ոգի առաւել է քան զկերակուր, եւ մարմին քան զհանդերձ։

Verse: 24   Link to gnt   
Հայեցարուք ընդ ագռաւս, զի ոչ սերմանեն եւ ոչ հնձեն, որոց ոչ գոն շտեմարանք եւ ոչ համբարանոցք, եւ Աստուած կերակրէ զնոսա. որչափ եւս առաւել զձեզ որ լաւ էք քան զթռչունս։

Verse: 25   Link to gnt   
Ով ի ձէնջ առ հոգալ կարիցէ յաւելուլ ի հասակ իւր կանգուն մի։

Verse: 26   Link to gnt   
Իսկ արդ եթէ ի փոքուն չէք բաւական վասն այլոցն զի հոգայցէք։

Verse: 27   Link to gnt   
Հայեցարուք ընդ շուշանն՝ որպէս աճէ, ոչ ջանայ եւ ոչ նիւթէ. ասեմ ձեզ, եւ ոչ սողովմոն յամենայն ի փառսն իւր զգեցաւ իբրեւ զմի ի նոցանէ։

Verse: 28   Link to gnt   
Իսկ եթէ զխոտսն որ այսօր ի բացի է եւ վաղիւ ի հնոց արկանելի, Աստուած այնպէս զգեցուցանէ. որչափ եւս առաւել զձեզ թերահաւատք։

Verse: 29   Link to gnt   
Եւ դուք մի խնդրէք զինչ ուտիցէք կամ զինչ ըմպիցէք, եւ մի զբաղնուք։

Verse: 30   Link to gnt   
Զի զայն ամենայն հեթանոսք աշխարհի խնդրեն։ Այլ ձեր հայր՝ գիտէ զի պիտոյ է այն ամենայն։

Verse: 31   Link to gnt   
Բայց խնդրեցէք զարքայութիւն Աստուծոյ. եւ այն յաւելցի ձեզ։

Passage: 5-3 
Verse: 32   Link to gnt   
Մի երկնչիր հօտ փոքրիկ. զի հաճեցաւ հայր ձեր տալ ձեզ զարքայութիւնն։

Verse: 33   Link to gnt   
Վաճառեցէք զինչս ձեր, եւ տուք ողորմութիւն. եւ արարէք ձեզ քսակս առանց հնանալոյ, գանձ անպակաս յերկինս. ուր ոչ գող մերձենայ, եւ ոչ ցեց ապականէ։

Verse: 34   Link to gnt   
Զի ուր գանձն ձեր է, անդ եւ սիրտք ձեր եղիցին։

Verse: 35   Link to gnt   
Եղիցին գօտիք ձեր պնդեալ ընդ մէջս, եւ ճրագունք լուցեալք։

Verse: 36   Link to gnt   
Եւ դուք նմանօղք մարդկան՝ որ ակն ունիցին տեառն իւրեանց՝ թէ երբ դառնայցէ ի հարսանեաց։ Զի յորժամ գայցէ եւ բախիցէ, վաղվաղակի բանայցեն նմա։

Verse: 37   Link to gnt   
Երանի իցէ ծառայիցն այնոցիկ, զորս եկեալ տէրն գտցէ արթունս։ ամէն ասեմ ձեզ՝ զի գօտի ընդ մէջ ածցէ, եւ բազմեցուսցէ զնոսա, եւ անցեալ պաշտիցէ զնոսա։

Verse: 38   Link to gnt   
Եւ եթէ յերկրորդ կամ յերրորդ պահու եկեսցէ՝ եւ գտցէ այնպէս, երանելի են ծառայքն այնոքիկ։

Verse: 39   Link to gnt   
Բայց զայն գիտասջիք, եթէ գիտէր տանուտէրն յորում ժամու գող գայ, չտայր թոյլ ական հատանել ի տան իւրում։

Verse: 40   Link to gnt   
Եւ դուք՝ եղերուք պատրաստք, զի յորում ժամու ոչ կարծիցէք, գայ որդի մարդոյ։

Verse: 41   Link to gnt   
Ասէ Պետրոս. տէր առ մեզ ասացեր զառակդ զայդ՝ թէ առ ամենեսեան։

Verse: 42   Link to gnt   
Եւ ասէ տէր. ով իցէ հաւատարիմ տնտես եւ իմաստուն, զոր կացոյց տէր իւր ի վերայ գերդաստանի իւրոյ տալ ի ժամու զկերակուրս։

Verse: 43   Link to gnt   
Երանի իցէ ծառային այնմիկ՝ զոր եկեալ տէր իւր գտանիցէ արարեալ այնպէս։

Verse: 44   Link to gnt   
Արդարեւ ասեմ ձեզ, զի ի վերայ ամենայն ընչից իւրոց կացուսցէ զնա։

Verse: 45   Link to gnt   
Ապա թէ ասիցէ ծառայն այն ի սրտի իւրում. յամէ տէր իմ ի գալ. եւ սկսանիցի հարկանել զծառայսն եւ զաղախնայսն, ուտել եւ ըմպել եւ արբենալ.

Verse: 46   Link to gnt   
Եկեսցէ տէր ծառային այնորիկ՝ յաւուր յորում ակն ոչ ունիցի, եւ ի ժամու յորում ոչ գիտիցէ. ընդ մէջ կտրեսցէ զնա, եւ զմասն նորա ընդ անհաւատս դիցէ։

Verse: 47   Link to gnt   
Եւ ծառայ որ գիտիցէ զկամս տեառն իւրոյ՝ եւ ոչ պատրաստեսցի ըստ կամաց նորա, արբցէ գան բազում։

Verse: 48   Link to gnt   
Եւ որ ոչն գիտիցէ՝ եւ արժանի գանի ինչ գործիցէ, արբցէ գան սակաւ։ Ամենայն որում շատ տուաւ, շատ խնդրեսցէ ի նմանէ. եւ որում բազում աւանդեցաւ, առաւել եւս պահանջեսցեն ի նմանէ։

Passage: 5-4 
Verse: 49   Link to gnt   
Հուր եկի արկանել յերկիր, եւ զինչ. կամիմ թէ արդէն իսկ բորբոքէր։

Verse: 50   Link to gnt   
Եւ մկրտութիւն մի ունիմ մկրտել. եւ զիարդ, փութամ մինչեւ կատարեսցի։

Verse: 51   Link to gnt   
Համարիք եթէ խաղաղութիւն եկի տալ յերկիր. ոչ ասեմ ձեզ, այլ բաժինս։

Verse: 52   Link to gnt   
Զի եղիցին յայսմ հետէ հինգ ի տան միում բաժանեալք, երեքն յերկուց, եւ երկուքն յերից։

Verse: 53   Link to gnt   
Բաժանեսցի հայր յորդւոյ, եւ որդի ի հօրէ. մայր ի դստերէ, եւ դուստր ի մօրէ. սկեսուր ի հարսնէ, եւ հարսն ի սկեսրէ իւրմէ։

Verse: 54   Link to gnt   
Ասաց եւ ցժողովուրդսն. յորժամ տեսանիցէք ամպ ծագեալ յարեւմտից, իսկոյն ասէք՝ թէ անձրեւ գայ, եւ լինի այնպէս։

Verse: 55   Link to gnt   
Եւ յորժամ հարաւ շնչեալ, ասէք թէ խորշակ լինի, եւ լինի այնպէս։

Verse: 56   Link to gnt   
Կեղծաւորք՝ զերեսս երկնի եւ երկրի գիտէք փորձել, իսկ զժամանակս զայս զիարդ ոչ փորձէք։

Verse: 57   Link to gnt   
Ընդէր եւ յանձանց իսկ ոչ ընտրեցէք զարժանն։

Verse: 58   Link to gnt   
Յորժամ երթայցես ընդ ոսոխի քում առ իշխան, ի ճանապարհի տուր զհաշիւն զերծանել ի նմանէ. զի գուցէ քարշիցէ զքեզ առ դատաւորն, եւ դատաւորն մատնիցէ դահճի, եւ դահիճն արկանիցէ ի բանտ։

Verse: 59   Link to gnt   
Ասեմ քեզ, ոչ ելանիցես անտի՝ մինչեւ հատուցանիցես զյետին բնիոնն։



Next part



This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.