TITUS
Armenian NT (Zohrab Bible)
Part No. 54
Previous part

Chapter: 10  
(Ժ՜)


Section: 34  
Passage: 4-4 
Verse: 1   Link to gnt   Յետ այսորիկ երեւեցոյց տէր եւ այլ եւս եւթանասուն եւ երկուս. եւ առաքեաց զնոսա երկուս երկուս առաջի իւր. յամենայն քաղաքս եւ ի տեղիս՝ ուր ինք երթալոց էր։

Verse: 2   Link to gnt   Եւ ասէ ցնոսա. հունձք բազում են՝ եւ մշակք սակաւ. արդ՝ աղաչեցէք զտէր հնձոց, զի հանցէ մշակս ի հունձս իւր։

Verse: 3   Link to gnt   Երթայք, ահա՝ առաքեմ զձեզ իբրեւ զգառինս ի մէջ գայլոց։

Verse: 4   Link to gnt   Մի բառնայք քսակ, մի մախաղ, մի կօշիկս. եւ ի ճանապարհի ումեք ողջոյն մի տայցէք։

Verse: 5   Link to gnt   Յոր տուն մտանիցէք, նախ ասասջիք թէ ողջոյն տանս այսմիկ.

Verse: 6   Link to gnt   Եթէ իցէ անդ որդի ողջունի՝ հանգիցէ ի վերայ նորա ողջոյնն ձեր. ապա թէ ոչ՝ ի ձեզ դարձցի։

Verse: 7   Link to gnt   Եւ ի նմին տան ագանիջիք. ուտիջիք եւ ըմպիջիք ի նոցանէ. զի արժանի է մշակն վարձու իւրոյ. մի փոխիցիք տանէ ի տուն.

Verse: 8   Link to gnt   Յոր քաղաք մտանիցէք՝ եւ ընդունիցին զձեզ. ուտիջիք զինչ առաջի դնիցեն ձեր.

Verse: 9   Link to gnt   Եւ բժշկեսջիք որ ի նմա հիւանդք իցեն. եւ ասասջիք նոցա, մերձեալ է ի վերայ ձեր արքայութիւն Աստուծոյ։

Verse: 10   Link to gnt   Իսկ յոր քաղաք մտանիցէք, եւ ոչ ընդունիցին զձեզ. իբրեւ ելանիցէք ի հրապարակս նորա՝ ասասջիք։

Verse: 11   Link to gnt   Եւ զփոշիս որ կռուեալ է ի քաղաքէ ձերմէ յոտս մեր՝ թօթափեսցուք ի ձեզ. բայց զայս գիտասջիք՝ զի մերձեալ է արքայութիւն Աստուծոյ։

Verse: 12   Link to gnt   Ասեմ ձեզ. զի Սոդոմայեցւոց ընդարձակագոյն լիցի յաւուրն յայնմիկ՝ քան քաղաքին այնմիկ։

Verse: 13   Link to gnt   Վայ քեզ Քորազին. վայ քեզ Բեթսայիդա. զի եթէ ի Տիւրոս եւ ի Սիդովն եղեալ էին զօրութիւնքն՝ որ եղեն ի ձեզ, վաղու եւս արդեւք ի խորդ եւ ի մոխիր նստեալ եւ ապաշխարեալ էր։

Verse: 14   Link to gnt   Բայց Տիւրոսի եւ Սիդովնի ընդարձակագոյն լիցի յաւուրն դատաստանի՝ քան ձեզ։

Verse: 15   Link to gnt   Եւ դու Կափառնաում, որ մինչեւ յերկինս բարձրացեալ ես. մինչեւ ի դժոխս իջցես։

Verse: 16   Link to gnt   Որ ձեզ լսէ, ինձ լսէ. եւ որ զձեզ անարգէ, զիս անարգէ. եւ որ զիս անարգէ, զառաքիչն իմ անարգէ. եւ որ ինձ լսէ, լսէ այնմիկ որ զիսն առաքեաց։

Verse: 17   Link to gnt   Դարձան եւթանասուն եւ երկուքն խնդութեամբ եւ ասեն, տէր՝ եւ դեւք հնազանդին մեզ յանուն քո.

Verse: 18   Link to gnt   Եւ ասէ ցնոսա. տեսանէի զսատանայ անկեալ յերկնից իբրեւ զփայլակն։

Verse: 19   Link to gnt   Ահա՝ ետու ձեզ իշխանութիւն կոխել զօձս եւ զկարիճս, եւ զամենայն զօրութիւն թշնամւոյն, եւ ձեզ ոչինչ մեղանչիցեն։

Verse: 20   Link to gnt   Բայց ընդ այն մի խնդայք՝ թէ այսք հնազանդին ձեզ. այլ խնդացէք՝ զի անուանք ձեր գրեալ են յերկինս։

Verse: 21   Link to gnt   Ի նմին ժամու՝ ցնծացաւ Յիսուս հոգւովն սրբով եւ ասէ. գոհանամ զքէն հայր տէր երկնից եւ երկրի, զի ծածկեցեր զայս յիմաստնոց եւ ի գիտնոց, եւ յայտնեցեր զայս տղայոց. այո հայր, զի այսպէս հաճոյ եղեւ առաջի քոյ։

Verse: 22   Link to gnt   Ամենայն ինչ տուաւ ինձ ի հօրէ իմմէ. եւ ոչ ոք գիտէ թէ ով է որդի, եթէ ոչ՝ հայր, եւ ո է հայր՝ եթէ ոչ՝ որդի, եւ ում կամիցի որդին յայտնել։

Verse: 23   Link to gnt   Եւ դարձեալ առանձինն առ աշակերտսն՝ ասէ. երանի աչաց՝ որ տեսանիցեն զոր տեսանէքդ։

Verse: 24   Link to gnt   Ասեմ ձեզ. զի բազում մարգարէք եւ թագաւորք կամեցան տեսանել զոր դուքդ տեսանէք՝ եւ ոչ տեսին. եւ լսել զոր լսէքդ՝ եւ ոչ լուան։

Section: 35  
Passage: 4-5 
Verse: 25   Link to gnt   Եւ ահա յարեաւ ոմն օրինական՝ փորձէր զնա եւ ասէր. վարդապետ՝ զինչ գործեցից՝ զի զկեանսն յաւիտենականս ժառանգեցից։

Verse: 26   Link to gnt   Եւ նա՝ ասէ ցնա. յօրէնս՝ զինչ գրեալ է, որպէս ընթեռնուս։

Verse: 27   Link to gnt   Նա պատասխանի ետ՝ եւ ասէ. սիրեսցես զտէր Աստուած քո յամենայն սրտէ քումմէ, եւ յամենայն անձնէ քումմէ եւ յամենայն զօրութենէ քումմէ, եւ յամենայն մտաց քոց. եւ զընկեր քո իբրեւ զանձն քո։

Verse: 28   Link to gnt   Եւ ասէ ցնա. ուղիղ ետուր զպատասխանիդ. զայդ արա՝ եւ կեցցես։

Section: 36  
Verse: 29   Link to gnt   Նա՝ իբրեւ կամեցաւ զանձն արդարացուցանել՝ ասէ ցՅիսուս. եւ ով է իմ ընկեր։

Verse: 30   Link to gnt   Պատասխանի ետ Յիսուս՝ եւ ասէ. այր մի՝ իջանէր յԵրուսաղեմէ յԵրիքով, եւ անկաւ ի ձեռս աւազակաց, որք մերկացին զնա, եւ վէրս ի վերայ եդին, թողին կիսամահ եւ գնացին։

Verse: 31   Link to gnt   Դէպ եղեւ քահանայի միոջ՝ իջանել ընդ նոյն ճանապարհ, եւ տեսեալ զնա՝ զանց արար։

Verse: 32   Link to gnt   Նոյնպէս եւ Ղեւտացի մի՝ եկեալ ընդ նոյն տեղի, ետես եւ զանց արար։

Verse: 33   Link to gnt   Սամարացի ոմն ճանապարհորդեալ, եկն ընդ նոյն առ նովաւ, եւ տեսեալ զնա՝ գթացաւ.

Verse: 34   Link to gnt   Եւ մատուցեալ պատեաց զվէրս նորա, արկեալ ի վերայ ձէթ եւ գինի. եւ եդեալ ի վերայ գրաստու իւրոյ՝ ած զնա ի պանդոկի մի, եւ դարմանեաց զնա։

Verse: 35   Link to gnt   Եւ ի վաղիւ անդր՝ իբրեւ ելանէր անտի, հանեալ ետ ցպանդոկապետն երկուս դահեկանս՝ եւ ասէ. դարման տար դմա, եւ զոր ինչ ծախեսցես ի դա՝ ի միւսանգամ գալստեան իմում հատուցից քեզ։

Verse: 36   Link to gnt   Արդ՝ ո յերեցունց ի նոցանէ թուի քեզ մերձաւոր լինել անկելոյն ի ձեռս աւազակացն։

Verse: 37   Link to gnt   Եւ նա ասէ. որ արար զողորմութիւնն ի վերայ նորա, ասէ ցնա Յիսուս. երթ եւ դու՝ արա նոյնպէս։

Section: 37  
Verse: 38   Link to gnt   Եւ եղեւ ի գալն նոցա, եւ ինքն եմուտ ի գեղ մի, եւ կին ոմն անուն Մարթա՝ ընկալաւ զնա ի տան իւրում։

Verse: 39   Link to gnt   Եւ նորա էր քոյր մի, որում անուն էր Մարիամ. որ եւ եկն նստաւ առ ոտսն տեառնն, եւ լսէր զբանս նորա։

Verse: 40   Link to gnt   Եւ Մարթա զբաղեալ էր ի բազում սպասու. եկն եկաց առ նմա՝ եւ ասէ. տէր՝ ոչինչ փոյթ է քեզ, զի քոյրդ իմ միայն եթող զիս ի սպասու. արդ՝ ասա դմա զի օգնեսցէ ինձ։

Verse: 41   Link to gnt   Պատասխանի ետ Յիսուս եւ ասէ. Մարթա Մարթա, դու հոգաս՝ եւ զբաղում իւիք զբաղեալ ես.

Verse: 42   Link to gnt   Բայց աստ՝ սակաւ ինչ պիտոյ է. Մարիամ մասն բարի ընտրեաց որ ոչ բարձցի ի սմանէ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.