TITUS
Armenian NT (Zohrab Bible)
Part No. 53
Previous part

Chapter: 9  
(Թ՜)


Section: 27  
Verse: 1   Link to gnt   Եւ կոչեցեալ զերկոտասան առաքեալսն, ետ նոցա զօրութիւն եւ իշխանութիւն ի վերայ ամենայն դիւաց, եւ բժշկել զհիւանդութիւնս։

Verse: 2   Link to gnt   Եւ առաքեաց զնոսա քարոզել զարքայութիւն Աստուծոյ, եւ բժշկել զախտաժէտս։

Verse: 3   Link to gnt   Եւ ասէ ցնոսա. մի ինչ բառնայք ի ճանապարհ. մի գաւազան, եւ մի մախաղ, մի հաց, եւ մի արծաթ, մի երկուս հանդերձս ունիցիք։

Verse: 4   Link to gnt   Եւ յոր տուն մտանիցէք՝ անդ ագջիք, եւ անտի գնայցէք։

Verse: 5   Link to gnt   Եւ որք ոչ ընդունիցին զձեզ, յորժամ ելանիցէք ի քաղաքէն յայնմանէ, զփոշի ոտից ձերոց թօթափեսջիք ի վկայութիւն նոցա։

Verse: 6   Link to gnt   Եւ ելեալ շրջէին ընդ քաղաքս եւ ընդ գեղս, աւետարանէին եւ բժշկէին ընդ ամենայն տեղիս։

Verse: 7   Link to gnt   Լուաւ Հերովդէս չորրորդապետ զգործսն ամենայն, եւ զարմանայր՝ վասն ասելոյն յոմանց,

Verse: 8   Link to gnt   եթէ Յովհաննէս յարեաւ ի մեռելոց, եւ յոմանց թէ Եղիա յայտնեցաւ, եւ յայլոց՝ թէ մարգարէ ոմն յառաջնոցն յարեաւ։

Verse: 9   Link to gnt   Ասէ Հերովդէս. զՅովհաննէս ես գլխատեցի. իսկ սա. ով իցէ զորմէ զայսպիսի իրս լսեմ։ եւ խնդրէր՝ տեսանել զնա։

Verse: 10   Link to gnt   Դարձան առաքեալքն, եւ պատմեցին նմա զամենայն զոր արարին։ Եւ առեալ զնոսա խուսեաց առանձինն ի տեղի անապատ քաղաքի միոյ, որում անուն էր Բեթսայիդա։

Verse: 11   Link to gnt   Եւ ժողովուրդքն իբրեւ գիտացին, գնացին զհետ նորա. եւ ընկալեալ զնոսա խօսէր ընդ նոսա վասն արքայութեան Աստուծոյ, եւ որոց պէտք էին բժշկութեան բժշկէր։

Section: 28  
Verse: 12   Link to gnt   Եւ օրն սկսաւ տարաժամել. մատեան երկոտասանքն եւ ասեն ցնա. արձակեա զժողովուրդսդ, զի երթեալ շուրջ ի գեղսն՝ եւ յագարակս հանգիցեն, եւ գտցեն կերակուր. զի աստ՝ յանապատի տեղւոջ եմք։

Verse: 13   Link to gnt   Ասէ ցնոսա. դուք տուք դոցա՝ ուտել. եւ նոքա ասեն. ոչ գոյ մեր՝ աւելի քան զհինգ նկանակ եւ զերկուս ձկունս, բայց եթէ երթիցուք գնեսցուք բաւական ժողովրդեանդ կերակուր.

Verse: 14   Link to gnt   Քանզի էին արք՝ իբրեւ հինգ հազար։ Ասէ ցաշակերտսն. բազմեցուցէք զդոսա դասս դասս յիսուն յիսուն։

Verse: 15   Link to gnt   Եւ արարին այնպէս, եւ բազմեցուցին զամենեսեան։

Verse: 16   Link to gnt   Եւ առեալ զհինգ նկանակն եւ զերկուս ձկունսն, հայեցաւ յերկինս՝ օրհնեաց, եւ եբեկ՝ եւ տայր ցաշակերտսն արկանել ժողովրդեանն.

Verse: 17   Link to gnt   Կերան եւ յագեցան ամենեքեան. եւ բարձին զնշխարս կոտորոցն՝ երկոտասան սակառի։

Section: 29  
Passage: 4-1 
Verse: 18   Link to gnt   Եւ եղեւ ի կալն նորա յաղօթս առանձինն, էին ընդ նմա եւ աշակերտքն նորա. եհարց զնոսա եւ ասէ. զո ոք ասեն զինէն ժողովուրդքն՝ թէ իցեմ։

Verse: 19   Link to gnt   Եւ նոցա պատասխանի տուեալ՝ ասեն զՅովհաննէս մկրտիչ. եւ այլք զԵղիա. իսկ այլք՝ թէ մարգարէ որ յառաջնոցն յարեաւ։

Verse: 20   Link to gnt   Ասէ ցնոսա. դուք զով ոք ասէք զինէն թէ իցեմ։ Պատասխանի ետ Պետրոս՝ եւ ասէ. զՔրիստոսն Աստուծոյ։

Verse: 21   Link to gnt   Նա սաստեաց ի նոսա, եւ պատուիրեաց մի ումէք ասել զայն։

Verse: 22   Link to gnt   Եւ ասէ՝ թէ պարտ է որդւոյ մարդոյ բազում չարչարել, եւ անարգել ի քահանայապետից եւ ի ծերոց եւ ի դպրաց, եւ սպանանել՝ եւ յերիր աւուր յառնել։

Verse: 23   Link to gnt   Եւ ասէր առ ամենեսին. եթէ ոք կամի զկնի իմ գալ, ուրասցի զանձն, եւ առցէ զխաչ իւր հանապազ, եւ եկեսցէ զհետ իմ։

Verse: 24   Link to gnt   Զի որ կամիցի զանձն իւր կեցուցանել, կորուսցէ զնա. եւ որ կորուսցէ զանձն իւր վասն իմ՝ կեցուսցէ զնա։

Verse: 25   Link to gnt   Զինչ օգուտ է մարդոյ՝ եթէ զաշխարհ շահեսցի, եւ զանձն իւր կորուսցէ կամ տուժեսցի։

Verse: 26   Link to gnt   Զի որ ամօթ համարեսցի զիս, եւ զբանս իմ, զնա՝ եւ որդի մարդոյ յամօթ արասցէ՝ յորժամ գայցէ փառօք իւրովք՝ եւ հօր, եւ հրեշտակաց սրբոց։

Section: 30  
Verse: 27   Link to gnt   Բայց արդարեւ՝ ասեմ ձեզ, եթէ են ոմանք ի դոցանէ որ այդր կան, որք մի ճաշակեսցեն զմահ, մինչեւ տեսցեն զարքայութիւն Աստուծոյ։

Verse: 28   Link to gnt   Եւ եղեւ յետ այսց բանից՝ իբրեւ աւուրք ութ, առեալ զՊետրոս եւ զՅակովբոս եւ զՅովհաննէս, ել ի լեառն կալ յաղօթս։

Verse: 29   Link to gnt   Եւ ի կալն նմա յաղօթս՝ եղեւ տեսիլ երեսաց նորա այլակերպ. եւ փոխեցաւ հանդերձ նորա՝ եւ եղեւ սպիտակ փայլուն։

Verse: 30   Link to gnt   Եւ ահա՝ արք երկու խօսէին ընդ նմա. որ էին Մովսէս եւ Եղիա,

Verse: 31   Link to gnt   Երեւեալ փառօք. եւ ասէին զելիցն նորա՝ զոր կատարելոց էր յերուսաղէմ։

Verse: 32   Link to gnt   Իսկ Պետրոս եւ որ ընդ նմայն էին՝ ծանրացեալք ի քնոյ, զարթեան, տեսին զփառսն նորա, եւ զերկուս արսն որ կային առ նմա։

Verse: 33   Link to gnt   Եւ եղեւ ի մեկնելն նոցա ի նմանէ, ասէ Պետրոս ցՅիսուս. վարդապետ՝ բարւոք է մեզ աստ լինել, եւ արասցուք երիս տաղաւարս, մի՝ քեզ եւ մի՝ Մովսիսի, եւ մի՝ Եղիայի։ Եւ ոչ գիտէր զինչ խօսէր։

Verse: 34   Link to gnt   Եւ իբրեւ զայս ասաց. եկն ամպ եւ հովանի եղեւ ի վերայ նոցա. եւ երկեան ի մտանելն նոցա ընդ ամպովն։

Verse: 35   Link to gnt   Ձայն եղեւ յամպոյն եւ ասէ. դա է որդի իմ ընտրեալ. դմա լուարուք։

Verse: 36   Link to gnt   Եւ ընդ լինել բարբառոյն՝ գտաւ Յիսուս միայն։ եւ ինքեանք լռեցին. եւ ոչ ումեք պատմեցին յաւուրսն յայնոսիկ, եւ ոչինչ յորոց տեսինն։

Passage: 4-2 
Verse: 37   Link to gnt   Եւ եղեւ ի վաղիւն՝ մինչ իջանէին նոքա ի լեռնէ անտի, ընդ առաջ եղեւ նմա ժողովուրդ բազում։

Section: 31  
Verse: 38   Link to gnt   Եւ ահա՝ այր մի ի ժողովրդենէ անտի, աղաղակեաց եւ ասէ. Վարդապետ՝ աղաչեմ զքեզ հայեաց յորդի իմ. զի միամօր է ինձ։

Verse: 39   Link to gnt   Եւ ահա՝ այս հարկանի ի նմա, եւ յանկարծ գոչէ, եւ զարկուցանէ զնա՝ եւ թաւալեցուցանէ զնա եւ փրփրեցուցանէ, եւ հազիւ մեկնի ի նմանէ, խորտակեալ զնա.

Verse: 40   Link to gnt   Եւ աղաչեցի զաշակերտսն քո զի հանցեն զնա, եւ ոչ կարացին։

Verse: 41   Link to gnt   Պատասխանի ետ Յիսուս՝ եւ ասէ. ով ազգ անհաւատ եւ թիւր, մինչեւ յերբ իցեմ ընդ ձեզ, եւ անսայցեմ ձեզ. մատո այսր զորդին քո։

Verse: 42   Link to gnt   Եւ մինչ դեռ մատչէր, զարկոյց զնա դեւն, եւ շարժլեաց։

Verse: 43   Link to gnt   Սաստեաց Յիսուս այսոյն պղծոյ, եւ բժշկեաց զմանուկն. եւ ետ զնա ցհայր իւր.

Verse: 44   Link to gnt   Եւ զարմանային ամենեքեան ի վերայ մեծամեծացն Աստուծոյ։ Եւ ի զարմանալն ամենեցուն ի վերայ ամենայնի զոր առնէր, ասէ ցաշակերտսն իւր. դիք դուք ի լսելիս ձեր զբանս զայսոսիկ. զի որդի մարդոյ մատնելոց է ի ձեռս մարդկան։

Verse: 45   Link to gnt   Եւ նոքա ոչ գիտէին զբանն, եւ էր ծածկեալ ի նոցանէ զի մի գիտասցեն. եւ երկնչէին հարցանել ցնա վասն բանին այնորիկ։

Section: 32  
Verse: 46   Link to gnt   Եմուտ խորհուրդ ի նոսա, թէ ո արդեւք մեծ իցէ ի նոցանէ։

Verse: 47   Link to gnt   Յիսուս իբրեւ ծանեաւ զխորհուրդս սրտից նոցա, առ մանուկ մի կացոյց ի մէջ նոցա առ իւր,

Verse: 48   Link to gnt   Եւ ասէ ցնոսա. որ ոք ընկալցի զմանուկս զայս յանուն իմ՝ զիս ընդունի, եւ որ զիս ընդունիցի՝ ընդունի զառաքիչն իմ. զի որ փոքրիկն է յամենեսին ի ձեզ՝ նա եղիցի մեծ։

Passage: 4-3 
Verse: 49   Link to gnt   Պատասխանի ետ Յովհաննէս՝ եւ ասէ. վարդապետ, տեսաք զոմն զի յանուն քո դեւս հանէր՝ եւ արգելաք զնա, զի ոչ շրջի ընդ մեզ։

Verse: 50   Link to gnt   Ասէ ցնոսա Յիսուս. մի արգելուք զնա. զի որ ոչն է ձեր թշնամի՝ ի ձեր կողմն է,

Verse: 51   Link to gnt   Եւ եղեւ ի կատարել աւուրց վերանալոյ նորա, եւ ինքն զերեսս հաստատեաց երթալ յԵրուսաղէմ։

Verse: 52   Link to gnt   Եւ առաքեաց հրեշտակս առաջի երեսաց իւրոց. եւ իբրեւ չոգան. մտին ի գեղ մի Սամարացւոց՝ պատրաստել ինչ նմա։

Verse: 53   Link to gnt   Եւ ոչ ընկալան զնա զի դէմ եդեալ էր նորա երթալ յԵրուսաղէմ։

Verse: 54   Link to gnt   Իբրեւ տեսին աշակերտքն՝ Յակովբոս եւ Յովհաննէս, ասեն. տէր՝ կամիս զի ասասցուք, եւ իջցէ հուր յերկնից՝ եւ սատակեսցէ զնոսա։

Verse: 55   Link to gnt   Դարձաւ՝ սաստեաց ի նոսա՝ եւ ասէ. ոչ գիտէք որոյ հոգւոյ էք դուք։

Verse: 56   Link to gnt   Զի որդի մարդոյ՝ ոչ եկն զոգիս մարդկան կորուսանել այլ կեցուցանել. եւ գնացին յայլ գեղ։

Section: 33  
Verse: 57   Link to gnt   Եւ մինչ դեռ երթային նոքա ի ճանապարհի, ասէ ոմն ցնա. եկից զկնի քո՝ յոր վայր եւ երթայցես։

Verse: 58   Link to gnt   Ասէ ցնա Յիսուս. աղուեսուց՝ որջք գոն, եւ թռչնոց երկնից՝ դադարք, եւ որդւոյ մարդոյ ոչ գոյ՝ ուր դիցէ զգլուխ։

Verse: 59   Link to gnt   Ասէ ցմեւս եւս. եկ զկնի իմ, եւ նա՝ ասէ. տէր հրաման տուր ինձ երթալ նախ թաղել զհայր իմ։

Verse: 60   Link to gnt   Ասէ ցնա Յիսուս. թող զմեռեալսն թաղել զմեռեալսն իւրեանց, եւ դու երթ՝ պատմեա զարքայութիւն Աստուծոյ։

Verse: 61   Link to gnt   Ասէ եւ այլ ոմն. եկից զկնի քո տէր. բայց նախ հրաման տուր ինձ՝ հրաժարել ի տանէ իմմէ։

Verse: 62   Link to gnt   Ասէ ցնա Յիսուս. ոչ ոք արկանէ ձեռն զմաճով եւ հայիցի յետս, եթէ յաջողեալ իցէ արքայութեան Աստուծոյ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.