TITUS
Armenian NT (Zohrab Bible)
Part No. 52
Previous part

Chapter: 8  
(Ը՜)


Passage: 3-5 
Verse: 1   Link to gnt   Եւ եղեւ յետ այնորիկ, ինքն շրջէր ընդ քաղաքս եւ ընդ գեղս, քարոզէր եւ աւետարանէր զարքայութիւն Աստուծոյ. եւ երկոտասանքն ընդ նմա։

Verse: 2   Link to gnt   Եւ կանայք ոմանք՝ որ բժշկեալ էին յայսոց չարաց եւ ի հիւանդութենէ. Մարիամ՝ որ կոչէր Մագդաղէնացի, յորմէ եւթն դեւն ելեալ էր.

Verse: 3   Link to gnt   Եւ Յովաննա կին՝ Քուզայ հազարապետին Հերովդի. եւ Շուշան, եւ այլք բազումք որք պաշտէին զնա յընչից իւրեանց։

Section: 22  
Verse: 4   Link to gnt   Եւ ի ժողովել բազում ժողովրդոց, եւ ըստ քաղաքաց քաղաքաց եկելոցն առ նա. ասէ առակաւ.

Verse: 5   Link to gnt   Ել սերմանացան՝ սերմանել զսերմանիս իւր. եւ ի սերմանելն իւրում, էր որ անկաւ առ ճանապարհաւ՝ եւ եղեւ կոխան, եւ թռչունք երկնից կերան զնա։

Verse: 6   Link to gnt   Եւ այլն անկաւ յապառաժի. եւ ընդ բուսանելն՝ չորացաւ, առ ի չգոյի հիւթոյ։

Verse: 7   Link to gnt   Եւ այլն անկաւ ի մէջ փշոց, եւ ընդ նմին բուսեալ փշոցն՝ հեղձուցին զնա։

Verse: 8   Link to gnt   Եւ այլն անկաւ յերկիր բարի պարարտ, եւ բուսեալ՝ արար պտուղ հարիւրապատիկ։ Զայս իբրեւ խօսեցաւ, ասէ. որ ունիցի ականջս լսելոյ՝ լուիցէ։

Verse: 9   Link to gnt   Հարցանէին զնա աշակերտքն՝ թէ զինչ իցէ առակն։

Verse: 10   Link to gnt   Եւ նա՝ ասէ. ձեզ տուեալ է գիտել զխորհուրդս արքայութեան Աստուծոյ։ բայց այլոցն առակօք, զի տեսցեն՝ եւ մի տեսցեն, եւ լուիցեն՝ եւ մի իմասցին։

Verse: 11   Link to gnt   Բայց առակն այս ինչ է։ Սերմն՝ բանն Աստուծոյ է։

Verse: 12   Link to gnt   Եւ որք առ ճանապարհաւն, այնոքիկ են՝ որ լսենն, եւ ապա գայ սատանայ՝ հանէ զբանն ի սրտից նոցա, զի մի հաւատասցեն՝ եւ ապրեսցին։

Verse: 13   Link to gnt   Եւ որք յապառաժին, որք յորժամ լսիցեն, խնդութեամբ ընդունին զբանն, եւ արմատս ոչ ունիցին. որք առ ժամանակ մի հաւատան, եւ ի ժամանակի փորձութեան հեռանան։

Verse: 14   Link to gnt   Իսկ որ ի մէջ փշոցն անկաւ՝ նոքա են, որ իբրեւ լսեն զբանն՝ եւ ի հոգս եւ ի մեծութիւն եւ ի ցանկութիւն աշխարհիս զբաղեալ՝ հեղձնուն եւ անպտուղ լինին։

Verse: 15   Link to gnt   Իսկ որ յերկիրն պարարտ, որոց բարւոք եւ զուարթագին սրտիւ լուեալ զբանն՝ ընդունին, եւ տան պտուղ համբերութեամբ։

Verse: 16   Link to gnt   Ոչ ոք լուցանէ ճրագ՝ եւ թաքուցանէ ընդ կարասեաւ, կամ դնէ ընդ մահճօք. այլ ի վերայ աշտանակի դնէ, զի որ մտանեն՝ զլոյս տեսցեն։

Verse: 17   Link to gnt   Չիք ինչ ծածուկ՝ որ ոչ յայտ լիցի. եւ ոչ գաղտնի՝ որ ոչ ծանիցի. եւ եկեսցէ ի յայտ։

Verse: 18   Link to gnt   Տեսէք այսուհետեւ զիարդ լսէքդ, զի ոյր գուցէ՝ տացի նմա եւ ոյր ոչն գուցէ՝ եւ զոր կարծէն թէ ունիցի բարձցի ի նմանէ։

Verse: 19   Link to gnt   Եկին առ նա մայրն եւ եղբարք իւր, եւ ոչ կարէին հասանել ի նա՝ վասն բազմութեանն։

Verse: 20   Link to gnt   Ազդ եղեւ նմա՝ եւ ասեն. մայր քո եւ եղբարք քո՝ կան արտաքոյ՝ եւ կամին զքեզ տեսանել։

Verse: 21   Link to gnt   Եւ ասէ ցնոսա. մայր իմ եւ եղբարք իմ սոքա են, որ զբանն Աստուծոյ լսեն՝ եւ առնեն։

Verse: 22   Link to gnt   Եւ եղեւ ի միում յաուրց, ինքն ել ի նաւ՝ եւ աշակերտք նորա, եւ ասէ ցնոսա. եկայք անցցուք յայնկոյս ծովակիս. եւ գնացին։

Section: 23  
Passage: 3-6 
Verse: 23   Link to gnt   Եւ մինչ դեռ նաւէին՝ ի քուն եմուտ. եւ էջ մրրիկ հողմոյ ի ծովակն՝ եւ ուռնոյր, եւ տագնապէին։

Verse: 24   Link to gnt   Մատուցեալ զարթուցին զնա՝ եւ ասեն. վարդապետ վարդապետ՝ կորնչիմք աւասիկ, եւ նա՝ յարուցեալ սաստեաց հողմոյն, եւ խռովութեան ջրոցն՝ եւ հանդարտեցին, եւ եղեւ խաղաղութիւն։

Verse: 25   Link to gnt   Ասէ ցնոսա, ուր են հաւատք ձեր, եւ զահի հարեալ զարմացան, եւ ասէին ցմիմեանս. ո՞վ արդեւք իցէ սա՝ զի եւ հողմոց եւ ջրոց հրաման տայ, եւ հնազանդին սմա։

Section: 24  
Verse: 26   Link to gnt   Եւ նաւեցին իջին յաշխարհն Գերգեսացւոց, որ է յայնկոյս հանդէպ Գալիլեա։

Verse: 27   Link to gnt   Եւ ընդ ելանելն նորա ի ցամաք, պատահեաց այր մի ի քաղաքէն յորում էին դեւք. եւ բազում ժամանակս չէր հանդերձ զգեցեալ՝ եւ ոչ ի տան բնակեալ. այլ ի գերեզմանս։

Verse: 28   Link to gnt   Եւ տեսեալ զՅիսուս, աղաղակեաց եւ անկաւ առաջի նորա, եւ ասէ մեծաձայն. զի կայ՝ իմ եւ քո՝ Յիսուս որդի Աստուծոյ բարձրելոյ, աղաչեմ զքեզ՝ մի տանջեր զիս։

Verse: 29   Link to gnt   Քանզի հրաման տայր այսոյն պղծոյ՝ ելանել ի մարդոյ անտի. զի բազում ժամանակս յափշտակեալ էր զնա, եւ կապէր ի շղթայս՝ եւ պահէր յերկաթս, եւ խզէր զկապանսն. եւ վարէր ի դիւէն յանապատ։

Verse: 30   Link to gnt   Եհարց ցնա Յիսուս եւ ասէ. զինչ անուն է քեզ, եւ նա՝ ասէ. լեգէովն. զի դեւք բազումք մտեալ էին ի նա։

Verse: 31   Link to gnt   Եւ աղաչէին զնա՝ զի մի հրաման տացէ նոցա երթալ յանդունդս։

Verse: 32   Link to gnt   Եւ էր անդ՝ երամակ մի խոզից բազմաց՝ արօտական ի լերինն, եւ աղաչեցին զնա՝ զի հրաման տացէ նոցա մտանել ի նոսա, եւ հրամայեաց նոցա։

Verse: 33   Link to gnt   Եւ ելեալ դեւքն յառնէն, մտին ի խոզեանն, եւ դիմեաց երամակն ի գահէ անտի ի ծովակն՝ եւ հեղձաւ։

Verse: 34   Link to gnt   Իբրեւ տեսին խոզարածքն զիրսն որ եղեն՝ փախեան, եւ պատմեցին ի քաղաքին եւ յագարակսն։

Verse: 35   Link to gnt   Եւ իբրեւ ելին տեսանել զգործսն, եւ եկին առ Յիսուս, եւ գտին զայրն ուստի դեւքն ելեալ էին, զգեցեալ եւ զգաստացեալ նստէր առ ոտսն Յիսուսի, եւ երկեան։

Verse: 36   Link to gnt   Պատմեցին նոցա որոց տեսեալն էր՝ թէ զիարդ փրկեցաւ դիւահարն։

Verse: 37   Link to gnt   Եւ աղաչէր զնա ամենայն բազմութիւնն շուրջ զկողմամբքն Գերգեսացւոց՝ գնալ՝ ի սահմանացն նոցա. քանզի ահիւ մեծաւ տագնապէին։ եւ Նա՝ մտեալ ի նաւ, դարձաւ անդրէն։

Verse: 38   Link to gnt   Աղաչէր զնա՝ այրն ուստի դեւքն ելեալ էին՝ շրջել ընդ նմա. արձակեաց զնա՝ եւ ասէ.

Verse: 39   Link to gnt   Դարձ ի տուն քո, եւ պատմեա զոր միանգամ արար քեզ Աստուած։ Գնաց ի քաղաքն՝ եւ քարոզէր զոր ինչ արար նմա Յիսուս։

Verse: 40   Link to gnt   Եւ իբրեւ դարձաւ անդրէն Յիսուս, ընկալաւ զնա ժողովուրդն. քանզի ամենեքեան ակն ունէին նմա։

Section: 25  
Verse: 41   Link to gnt   Եւ ահա՝ եկն այր մի՝ որում անուն էր Յայրոս, եւ նա՝ էր իշխան ժողովրդեանն. անկեալ առ ոտսն Յիսուսի, աղաչէր զնա՝ մտանել ի տուն նորա.

Verse: 42   Link to gnt   Զի դուստր մի՝ միամօր էր նորա, ամաց իբրեւ երկոտասանից, եւ էր մերձ ի մահ։ Եւ ընդ երթալն նորա՝ ժողովուրդքն նեղէին զնա։

Section: 26  
Verse: 43   Link to gnt   Եւ կին մի՝ էր ի տեռատեսութեան արեան յամաց երկոտասանից, որում ոչ էր լիեալ հնար յումեքէ բժշկել։

Verse: 44   Link to gnt   Մատուցեալ յետոյ մերձեցաւ ի քղանցս հանդերձի նորա. եւ նոյն ժամայն՝ եկաց բղխումն արեան նորա։

Verse: 45   Link to gnt   Եւ ասէ Յիսուս. ով է որ մերձեցաւն յիս։ իբրեւ ամենեքեան ուրանային, ասէ Պետրոս՝ եւ որ ընդ նմա էին. վարդապետ՝ ժողովուրդքդ պնդեն եւ նեղեն զքեզ։

Verse: 46   Link to gnt   Եւ ասէ Յիսուս. ոմն մերձեցաւ յիս, քանզի գիտացի եթէ զօրութիւն ել յինէն։

Verse: 47   Link to gnt   Իբրեւ ետես կինն՝ թէ ոչ ծածկեցաւ ի նմանէ, եկն դողալով՝ եւ անկաւ առաջի նորա թէ վասն որոյ իրաց մերձեցաւ ի նա, եւ պատմեաց առաջի ամենայն ժողովրդեանն. եւ թէ որպէս բժշկեցաւ առժամայն։

Verse: 48   Link to gnt   Եւ ասէ. քաջալերեաց դուստր՝ հաւատք քո կեցուցին զքեզ, երթ ի խաղաղութիւն։

Verse: 49   Link to gnt   Եւ մինչ դեռ նա խօսէր, գայ ոմն ի տանէ ժողովրդապետին՝ եւ ասէ ցնա. մեռաւ դուստրն քո, մի ինչ աշխատ առներ զդա։

Verse: 50   Link to gnt   Իսկ Յիսուս իբրեւ լուաւ, պատասխանի ետ նմա եւ ասէ. մի երկնչիր, միայն հաւատա՝ եւ կեցցէ։

Verse: 51   Link to gnt   Եւ մտեալ ի տունն, ոչ զոք եթող մտանել, բայց միայն զՊետրոս եւ զՅակովբոս եւ զՅովհաննէս, եւ զհայր մանկանն եւ զմայր նորա։

Verse: 52   Link to gnt   Լային ամենեքեան՝ եւ կոծէին զնա։ եւ նա՝ ասէ. մի լայք զի չէ մեռեալ, այլ ննջէ։

Verse: 53   Link to gnt   Եւ նոքա՝ ծաղր առնէին զնա, զի գիտէին թէ մեռաւ։

Verse: 54   Link to gnt   Եւ նորա հանեալ զամենեսին արտաքս,

Verse: 55   Link to gnt   Կալաւ զձեռանէ նորա, բարբառեցաւ եւ ասէ. արի կաց մանուկ դու։

Verse: 56   Link to gnt   Եւ դարձաւ ոգի նորա, եւ կանգնեցաւ վաղվաղակի. եւ հրամայեաց տալ նմա ուտել։

Verse: 57   Link to gnt   Եւ զարմացան ծնօղքն նորա՝ եւ նա՝ պատուիրէր մի ումեք ասել՝ որ ինչ եղեւն։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.