TITUS
Armenian NT (Zohrab Bible)
Part No. 51
Previous part

Chapter: 7  
(Է՜)


Section: 18  
Passage: 3-2 
Verse: 1   Link to gnt   Եւ իբրեւ կատարեաց զամենայն բանս իւր ի լսելիս ժողովրդեանն, եմուտ ի Կափառնաում։

Verse: 2   Link to gnt   Հարիւրապետի ուրումն ծառայ՝ չարաչար հիւանդացեալ՝ մերձ էր ի վախճանել, որ էր նմա պատուական։

Verse: 3   Link to gnt   Իբրեւ լուաւ զՅիսուսէ, առաքեաց զծերսն ի Հրեից, աղաչել զնա՝ զի եկեսցէ ապրեցուսցէ զծառայն նորա։

Verse: 4   Link to gnt   Եւ նոքա եկեալ առ Յիսուս՝ աղաչէին զնա ստեպ՝ եւ ասէին, թէ արժանի է որում զշնորհս զայս առնես։

Verse: 5   Link to gnt   Զի սիրէ զազգս մեր, եւ զժողովրդանոցն՝ նա շինեաց մեզ։

Verse: 6   Link to gnt   Եւ Յիսուս գնաց ընդ նոսա։ Իբրեւ ոչինչ կարի հեռի էր ի տանէն, յղեաց առ նա հարիւրապետն բարեկամս՝ եւ ասէ ցնա. տէր. մի ինչ աշխատ լինիր, զի չեմ բաւական եթէ ընդ յարկաւ իմով մտանիցես։

Verse: 7   Link to gnt   Վասն որոյ եւ ոչ զանձն համարեցայ արժանի առ քեզ գալոյ. այլ ասա բանիւ՝ եւ բժշկեսցի մանուկս իմ։

Verse: 8   Link to gnt   Քանզի եւ ես այր մի եմ՝ կարգեալ ընդ իշխանութեամբ. ունիմ ընդ ինեւ զինուորս. եւ ասեմ սմա երթ՝, եւ երթայ. այլում՝ թէ եկ, եւ գայ. եւ ծառայի իմում թէ արա զայս, եւ առնէ։

Verse: 9   Link to gnt   Եւ իբրեւ լուաւ զայս Յիսուս՝ զարմացաւ, դարձաւ առ ժողովուրդն որ երթային զհետ նորա եւ ասէ. ամէն ասեմ ձեզ՝ թէ եւ ոչ յԻսրայելի այսչափ հաւատս գտի.

Verse: 10   Link to gnt   Եւ դարձան անդրէն պատգամաւորքն ի տուն, եւ գտին զծառայն հիւանդ՝ բժշկեալ։

Section: 19  
Passage: 3-3 
Verse: 11   Link to gnt   Եւ եղեւ ի վաղիւն երթայր ի քաղաք մի, որում անուն էր Նային. երթային ընդ նմա եւ աշակերտք նորա, եւ ժողովուրդ բազում։

Verse: 12   Link to gnt   Իբրեւ մերձ եղեւ ի դուռն քաղաքին, եւ ահա ելանէր մեռեալ մի, որդի՝ միամօր մօր իւրոյ, եւ նա՝ էր այրի. եւ ժողովուրդ բազում քաղաքին էր ընդ նմա։

Verse: 13   Link to gnt   Իբրեւ ետես զնա տէր՝ գթացաւ ի նա՝ եւ ասէ. մի լար։

Verse: 14   Link to gnt   Եւ մատուցեալ մերձեցաւ ի դագաղսն։ եւ որ բարձեալն տանէին՝ զտեղի առին։ եւ ասէ, պատանի դու՝ քեզ ասեմ, արի։

Verse: 15   Link to gnt   Կանգնեցաւ նստաւ մեռեալն, եւ սկսաւ խօսել. եւ ետ զնա ցմայր իւր։

Verse: 16   Link to gnt   Եւ ահ կալաւ զամենեսին, եւ փառաւոր առնէին զԱստուած՝ եւ ասէին. թէ մարգարէ ոմն մեծ յարուցեալ է ի միջի մերում, եւ թէ այց արար Աստուած ժողովրդեան իւրում ի բարութիւն։

Verse: 17   Link to gnt   Եւ ել զրոյցս այս ընդ ամենայն Հրեաստան վասն նորա. եւ ընդ ամենայն կողմանս աշխարհին։

Section: 20  
Verse: 18   Link to gnt   Եւ պատմեցին Յովհաննու աշակերտքն իւր վասն ամենայնի այսորիկ։

Verse: 19   Link to gnt   Եւ կոչեաց առ ինքն երկուս ոմանս յաշակերտաց իւրոց Յովհաննէս, առաքեաց առ տէր եւ ասէ. դու ես որ գալոցն ես՝ եթէ այլում ակն կալցուք։

Verse: 20   Link to gnt   Եւ եկեալ առ նա արքն ասեն, Յովհաննէս մկրտիչ առաքեաց զմեզ առ քեզ՝ եւ ասէ, դու ես որ գալոցն ես եթէ այլում ակն կալցուք։

Verse: 21   Link to gnt   Եւ ի նմին ժամու բժշկեաց զբազումս ի հիւանդութեանց եւ ի հարուածոց եւ յայսոց չարաց, եւ կուրաց բազմաց շնորհեաց տեսանել։

Verse: 22   Link to gnt   Պատասխանի ետ նոցա եւ ասէ. երթայք պատմեցէք Յովհաննու՝ զոր տեսէքդ եւ լուայք. զի կոյրք՝ տեսանեն, եւ կաղք գնան. բորոտք սրբին. խուլք լսեն. մեռեալք՝ յառնեն. աղքատք՝ աւետարանին.

Verse: 23   Link to gnt   եւ երանի իցէ՝ որ ոչ գայթագղիցի յիս։

Verse: 24   Link to gnt   Եւ իբրեւ գնացին հրեշտակքն Յովհաննու, սկսաւ խօսել ընդ ժողովուրդսն վասն Յովհաննու. զինչ ելէք յանապատն տեսանել, եղէգն շարժուն ի հողմոյ։

Verse: 25   Link to gnt   Այլ զինչ ելէք տեսանել, այր ի հանդերձս փափկութեան զարդարեալ. ահաւանիկ՝ որ ի հանդերձս երեւելիս եւ ի փափկութեան են՝ յարքունիս են։

Verse: 26   Link to gnt   Այլ զինչ ելէք տեսանել, մարգարէ. այո, ասեմ ձեզ՝ առաւել եւս քան զմարգարէ։

Verse: 27   Link to gnt   Զի սա է վասն որոյ գրեալն է, թէ ահա առաքեմ զհրեշտակ իմ առաջի քոյ՝ որ յարդարեսցէ զճանապարհ քո առաջի քոյ։

Verse: 28   Link to gnt   Ամէն ասեմ ձեզ. մեծ ի ծնունդս կանանց՝ մարգարէ, քան զՅովհաննէս ոչ ոք է. բայց փոքրիկն յարքայութեան Աստուծոյ՝ մեծ է քան զնա։

Verse: 29   Link to gnt   Եւ ամենայն ժողովուրդն իբրեւ լուան, եւ մաքսաւորքն, արդարացուցին զԱստուած. զի մկրտեցան ի մկրտութիւնն Յովհաննու։

Verse: 30   Link to gnt   Իսկ Փարիսեցիքն եւ օրինականքն, զխորհուրդն Աստուծոյ անարգեցին յանձինս իւրեանց, զի ոչ մկրտեցան ի նմանէ։

Verse: 31   Link to gnt   Արդ ում նմանեցուցից զմարդիկ ազգիս այսորիկ, եւ ում իցեն նմանօղք։

Verse: 32   Link to gnt   Նման են մանկտւոյ որ ի հրապարակս նստիցին, կարդայցեն զմիմեանս եւ ասիցեն. փողս հարաք ձեզ՝ եւ ոչ կաքաւեցէք. ողբացաք՝ եւ ոչ լացէք։

Verse: 33   Link to gnt   Եկն՝ Յովհաննէս մկրտիչ՝ ոչ ուտէր եւ ոչ ըմպէր, եւ ասէիք՝ դեւ գոյ ի նմա։

Verse: 34   Link to gnt   Եկն որդի մարդոյ՝ ուտէ եւ ըմպէ, եւ ասէք. ահա այր կերօղ եւ արբեցօղ՝ բարեկամ մաքսաւորաց եւ մեղաւորաց։

Verse: 35   Link to gnt   Եւ արդարացաւ իմաստութիւն յորդւոց իւրոց։

Section: 21  
Passage: 3-4 
Verse: 36   Link to gnt   Աղաչէր ոմն զնա ի փարիսեցւոցն՝ զի կերիցէ ճաշ ընդ նմա։ Եւ մտեալ ի տուն Փարիսեցւոյն՝ բազմեցաւ.

Verse: 37   Link to gnt   Եւ կին մի էր ի քաղաքին մեղաւոր. իբրեւ գիտաց թէ բազմեալ է ի տան Փարիսեցոյն, բերեալ շիշ մի իւղոյ ազնուի.

Verse: 38   Link to gnt   Կայր յետոյ առ ոտս նորա, լայր, եւ արտասուօքն սկսաւ թանալ զոտս նորա, եւ հերով գլխոյ իւրոյ ջնջէր։ եւ համբուրէր զոտս նորա, եւ օծանէր իւղովն։

Verse: 39   Link to gnt   Եւ տեսեալ Փարիսեցոյն որ կոչեաց զնա, ասէր, ընդ միտս իւր. սա թէ մարգարէ ոք էր, ապա գիտէր թէ ով կամ որպիսի ոք կին մերձենայ ի սա. զի մեղաւոր է։

Verse: 40   Link to gnt   Պատասխանի ետ Յիսուս՝ եւ ասէ ցնա. Սիմովն՝ ունիմ ինչ ասել քեզ, եւ նա ասէ. ասա վարդապետ։ Եւ ասէ.

Verse: 41   Link to gnt   Երկու պարտապանք էին ուրումն փոխատուի. մին՝ պարտէր հինգ հարեւր դահեկան, եւ մեւսն յիսուն։

Verse: 42   Link to gnt   Եւ իբրեւ ոչ գոյր նոցա հատուցանել. երկոցունց շնորհեաց. արդ ասա ով առաւել սիրեսցէ զնա։

Verse: 43   Link to gnt   Ասէ Սիմովն. ինձ այսպէս թուի՝ եթէ որում զբազումն շնորհեաց։ Եւ նա ասէ ցնա. ուղիղ դատեցար։

Verse: 44   Link to gnt   Եւ դարձեալ ի կինն կողմն, ասէ ցՍիմովն. տեսանես զայս կին, մտի ի տուն քո ջուր ոտից իմոց ոչ ետուր, իսկ սա՝ արտասուօք իւրովք եթաց զոտս իմ, եւ հերով իւրով ջնջեաց.

Verse: 45   Link to gnt   Համբոյր մի դու ոչ ետուր ինձ, սա աւասիկ յորմէ հետէ մտեալ եմ, ոչ դադարեաց ի համբուրելոյ զոտս իմ։

Verse: 46   Link to gnt   Իւղով զգլուխ իմ ոչ օծեր, սա իւղով անուշիւ օծ։

Verse: 47   Link to gnt   Վասն որոյ ասեմ քեզ. թողեալ լիցի սմա մեղք իւր բազումք։ Զի յոյժ սիրեաց, զի որում շատ թողուցու՝ շատ սիրէ, եւ որում սակաւ՝ սակաւ։

Verse: 48   Link to gnt   Եւ ասէ ցնա. թողեալ լիցին քեզ մեղք քո։

Verse: 49   Link to gnt   Եւ սկսան որ բազմեալն էին ընդ նմա՝ ասել ընդ միտս իւրեանց. ով է սա՝ որ զմեղս թողու։

Verse: 50   Link to gnt   Եւ նա՝ ասէ ցկինն. հաւատք քո կեցուցին զքեզ, երթ ի խաղաղութիւն։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.