TITUS
Armenian NT (Zohrab Bible)
Part No. 50
Previous part

Chapter: 6  
(Զ՜)


Passage: 2-7 
Verse: 1   Link to gnt   Եւ եղեւ ի շաբաթու յերկրորդում առաջնոյն՝ անցանել ընդ արտորայսն. եւ աշակերտքն նորա կորզէին հասկ՝ շփէին ընդ ափ, եւ ուտէին։

Verse: 2   Link to gnt   Եւ ոմանք ի Փարիսեցւոցն ասեն ցնոսա. զինչ գործէք՝ զոր չէ օրէն ի շաբաթու։

Verse: 3   Link to gnt   Պատասխանի ետ նոցա Յիսուս եւ ասէ. չիցէ ընթերցեալ ձեր՝ զոր արարն Դաւիթ, յորժամ քաղցեաւն ինքն՝ եւ որ ընդ նմայն էին։

Verse: 4   Link to gnt   Զիարդ եմուտ նա ի տունն Աստուծոյ, եւ զհացն զառաջաւորութեան եկեր՝ եւ ետ այնոցիկ որ ընդ նմայն էին. զոր ոչ էր օրէն ուտել, բայց միայն քահանայապետիցն։

Verse: 5   Link to gnt   Եւ ասէ ցնոսա. տէր է որդի մարդոյ եւ շաբաթու։

Section: 15  
Verse: 6   Link to gnt   Եւ եղեւ ի միւսում շաբաթուն մտանել նմա ի ժողովուրդն՝ եւ ուսուցանել. եւ էր անդ այր մի, եւ ձեռն իւր աջ՝ գօսացեալ էր։

Verse: 7   Link to gnt   Եւ սպասէին նմա դպիրքն եւ Փարիսեցիք՝ թէ ի շաբաթուն բժշկիցէ, զի գտանիցեն չարախօսութիւն զնմանէ։

Verse: 8   Link to gnt   Եւ նա գիտէր զխորհուրդս նոցա. ասէ ցայրն՝ որոյ ձեռնն գօսացեալ էր. արի՝ անց ի մէջ, եւ նա յարուցեալ եկաց։

Verse: 9   Link to gnt   Ասէ ցնոսա Յիսուս. հարցից ինչ զձեզ. զինչ արժան է ի շաբաթու, բարի ինչ առնել՝ եթէ չար գործել, ոգի մի ապրեցուցանել՝ թէ կորուսանել։

Verse: 10   Link to gnt   Եւ հայեցեալ շուրջ զամենեքումբք զայրագին, ասէ ցնա. ձգեայ զձեռն քո. եւ նա ձգեաց, եւ հաստատեցաւ ձեռն նորա իբրեւ զմեւսն։

Verse: 11   Link to gnt   Նոքա լցան յիմարութեամբ, եւ խօսէին ընդ միմեանս, թէ զինչ առնիցեն Յիսուսի։

Passage: 3-1 
Verse: 12   Link to gnt   Եւ եղեւ ընդ աւուրսն ընդ այնոսիկ՝ ել ի լեառն կալ յաղօթս. եւ հանէր զգիշերն ի գլուխ յաղօթսն Աստուծոյ։

Section: 16  
Verse: 13   Link to gnt   Եւ իբրեւ այգ եղեւ՝ կոչեաց զաշակերտսն իւր. եւ ընտրեաց ի նոցանէ երկոտասանս, զորս եւ առաքեալս անուանեաց։

Verse: 14   Link to gnt   ԶՍիմովն՝ զոր եւ Պետրոսն անուանեաց. եւ զԱնդրէաս եղբայր նորին, եւ զՅակովբոս, եւ զՅովհաննէս, եւ զՓիլիպպոս, եւ զԲարթողովմէոս.

Verse: 15   Link to gnt   ԶՄատթէոս,եւ զԹովմաս, եւ զՅակովբոս Ալփեայ, եւ զՍիմովն զկոչեցեալն զՆախանձայոյզ,

Verse: 16   Link to gnt   եւ զՅուդայ Յակովբայ, եւ զՅուդայ Սկարիովտացի՝ որ եղեւ իսկ մատնիչ։

Verse: 17   Link to gnt   Եւ իջեալ նոքօք հանդերձ ի տեղի մի տափարակ. եւ ժողով աշակերտացն նորա, եւ բազմութիւն յոյժ ժողովրդեանն յամենայն Հրեաստանէ, եւ յԵրուսաղեմէ, եւ յայնմ կողմանէ, եւ ի ծովեզերէն Տիւրոսի եւ Սիդոնի.

Verse: 18   Link to gnt   Որ եկին լսել՝ ի նմանէ, եւ բժշկել ի հիւանդութենէ իւրեանց. եւ նեղեալքն յայսոց պղծոց բժշկէին։

Verse: 19   Link to gnt   Եւ ամենայն ժողովուրդն խնդրէր մերձենալ ի նա, զի զօրութիւն բազում ելանէր ի նմանէ՝ եւ բժշկէր զամենեսին։

Section: 17  
Verse: 20   Link to gnt   Եւ նա՝ ամբարձ զաչս իւր յաշակերտսն իւր՝ եւ ասէ, Երանի աղքատացդ հոգւով, զի ձեր է արքայութիւն Աստուծոյ։

Verse: 21   Link to gnt   Երանի որ քաղցեալ են այժմ, զի յագեսցին։ Երանի որ լան այժմ, զի ծիծաղեսցին։

Verse: 22   Link to gnt   Երանի է ձեզ յորժամ նախատիցեն զձեզ մարդիկ, եւ յորժամ որոշիցեն զձեզ՝ եւ ատիցեն, եւ հանիցեն անուն չար զձէնջ վասն որդւոյ մարդոյ։

Verse: 23   Link to gnt   Ուրախ լիջիք յաւուր յայնմիկ եւ ցնծասջիք. զի ահա՝ վարձք ձեր բազում են յերկինս. ըստ դմին օրինակի առնէին մարգարէիցն հարքն իւրեանց։

Verse: 24   Link to gnt   Բայց վայ ձեզ մեծատանցդ. զի ընկալայք զմխիթարութիւն ձեր։

Verse: 25   Link to gnt   Վայ ձեզ զոր յագեալդ էք այժմ, զի քաղցիցէք. վայ ձեզ որ ծիծաղիքդ այժմ. զի սգայցէք եւ լայցէք։

Verse: 26   Link to gnt   Վայ ձեզ՝ յորժամ բարի ասիցեն զձէնջ ամենայն մարդիկ. զի այդպէս առնէին սուտ մարգարէիցն հարք նոցա։

Verse: 27   Link to gnt   Այլ ձեզ ասեմ որ լսէքդ. սիրեցէք զթշնամիս ձեր, բարի արարէք ատելեաց ձերոց։

Verse: 28   Link to gnt   Օրհնեցէք զանիծիչս ձեր. աղօթս արարէք ի վերայ նեղչաց ձերոց։

Verse: 29   Link to gnt   Որ Հարկանէ զծնօտ քո, մատո նմա եւ զմեւսն. եւ որ հանէ ի քէն զբաճկոն քո, մի արգելուր ի նմանէ եւ զշապիկս։

Verse: 30   Link to gnt   Ամենայնի՝ որ խնդրէ ի քէն տուր, եւ զոր ինչ հանէ ոք ի քէն՝ մի պահանջեր։

Verse: 31   Link to gnt   Եւ որպէս կամիք թէ արասցեն ձեզ մարդիկ. այնպէս արասջիք եւ դուք նոցա։

Verse: 32   Link to gnt   Եւ եթէ սիրէք դուք զսիրելիս ձեր, զինչ շնորհ է ձեր. զի եւ մեղաւորք սիրեն զսիրելիս իւրեանց։

Verse: 33   Link to gnt   Եւ եթէ բարի առնէք բարերարաց ձերոց, որ շնորհ է ձեր. զի եւ մեղաւորք զնոյն գործեն։

Verse: 34   Link to gnt   Եւ եթէ տայք փոխ այնոցիկ յորոց ակն ունիք առնուլ, որ շնորհ է ձեր. քանզի եւ մեղաւորք մեղաւորաց փոխ տան, զի առցեն անդէն զկշիռն։

Verse: 35   Link to gnt   Բայց սիրեցէք զթշնամիս ձեր, եւ բարի արարէք ատելեաց ձերոց, եւ տուք փոխ՝ ուստի ոչ ակն ունիցիք առնուլ. եւ եղիցի վարձք ձեր բազում, եւ եղիջիք որդիք բարձրելոյն. զի նա՝ քաղցր է ի վերայ չարաց եւ ապաշնորհաց։

Verse: 36   Link to gnt   Եւ եղերուք գթածք՝ որպէս եւ հայրն ձեր գթած է։

Verse: 37   Link to gnt   Մի դատիք՝ եւ ոչ դատիցիք. մի պատժէք՝ եւ ոչ պատժիցիք եւ արձակիցէք եւ արձակիցիք։

Verse: 38   Link to gnt   Տուք՝ եւ տացի ձեզ. չափ բարւոք թաթաղուն շարժուն զեղուն՝ տացեն ի գոգս ձեր. նովին չափով որով չափէք՝ չափեսցի ձեզ։

Verse: 39   Link to gnt   Ասաց եւ առակ մի առ նոսա. միթէ կարիցէ կոյր կուրի առաջնորդել, ոչ ապաքէն երկոքին ի խորխորատ անկանիցին.

Verse: 40   Link to gnt   Ոչ է աշակերտ լաւ քան զվարդապետ իւր. ամենայն կատարեալն՝ եղիցի իբրեւ զվարդապետ իւր։

Verse: 41   Link to gnt   Զի տեսանես զշիւղ յական եղբօր քոյ, եւ ի քում ական զգերանդ ոչ նշմարես։

Verse: 42   Link to gnt   Կամ զիարդ կարես ասել ցեղբայր քո. եղբայր՝ թող հանից զշիւղդ յականէ քումմէ, եւ դու ի քում ական զգերանդ ոչ տեսանես։ Կեղծաւոր՝ հան նախ զգերանդ յականէ քումմէ, եւ ապա հայեսջիր հանել զշիւղ յականէ եղբօր քոյ։

Verse: 43   Link to gnt   Զի ոչ է ծառ բարի, որ առնէ պտուղ չար եւ ոչ դարձեալ ծառ չար՝ որ առնէ պտուղ բարի.

Verse: 44   Link to gnt   Զի իւրաքանչիւր ծառ ի պտղոյ իւրմէ ճանաչի։ Զի ոչ եթէ ի փշոց քաղեն թուզ, եւ ոչ ի մորենւոյ կթեն խաղող։

Verse: 45   Link to gnt   Մարդ բարի՝ ի բարի գանձուց սրտի իւրոյ բղխէ զբարի, եւ մարդ չար՝ ի չարէն բղխէ զչար. քանզի ի յաւելուածոյ սրտին խօսի բերան նորա։

Verse: 46   Link to gnt   Զի կոչէք զիս՝ տէր՝ տէր, եւ զոր ասեմն ոչ առնէք։

Verse: 47   Link to gnt   Ամենայն որ գայ առ իս, եւ լսէ զբանս իմ՝ եւ առնէ զնոսա, ցուցից ձեզ ում նման է։

Verse: 48   Link to gnt   Նման է առն, որ շինիցէ տուն, որ փորեաց եւ խորեաց. եւ եդ հիմն ի վերայ վիմի. ի յառնել հեղեղաց՝ բախեաց գետ զտունն, եւ ոչ կարաց շարժել զնա. զի հաստատեալ էր հիմնն ի վերայ վիմի։

Verse: 49   Link to gnt   Իսկ որ լսէ զբանս իմ՝ եւ ոչ առնէ, նման է առն որ շինիցէ տուն ի վերայ հողոյ առանց հիման. զոր բախեաց գետ, եւ վաղվաղակի անկաւ, եւ եղեւ կործանումն տանն այնորիկ մեծ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.