TITUS
Armenian NT (Zohrab Bible)
Part No. 49
Previous part

Chapter: 5  
(Ե՜)


Verse: 1   Link to gnt   Եւ եղեւ ի խռնել զնովաւ ժողովրդեանն, եւ լսել զբանն Աստուծոյ, եւ ինքն կայր առ ծովակին Գէննէսարեթայ։

Verse: 2   Link to gnt   Եւ ետես երկուս նաւս զի կային առ ծովակին, եւ ձկնորսքն ելեալ ի նոցանէ լուանային զգործիսն։

Verse: 3   Link to gnt   Ել նա ի մի նաւուցն որ էր Սիմովնի, եւ աղաչեաց զնա՝ սակաւիկ մի տանել ի ներքս ի ցամաքէն. նստաւ՝ ուսուցանէր ի նաւէ անտի զժողովուրդսն։

Section: 11  
Verse: 4   Link to gnt   Եւ իբրեւ լռեաց ի խօսիցն, ասէ ցՍիմովն. խաղացո ի խորն, եւ արկէք զգործիս ձեր յորս։

Verse: 5   Link to gnt   Պատասխանի ետ Սիմովն՝ եւ ասէ ցնա. վարդապետ՝ զամենայն գիշերս աշխատ եղեաք, եւ ոչինչ կալաք. բայց վասն քո բանիդ՝ արկցուք զգործիսս։

Verse: 6   Link to gnt   Զայս իբրեւ արարին՝ փակեցին ի ներքս բազմութիւն ձկանց յոյժ, մինչեւ պարպատէին ուռկանքն նոցա։

Verse: 7   Link to gnt   Եւ ակնարկէին որսակցացն ի մեւս նաւն՝ գալ օգնել նոցա. եւ եկին, եւ լցան երկոքին նաւքն՝ մինչեւ մերձ յընկղմել նոցա։

Verse: 8   Link to gnt   Իբրեւ ետես Սիմովն Պետրոս՝ անկաւ առ ծունկսն Յիսուսի եւ ասէ. ի բաց գնա յինէն տէր, զի այր՝ մեղաւոր եմ ես։

Verse: 9   Link to gnt   Քանզի ահ պատեաց զնա, եւ զամենեսեան որ ընդ նմայն էին, վասն որսոյ ձկանցն զոր ըմբռնեցին։

Verse: 10   Link to gnt   Նոյնպէս եւ զՅակովբոս եւ զՅովհաննէս՝ զորդիսն Զեբեդեայ, որ էին որսակիցք Սիմովնի։ Եւ ասէ ցՍիմովն Յիսուս. մի երկնչիր՝ յայսմ հետէ զմարդիկ որսայցես ի կեանս։

Verse: 11   Link to gnt   Եւ հանեալ զնաւն ի ցամաք, թողին զամենայն, եւ գնացին զհետ նորա,

Section: 12  
Passage: 2-4 
Verse: 12   Link to gnt   Եւ եղեւ ի հասանելն նորա ի մի ի քաղաքացն, ահա այր մի լի բորոտութեամբ՝ իբրեւ ետես զՅիսուս, անկեալ ի վերայ երեսաց աղաչեաց զնա՝ եւ ասէ. տէր՝ եթէ կամիս, կարօղ ես զիս սրբել։

Verse: 13   Link to gnt   Ձգեաց զձեռն իւր՝ հասոյց ի նա՝ եւ ասէ. կամիմ սրբեաց, եւ վաղվաղակի գնաց ի նմանէ բորոտութիւնն։

Verse: 14   Link to gnt   Եւ նա՝ պատուիրեաց նմա՝ մի ումէք ասել, այլ թէ երթ ցոյց զանձն քո քահանային. եւ մատո պատարագս վասն սրբութեան քոյ, որպէս եւ հրամայեաց Մովսէս՝ ի վկայութիւն նոցա։

Verse: 15   Link to gnt   Եւ յորդէր առաւել բանն զնմանէ. եւ ժողովէին ժողովուրդք բազումք լսել եւ բժշկել ի հիւանդութենէ իւրեանց։

Verse: 16   Link to gnt   Եւ նա՝ խոյս տայր յանապատ տեղիս, եւ կայր յաղօթս։

Section: 13  
Passage: 2-5 
Verse: 17   Link to gnt   Եւ եղեւ ի միում աւուրց՝ եւ ինքն ուսուցանէր, եւ Փարիսեցիքն եւ օրինացն վարդապետք նստէին. որք ժողովեալ էին յամենայն քաղաքաց Գալիլեացւոց՝ եւ Հրէաստանի, եւ Երուսաղէմի. եւ զօրութիւն տեառն էր ի բժշկել զնոսա։

Verse: 18   Link to gnt   Եւ ահա արք՝ բերէին մահճօք զայր մի՝ որ էր անդամալոյծ, եւ խնդրէին զնա մուծանել ի ներքս, եւ դնել առաջի նորա։

Verse: 19   Link to gnt   Եւ իբրեւ ոչ գտանէին թէ ընդ որ մուծանիցեն զնա ի ներքս՝ վասն ամբոխին, ելին ի տանիս, եւ ի ցուոցն կախեցին զնա, եւ իջուցին մահճօքն հանդերձ ի մէջ առաջի Յիսուսի։

Verse: 20   Link to gnt   Եւ տեսեալ զհաւատսն նոցա՝ ասէ ցնա. այր դու՝ թողեալ լիցին քեզ մեղք քո։

Verse: 21   Link to gnt   Սկսան խորհել դպիրքն եւ Փարիսեցիք՝ եւ ասեն. ով է սա՝ որ խօսի զհայհոյութիւնս. ով կարէ թողուլ զմեղս, բայց միայն Աստուած։

Verse: 22   Link to gnt   Իբրեւ գիտաց Յիսուս զխորհուրդսն նոցա, պատասխանի ետ եւ ասէ ցնոսա. զի խորհիք ի սիրտս ձեր։

Verse: 23   Link to gnt   Զինչ դիւրագոյն է. ասել՝ թողեալ լիցին քեզ մեղք քո, եթէ ասել՝ արի եւ գնա։

Verse: 24   Link to gnt   Այլ զի գիտասջիք՝ եթէ իշխանութիւն ունի որդի մարդոյ յերկրի՝ թողուլ զմեղս. ասէ ցանդամալոյծն, քեզ ասեմ՝ արի առ զմահիճս քո, եւ երթ ի տուն քո։

Verse: 25   Link to gnt   Եւ առժամայն յարուցեալ առաջի ամենեցուն, առ զիւրեւ՝ յորոյ վերայ անկեալն դնէր, գնաց ի տուն իւր, եւ փառաւոր առնէր զԱստուած։

Verse: 26   Link to gnt   Զարմանք կալան զամենեսին, եւ փառաւոր առնէին զԱստուած. լի եղեն ահիւ՝ եւ ասեն. եթէ տեսաք այսօր՝ նոր նշան։

Section: 14  
Passage: 2-6 
Verse: 27   Link to gnt   Եւ յետ այնորիկ՝ ել անտի, եւ ետես մաքսաւոր մի որուն անուն էր Ղեւի, զի նստէր ի մաքսաւորութեան եւ ասէ ցնա՝ եկ զկնի իմ։

Verse: 28   Link to gnt   Եւ թողեալ զամենայն՝ յարեաւ գնաց զկնի նորա։

Verse: 29   Link to gnt   Եւ արար ընդունելութիւն մեծ նմա Ղեւի ի տան իւրում։ Եւ էր ժողովուրդ բազում մաքսաւորաց, եւ այլոց՝ որ էին բազմեալ ընդ նոսա։

Verse: 30   Link to gnt   Եւ տրտնջէին Փարիսեցիքն եւ դպիրքն նոցա զնմանէ առ աշակերտսն նորա՝ եւ ասէին. ընդէր ընդ մաքսաւորս եւ ընդ մեղաւորս ուտէք եւ ըմպէք։

Verse: 31   Link to gnt   Պատասխանի ետ Յիսուս՝ եւ ասէ ցնոսա, ոչ են պիտոյ բժիշկք ողջոց, այլ հիւանդաց.

Verse: 32   Link to gnt   Ոչ եկի կոչել զարդարս, այլ զմեղաւորս յապաշխարութիւն։

Verse: 33   Link to gnt   Եւ նոքա ասեն ցնա. ընդէր աշակերտքն Յովհաննու պահեն ստէպ, եւ խնդրուածս առնեն, նոյնպէս եւ Փարիսեցւոցն. եւ քոյքդ ուտեն եւ ըմպեն։

Verse: 34   Link to gnt   Եւ նա՝ ասէ ցնոսա. միթէ՝ կարօղ էք մանկանց առագաստի, մինչ փեսայն ընդ նոսա իցէ՝ հրաման տալ պահել։

Verse: 35   Link to gnt   Եկեսցէ աւուրք՝ յորժամ բարձցի ի նոցանէ փեսայն, ապա պահեսցեն յաւուրսն յայնոսիկ։

Verse: 36   Link to gnt   Ասաց եւ առակ մի առ նոսա, թէ ոչ ոք արկանէ ի նոր հանդերձէ ի վերայ հնացեալ ձորձոյ. ապա թէ ոչ՝ եւ զնորն պատառէ, եւ ընդ հնոյն չմիաբանի կապերտն որ ի նորոյն։

Verse: 37   Link to gnt   Եւ ոչ ոք արկանէ գինի նոր ի տիկսն հինս. ապա թէ ոչ՝ պայթուցանէ գինին նոր զտիկսն հինս. ինքն հեղու, եւ տիկքն կորնչին։

Verse: 38   Link to gnt   Այլ գինի նոր՝ ի տիկս նորս արկանելի է, եւ երկոքին պահին։

Verse: 39   Link to gnt   Եւ ոչ ոք ըմպէ զհինն՝ եւ կամիցի զնորն. քանզի ասէ՝ թէ հինն քաղցրագոյն է։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.