TITUS
Armenian NT (Zohrab Bible)
Part No. 48
Previous part

Chapter: 4  
(Դ՜)


Section: 7 
Verse: 1   Link to gnt   Եւ Յիսուս լի հոգւով սրբով դարձաւ ի Յորդանանէ. եւ վարէր հոգւովն յանապատ,

Verse: 2   Link to gnt   Աւուրս քառասուն փորձեալ ի սատանայէ։ եւ ոչ եկեր, եւ ոչ արբ յաւուրսն յայնոսիկ. եւ ի կատարելն նոցա քաղցեաւ։

Verse: 3   Link to gnt   Եւ ասէ ցնա սատանայ. եթէ որդի ես Աստուծոյ. ասա քարիդ այդմիկ՝ զի հաց լիցի։

Verse: 4   Link to gnt   Պատասխանի ետ նմա Յիսուս եւ ասէ. գրեալ է՝ եթէ ոչ հացիւ միայն կեցցէ մարդ, այլ ամենայն բանիւ Աստուծոյ։

Verse: 5   Link to gnt   Եւ հանեալ զնա ի լեառն մի բարձր՝ եցոյց նմա զամենայն թագաւորութիւնս աշխարհի ի վայրկեան ժամանակի։

Verse: 6   Link to gnt   Եւ ասէ ցնա սատանայ. քեզ տաց զայս ամենայն իշխանութիւն եւ զփառս սոցա. զի ինձ տուեալ է. եւ ում կամիմ՝ տամ զսա,

Verse: 7   Link to gnt   Արդ դու եթէ անկեալ երկիր պագանիցես առաջի իմ, քեզ եղիցի ամենայն։

Verse: 8   Link to gnt   Պատասխանի ետ նմա Յիսուս՝ եւ ասէ. գրեալ է, երկիր պագցես տեառն Աստուծոյ քում, եւ զնա միայն պաշտեսցես։

Verse: 9   Link to gnt   Եւ ած զնա յԵրուսաղէմ. եւ կացոյց ի վերայ աշտարակի տաճարին, եւ ասէ ցնա. եթէ որդի ես Աստուծոյ. արկ զքեզ աստի ի վայր։

Verse: 10   Link to gnt   Զի գրեալ է՝ եթէ հրեշտակաց իւրոց պատուիրեալ է վասն քո, պահել զքեզ։

Verse: 11   Link to gnt   Զի ի վերայ ձեռաց բարձցեն զքեզ, մի երբէք հարցես զքարի զոտն քո։

Verse: 12   Link to gnt   Պատասխանի ետ նմա Յիսուս եւ ասէ. ասացեալ է, թէ ոչ փորձեսցես զտէր Աստուած քո։

Verse: 13   Link to gnt   Եւ կատարեալ զամենայն փորձութիւնս սատանայի, ի բաց եկաց ի նմանէ առ ժամանակ մի։

Passage: 2-1 
Verse: 14   Link to gnt   Եւ դարձաւ Յիսուս զօրութեամբ հոգւոյն ի Գալիլեա. եւ ել համբաւ զնմանէ ընդ ամենայն կողմանս գաւառին։

Verse: 15   Link to gnt   Եւ նա՝ ուսուցանէր ի ժողովուրդս նոցա փառաւորեալ յամենեցունց։

Verse: 16   Link to gnt   Եւ եկն ի Նազարեթ՝ ուր սնեալն էր. եւ եմուտ ըստ սովորութեան իւրում յաւուր շաբաթու ի ժողովուրդն։

Verse: 17   Link to gnt   Եւ ետուն նմա գիրս զԵսայայ մարգարէի, եւ յարեաւ ընթեռնուլ, եւ իբրեւ եբաց զգիրսն՝ եգիտ զայն տեղի յորում գրեալն էր։

Verse: 18   Link to gnt   Հոգի տեառն ի վերայ իմ, վասն որոյ եւ օծ իսկ զիս. աւետարանել աղքատաց առաքեաց զիս. բժշկել զբեկեալս սրտիւ.

Verse: 19   Link to gnt   Քարոզել գերեաց զթողութիւն եւ կուրաց տեսանել. արձակել զվիրաւորս ի թողութիւն. քարոզել զտարեկան տեառն ընդունելի։

Verse: 20   Link to gnt   Եւ խփեալ զգիրսն՝ ետ ցպաշտօնեայն՝ եւ նստաւ, եւ ամենեցուն որ ի ժողովրդեանն էին աչք՝ ի նա հայէին։

Verse: 21   Link to gnt   Եւ սկսաւ ասել ցնոսա. այսօր լցան գիրքս այս յականջս ձեր։

Verse: 22   Link to gnt   Եւ ամենեքին վկայէին նմա, եւ զարմանային ընդ բանս շնորհացն որ ելանէին ի բերանոյ նորա։ եւ ասէին, ոչ սա է որդին Յովսեփայ։

Verse: 23   Link to gnt   Եւ ասէ ցնոսա. ապաքէն ասիցէք առ իս զառակս զայս։ բժիշկ՝ բժշկեա զանձն քո. որչափ լուաք՝ զոր արարեր ի Կափառնաում, արա եւ աստ ի քում գաւառի։

Verse: 24   Link to gnt   Եւ ասէ. ամէն ասեմ ձեզ, թէ չէ մարգարէ ընդունելի ի քաղաքի իւրում։

Verse: 25   Link to gnt   Արդարեւ՝ ասեմ ձեզ. զի բազում այրիք էին յաւուրս Եղիայի ի մէջ Իսրայելի, յորժամ փակեցանն երկինք զերիս ամս եւ զվեց ամիս. եւ եղեւ սով մեծ ընդ ամենայն երկիր։

Verse: 26   Link to gnt   Եւ ոչ առ մի ի նոցանէ առաքեցաւ Եղիա, բայց միայն ի Սարեփթա Սիդովնացւոց՝ առ կին մի այրի։

Verse: 27   Link to gnt   Եւ բազում բորոտք էին յԻսրայէլի առ Եղիսեիւ մարգարէիւ. եւ ոչ ոք ի նոցանէ սրբեցաւ, բայց միայն Նէեման Ասորի։

Verse: 28   Link to gnt   Եւ լցան ամենեքին բարկութեամբ ի ժողովրդեանն՝ իբրեւ լսէին զայս։

Verse: 29   Link to gnt   Եւ յարուցեալ հանին զնա արտաքոյ քաղաքին, եւ ածին զնա մինչեւ յարտեւանն լերինն՝ յորոյ վերայ քաղաքն նոցա շինեալ էր, գահավեժ առնել զնա։

Verse: 30   Link to gnt   Եւ նա՝ անցեալ ընդ մէջն նոցա գնայր։

Passage: 2-2 
Verse: 31   Link to gnt   Եւ էջ ի Կափառնաում ի քաղաքն Գալիլեացւոց, եւ ուսուցանէր զնոսա ի շաբաթսն,

Verse: 32   Link to gnt   Եւ զարմանային ընդ վարդապետութիւնն նորա, զի իշխանութեամբ էր բանն նորա։

Section: 8  
Verse: 33   Link to gnt   Եւ էր ի ժողովրդեանն այր մի զոր ունէր՝ այս դիւի պղծոյ, եւ աղաղակեաց ի ձայն մեծ՝

Verse: 34   Link to gnt   Եւ ասէ. թուլացո՝ զի կայ մեր եւ քո Յիսուս Նազովրեցի, եկիր կորուսանել զմեզ. գիտեմք զքեզ ով ես՝ սուրբդ Աստուծոյ։

Verse: 35   Link to gnt   Սաստեաց ի նա Յիսուս եւ ասէ. պապանձեաց՝ եւ ել ի դմանէ։ զգետնեաց զնա դեւն ի միջի անդ, եւ ել ի նմանէ, եւ ոչ ինչ վնասեաց նմա։

Verse: 36   Link to gnt   Եւ եղեն զարմանալիք ի վերայ ամենեցուն. խօսէին ընդ միմեանս եւ ասէին. զինչ է բանս այս, զի իշխանութեամբ եւ զօրութեամբ սաստէ այսոց պղծոց՝ եւ ելանեն։

Verse: 37   Link to gnt   Եւ երթայր հռչակ զնմանէ յամենայն տեղիս շուրջ զգաւառաւն։

Section: 9  
Verse: 38   Link to gnt   Եւ յարուցեալ ի ժողովրդենէ անտի, եմուտ ի տուն Սիմովնի։

Verse: 39   Link to gnt   Զոքանչ Սիմովնի տագնապէր ջերմամբ մեծաւ, եւ աղաչեցին զնա վասն նորա։

Verse: 40   Link to gnt   Եկաց առ նմա, սաստեաց ջերմանն, եւ եթող զնա։ եւ վաղվաղակի յարեաւ՝ եւ պաշտէր զնոսա։

Section: 10  
Verse: 41   Link to gnt   Եւ ընդ արեւուն մտանել՝ ամենեքին որոց էին հիւանդք ի պէսպէս ցաւս, բերէին զնոսա առ նա։ Եւ նա իւրաքանչիւր ումեք ի նոցանէ դնէր ձեռս, եւ բժշկէր զնոսա։

Verse: 42   Link to gnt   Ելանէին եւ դեւք ի բազմաց՝ աղաղակէին եւ ասէին. եթէ դու ես որդի Աստուծոյ։ եւ նա՝ սաստէր եւ ոչ տայր նոցա թոյլ խօսել, զի գիտէին զնա թէ Քրիստոսն է։

Passage: 2-3 
Verse: 43   Link to gnt   Եւ իբրեւ տիւ եղեւ՝ ել գնաց յանապատ տեղի. եւ ժողովուրդքն խնդրէին զնա. եկին մինչեւ առ նա՝ եւ արգելուին զնա. զի մի գնասցէ ի նոցանէ։

Verse: 44   Link to gnt   Եւ նա՝ ասէ ցնոսա. եւ այլոց քաղաքաց պարտ է ինձ աւետարանել զարքայութիւնն Աստուծոյ, զի յայն իսկ առաքեցայ։

Verse: 45   Link to gnt   Եւ քարոզէր ի ժողովուրդսն Գալիլեացւոց։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.