TITUS
Armenian NT (Zohrab Bible)
Part No. 33
Previous part

Chapter: 5  
(Ե՜)


Section: 11  
Verse: 1   Link to gnt   Եւ եկն յայնկոյս ծովուն՝ յաշխարհն գերգեսացւոց։

Verse: 2   Link to gnt   Եւ ընդ ելանելն նորա ի նաւէ անտի, պատահեաց նմա այր մի ի գերեզմանացն՝ զոր ունէր այս պիղծ։

Verse: 3   Link to gnt   որոյ եւ բնակութիւնն իւր իսկ ի գերեզմանս էր. եւ ոչ շղթայիւք ոք եւս՝ կարէր կապել զնա.

Verse: 4   Link to gnt   Վասն բազում անգամ ոտնակապովք եւ շղթայիւք կապելոյ, եւ խզելոյ ի նմանէ զշղթայսն, եւ զոտնակապսն խորտակելոյ. եւ ոչ ոք կարէր պարտել զնա.

Verse: 5   Link to gnt   Քանզի հանապազ զցայգ եւ զցերեկ ի գերեզմանս եւ ի լերինս աղաղակէր, եւ կոծէր զանձն իւր քարամբք։

Verse: 6   Link to gnt   Իբրեւ ետես զՅիսուս ի հեռաստանէ, ընթացաւ եւ երկիր եպագ նմա։

Verse: 7   Link to gnt   Աղաղակեաց ի ձայն մեծ՝ եւ ասէ. զի կայ՝ իմ եւ քո՝ Յիսուս որդի Աստուծոյ բարձրելոյ. երդմնեցուցանեմ զքեզ յԱստուած, մի տանջեր զիս։

Verse: 8   Link to gnt   Քանզի ասէր ցնա. ել այսդ պիղծ ի մարդոյ այտի։

Verse: 9   Link to gnt   Եւ հարցանէր ցնա՝ թէ զինչ անուն է քո։ եւ ասէր ցնա. լեգէովն է անուն իմ, քանզի բազումք եմք։

Verse: 10   Link to gnt   Եւ աղաչէին զնա յոյժ, զի մի առաքեսցէ զնոսա արտաքս քան զաշխարհն։

Verse: 11   Link to gnt   Եւ անդ էր առ լերամբն՝ երամակ մի խոզաց արօտական մեծ։

Verse: 12   Link to gnt   Աղաչեցին զնա ամենայն դեւքն՝ եւ ասեն, առաքեա զմեզ ի խոզսն, զի մտցուք ի նոսա։

Verse: 13   Link to gnt   Եւ հրամայեաց նոցա։ Եւ իբրեւ ելին այսքն պիղծ՝ մտին ի խոզսն, եւ դիմեաց երամակն ի դարէ անտի ի ծովն. էին իբրեւ երկու հազարք, եւ հեղձնուին ի ծովուն։

Verse: 14   Link to gnt   խոզարածքն փախան, եւ պատմեցին ի քաղաքին եւ յագարակս՝ եւ ելին տեսանել զինչ իցէ որ գործեցաւ։

Verse: 15   Link to gnt   Գան առ Յիսուս, եւ տեսանեն զդիւահարն զի նստէր զգեցեալ եւ զգաստացեալ, որ ունէր զլեգէոնն. եւ զահի հարան։

Verse: 16   Link to gnt   Եւ պատմեցին նոցա՝ որոց տեսեալն էր, թէ զինչ եղեւ այսահարին, եւ զինչ վասն խոզիցն։

Verse: 17   Link to gnt   Եւ սկսան աղաչել զնա՝ գնալ ի սահմանաց նոցա։

Verse: 18   Link to gnt   Եւ իբրեւ եմուտ նա ի նաւն, աղաչէր, զնա դիւահարն զի ընդ նմա իցէ։

Verse: 19   Link to gnt   Եւ Յիսուս ոչ ետ նմա թոյլ. այլ ասէ ցնա. երթ ի տուն քո առ ընտանիս քո, եւ պատմեա նոցա, որ ինչ միանգամ տէր արար քեզ՝ եւ ողորմեցաւ քեզ։

Verse: 20   Link to gnt   Եւ չոգաւ՝ եւ սկսաւ քարոզել ի դեկապոլին, զոր ինչ արար նմա Յիսուս. եւ ամենեքին զարմանային։

Passage: 3-3 
Verse: 21   Link to gnt   Եւ իբրեւ անց Յիսուս միւսանգամ յայն կողմն՝ ժողովեցաւ առ նա ժողովուրդ բազում, եւ էր առ ծովեզերբն։

Section: 12  
Verse: 22   Link to gnt   Եւ ահա մի ի ժողովրդապետացն գայր, որում անուն էր յայրոս. իբրեւ ետես զնա՝ անկաւ առ ոտս նորա.

Verse: 23   Link to gnt   աղաչէր զնա յոյժ եւ ասէր, թէ դուստր նորա մերձ է ի մահ. զի եկեալ դնիցէ նմա ձեռն, որպէս զի ապրեսցի եւ կեցցէ.

Verse: 24   Link to gnt   Եւ գնաց ընդ նմա։ երթայր եւ ժողովուրդ բազում զհետ նորա, եւ նեղէին զնա։

Section: 13  
Verse: 25   Link to gnt   Եւ կին մի՝ էր ի տեռատեսութեան արեան զերկոտասան ամ.

Verse: 26   Link to gnt   յոյժ վշտացեալ ի բազում բժշկաց, եւ ծախեալ զինչս իւր զամենայն, եւ չէր ինչ օգտեալ, այլ եւս առաւել զայրացեալ։

Verse: 27   Link to gnt   Իբրեւ լուաւ զՅիսուսէ, եկն ի մէջ ամբոխին յետոյ՝ եւ բուռն եհար զհանդերձէ նորա։

Verse: 28   Link to gnt   քանզի խորհէր ի մտի, թէ միայն մերձեցայց ի հանդերձս նորա՝ փրկեցայց։

Verse: 29   Link to gnt   Եւ վաղվաղակի ցամաքեցաւ աղբեւր արեան նորա. եւ գիտաց մարմին իւր թէ բժշկեցաւ ի տանջանացն։

Verse: 30   Link to gnt   Եւ անդէն վաղվաղակի գիտաց Յիսուս յանձն իւր զզօրութիւնն որ ել ի նմանէ, դարձաւ յամբոխն եւ ասէ. ով մերձեցաւ ի հանդերձս իմ։

Verse: 31   Link to gnt   Եւ ասեն ցնա աշակերտքն. տեսանես՝ զի ամբոխդ նեղէ զքեզ, եւ ասես թէ ով մերձեցաւ ի հանդերձս իմ։

Verse: 32   Link to gnt   Եւ շուրջ հայէր տեսանել թէ ո զայն արար։

Verse: 33   Link to gnt   Եւ կինն՝ զարհուրեալ եւ դողացեալ վասն որոյ գաղտն արար. քանզի գիտէր զինչ եղեւ նմա։ եկն՝ անկաւ առաջի նորա, եւ ասաց զամենայն իրս ստուգութեամբ։

Verse: 34   Link to gnt   Եւ Յիսուս ասէ ցնա, դուստր՝ հաւատք քո կեցուցին զքեզ. երթ ի խաղաղութիւն. եւ եղիջիր ողջ ի տանջանաց քոց։

Passage: 4-4 
Verse: 35   Link to gnt   Մինչ դեռ նա զայն խօսէր, գան ոմանք ի տանէ ժողովրդապետին՝ եւ ասեն, թէ դուստրն քո մեռաւ, զի եւս աշխատ առնես զվարդապետդ։

Verse: 36   Link to gnt   Իսկ Յիսուս իբրեւ լուաւ զբանն ասացեալ, ասէ ցժողովրդապետն. մի երկնչիր. բայց միայն՝ հաւատա։

Verse: 37   Link to gnt   Եւ ոչ զոք եթող իւր երթալ, բայց միայն զպետրոս եւ զյակովբոս եւ զյովհաննէս՝ զեղբայրն յակովբայ։

Verse: 38   Link to gnt   Գայ ի տուն ժողովրդապետին, եւ տեսանէ ամբոխ յոյժ, եւ լալականս եւ աղաղակ յոյժ։

Verse: 39   Link to gnt   Եւ մտեալ ի ներքս՝ ասէ ցնոսա. զի խռովեալ էք եւ լայք, մանուկն ոչ է մեռեալ. այլ ննջէ։

Verse: 40   Link to gnt   եւ ծաղր առնէին զնա։ Եւ նորա հանեալ արտաքս զամենեսեան. առնու ընդ իւր զհայր մանկանն եւ զմայր, եւ զնոսա որ ընդ նմին էին։ եւ մտանէ ուր դնէր մանուկն։

Verse: 41   Link to gnt   Եւ կալեալ զձեռանէ եւ մանկանն՝ ասէ ցնա. տալիթա կումի. որ թարգմանի, աղջիկ դու՝ քեզ ասեմ արի։

Verse: 42   Link to gnt   Եւ վաղվաղակի յարեաւ աղջիկն, եւ գնայր. քանզի էր ամաց իբրեւ երկոտասանից եւ զարմացան մեծաւ զարմանալեօք։

Verse: 43   Link to gnt   Եւ պատուէր տայր նոցա յոյժ զի մի ոք գիտասցէ զայն. եւ ասաց՝ տալ նմա ուտել։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.