TITUS
Armenian NT (Zohrab Bible)
Part No. 31
Previous part

Chapter: 3  
(Գ՜)


Section: 7  
Verse: 1   Link to gnt   Եւ եմուտ միւսանգամ ի ժողովուրդն. եւ էր անդ այր մի՝ որոյ ձեռն իւր գօսացեալ օր։

Verse: 2   Link to gnt   Եւ սպասէին նմա՝ եթէ բժշկեսցէ զնա ի շաբաթուն. զի չարախօսեսցեն զնմանէ։

Verse: 3   Link to gnt   Եւ ասէ ցայրն՝ որոյ ձեռն գօսացեալ էր. արի անց ի մէջ։

Verse: 4   Link to gnt   Եւ ասէ ցնոսա. զինչ արժան է ի շաբաթու, բարի ինչ գործել՝ եթէ չար առնել, ոգի մի ապրեցուցանել՝ եթէ կորուսանել։ եւ նոքա լռեցին։

Verse: 5   Link to gnt   Հայեցեալ Յիսուսի զնոքօք լի ցասմամբ, տրտմեալ վասն կուրութեան սրտից նոցա. ասէ ցայրն. ձգեա զձեռն քո. եւ նա ձգեաց, եւ ողջացաւ ձեռն նորա։

Passage: 3-1 
Verse: 6   Link to gnt   Եւ ելեալ արտաքս վաղվաղակի փարիսեցիքն հրովդիանոսօքն հանդերձ, խորհուրդ առնէին վասն թէ զիարդ կորուսցեն զնա։

Verse: 7   Link to gnt   Իսկ Յիսուս աշակերտօքն իւրովք գնաց ի ծովեզրն։ Եւ բազում ժողովուրդ ի գալիլեացւոց երթային զհետ նորա. եւ ի հրէաստանէ,

Verse: 8   Link to gnt   Եւ յերուսաղեմէ, եւ յայնկոյս յորդանանու, եւ որք ի տիւրոսէ եւ ի սիդովնէ. բազում ժողովուրդ իբրեւ լսէին որչափ ինչ առնէր, գային առ նա։

Verse: 9   Link to gnt   Եւ ասէ ցաշակերտսն իւր, զի նաւակ մի պատրաստական կայցէ նմա վասն ամբոխին՝ զի մի նեղեսցեն զնա։

Verse: 10   Link to gnt   քանզի զբազումս բժշկեաց. մինչ գալ խռնել զնովաւ՝ զի մերձեսցին առ նա, որք ունէին ախտս ինչ։

Verse: 11   Link to gnt   Եւ այսք պիղծք յորժամ տեսանէին զնա, անկանէին առաջի նորա, աղաղակէին եւ ասէին.

Verse: 12   Link to gnt   Եթէ դու ես որդի Աստուծոյ. եւ նա՝ յոյժ սաստէր նոցա, զի մի յայտնի առնիցեն զնա։

Section: 8  
Passage: 3-2 
Verse: 13   Link to gnt   Ելանէ ի լեառն՝ եւ կոչէ առ ինքն զորս ինքն կամեցաւ. եւ չոգան առ նա.

Verse: 14   Link to gnt   Եւ արար երկոտասանս՝ զի իցեն զնովաւ, եւ զի առաքեսցէ զնոսա քարոզել.

Verse: 15   Link to gnt   Եւ ունել իշխանութիւն բժշկել զցաւս՝ եւ հանելոյ զդեւս։

Verse: 16   Link to gnt   Եւ եդ անուն սիմովնի՝ պետրոս.

Verse: 17   Link to gnt   Եւ յակովբու զեբեդեայ՝ եւ յովհաննու եղբօրն յակովբայ՝ եդ նոցա անուանս բաներեգէս, որ է որդիք որոտման,

Verse: 18   Link to gnt   Եւ զանդրէաս, եւ զփիլիպպոս, եւ զբարթողովմէոս, եւ զմատթէոս զմաքսաւորն, եւ զթովմաս, եւ զյակովբոս ալփեայ, եւ զթադէոս, եւ զսիմովն կաննանացի.

Verse: 19   Link to gnt   Եւ զյուդա սկարիովտացի, որ եւ մատնեացն զնա.

Passage: 3-3 
Verse: 20   Link to gnt   Գան ի տուն, եւ գայ միւսանգամ ընդ նոսա ժողովուրդն. մինչ զի եւ հաց եւս՝ ոչ ժամանել ուտել նոցա։

Verse: 21   Link to gnt   Եւ իբրեւ լուան որ իւրքն էին՝ ելին ունել զնա, զի համարէին թէ մոլեգնեալ իցէ։

Verse: 22   Link to gnt   Եւ դպիրքն՝ որ յերուսաղեմէ իջեալ էին, ասէին թէ բէեղզեբուղ գոյ ի դմա, եւ իշխանաւ դիւացն հանէ դա զդեւս։

Verse: 23   Link to gnt   Եւ կոչեցեալ զնոսա առ ինքն, առակօք խօսէր ընդ նոսա. զիարդ կարէ սատանայ զսատանայ հանել.

Verse: 24   Link to gnt   Եւ արդ՝ եթէ թագաւորութիւն յանձն իւր բաժանեսցի, ոչ կարէ կալ թագաւորութիւնն այն։

Verse: 25   Link to gnt   Եւ եթէ տուն յանձն իւր բաժանեսցի, ոչ կարէ կալ տունն։

Verse: 26   Link to gnt   Եւ եթէ սատանայ ի վերայ անձին իւրոյ յարեաւ՝ եւ բաժանեալ իցէ, ոչ կարէ կալ. այլ վախճանեալ է։

Verse: 27   Link to gnt   Այլ ոչ ոք կարէ զկարասի հզօրի մտեալ ի տուն նորա աւար հարկանել, եթէ ոչ նախ զհզօրն կապիցէ, եւ ապա զտուն նորա աւար հարկանիցէ։

Verse: 28   Link to gnt   Ամէն ասեմ ձեզ, զի ամենայն թողցի որդւոց մարդկան մեղք՝ եւ հայհոյութիւնք՝ որչափ եւ հայհոյեսցեն,

Verse: 29   Link to gnt   Բայց որ հայհոյեսցէ զհոգին սուրբ, ոչ ունիցի թողութիւն յաւիտեան, այլ պարտապան լիցի յաւիտենիցն մեղաց։

Verse: 30   Link to gnt   Զի ասէին՝ թէ այս պիղծ գոյ ի նմա։

Passage: 3-4 
Verse: 31   Link to gnt   Գան եղբարքն եւ մայր նորա, եւ արտաքոյ կացեալ՝ յղեցին եւ կոչէին զնա։

Verse: 32   Link to gnt   Եւ անդ ժողովուրդն շուրջ զնովաւ նստէր. եւ իբրեւ ասացին ցնա, ահաւասիկ մայր քո եւ եղբարք քո՝ կան արտաքոյ, եւ խնդրեն զքեզ։

Verse: 33   Link to gnt   Պատասխանի ետ նոցա եւ ասէ. ով է իմ մայր՝ կամ եղբարք։

Verse: 34   Link to gnt   Հայեցաւ շուրջ զիւրեւ յաշակերտսն զի նստէ ին, եւ ասէ. ահաւասիկ մայր իմ, եւ եղբարք իմ։

Verse: 35   Link to gnt   Զի որ առնէ զկամս Աստուծոյ, նա է իմ եղբայր՝ եւ քոյր եւ մայր։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.