TITUS
Armenian NT (Zohrab Bible)
Part No. 20
Previous part

Chapter: 20  
(Ի՜)


Section: 42  
Verse: 1   Link to gnt   Քանզի նման է արքայութիւն երկնից առն տանուտեառն, որ ել ընդ առաւոտս ի վարձու ունել մշակս յայգիս իւր։

Verse: 2   Link to gnt   եւ արկ վարձս մշակացն աւուր դահեկան, եւ առաքեաց զնոսա յայգի իւր։

Verse: 3   Link to gnt   Եւ ելեալ զերորդ ժամու՝ ետես այլս զի կային դատարկք ի հրապարակս.

Verse: 4   Link to gnt   ասէ եւ ցնոսա երթայք եւ դուք յայգի իմ, եւ որ ինչ արժան իցէ տաց ձեզ։

Verse: 5   Link to gnt   Գնացին եւ նոցա։ Եւ դարձեալ՝ ելեալ զվեց ժամու, եւ զինն ժամու՝ արար այնպէս։

Verse: 6   Link to gnt   Եւ զմետասաներորդ ժամու ելեալ, եգիտ այլս՝ զի կային դատարկք, ասէ ցնոսա. ընդէր կայք աստ զօրս ցերեկ դատարկք։

Verse: 7   Link to gnt   Ասեն ցնա. զի ոչ ոք կալաւ զմեզ ի վարձու։ ասէ ցնոսա։ երթայք եւ դուք յայգին, եւ որ ինչ արժան է՝ առնուցուք։

Verse: 8   Link to gnt   Եւ իբրեւ երեկոյ եղեւ՝ ասէ տէր այգւոյն ցգաւառապետ իւր. կոչեա զմշակսն՝ եւ տուր նոցա վարձս, սկսեալ ի յետնոցն մինչեւ ցառաջինսն։

Verse: 9   Link to gnt   Իբրեւ եկինք որք մետասաներորդ ժամուն, եւ առին մէն մի դահեկան։

Verse: 10   Link to gnt   եկեալ եւ առաջինքն՝ համարէին թէ աւելի առնուցուն, եւ առին մէն մի դահեկան եւ նոքա։

Verse: 11   Link to gnt   Իբրեւ առին տրտնջային զտանուտեռնէն՝ եւ ասէին.

Verse: 12   Link to gnt   Թէ դոքա՝ յետինքդ՝ մի ժամ գործեցին, եւ հասարակորդս մեզ արարեր զդոսա, որ զծանրութիւն աւուրն բարձաք եւ զտօթ։

Verse: 13   Link to gnt   Նա պատասխանի ետ միում ի նոցանէ՝ եւ ասէ. ընկեր՝ չզրկեմ զքեզ, ոչ դահեկանի միոջ սակ արկեր ընդ իս։

Verse: 14   Link to gnt   առ զքոյդ՝ երթ. եթէ կամիմ յետնոցս տալ որպէս քեզ։

Verse: 15   Link to gnt   Եթէ չիցէ ինձ իշխանութիւն յիմսս առնել զինչ եւ կամիմ. կամ թէ ակն քո չար է, զի ես առատս եմ։

Verse: 16   Link to gnt   Այսպէս եղիցին յետինք առաջինք, եւ առաջինք՝ յետինք։ զի բազում են կոչեցեալք՝ եւ սակաւք են ընտրեալք։

Passage: 6-7 
Verse: 17   Link to gnt   Իբրեւ ելանէր Յիսուս յերուսաըէմ, առ զերկոտասանսն առանձինն, եւ ի ճանապարհին՝ ասէ ցնոսա։

Verse: 18   Link to gnt   Ահաւասիկ ելանեմք յերուսաղէմ, եւ որդի մարդոյ մատնեսցի քահանայապետից՝ եւ դպրաց. եւ դատապարտեսցեն զնա ի մահ.

Verse: 19   Link to gnt   եւ մատնեսցեն զնա հեթանոսաց՝ այպանել, եւ հարկանել, եւ ի խաչ հանել. եւ յերիր աւուր յարիցէ։

Section: 43  
Verse: 20   Link to gnt   Յայնժամ մատեաւ առ նա մայր որդւոցն զեբեդեայ՝ որդւովք իւրովք հանդերձ, երկիր պագանէր՝ եւ խնդրէր ինչ ի նմանէ։

Verse: 21   Link to gnt   Եւ նա ասէ ցնա. զինչ կամիս ասէ ցնա. ասա զի նստցին սոքա երկու որդիքս իմ մի ընդ աջմէ քումմէ՝ եւ մի ընդ ահեկէ յարքայութեան քում։

Verse: 22   Link to gnt   Պատասխանի ետ Յիսուս եւ ասէ. ոչ գիտէք զինչ խնդրէք. կարէք ըմպել զբաժակն՝ զոր ես ըմպելոցն եմ, կամ զմկրտութիւն զոր ես մկրտելոցն եմ մկրտել։ ասեն ցնա կարօղ եմք։

Verse: 23   Link to gnt   Ասէ ցնոսա Յիսուս. զբաժակն իմ ըմպիցէռկ, եւ մկրտութիւն զոր ես մկրտիմ՝ մկրտիցիք, բայց նստուցանել ընդ աջմէ եւ ընդ ահեկէ իմմէ ոչ է իմ տալ, այլ որոց տուեալ է ի հօրէ իմմէ։

Verse: 24   Link to gnt   Եւ լուեալ տասանցն, բարկացան ի վերայ երկուցն եղբարց։

Verse: 25   Link to gnt   Յիսուս կոչեաց զնոսա առ ինքն, եւ ասէ՝ գիտէք՝ զի իշխանք ազգաց տիրեն նոցա, եւ մեծամեծքն իշխեն նոցա։

Verse: 26   Link to gnt   Ոչ այնպէս իցէ եւ ի ձերում միջի. այլ որ կամիցի ի ձէնջ մեծ լինել՝ եղիցի ձեր պաշտօնեայ։

Verse: 27   Link to gnt   եւ որ կամիցի ի ձէնջ առաջին լինել՝ եղիցի ձեր ծառայ։

Verse: 28   Link to gnt   Որպէս որդի մարդոյ ոչ եկն պաշտօն առնուլ, այլ պաշտել. եւ տալ զանձն իւր փրկանս փոխանակ բազմաց։

Section: 44  
Passage: 7-1 
Verse: 29   Link to gnt   Եւ յելանելն նոցա յերիքովէ, գնացին զհետ նորա ժողովուրդք բազումք։

Verse: 30   Link to gnt   Եւ ահա կոյրք երկու նստէին առ ճանապարհաւն։ իբրեւ լուան թէ Յիսուս անցանէ աղաղակեցին եւ ասեն. ողորմեաց մեզ Յիսուս որդի դաւթի։

Verse: 31   Link to gnt   Եւ ամբոխն սաստեաց նոցա՝ զի լռեսցեն։ եւ նոքա եւս առաւել աղաղակէին եւ ասէին, տէր՝ ողորմեաց մեզ որդի դաւթի։

Verse: 32   Link to gnt   Զտեղի առ Յիսուս, կոչեառծ զնոսա եւ ասէ. զինչ կամիք՝ զի արարից ձեզ։

Verse: 33   Link to gnt   Ասեն ցնա. տէր՝ զի բացցին աչք մեր։

Verse: 34   Link to gnt   Եւ գթացեալ Յիսուս մերձեցաւ յաչս նոցա, եւ վաղվաղակի տեսին՝ եւ գնացին զհետ նորա։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.