TITUS
Armenian NT (Zohrab Bible)
Part No. 18
Previous part

Chapter: 18  
(Ժ՜Ը)


Section: 37  
Verse: 1   Link to gnt   Յայնմ աւուր մատեան աշակերտքն առ Յիսուս՝ եւ ասեն. ով իցէ ի մէնջ մեծ յարքայութեան երկնից։

Verse: 2   Link to gnt   Եւ կոչեաց առ ինքն Յիսուս մանուկ մի, կացոյց զնա ի մէջ նոցա,

Verse: 3   Link to gnt   Եւ ասէ. ամէն ասեմ ձեզ, եթէ ոչ դարձջիք, եւ լինիջիք իբրեւ զմանկտի, ոչ մտանիցէք յարքայութիւն երկնից։

Verse: 4   Link to gnt   Արդ՝ որ խոնարհեցուցանէ զանձն իբրեւ զմանուկս զայս, նա է մեծ յարքայութեան երկնից։

Verse: 5   Link to gnt   Եւ որ ոք ընկալցի մանուկ մի՝ այսպիսի յանուն իմ, զիս ընդունի։

Verse: 6   Link to gnt   Եւ որ ոք գայթագղեցուսցէ զմի ի փոքրկանցս յայսցանէ յիս հաւատացելոց, լաւ է նմա՝ եթէ կախիցի երկան իշոյ ընդ պարանոց նորա՝ եւ ընկղմիցի ի խորս ծովու։

Verse: 7   Link to gnt   Վայ աշխարհի գայթագղութեանց. հարկ է գալ գայթագղութեանց. բայց վայ մարդոյն այնմիկ՝ յոյր ձեռն գայցէ գայթագղութիւն։

Verse: 8   Link to gnt   Եթէ ձեռն քո կամ ոտն գայթագղեցուցանէ քեզ, հատ զնա՝ եւ ընկեա ի քէն. լաւ իցէ քեզ՝ միաձեռանի կամ կաղ մտանել ի կեանս, քան թէ երկուս ձեռս եւ երկուս ոտս ունիցիս, եւ անկեալ ի հուր յաւիտենից։

Verse: 9   Link to gnt   Եւ եթէ ակն քո գայթագղեցուցանէ զքեզ, խլեա զնա եւ ընկեա ի քէն. լաւ իցէ քեզ միականի մտանել ի կեանս, քան երկուս աչս ունել՝ եւ անկանել ի գեհեն հրոյն։

Passage: 6-4 
Verse: 10   Link to gnt   Զգոյշ լերուք մի արհամարհիցէք զմի ի փոքրկանցս յայսցանէ. ասեմ ձեզ, զի հրեշտակք նոցա յերկինս՝ հանապազ տեսանեն զերեսս հօր իմոյ՝ որ հերկինս է։

Verse: 11   Link to gnt   Զի եկն որդի մարդոյ կեցուցանել զկորուսեալն։

Section: 38  
Verse: 12   Link to gnt   Զիարդ թուի ձեզ՝ եթէ լինիցի մարդոյ հարեւր ոչխար, եւ մոլորեսցի մի ի նոցանէ, ոչ թողուցու զիննսունն եւ զինն ոչխարն ի լերինս, եւ երթայցէ խնդրեցէ զմոլորեալն։

Verse: 13   Link to gnt   եւ եթէ լինիցի գտանել զնա. ամէն ասեմ ձեզ՝ զի ուրախ լինի ի վերայ նորա, առաւել քան ի վերայ իննսուն եւ յինունցն որ չիցեն մոլորեալ։

Verse: 14   Link to gnt   Այսպէս ոչ են կամք առաջի հօր իմոյ որ յերկինս է, եթէ կորիցէ մի ի փոքրկանցս յայսցանէ։

Verse: 15   Link to gnt   Եթէ մեղիցէ քեզ եղբայր քո, երթ յանդիմանեա զնա՝ յորժամ դու եւ նա միայն իցէք. եթէ լուիցէ քեզ, շահեցար զեղբայրն քո։

Verse: 16   Link to gnt   Ապա թէ ոչ լուիցէ քեզ, առ ընդ քեզ մի եւս կամ երկուս. զի ի բերանոյ երկուց եւ յերից վկայից հաստատեսցի ամենայն բան։

Verse: 17   Link to gnt   Իսկ եւ թէ նոցա ոչ լուիցէ, ասասջիր յեկեղեցւոջ։ Ապա թէ եւ եկեղեցւոյն ոչ լուիցէ, եղիցի քեզ իբրեւ զհեթանոսն եւ զմաքսաւորս։

Verse: 18   Link to gnt   Ամէն ասեմ ձեզ. զի զոր կապիք յերկրի՝ եղիցի կապեալ յերկինս, եւ զոր արձակիցէք յերկրի՝ եղիցի ասրձակեալ յերկինս։

Verse: 19   Link to gnt   Դարձեալ ասեմ ձեզ. եթէ երկու ի մէնջ միաբանիցեն յերկրի վասն ամենայն իրաց, զինչ եւ խնդրեսցեն՝ եղիցի նոցա ի հօրէ իմմօ որ հերկինսն է։

Verse: 20   Link to gnt   Զի ուր իցեն երկու կամ երեք ժողովեալ յանուն իմ, անդ եմ ես ի մէջ նոցա։

Verse: 21   Link to gnt   Յայժամ մատեաւ առ նա պետրոս՝ եւ ասէ. տէր քանիցս անգամ թէ մեղիցէ ինձ եղբայր իմ, եւ թողից նմա. մինչեւ ցեւթն անգամ։

Verse: 22   Link to gnt   Ասէ ցնա Յիսուս. ոչ ասեմ քեզ՝ թէ մինչեւ յեւթն անգամ, այլ՝ յեւթանասնեկին եւթն։

Section: 39  
Verse: 23   Link to gnt   Վասն այսորիկ նմանեցաւ արքայութիւն երկնից առն թագաւորի, որ որ կամեցաւ համար առնել ի մէջ ծառայից իւրոց։

Verse: 24   Link to gnt   Իբրեւ սկսաւ առնուլ, մատուցաւ առ նա պարտապան մի բեւր քանքարոյ։

Verse: 25   Link to gnt   Իբրեւ ոչ ունէր հատուցանել, հրամայեաց՝ զնա վաճառել տէրն նորա, եւ զկին նորա, եւ զորդիս, եւ զամենայն որ զինչ եւ ունիցի՝ եւ հատուցանել։

Verse: 26   Link to gnt   Եւ անկեալ ծառայն երկիր պագանէր նմա՝ եւ ասէր. երկայնամիտ լեր առ իս, եւ զամենայն հատուցից քեզ։

Verse: 27   Link to gnt   Գթացեալ տէր ծառային այնորիկ՝ արձակեաց զնա, եւ զփոխն եթող նմա։

Verse: 28   Link to gnt   Եւ ելեալ ծառայն՝ եգիտ զմի ի ծառայակցաց իւրոց, որ պարտ էր նմա հարեւր դահեկան. եւ կալեալ զնա՝ խեղդէր եւ ասէր. հատո ինձ զոր պարտիս։

Verse: 29   Link to gnt   Արդ անկեալ ծառայակցին՝ առ ոտս նորա, աղաչէր զնա՝ եւ ասէր. երկայնամիտ լեր աէ իս՝ եւ հատուցից քեզ։

Verse: 30   Link to gnt   Եւ նա ոչ կամէր. այլ չոգաւ արկ զնա ի բանտ՝ մինչեւ հատուցանէ զպարտսն։

Verse: 31   Link to gnt   Իբրեւ տեսին ծառայակիցքն նորա որ ինչ եղեւն՝ տրտմեցան յոյժ, եւ եկեալ ցուցին տեառն իւրեանց զամենայն որ ինչ եղեւն։

Verse: 32   Link to gnt   Յայնժամ կոչեաց զնա տէրն իւր՝ եւ ասէ. ծառայ չար, զամենայն զպարտսն թողի քեզ՝ վասն զի աղաչեցեր զիս։

Verse: 33   Link to gnt   Իսկարդ՝ ոչ էր պարտ եւ քեզ ողորմել ծառայակցին քում, որպէս եւ ես քեզ ողորմեցայ։

Verse: 34   Link to gnt   Եւ բարկացեալ տէրն նորա՝ մատնեաց զնա դահճաց, մինչեւ հատուսցէ զամենայն զպարտսն։

Verse: 35   Link to gnt   Նոյնպէս եւ հայր իմ որ յերկինս է՝ արասցէ ձեզ, եթէ ոչ թողուցուք իւրաքանչիւր եղբօր իւրում ի սրտից ձերոց զյանցանս նոցա։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.