TITUS
Armenian NT (Zohrab Bible)
Part No. 14
Previous part

Chapter: 14  
(Ժ՜Դ)


Section: 25  
Passage: 5-2 
Verse: 1   Link to gnt   Յայնմ ժամանակի լուաւ հերովդէս չորրորդապետ զլուր Յիսուսի։

Verse: 2   Link to gnt   Եւ ասէ ցծառայս իւր. նա է յովհաննէս մկրտիչ, նա յարեաւ ի մեռելոց, եւ վասն այսորիկ զօրութիւնք լինին նովաւ։

Verse: 3   Link to gnt   Քանզի հերովդէս կալաւ զյովհաննէս՝ կապեաց զնա՝ եւ եդ ի բանտի վասն հերովդիայ կնոչ փիլիպպոսի եղբօր նորա։

Verse: 4   Link to gnt   Զի ասէր ցնա յովհաննէս. չէ արժան քեզ ունել զդա։

Verse: 5   Link to gnt   Եւ կամի զնա սպանանել, բայց երկնչէր ի ժողովրդենէ անտի. քանզի իբրեւ զմարգարէ ունէին զնա։

Verse: 6   Link to gnt   Եւ իբրեւ եղեն ծնունդք հերովդի, կաքաւեաց դուստրն հրովդիայ ի մէջ բազմականին. եւ հաճոյ թուեցաւ հերովդի.

Verse: 7   Link to gnt   ուստի եւ երդմամբ խոստացաւ տալ նմա զինչ եւ խնդրեսցէ։

Verse: 8   Link to gnt   Եւ նա յառաջագոյն խրատեալ ի մօրէ իւրմէ, տուր ինձ ասէ այսր՝ ի վերայ սկտեղ զգլուխ յովհաննու մկրտչի։

Verse: 9   Link to gnt   Եւ տրտմեցաւ թագաւորն. բայց վասն երդմանցն, եւ բարձակցացն՝ հրամայեաց տալ նմա։

Verse: 10   Link to gnt   Եւ առաքեաց գլխատեաց զյովհաննէս ի բանտի։

Verse: 11   Link to gnt   Եւ բերաւ գլուխն նորա սկտեղբ՝ եւ տուաւ աղջկանն, եւ տարաւ առ մայր իւր։

Verse: 12   Link to gnt   Եւ մատուցեալ աշակերտքն նորա բարձին զմարմինն եւ թաղեցին. եւ եկեալ պատմեցին Յիսուսի։

Passage: 5-3 
Verse: 13   Link to gnt   Եւ իբրեւ լուաւ Յիսուս, գնաց անտի նաւու յանապատ տեղի առանձինն։ Իբրեւ լուան ժողովուրդքն՝ գնացին զհետ նորա հետի ի քաղաքաց անտի։

Verse: 14   Link to gnt   Եւ իբրեւ ել, ետես ժողովուրդ բազում, գթացաւ ի նոսա, եւ բժշկեաց զհիւանդս նոցա։

Section: 26  
Verse: 15   Link to gnt   Իբրեւ ընդ երեկս եղեւ, մատեան առ նա աշակերտքն՝ եւ ասեն. տեղիս անապատ է, եւ օրս՝ տարաժամեալ, արձակեա զժողովուրդսդ՝ զի երթիցեն շուրջ ի շէնսն, գնեսցեն իւրեանց կերակուրս։

Verse: 16   Link to gnt   Եւ ասէ Յիսուս. ոչինչ պիտոյ է դոցա երթալ. դուք տուք դոցա ուտել։

Verse: 17   Link to gnt   Եւ նոքա ասեն ցնա. ոչինչ ունիմք աստ, բայց հինգ նկանակ եւ երկուս ձկունս։

Verse: 18   Link to gnt   Եւ ասէ ցնոսա. բերէք այսր զայն։

Verse: 19   Link to gnt   Եւ հրամայեաց բազմեցուցանել զժողովուրդն ի ի վերայ խոտոյ։ եւ առեալ զհինգ նկանակն եւ զերկուս ձկունս՝ հայեցաւ յերկինս, օրհնեաց. եւ եբեկ՝ եւ ետ ցաշակերտսն զնկանակսն, եւ աշակերտքն ժողովրդոցն։

Verse: 20   Link to gnt   Կերան ամենեքեան՝ եւ յագեցան, եւ բարձին զնշխարս կոտորոցն երկոտասան սակառի լի։

Verse: 21   Link to gnt   Եւ որք կերանն՝ էին արք իբրեւ հինգ հազար. թող զկանայս եւ զմանկդի։

Passage: 5-4 
Verse: 22   Link to gnt   Եւ ստիպեաց վաղվաղակի զաշակերտսն մտանել ի նաւ եւ յառաջել յայնկոյս, մինչ ինքն զժողովուրդսն արձակիցէ։

Verse: 23   Link to gnt   Եւ իբրեւ արձակեաց զժողովուրդսն՝ ել ի լեառն առանձինն կալ յաղօթս։ Եւ իբրեւ ընդ երեկս եղեւ, անդ էր միայն։

Section: 27  
Verse: 24   Link to gnt   Եւ նաւն մեկնեալ էր ի ցամաքէն բազում ասպարիսօք՝ ծփեալ յալեացն. քանզի ընդդէմ էր հողմնն։

Verse: 25   Link to gnt   Եւ ի չորրորդում պահու գիշերոյն եկն առ նոսա Յիսուս գնալով ի վերայ ծովուն։

Verse: 26   Link to gnt   Իբրեւ տեսին զնա աշակերտքն զի գնայր ի վերայ ծովուն՝ խռովեցան, եւ ասեն թէ առաչօք ինչ իցէ. եւ առ ահին՝ աղաղակեցին։

Verse: 27   Link to gnt   Եւ վաղվաղակի խօսեցաւ ընդ նոսա Յիսուս՝ եւ ասէ. քաջալերեցարուք, եւ եմ մի երկնչիք։

Verse: 28   Link to gnt   Պատասխանի ետ նմա պետրոս՝ եւ ասէ. տէր՝ եթէ դու ես, հրամայեա ինձ գալ առ քեզ ի վերայ ջրոյս։

Verse: 29   Link to gnt   Եւ նա ասէ, եկ։ եւ իջեալ ի նաւէն պետրոս՝ գնաց ի վերայ ջուրցն, եւ եկն առ Յիսուս։

Verse: 30   Link to gnt   Եւ տեսեալ զհողմն սաստիկ երկեաւ. եւ իբրեւ սկսաւ ընկղմել՝ աղաղակեաց՝ եւ ասէ. տէր՝ փրկեա զիս։

Verse: 31   Link to gnt   Եւ վաղվաղակի Յիսուս ձգեաց զձեռն իւր կալաւ զնա եւ ասէ. թերահաւատ՝ ընդ էր երկմտեցեր։

Verse: 32   Link to gnt   Եւ իբրեւ ելին՝ ի նաւն՝ հանդարտեաց հողմն։

Verse: 33   Link to gnt   Եւ որ ի նաւին էին՝ մատեան երկիրպագին նմա՝ եւ ասեն. արդարեւ որդի Աստուծոյ ես դու։

Verse: 34   Link to gnt   Եւ անցեալ եկին ի ցամաք ի գեննեսարեթ։

Verse: 35   Link to gnt   Եւ իբրեւ ծանեան զնա արք տեղւոյն այնորիկ, առաքեշծին ընդ ամենայն գաւառն՝ եւ ածին առ նա զամենայն հիւանդս։

Verse: 36   Link to gnt   Եւ աղաչէին զնա, զի գոնէ՝ միայն ի քղանցս հանդերձի նորա մերձեսցին. եւ որ միանգամ մերձեցանն՝ փրկեցան։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.