TITUS
Armenian NT (Zohrab Bible)
Part No. 11
Previous part

Chapter: 11  
(Ժ՜Ա)


Passage: 3-7 
Verse: 1   Link to gnt   Եւ եղեւ իբրեւ կատարեաց Յիսուս զպատուէր երկոտասանից աշակերտացն իւրոց, գնաց անտի քարոզել եւ ուսուցանել ի քաղաքս նոցա։

Section: 20  
Verse: 2   Link to gnt   Իսկ յովհաննէս իբրեւ լուաւ ի բանտին զգործսն Քրիստոսի, առաքեաց ի ձեռն աշակերտաց իւրոց,

Verse: 3   Link to gnt   եւ ասէ ցնա. դու ես որ գալոցն ես, եթէ այլում ակն կալցուք։

Verse: 4   Link to gnt   Պատասխանի ետ Յիսուսն՝ եւ ասէ ցնոսա. գնացէք պատմեցէք յովհաննու, զոր լուաք եւ տեսէք։

Verse: 5   Link to gnt   Կոյրք տեսանեն կաղք՝ գնան, բորոտք՝ սրբին, եւ խուլք լսեն, եւ մեռեալք յառնեն. եւ աղքատք աւետարանին։

Verse: 6   Link to gnt   Եւ երանեալ է որ ոչ գայթագղեսցի յիս։

Verse: 7   Link to gnt   Եւ իբրեւ նոքա գնացին, սկսաւ Յիսուս ասել ցժողովուրդսն զյովհաննէ։ Զինչ ելէք տեսանել յանապատին, եղէգն շարժուն ի հողմոյ։

Verse: 8   Link to gnt   Այլ զինչ ելէք տեսանել, մարդ ի հանդերձս փափկութեան զարդարեալ։ Ահաւանիկ որ զփափուկսն զգեցեալ են՝ ի տունս թագաւորաց են։

Verse: 9   Link to gnt   Այլ զինչ ելէք տեսանել. մարգարէ. այո՝ ասեմ ձեզ, եւ առաւել եւս քան զմարգարէ։

Verse: 10   Link to gnt   Զի նա է՝ վասն որոյ գրեալն է. ահա ես առաքեցից զհրեշտակ իմ առաջի երեսաց քոց, որ պատրաստեսցէ զճանապարհս քո առաջի քոյ։

Verse: 11   Link to gnt   Ամէն ասեմ ձեզ, չէ յարուցեալ ի ծնունդս կանանց մեծ քան զյովհաննէս մկրտիչ։ Բայց փոքրիկն յարքայութեան երկնից մեծ է քան զնա։

Verse: 12   Link to gnt   Բայց յաւուրցն յովհաննու մկրտչի մինչեւ ցայժմ՝ արքայութիւն երկնից բռնադատի, եւ բռունք յափշտակեն զնա։

Verse: 13   Link to gnt   Քանզի ամենայն օրէնք եւ մարգարէք մինչեւ ցյովհան մարգարէացան։

Verse: 14   Link to gnt   Եւ եռտէ կամիք ընդունել նա է եղիա՝ որ գալոցն է։

Verse: 15   Link to gnt   Որ ունիցի ականջս լսելոյ՝ լուիցէ։

Verse: 16   Link to gnt   Ում նմանեցուցից զազգս զայս. նման է մանկտւոյ՝ որ նստիցին ի հրապարակս, կարդայցեն զընկերս իւրեանց,

Verse: 17   Link to gnt   եւ ասիցեն. փողս հարաք ձեզ՝ եւ ոչ կաքաւեցէք, ողբացաք ձեզ՝ եւ ոչ կոծեցարուք։

Verse: 18   Link to gnt   Եկն յովհաննէս, ոչ ուտէր եւ ոչ ըմպէր. եւ ասեն դեւ գոյ ի նմա։

Verse: 19   Link to gnt   Եկն որդի մարդոյ՝ ուտէ եւ ըմպէ. եւ ասեն, ահա այր կերօղ եւ արբեցօղ, բարեկամ մաքսաւորաց եւ մեղաւորաց։ եւ արդարացաւ իմաստութիւն յորդւոց իւրոց։

Verse: 20   Link to gnt   Յայնժամ սկսաւ նախատել զքաղաքսն՝ յորս եղեն բազում զօրութիւնք նորա, եւ ոչ ապաշխարեցին։

Verse: 21   Link to gnt   Վայ քեզ քորազին, վայ քեզ բեթսայիդա. զի եթէ ի տիւրոս եւ ի սիդովն եղեալ էին զօրութիւնքն՝ որ ի ձեզ եղեն, վազու եւ սարդեւք խորգով եւ մոխրով ապաշխարեալ էր։

Verse: 22   Link to gnt   Բայց ասեմ ձեզ. դիւրագոյն լիցի երկրին տիւրոսի եւ սիդովնի յաւուրն դատաստանի՝ քան ձեզ։

Verse: 23   Link to gnt   Եւ դու կափառնաում, մի մինչեւ յերկինս բարձրասցիս. այլ մինչեւ ի դժոխս իջցես։ Զի եթէ ի սոդոմ եղեալ էին զօրութիւնքն՝ որ եղեն ի քեզ, ապաքէն կային եւս մինչեւ ցայսօր։

Verse: 24   Link to gnt   Բայց ասեմ ձեզ՝ եթէ երկրին սոդովմացւոց դիւրագոյն լիցի յաւուրն դատաստանի՝ քան քեզ։

Passage: 4-1 
Verse: 25   Link to gnt   Յայնմ ժամանակի պատասխանի ետ Յիսուս եւ ասէ. Գոհանամ զքէն հայր՝ տէր երկնի եւ երկին. ծածկեցեր զայս յիմաստնոց եւ գիտնոց, եւ յայտնեցեր տղայոց։

Verse: 26   Link to gnt   Այո հայր. զի այսպէս հաճոյ եղեւ առաջի քոյ։

Verse: 27   Link to gnt   Ամենայն ինչ տուաւ ինձ ի հօրէ իմմէ։ Եւ ոչ ոք ճանաչէ զորդի՝ եթէ ոչ հայր. եւ ոչ զհայր ոք ճանաչէ՝ եթէ ոչ որդի, եւ ում որդի կամիցի յայտնել։

Verse: 28   Link to gnt   Եկայք առ իս ամենայն վաստակեալք եւ բեռնաւորք, եւ ես հանգուցից զձեզ։

Verse: 29   Link to gnt   առէք զլուծ իմ ի ձեզ, եւ ուսարուք յինէն զի հեզ եմ եւ խոնարհ սրտիւ. եւ գտջիք հանգիստ անձանց ձերոց։

Verse: 30   Link to gnt   զի լուծ իմ քաղցր է. եւ բեռն իմ փոքրոգի։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.