TITUS
Armenian NT (Zohrab Bible)
Part No. 10
Previous part

Chapter: 10  
(Ժ՜)


Section: 19  
Verse: 1   Link to gnt   Եւ կոչեցեալ առ ինքն զերկոտասանեսին աշակերտտսն իւր, ետ նոցա իշխանութիւն այսոց պղծոց հանել զնոսա, եւ բժշկել զամենայն ցաւս եւ զամենայն հիւանդութիւնս։

Verse: 2   Link to gnt   Եւ առաքելոցն երկոտասանից՝ էին անուանք այսոքիկ։ առաջին, սիմովն՝ անուանեալն պետրոս, եւ անդրէաս եղբայր նորա։

Verse: 3   Link to gnt   Յակովբոս զեբեդեայ, եւ յովհաննէս եղբայր նորա. փիլիպպոս, եւ բարթողովմէոս. թովմաս, եւ մատթէոս մաքսաւոր. յակովբոս ալփեայ, եւ զաբէոս՝ որ անուանեցաւն թադէոս։

Verse: 4   Link to gnt   Սիմովն կաննանացի, եւ յուդա սկարիովտացի՝ որ եւ մատեացն զնա։

Verse: 5   Link to gnt   Զնոսա երկոտասանեսին առաքելեաց Յիսուս, պատուիրեաց նոցա եւ ասէ, ի ճանապարհ հեթանոսաց մի երթայցէք, եւ ի քաղաք սամարացւոց մի մտանիցէք։

Verse: 6   Link to gnt   Այլ երթայք առաւել առ ոչխարսն կորուսեալս տան իսրայէլի։

Verse: 7   Link to gnt   Եւ իբրեւ երթայցէք՝ քարոզեցէք եւ ասացէք, թէ մերձեալ է արքայութիւն երկնից։

Verse: 8   Link to gnt   Զհիւանդս բժշկեցէք, զբորոտս սրբեցէք, զդեւս հանէք. ձրի առէք. ձրի տուք։

Verse: 9   Link to gnt   Մի ստանայք ոսկի, եւ մի արծաթ, եւ մի պղինձ ի գօտիս ձեր։

Verse: 10   Link to gnt   մի պարկ ի ճանապարհ. եւ մի երկուս հանդերձս. մի կօշիկս. մի ցուպ։ զի արժանի է մշակն կերակրոյ իւրում։

Verse: 11   Link to gnt   Յոր քաղաք մտանիցէք կամ ի գեղ, հարցանիցէք թէ ո է ի նմա արժանի. եւ անդ լինիջիք մինչեւ ելանիցէք անտի։

Verse: 12   Link to gnt   Եւ իբրեւ մտանիցէք ի տունն, ողջոյն տաջիք նմա՝ եւ ասասջիք. ողջոյն տանս այսմիկ։

Verse: 13   Link to gnt   Եթէ իցէ տունն արժանի, եկեսցէ ողջոյնն ձեր ի վերայ նորա. ապա թէ ոչ իցէ արժանի, ողջոյն ձեր առ ձեզ դարձցի։

Verse: 14   Link to gnt   Եւ որ ոչ ընկալցի զձեզ՝ եւ ոչ լուիցէ բանից ձերոց, իբրեւ ելանիցէք ի քաղաքէն յայնմանէ, թօթափեսջիք զփոշին յոտից ձերոց։

Verse: 15   Link to gnt   Ամէն ասեմ ձեզ՝ դիւրագոյն լիցի երկրին սոդովմացւոց եւ գոմորացւոց յաւուրն դատաստանի, քան քաղաքին այնմիկ։

Passage: 3-6 
Verse: 16   Link to gnt   Ահաւասիկ ես առաքեմ զձեզ իբրեւ զոչխարս ի մէջ գայլոց. եղերուք այսուհետեւ խորագէտք իբրեւ զօձս, եւ միամիտք իբրեւ զաղաւնիս։

Verse: 17   Link to gnt   Զգոյշ լինիջիք ի մարդկանէ. զի մատնեսցեն զձեզ զյատեանս, եւ ի ժողովուրդս իւրեանց տանջեսցեն զձեզ։

Verse: 18   Link to gnt   եւ առաջի դատաւորաց եւ թագաւորաց տանիցին զձեզ վասն իմ, ի վկայութիւն նոցա եւ հեթանոսաց։

Verse: 19   Link to gnt   Այլ յորժամ մատնիցեն զձեզ, մի հոգայցէք թէ որպէս կամ զինչ խօսիցիք. զի տացի ձեզ ի ժամուն յայնմիկ զինչ խօսիցիք։

Verse: 20   Link to gnt   Զի ոչ եթէ դուք իցէք որ խօսիցիքն, այլ հոգին հօր ձերոյ որ խօսիցի ի ձեզ։

Verse: 21   Link to gnt   Մատնեսցէ եղբայր զեղբայր ի մահ, եւ հայր զորդի։ Եւ յառնիցեն որդիք ի վերայ հարց՝ եւ սպանանիցեն զնոսա։

Verse: 22   Link to gnt   Եւ եղիջիք ատեցեալք յամենեցունց վասն անուան իմոյ. իսկ որ համբերեսցէ ի սպառ, նա կեցցէ։

Verse: 23   Link to gnt   Եւ յորժամ հալածիցեն զձեզ ի քաղաքիս յայսմիկ՝ փախիջիք յայլ. եւ եթէ յայնմանէ հալածիցեն զձեզ փախիջիք ի մեւսն։ ամէն ասեն ձեզ, ոչ սապառեսջիք զքաղաքս իսրայէլի մինչեւ եկեսցէ որդի մարդոյ։

Verse: 24   Link to gnt   Ոչ է աշակերտ առաւել քան զվարդապետ, եւ ոչ ծառայ քան զտէր իւր։

Verse: 25   Link to gnt   շատ իցէ աշակերտին՝ եթէ եղիցի իբրեւ զվարդապետ իւր։ եւ ծառային՝ իբրեւ զտէր իւր։ Եթէ զտանուտէրն բէեղզեբուղ կոչեցին, որչափ եւս առաւել զընտանիս նորա։

Verse: 26   Link to gnt   Մի այնուհետեւ երկնչիցիք ի նոցանէ։ զի ոչ ինչ է ի ծածուկ՝ որ ոչ յայտնեսցի, եւ գաղտնի՝ որ ոչ ծանիցի։

Verse: 27   Link to gnt   Զոր ասեմ ձեզ ի խաւարի՝ ասացէք ի լոյս. եւ զոր լսիցէք յունկանէ՝ քարոզեցէք ի վերայ տանեաց։

Verse: 28   Link to gnt   Եւ մի երկնչիք յայնցանէ՝ որ սպանանեն զմարմին, եւ զոգի ոչ կարեն սպանանել։ Այլ երկերուք դուք առաւել յայնմանէ՝ որ կարօղն է զոգի եւ զմարմին կորուսանել ի գեհենի։

Verse: 29   Link to gnt   Ոչ ապագէն երկու ճնճղուկք դանգի միոջ վաճառին, եւ մի ի նոցանէ յերկիր ոչ անկցի առանց հօր ձերոյ։

Verse: 30   Link to gnt   Այլ ձեր եւ ամենայն իսկ հեր գլխոյ թուեալ է։

Verse: 31   Link to gnt   եւ արդ մի երկնչիցիք՝ զի լաւ էր քան զբազում ճնճղուկս։

Verse: 32   Link to gnt   Ամենայն որ խոստովանեսցի յիս առաջի մարդկան, խոստովանեցից եւ ես զնմանէ առաջի հօր իմոյ որ յերկինսն է։

Verse: 33   Link to gnt   Եւ որ ուրասցի զիս առաջի մարդկան, ուրացայց եւ ես զնա առաջի հօր իմոյ՝ որ յերկինս է։

Verse: 34   Link to gnt   Մի համարիք եթէ եկի արկանել խաղաղութիւն յերկիր.. ոչ եկի արկանել խաղաղութիւն, այլ սուր։

Verse: 35   Link to gnt   Քանզի եկի քակել զայր՝ ի հօրէ իւրմէ,, եւ զդուստր ի մօրէ, եւ զհարսն ի սկեսրէ իւրմէ։

Verse: 36   Link to gnt   Եւ թշնամիք առն՝ ընտանիք իւր։

Verse: 37   Link to gnt   Որ սիրէ զհայր կամ զմայր առաւել քան զիս, ոչ է ինձ արժանի։ Եւ որ սիրէ զուստր կամ զդուստր առաւել քան զիս, չէ ինձ արժանի։

Verse: 38   Link to gnt   Եւ որ ոչ առնու զխաչ իւր՝ եւ գայ զկնի իմ, չէ ինձ արժանի։

Verse: 39   Link to gnt   Որ գտանէ զանձն իւր՝ կորուսցէ զնա, եւ որ կորոյս զանձն իւր վասն իմ, գտցէ զնա։

Verse: 40   Link to gnt   Որ ընդունի զձեզ՝ զիս ընդունի, եւ որ զիս ընդունի՝ ընդունի զառաքիչն իմ։

Verse: 41   Link to gnt   Որ ընդունի զմարգարէ յանուն մարգարէի, զվարձս մարգարէի առցէ։ Եւ որ ընդունի զարդար յանուն արդարոյ՝ զվարձս արդարոյ առցէ։

Verse: 42   Link to gnt   Եւ որ արբուսցէ միում ի փոքրկանցս յայսցանէ բաժակ մի ջուր ցուրտ միայն յանուն աշակերտի, ամէն ասեմ ձեզ, ոչ կորուսցէ զվարձս իւր։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.