TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 990

Hymn: 153_(979)
Verse: 1
Halfverse: a    ई॒ङ्खय॑न्तीरप॒स्युव॒ इन्द्रं॑ जा॒तमुपा॑सते ।
   ई॒ङ्खय॑न्तीरप॒स्युव
   ई॒ङ्खय॑न्तीः अप॒स्युवः
   ई॒ङ्खय॑न्तीर् अप॒स्युव

Halfverse: b    इन्द्रं॑ जा॒तमुपा॑सते ।
   इन्द्र॑म् जा॒तम् उप आसते ।
   इन्द्रं जा॒तम् उपा॑सते ।

Halfverse: c    भे॑जा॒नासः॑ सु॒वीर्य॑म् ।।
   भे॑जा॒नासः॑ सु॒वीर्य॑म् ।।
   भे॑जा॒नासः सु॒वीर्य॑म् ।।
   भे॑जा॒नासः सु॒वीरि॑यम् ।।

Verse: 2
Halfverse: a    त्वमि॑न्द्र॒ बला॒दधि॒ सह॑सो जा॒त ओज॑सः ।
   त्वमि॑न्द्र॒ बला॒दधि
   त्वम् इन्द्र बला॑त् अधि
   तु॒वम् इन्द्र बला॑द् अधि

Halfverse: b    सह॑सो जा॒त ओज॑सः ।
   सह॑सः जा॒तः ओज॑सः ।
   सह॑सो जा॒त ओज॑सः ।

Halfverse: c    त्वं वृ॑ष॒न्वृषेद॑सि ।।
   त्वं वृ॑ष॒न्वृषेद॑सि ।।
   त्वम् वृषन् वृषा इत् असि ।।
   तु॒वं वृ॑षन् वृषेद् असि ।।

Verse: 3
Halfverse: a    त्वमि॑न्द्रासि वृत्र॒हा व्य॒न्तरि॑क्षमतिरः ।
   त्वमि॑न्द्रासि वृत्र॒हा
   त्वम् इन्द्र असि वृत्र॒हा
   तु॒वम् इन्द्रासि वृत्र॒हा

Halfverse: b    व्य॒न्तरि॑क्षमतिरः ।
   वि अ॒न्तरि॑क्षम् अतिरः ।
   वि अ॒न्तरि॑क्षम् अतिरः ।

Halfverse: c    उद्द्याम॑स्तभ्ना॒ ओज॑सा ।।
   उद्द्याम॑स्तभ्ना॒ ओज॑सा ।।
   उत् द्याम् अस्तभ्नाः ओज॑सा ।।
   उद् द्याम् अस्तभ्ना ओज॑सा ।।

Verse: 4
Halfverse: a    त्वमि॑न्द्र स॒जोष॑सम॒र्कम्बि॑भर्षि बा॒ह्वोः ।
   त्वमि॑न्द्र स॒जोष॑सम्
   त्वम् इन्द्र स॒जोष॑सम्
   तु॒वम् इन्द्र स॒जोष॑सम्

Halfverse: b    अ॒र्कम्बि॑भर्षि बा॒ह्वोः ।
   अ॒र्कम् बिभर्षि बा॒ह्वोः ।
   अ॒र्कम् बिभर्षि बाहु॒वोः ।

Halfverse: c    वज्रं॒ शिशा॑न॒ ओज॑सा ।।
   वज्रं॒ शिशा॑न॒ ओज॑सा ।।
   वज्र॑म् शिशा॑नः ओज॑सा ।।
   वज्रं शिशा॑न ओज॑सा ।।

Verse: 5
Halfverse: a    त्वमि॑न्द्राभि॒भूर॑सि॒ विश्वा॑ जा॒तान्योज॑सा ।
   त्वमि॑न्द्राभि॒भूर॑सि
   त्वम् इन्द्र अभि॒भूः अ॑सि
   तु॒वम् इन्द्राभि॒भूर् असि

Halfverse: b    विश्वा॑ जा॒तान्योज॑सा ।
   विश्वा जा॒तानि ओज॑सा ।
   विश्वा जा॒तानि ओज॑सा ।

Halfverse: c    स विश्वा॒ भुव॒ आभ॑वः ।।
   स विश्वा॒ भुव॒ आभ॑वः ।।
   स विश्वा भुवः आ अ॑भवः ।।
   स विश्वा भुव आभ॑वः ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.