TITUS
Rg-Veda: Rg-Veda-Samhita
Part No. 987
Previous part

Hymn: 150_(976) 
Verse: 1 
Halfverse: a    समि॑द्धश्चि॒त्समि॑ध्यसे दे॒वेभ्यो॑ हव्यवाहन ।
   समि॑द्धश्चि॒त्समि॑ध्यसे
   समि॑द्धः चित् सम् इध्यसे
   समि॑द्धश् चित् सम् इध्यसे

Halfverse: b    दे॒वेभ्यो॑ हव्यवाहन ।
   दे॒वेभ्यः हव्यवाहन ।
   दे॒वेभ्यो हव्यवाहन ।

Halfverse: c    आ॑दि॒त्यै रु॒द्रैर्वसु॑भिर्न॒ आ ग॑हि मृळी॒काय॑ न॒ आ ग॑हि ।।
   आ॑दि॒त्यै रु॒द्रैर्वसु॑भिर्न॒ आ ग॑हि
   आदि॒त्यैः रु॒द्रैः वसु॑भिः नः आ ग॑हि
   आदि॒त्यै रु॒द्रैर् वसु॑भिर् न आ ग॑हि

Halfverse: d    मृळी॒काय॑ न॒ आ ग॑हि ।।
   मृ॑ळी॒काय नः आ ग॑हि ।।
   मृ॑ळी॒काय न आ ग॑हि ।।


Verse: 2 
Halfverse: a    इ॒मं य॒ज्ञमि॒दं वचो॑ जुजुषा॒ण उ॒पाग॑हि ।
   इ॒मं य॒ज्ञमि॒दं वचो
   इ॒मम् य॒ज्ञम् इ॒दम् वचः
   इ॒मं य॒ज्ञम् इ॒दं वचो

Halfverse: b    जुजुषा॒ण उ॒पाग॑हि ।
   जु॑जुषा॒णः उ॒पाग॑हि ।
   जु॑जुषा॒ण उ॒पाग॑हि ।

Halfverse: c    मर्ता॑सस्त्वा समिधान हवामहे मृळी॒काय॑ हवामहे ।।
   मर्ता॑सस्त्वा समिधान हवामहे
   मर्ता॑सः त्वा समिधान हवामहे
   मर्ता॑सस् त्वा समिधान हवामहे

Halfverse: d    मृळी॒काय॑ हवामहे ।।
   मृ॑ळी॒काय हवामहे ।।
   मृ॑ळी॒काय हवामहे ।।


Verse: 3 
Halfverse: a    त्वामु॑ जा॒तवे॑दसं वि॒श्ववा॑रं गृणे धि॒या ।
   त्वामु॑ जा॒तवे॑दसं
   त्वाम् उ जा॒तवे॑दसम्
   तु॒वाम् उ जा॒तवे॑दसं

Halfverse: b    वि॒श्ववा॑रं गृणे धि॒या ।
   वि॒श्ववा॑रम् गृणे धि॒या ।
   वि॒श्ववा॑रं गृणे धि॒या ।

Halfverse: c    अग्ने॑ दे॒वाँ आ व॑ह नः प्रि॒यव्र॑तान्मृळी॒काय॑ प्रि॒यव्र॑तान् ।।
   अग्ने॑ दे॒वाँ आ व॑ह नः प्रि॒यव्र॑तान्
   अग्ने दे॒वान् आ व॑ह नः प्रि॒यव्र॑तान्
   अग्ने दे॒वाँ आ व॑ह नः प्रि॒यव्र॑तान्

Halfverse: d    मृळी॒काय॑ प्रि॒यव्र॑तान् ।।
   मृ॑ळी॒काय प्रि॒यव्र॑तान् ।।
   मृ॑ळी॒काय प्रि॒यव्र॑तान् ।।


Verse: 4 
Halfverse: a    अ॒ग्निर्दे॒वो दे॒वाना॑मभवत्पु॒रोहि॑तो॒ ऽग्निम्म॑नु॒ष्या॒ ऋष॑यः॒ समी॑धिरे ।
   अ॒ग्निर्दे॒वो दे॒वाना॑मभवत्पु॒रोहि॑तो
   अ॒ग्निः दे॒वः दे॒वाना॑म् अभवत् पु॒रोहि॑तः
   अ॒ग्निर् दे॒वो दे॒वाना॑म् अभवत् पु॒रोहि॑तो

Halfverse: b    ऽग्निम्म॑नु॒ष्या॒ ऋष॑यः॒ समी॑धिरे ।
   अ॒ग्निम् मनु॒ष्याः ऋष॑यः सम् ईधिरे ।
   अ॒ग्निम् मनु॒ष्या ऋष॑यः सम् ईधिरे ।

Halfverse: c    अ॒ग्निम्म॒हो धन॑साताव॒हं हु॑वे मृळी॒कं धन॑सातये ।।
   अ॒ग्निम्म॒हो धन॑साताव॒हं हु॑वे
   अ॒ग्निम् म॒हः धन॑सातौ अ॒हम् हुवे
   अ॒ग्निम् म॒हो धन॑साताव् अ॒हं हु॑वे

Halfverse: d    मृळी॒कं धन॑सातये ।।
   मृ॑ळी॒कम् धन॑सातये ।।
   मृ॑ळी॒कं धन॑सातये ।।


Verse: 5 
Halfverse: a    अ॒ग्निरत्रि॑म्भ॒रद्वा॑जं॒ गवि॑ष्ठिर॒म्प्राव॑न्नः॒ कण्वं॑ त्र॒सद॑स्युमाह॒वे ।
   अ॒ग्निरत्रि॑म्भ॒रद्वा॑जं॒ गवि॑ष्ठिरम्
   अ॒ग्निः अत्रि॑म् भ॒रद्वा॑जम् गवि॑ष्ठिरम्
   अ॒ग्निर् अत्रि॑म् भ॒रद्वा॑जं गवि॑ष्ठिरम्

Halfverse: b    प्राव॑न्नः॒ कण्वं॑ त्र॒सद॑स्युमाह॒वे ।
   प्र आ॑वत् नः कण्व॑म् त्र॒सद॑स्युम् आह॒वे ।
   प्राव॑न् नः कण्वं त्र॒सद॑स्युम् आह॒वे ।

Halfverse: c    अ॒ग्निं वसि॑ष्ठो हवते पु॒रोहि॑तो मृळी॒काय॑ पु॒रोहि॑तः ।।
   अ॒ग्निं वसि॑ष्ठो हवते पु॒रोहि॑तो
   अ॒ग्निम् वसि॑ष्ठः हवते पु॒रोहि॑तः
   अ॒ग्निं वसि॑ष्ठो हवते पु॒रोहि॑तो

Halfverse: d    मृळी॒काय॑ पु॒रोहि॑तः ।।
   मृ॑ळी॒काय पु॒रोहि॑तः ।।
   मृ॑ळी॒काय पु॒रोहि॑तः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.