TITUS
Rg-Veda: Rg-Veda-Samhita
Part No. 974
Previous part

Hymn: 137_(963) 
Verse: 1 
Halfverse: a    उ॒त दे॑वा॒ अव॑हितं॒ देवा॒ उन्न॑यथा॒ पुनः॑ ।
   उ॒त दे॑वा॒ अव॑हितं
   उ॒त दे॑वाः अव॑हितम्
   उ॒त दे॑वा अव॑हितं

Halfverse: b    देवा॒ उन्न॑यथा॒ पुनः॑ ।
   देवाः उत् नयथ+ पुन॑र् ।
   देवा उन् नयथा पुनः ।

Halfverse: c    उ॒ताग॑श्च॒क्रुषं॑ देवा॒ देवा॑ जी॒वय॑था॒ पुनः॑ ।।
   उ॒ताग॑श्च॒क्रुषं॑ देवा
   उ॒त आगः च॒क्रुष॑म् देवाः
   उ॒ताग॑श् च॒क्रुषं देवा

Halfverse: d    देवा॑ जी॒वय॑था॒ पुनः॑ ।।
   देवाः जी॒वय॑थ+ पुन॑र् ।।
   देवा जी॒वय॑था पुनः ।।


Verse: 2 
Halfverse: a    द्वावि॒मौ वातौ॑ वात॒ आ सिन्धो॒रा प॑रा॒वतः॑ ।
   द्वावि॒मौ वातौ॑ वात
   द्वौ इ॒मौ वातौ वातः
   दु॒वाव् इ॒मौ वातौ वात

Halfverse: b    आ सिन्धो॒रा प॑रा॒वतः॑ ।
   आ सिन्धोः आ प॑रा॒वतः ।
   आ सिन्धो॑र् आ प॑रा॒वतः ।

Halfverse: c    दक्षं॑ ते अ॒न्य आ वा॑तु॒ परा॒न्यो वा॑तु॒ यद्रपः॑ ।।
   दक्षं॑ ते अ॒न्य आ वा॑तु
   दक्ष॑म् ते अ॒न्यः आ वा॑तु
   दक्षं ते अ॒न्य आ वा॑तु

Halfverse: d    परा॒न्यो वा॑तु॒ यद्रपः॑ ।।
   परा अ॒न्यः वा॑तु यत् रपः ।।
   परा॒न्यो वा॑तु यद् रपः ।।


Verse: 3 
Halfverse: a    आ वा॑त वाहि भेष॒जं वि वा॑त वाहि॒ यद्रपः॑ ।
   आ वा॑त वाहि भेष॒जं
   आ वा॑त वाहि भेष॒जम्
   आ वा॑त वाहि भेष॒जं

Halfverse: b    वि वा॑त वाहि॒ यद्रपः॑ ।
   वि वा॑त वाहि यत् रपः ।
   वि वा॑त वाहि यद् रपः ।

Halfverse: c    त्वं हि वि॒श्वभे॑षजो दे॒वानां॑ दू॒त ईय॑से ।।
   त्वं हि वि॒श्वभे॑षजो
   त्वम् हि वि॒श्वभे॑षजः
   तु॒वं हि वि॒श्वभे॑षजो

Halfverse: d    दे॒वानां॑ दू॒त ईय॑से ।।
   दे॒वाना॑म् दू॒तः ईय॑से ।।
   दे॒वानां दू॒त ईय॑से ।।


Verse: 4 
Halfverse: a    आ त्वा॑गमं॒ शंता॑तिभि॒रथो॑ अरि॒ष्टता॑तिभिः ।
   आ त्वा॑गमं॒ शंता॑तिभिर्
   आ त्वा अगमम् शंता॑तिभिः
   आ त्वा॑गमं शंता॑तिभिर्

Halfverse: b    अथो॑ अरि॒ष्टता॑तिभिः ।
   अथ उ अरि॒ष्टता॑तिभिः ।
   अथो अरि॒ष्टता॑तिभिः ।

Halfverse: c    दक्षं॑ ते भ॒द्रमाभा॑र्ष॒म्परा॒ यक्ष्मं॑ सुवामि ते ।।
   दक्षं॑ ते भ॒द्रमाभा॑र्षम्
   दक्ष॑म् ते भ॒द्रम् आ अ॑भार्षम्
   दक्षं ते भ॒द्रम् आभा॑र्षम्

Halfverse: d    परा॒ यक्ष्मं॑ सुवामि ते ।।
   परा यक्ष्म॑म् सुवामि ते ।।
   परा यक्ष्मं सुवामि ते ।।


Verse: 5 
Halfverse: a    त्राय॑न्तामि॒ह दे॒वास्त्राय॑ताम्म॒रुतां॑ ग॒णः ।
   त्राय॑न्तामि॒ह दे॒वास्
   त्राय॑न्ताम् इ॒ह दे॒वाः
   त्राय॑न्ताम् इ॒ह दे॒वास्

Halfverse: b    त्राय॑ताम्म॒रुतां॑ ग॒णः ।
   त्राय॑ताम् म॒रुता॑म् ग॒णः ।
   त्राय॑ताम् म॒रुतां ग॒णः ।

Halfverse: c    त्राय॑न्तां॒ विश्वा॑ भू॒तानि॒ यथा॒यम॑र॒पा अस॑त् ।।
   त्राय॑न्तां॒ विश्वा॑ भू॒तानि
   त्राय॑न्ताम् विश्वा भू॒तानि
   त्राय॑न्तां विश्वा भू॒तानि

Halfverse: d    यथा॒यम॑र॒पा अस॑त् ।।
   यथा अ॒यम् अर॒पाः अस॑त् ।।
   यथा॒यम् अर॒पा अस॑त् ।।


Verse: 6 
Halfverse: a    आप॒ इद्वा उ॑ भेष॒जीरापो॑ अमीव॒चात॑नीः ।
   आप॒ इद्वा उ॑ भेष॒जीर्
   आपः इत् वै उ भेष॒जीः
   आप इद् वा उ भेष॒जीर्

Halfverse: b    आपो॑ अमीव॒चात॑नीः ।
   आपः अमीव॒चात॑नीः ।
   आपो अमीव॒चात॑नीः ।

Halfverse: c    आपः॒ सर्व॑स्य भेष॒जीस्तास्ते॑ कृण्वन्तु भेष॒जम् ।।
   आपः॒ सर्व॑स्य भेष॒जीस्
   आपः सर्व॑स्य भेष॒जीः
   आपः सर्व॑स्य भेष॒जीस्

Halfverse: d    तास्ते॑ कृण्वन्तु भेष॒जम् ।।
   ताः ते कृण्वन्तु भेष॒जम् ।।
   तास् ते कृण्वन्तु भेष॒जम् ।।


Verse: 7 
Halfverse: a    हस्ता॑भ्यां॒ दश॑शाखाभ्यां जि॒ह्वा वा॒चः पु॑रोग॒वी ।
   हस्ता॑भ्यां॒ दश॑शाखाभ्यां
   हस्ता॑भ्याम् दश॑शाखाभ्याम्
   हस्ता॑भ्यां दश॑शाखाभ्यां

Halfverse: b    जि॒ह्वा वा॒चः पु॑रोग॒वी ।
   जि॒ह्वा वा॒चः पु॑रोग॒वी ।
   जि॒ह्वा वा॒चः पु॑रोग॒वी ।

Halfverse: c    अ॑नामयि॒त्नुभ्यां॑ त्वा॒ ताभ्यां॒ त्वोप॑ स्पृशामसि ।।
   अ॑नामयि॒त्नुभ्यां॑ त्वा
   अनामयि॒त्नुभ्या॑म् त्वा
   अनामयि॒त्नुभ्यां तुवा

Halfverse: d    ताभ्यां॒ त्वोप॑ स्पृशामसि ।।
   ताभ्या॑म् त्वा उप स्पृशामसि ।।
   ताभ्यां त्वोप स्पृशामसि ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.