TITUS
Rg-Veda: Rg-Veda-Samhita
Part No. 973
Previous part

Hymn: 136_(962) 
Verse: 1 
Halfverse: a    के॒श्य॒ग्निं के॒शी वि॒षं के॒शी बि॑भर्ति॒ रोद॑सी ।
   के॒श्य॒ग्निं के॒शी वि॒षं
   के॒शी अ॒ग्निम् के॒शी वि॒षम्
   के॒शी अ॒ग्निं के॒शी वि॒षं

Halfverse: b    के॒शी बि॑भर्ति॒ रोद॑सी ।
   के॒शी बि॑भर्ति रोद॑सी ।
   के॒शी बि॑भर्ति रोद॑सी ।

Halfverse: c    के॒शी विश्वं॒ स्व॑र्दृ॒शे के॒शीदं ज्योति॑रुच्यते ।।
   के॒शी विश्वं॒ स्व॑र्दृ॒शे
   के॒शी विश्व॑म् स्व॑र् दृ॒शे
   के॒शी विश्वं सुव॑र् दृ॒शे

Halfverse: d    के॒शीदं ज्योति॑रुच्यते ।।
   के॒शी इ॒दम् ज्योतिः उच्यते ।।
   के॒शीदं ज्योति॑र् उच्यते ।।


Verse: 2 
Halfverse: a    मुन॑यो॒ वात॑रशनाः पि॒शङ्गा॑ वसते॒ मला॑ ।
   मुन॑यो॒ वात॑रशनाः
   मुन॑यः वात॑रशनाः
   मुन॑यो वात॑रशनाः

Halfverse: b    पि॒शङ्गा॑ वसते॒ मला॑ ।
   पि॒शङ्गा वसते मला ।
   पि॒शङ्गा वसते मला ।

Halfverse: c    वात॒स्यानु॒ ध्राजिं॑ यन्ति॒ यद्दे॒वासो॒ अवि॑क्षत ।।
   वात॒स्यानु॒ ध्राजिं॑ यन्ति
   वात॑स्य अनु ध्राजि॑म् यन्ति
   वात॒स्यानु ध्राजिं यन्ति

Halfverse: d    यद्दे॒वासो॒ अवि॑क्षत ।।
   यत् दे॒वासः अवि॑क्षत ।।
   यद् दे॒वासो अवि॑क्षत ।।


Verse: 3 
Halfverse: a    उन्म॑दिता॒ मौने॑येन॒ वाताँ॒ आ त॑स्थिमा व॒यम् ।
   उन्म॑दिता॒ मौने॑येन
   उन्म॑दिताः मौने॑येन
   उन्म॑दिता मौने॑येन

Halfverse: b    वाताँ॒ आ त॑स्थिमा व॒यम् ।
   वाता॑न् आ त॑स्थिम+ व॒यम् ।
   वाताँ आ त॑स्थिमा व॒यम् ।

Halfverse: c    शरी॒रेद॒स्माकं॑ यू॒यम्मर्ता॑सो अ॒भि प॑श्यथ ।।
   शरी॒रेद॒स्माकं॑ यू॒यम्
   शरी॑रा इत् अ॒स्माक॑म् यू॒यम्
   शरी॒रेद् अ॒स्माकं यू॒यम्

Halfverse: d    मर्ता॑सो अ॒भि प॑श्यथ ।।
   मर्ता॑सः अ॒भि प॑श्यथ ।।
   मर्ता॑सो अ॒भि प॑श्यथ ।।


Verse: 4 
Halfverse: a    अ॒न्तरि॑क्षेण पतति॒ विश्वा॑ रू॒पाव॒चाक॑शत् ।
   अ॒न्तरि॑क्षेण पतति
   अ॒न्तरि॑क्षेण पतति
   अ॒न्तरि॑क्षेण पतति

Halfverse: b    विश्वा॑ रू॒पाव॒चाक॑शत् ।
   विश्वा रू॒पा अ॑व॒चाक॑शत् ।
   विश्वा रू॒पाव॒चाक॑शत् ।

Halfverse: c    मुनि॑र्दे॒वस्य॑देवस्य॒ सौकृ॑त्याय॒ सखा॑ हि॒तः ।।
   मुनि॑र्दे॒वस्य॑देवस्य
   मुनिः दे॒वस्य॑देवस्य
   मुनि॑र् दे॒वस्य॑देवस्य

Halfverse: d    सौकृ॑त्याय॒ सखा॑ हि॒तः ।।
   सौकृ॑त्याय सखा हि॒तः ।।
   सौकृ॑त्याय सखा हि॒तः ।।


Verse: 5 
Halfverse: a    वात॒स्याश्वो॑ वा॒योः सखाथो॑ दे॒वेषि॑तो॒ मुनिः॑ ।
   वात॒स्याश्वो॑ वा॒योः सखा
   वात॑स्य अश्वः वा॒योः सखा
   वात॒स्याश्वो वा॒योः सखा

Halfverse: b     अथो॑ दे॒वेषि॑तो॒ मुनिः॑ ।
   अथ उ दे॒वेषि॑तः मुनिः ।
   अथो दे॒वेषि॑तो मुनिः ।

Halfverse: c    उ॒भौ स॑मु॒द्रावा क्षे॑ति॒ यश्च॒ पूर्व॑ उ॒ताप॑रः ।।
   उ॒भौ स॑मु॒द्रावा क्षे॑ति
   उ॒भौ स॑मु॒द्रौ आ क्षे॑ति
   उ॒भौ स॑मु॒द्राव् आ क्षे॑ति

Halfverse: d    यश्च॒ पूर्व॑ उ॒ताप॑रः ।।
   यः च पूर्वः उ॒त अप॑रः ।।
   यश् च पूर्व उ॒ताप॑रः ।।


Verse: 6 
Halfverse: a    अ॑प्स॒रसां॑ गन्ध॒र्वाणा॑म्मृ॒गाणां॒ चर॑णे॒ चर॑न् ।
   अ॑प्स॒रसां॑ गन्ध॒र्वाणा॑म्
   अप्स॒रसा॑म् गन्ध॒र्वाणा॑म्
   अप्स॒रसां गन्ध॒र्वाणा॑म्

Halfverse: b    मृ॒गाणां॒ चर॑णे॒ चर॑न् ।
   मृ॒गाणा॑म् चर॑णे चर॑न् ।
   मृ॒गाणां चर॑णे चर॑न् ।

Halfverse: c    के॒शी केत॑स्य वि॒द्वान्सखा॑ स्वा॒दुर्म॒दिन्त॑मः ।।
   के॒शी केत॑स्य वि॒द्वान्
   के॒शी केत॑स्य वि॒द्वान्
   के॒शी केत॑स्य वि॒द्वान्

Halfverse: d    सखा॑ स्वा॒दुर्म॒दिन्त॑मः ।।
   सखा स्वा॒दुः म॒दिन्त॑मः ।।
   सखा स्वा॒दुर् म॒दिन्त॑मः ।।


Verse: 7 
Halfverse: a    वा॒युर॑स्मा॒ उपा॑मन्थत्पि॒नष्टि॑ स्मा कुनन्न॒मा ।
   वा॒युर॑स्मा॒ उपा॑मन्थत्
   वा॒युः अ॑स्मै उप अमन्थत्
   वा॒युर् अस्मा उपा॑मन्थत्

Halfverse: b    पि॒नष्टि॑ स्मा कुनन्न॒मा ।
   पि॒नष्टि स्म+ कुनन्न॒मा ।
   पि॒नष्टि स्मा कुनन्न॒मा ।

Halfverse: c    के॒शी वि॒षस्य॒ पात्रे॑ण॒ यद्रु॒द्रेणापि॑बत्स॒ह ।।
   के॒शी वि॒षस्य॒ पात्रे॑ण
   के॒शी वि॒षस्य पात्रे॑ण
   के॒शी वि॒षस्य पात्रे॑ण

Halfverse: d    यद्रु॒द्रेणापि॑बत्स॒ह ।।
   यत् रु॒द्रेण अपि॑बत् स॒ह ।।
   यद् रु॒द्रेणापि॑बत् स॒ह ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.