TITUS
Rg-Veda: Rg-Veda-Samhita
Part No. 963
Previous part

Hymn: 126_(952) 
Verse: 1 
Halfverse: a    न तमंहो॒ न दु॑रि॒तं देवा॑सो अष्ट॒ मर्त्य॑म् ।
   न तमंहो॒ न दु॑रि॒तं
   न तम् अंहः न दु॑रि॒तम्
   न तम् अंहो न दु॑रि॒तं

Halfverse: b    देवा॑सो अष्ट॒ मर्त्य॑म् ।
   देवा॑सः अष्ट मर्त्य॑म् ।
   देवा॑सो अष्ट मर्ति॑यम् ।

Halfverse: c    स॒जोष॑सो॒ यम॑र्य॒मा मि॒त्रो नय॑न्ति॒ वरु॑णो॒ अति॒ द्विषः॑ ।।
   स॒जोष॑सो॒ यम॑र्य॒मा
   स॒जोष॑सः यम् अर्य॒मा
   स॒जोष॑सो यम् अर्य॒मा

Halfverse: d    मि॒त्रो नय॑न्ति॒ वरु॑णो
   मि॒त्रः नय॑न्ति वरु॑णः
   मि॒त्रो नय॑न्ति वरु॑णो

Halfverse: e    अति॒ द्विषः॑ ।।
   अति द्विषः ।।
   अति द्विषः ।।


Verse: 2 
Halfverse: a    तद्धि व॒यं वृ॑णी॒महे॒ वरु॑ण॒ मित्रार्य॑मन् ।
   तद्धि व॒यं वृ॑णी॒महे
   तत् हि व॒यम् वृणी॒महे
   तद् धि व॒यं वृ॑णी॒महे

Halfverse: b    वरु॑ण॒ मित्रार्य॑मन् ।
   वरु॑ण मित्र अर्य॑मन् ।
   वरु॑ण मित्र अर्य॑मन् ।

Halfverse: c    येना॒ निरंह॑सो यू॒यम्पा॒थ ने॒था च॒ मर्त्य॒मति॒ द्विषः॑ ।।
   येना॒ निरंह॑सो यू॒यम्
   येन+ निः अंह॑सः यू॒यम्
   येना निर् अंह॑सो यू॒यम्

Halfverse: d    पा॒थ ने॒था च॒ मर्त्य॑म्
   पा॒थ ने॒थ+ च मर्त्य॑म्
   पा॒थ ने॒था च मर्ति॑यम्

Halfverse: e    अति॒ द्विषः॑ ।।
   अति द्विषः ।।
   अति द्विषः ।।


Verse: 3 
Halfverse: a    ते नू॒नं नो॒ ऽयमू॒तये॒ वरु॑णो मि॒त्रो अ॑र्य॒मा ।
   ते नू॒नं नो॒ ऽयमू॒तये
   ते नू॒नम् नः अ॒यम् ऊ॒तये
   ते नू॒नं नो ऽयम् ऊ॒तये

Halfverse: b    वरु॑णो मि॒त्रो अ॑र्य॒मा ।
   वरु॑णः मि॒त्रः अ॑र्य॒मा ।
   वरु॑णो मि॒त्रो अ॑र्य॒मा ।

Halfverse: c    नयि॑ष्ठा उ नो ने॒षणि॒ पर्षि॑ष्ठा उ नः प॒र्षण्यति॒ द्विषः॑ ।।
   नयि॑ष्ठा ।!। उ॑ नो ने॒षणि
   नयि॑ष्ठाः ।!। उ नः ने॒षणि
   नयि॑ष्ठा उ नो ने॒षणि

Halfverse: d    पर्षि॑ष्ठा उ नः प॒र्षण्य्
   पर्षि॑ष्ठाः उ नः प॒र्षणि
   पर्षि॑ष्ठा उ नः प॒र्षणि

Halfverse: e    अति॒ द्विषः॑ ।।
   अति द्विषः ।।
   अति द्विषः ।।


Verse: 4 
Halfverse: a    यू॒यं विश्व॒म्परि॑ पाथ॒ वरु॑णो मि॒त्रो अ॑र्य॒मा ।
   यू॒यं विश्व॒म्परि॑ पाथ
   यू॒यम् विश्व॑म् परि पाथ
   यू॒यं विश्व॑म् परि पाथ

Halfverse: b    वरु॑णो मि॒त्रो अ॑र्य॒मा ।
   वरु॑णः मि॒त्रः अ॑र्य॒मा ।
   वरु॑णो मि॒त्रो अ॑र्य॒मा ।

Halfverse: c    यु॒ष्माकं॒ शर्म॑णि प्रि॒ये स्याम॑ सुप्रणीत॒यो ऽति॒ द्विषः॑ ।।
   यु॒ष्माकं॒ शर्म॑णि प्रि॒ये
   यु॒ष्माक॑म् शर्म॑णि प्रि॒ये
   यु॒ष्माकं शर्म॑णि प्रि॒ये

Halfverse: d    स्याम॑ सुप्रणीत॒यो
   स्याम सुप्रणीतयः
   सि॒याम सुप्रणीतयो

Halfverse: e    ऽति॒ द्विषः॑ ।।
   अति द्विषः ।।
   अति द्विषः ।।


Verse: 5 
Halfverse: a    आ॑दि॒त्यासो॒ अति॒ स्रिधो॒ वरु॑णो मि॒त्रो अ॑र्य॒मा ।
   आ॑दि॒त्यासो॒ अति॒ स्रिधो
   आदि॒त्यासः अति स्रिधः
   आदि॒त्यासो अति स्रिधो

Halfverse: b    वरु॑णो मि॒त्रो अ॑र्य॒मा ।
   वरु॑णः मि॒त्रः अ॑र्य॒मा ।
   वरु॑णो मि॒त्रो अ॑र्य॒मा ।

Halfverse: c    उ॒ग्रम्म॒रुद्भी॑ रु॒द्रं हु॑वे॒मेन्द्र॑म॒ग्निं स्व॒स्तये ऽति॒ द्विषः॑ ।।
   उ॒ग्रम्म॒रुद्भी॑ रु॒द्रं हु॑वेम
   उ॒ग्रम् म॒रुद्भिः रु॒द्रम् हुवेम
   उ॒ग्रम् म॒रुद्भी रु॒द्रं हु॑वेम

Halfverse: d     इन्द्र॑म॒ग्निं स्व॒स्तये
   इन्द्र॑म् अ॒ग्निम् स्व॒स्तये
   इन्द्र॑म् अ॒ग्निं सुअ॒स्तये

Halfverse: e    ऽति॒ द्विषः॑ ।।
   अति द्विषः ।।
   अति द्विषः ।।


Verse: 6 
Halfverse: a    नेता॑र ऊ॒ षु ण॑स्ति॒रो वरु॑णो मि॒त्रो अ॑र्य॒मा ।
   नेता॑र ऊ॒ षु ण॑स्ति॒रो
   नेता॑रः उ+ सु नः ति॒रः
   नेता॑र ऊ षु ण॑स् ति॒रो

Halfverse: b    वरु॑णो मि॒त्रो अ॑र्य॒मा ।
   वरु॑णः मि॒त्रः अ॑र्य॒मा ।
   वरु॑णो मि॒त्रो अ॑र्य॒मा ।

Halfverse: c    अति॒ विश्वा॑नि दुरि॒ता राजा॑नश्चर्षणी॒नामति॒ द्विषः॑ ।।
   अति॒ विश्वा॑नि दुरि॒ता
   अति विश्वा॑नि दुरि॒ता
   अति विश्वा॑नि दुरि॒ता

Halfverse: d    राजा॑नश्चर्षणी॒नाम्
   राजा॑नः चर्षणी॒नाम्
   राजा॑नश् चर्षणी॒नाअम्

Halfverse: e    अति॒ द्विषः॑ ।।
   अति द्विषः ।।
   अति द्विषः ।।


Verse: 7 
Halfverse: a    शु॒नम॒स्मभ्य॑मू॒तये॒ वरु॑णो मि॒त्रो अ॑र्य॒मा ।
   शु॒नम॒स्मभ्य॑मू॒तये
   शु॒नम् अ॒स्मभ्य॑म् ऊ॒तये
   शु॒नम् अ॒स्मभ्य॑म् ऊ॒तये

Halfverse: b    वरु॑णो मि॒त्रो अ॑र्य॒मा ।
   वरु॑णः मि॒त्रः अ॑र्य॒मा ।
   वरु॑णो मि॒त्रो अ॑र्य॒मा ।

Halfverse: c    शर्म॑ यछन्तु स॒प्रथ॑ आदि॒त्यासो॒ यदीम॑हे॒ अति॒ द्विषः॑ ।।
   शर्म॑ यछन्तु स॒प्रथ
   शर्म यछन्तु स॒प्रथः
   शर्म यछन्तु स॒प्रथ

Halfverse: d    आदि॒त्यासो॒ यदीम॑हे
   आदि॒त्यासः यत् ईम॑हे
   आदि॒त्यासो यद् ईम॑हे

Halfverse: e    अति॒ द्विषः॑ ।।
   अति द्विषः ।।
   अति द्विषः ।।


Verse: 8 
Halfverse: a    यथा॑ ह॒ त्यद्व॑सवो गौ॒र्यं॑ चित्प॒दि षि॒ताममु॑ञ्चता यजत्राः ।
   यथा॑ ह॒ त्यद्व॑सवो गौ॒र्यं॑ चित्
   यथा ह त्यत् वसवः गौ॒र्य॑म् चित्
   यथा ह त्यद् वसवो गौ॒रियं चित्

Halfverse: b    प॒दि षि॒ताममु॑ञ्चता यजत्राः ।
   प॒दि सि॒ताम् अमु॑ञ्चत+ यजत्राः ।
   प॒दि षि॒ताम् अमु॑ञ्चता यजत्राः ।

Halfverse: c    ए॒वो ष्व॒स्मन्मु॑ञ्चता॒ व्यंहः॒ प्र ता॑र्यग्ने प्रत॒रं न॒ आयुः॑ ।।
   ए॒वो ष्व॒स्मन्मु॑ञ्चता॒ व्यंहः
   ए॒व उ सु अ॒स्मत् मुञ्चत+ वि अंहः
   ए॒वो षु अ॒स्मन् मुञ्चता वि अंहः

Halfverse: d    प्र ता॑र्यग्ने प्रत॒रं न॒ आयुः॑ ।।
   प्र ता॑रि अग्ने प्रत॒रम् नः आयुः ।।
   प्र ता॑रि अग्ने प्रत॒रं न आयुः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.