TITUS
Rg-Veda: Rg-Veda-Samhita
Part No. 959
Previous part

Hymn: 122_(948) 
Verse: 1 
Halfverse: a    वसुं॒ न चि॒त्रम॑हसं गृणीषे वा॒मं शेव॒मति॑थिमद्विषे॒ण्यम् ।
   वसुं॒ न चि॒त्रम॑हसं गृणीषे
   वसु॑म् न चि॒त्रम॑हसम् गृणीषे
   वसुं न चि॒त्रम॑हसं गृणीषे

Halfverse: b    वा॒मं शेव॒मति॑थिमद्विषे॒ण्यम् ।
   वा॒मम् शेव॑म् अति॑थिम् अद्विषे॒ण्यम् ।
   वा॒मं शेव॑म् अति॑थिम् अद्विषे॒ण्यम् ।

Halfverse: c    स रा॑सते शु॒रुधो॑ वि॒श्वधा॑यसो॒ ऽग्निर्होता॑ गृ॒हप॑तिः सु॒वीर्य॑म् ।।
   स रा॑सते शु॒रुधो॑ वि॒श्वधा॑यसो
   स रा॑सते शु॒रुधः वि॒श्वधा॑यसः
   स रा॑सते शु॒रुधो वि॒श्वधा॑यसो

Halfverse: d    ऽग्निर्होता॑ गृ॒हप॑तिः सु॒वीर्य॑म् ।।
   अ॒ग्निः होता गृ॒हप॑तिः सु॒वीर्य॑म् ।।
   अ॒ग्निर् होता गृ॒हप॑तिः सु॒वीर्य॑म् ।।


Verse: 2 
Halfverse: a    जु॑षा॒णो अ॑ग्ने॒ प्रति॑ हर्य मे॒ वचो॒ विश्वा॑नि वि॒द्वान्व॒युना॑नि सुक्रतो ।
   जु॑षा॒णो अ॑ग्ने॒ प्रति॑ हर्य मे॒ वचो
   जुषा॒णः अ॑ग्ने प्रति हर्य मे वचः
   जुषा॒णो अ॑ग्ने प्रति हर्य मे वचो

Halfverse: b    विश्वा॑नि वि॒द्वान्व॒युना॑नि सुक्रतो ।
   विश्वा॑नि वि॒द्वान् व॒युना॑नि सुक्रतो ।
   विश्वा॑नि वि॒द्वान् व॒युना॑नि सुक्रतो ।

Halfverse: c    घृत॑निर्णि॒ग्ब्रह्म॑णे गा॒तुमेर॑य॒ तव॑ दे॒वा अ॑जनय॒न्ननु॑ व्र॒तम् ।।
   घृत॑निर्णि॒ग्ब्रह्म॑णे गा॒तुमेर॑य
   घृत॑निर्णिक् ब्रह्म॑णे गा॒तुम् आ ई॑रय
   घृत॑निर्णिग् ब्रह्म॑णे गा॒तुम् एर॑य

Halfverse: d    तव॑ दे॒वा अ॑जनय॒न्ननु॑ व्र॒तम् ।।
   तव दे॒वाः अ॑जनयन् अनु व्र॒तम् ।।
   तव दे॒वा अ॑जनयन्न् अनु व्र॒तम् ।।


Verse: 3 
Halfverse: a    स॒प्त धामा॑नि परि॒यन्नम॑र्त्यो॒ दाश॑द्दा॒शुषे॑ सु॒कृते॑ मामहस्व ।
   स॒प्त धामा॑नि परि॒यन्नम॑र्त्यो
   स॒प्त धामा॑नि परि॒यन् अम॑र्त्यः
   स॒प्त धामा॑नि परि॒यन्न् अम॑र्तियो

Halfverse: b    दाश॑द्दा॒शुषे॑ सु॒कृते॑ मामहस्व ।
   दाश॑त् दा॒शुषे सु॒कृते मामहस्व ।
   दाश॑द् दा॒शुषे सु॒कृते मामहस्व ।

Halfverse: c    सु॒वीरे॑ण र॒यिणा॑ग्ने स्वा॒भुवा॒ यस्त॒ आन॑ट्स॒मिधा॒ तं जु॑षस्व ।।
   सु॒वीरे॑ण र॒यिणा॑ग्ने स्वा॒भुवा
   सु॒वीरे॑ण र॒यिणा अग्ने स्वा॒भुवा
   सु॒वीरे॑ण र॒यिणा॑ग्ने सुआ॒भुवा

Halfverse: d    यस्त॒ आन॑ट्स॒मिधा॒ तं जु॑षस्व ।।
   यः ते आन॑ट् स॒मिधा तम् जुषस्व ।।
   यस् त आन॑ट् स॒मिधा तं जु॑षस्व ।।


Verse: 4 
Halfverse: a    य॒ज्ञस्य॑ के॒तुम्प्र॑थ॒मम्पु॒रोहि॑तं ह॒विष्म॑न्त ईळते स॒प्त वा॒जिन॑म् ।
   य॒ज्ञस्य॑ के॒तुम्प्र॑थ॒मम्पु॒रोहि॑तं
   य॒ज्ञस्य के॒तुम् प्रथ॒मम् पु॒रोहि॑तम्
   य॒ज्ञस्य के॒तुम् प्रथ॒मम् पु॒रोहि॑तं

Halfverse: b    ह॒विष्म॑न्त ईळते स॒प्त वा॒जिन॑म् ।
   ह॒विष्म॑न्तः ईळते स॒प्त वा॒जिन॑म् ।
   ह॒विष्म॑न्त ईळते स॒प्त वा॒जिन॑म् ।

Halfverse: c    शृ॒ण्वन्त॑म॒ग्निं घृ॒तपृ॑ष्ठमु॒क्षण॑म्पृ॒णन्तं॑ दे॒वम्पृ॑ण॒ते सु॒वीर्य॑म् ।।
   शृ॒ण्वन्त॑म॒ग्निं घृ॒तपृ॑ष्ठमु॒क्षण॑म्
   शृ॒ण्वन्त॑म् अ॒ग्निम् घृ॒तपृ॑ष्ठम् उ॒क्षण॑म्
   शृ॒ण्वन्त॑म् अ॒ग्निं घृ॒तपृ॑ष्ठम् उ॒क्षण॑म्

Halfverse: d    पृ॒णन्तं॑ दे॒वम्पृ॑ण॒ते सु॒वीर्य॑म् ।।
   पृ॒णन्त॑म् दे॒वम् पृण॒ते सु॒वीर्य॑म् ।।
   पृ॒णन्तं दे॒वम् पृण॒ते सु॒वीरि॑यम् ।।


Verse: 5 
Halfverse: a    त्वं दू॒तः प्र॑थ॒मो वरे॑ण्यः॒ स हू॒यमा॑नो अ॒मृता॑य मत्स्व ।
   त्वं दू॒तः प्र॑थ॒मो वरे॑ण्यः
   त्वम् दू॒तः प्र॑थ॒मः वरे॑ण्यः
   तु॒वं दू॒तः ? प्र॑थ॒मो वरे॑ण्यः

Halfverse: b    स हू॒यमा॑नो अ॒मृता॑य मत्स्व ।
   स हू॒यमा॑नः अ॒मृता॑य मत्स्व ।
   स हू॒यमा॑नो अ॒मृता॑य मत्स्व ।

Halfverse: c    त्वाम्म॑र्जयन्म॒रुतो॑ दा॒शुषो॑ गृ॒हे त्वां स्तोमे॑भि॒र्भृग॑वो॒ वि रु॑रुचुः ।।
   त्वाम्म॑र्जयन्म॒रुतो॑ दा॒शुषो॑ गृ॒हे
   त्वाम् मर्जयन् म॒रुतः दा॒शुषः गृ॒हे
   त्वाम् मर्जयन् म॒रुतो दा॒शुषो गृ॒हे

Halfverse: d    त्वां स्तोमे॑भि॒र्भृग॑वो॒ वि रु॑रुचुः ।।
   त्वाम् स्तोमे॑भिः भृग॑वः वि रु॑रुचुः ।।
   तु॒वां स्तोमे॑भिर् भृग॑वो वि रु॑रुचुः ।।


Verse: 6 
Halfverse: a    इषं॑ दु॒हन्सु॒दुघां॑ वि॒श्वधा॑यसं यज्ञ॒प्रिये॒ यज॑मानाय सुक्रतो ।
   इषं॑ दु॒हन्सु॒दुघां॑ वि॒श्वधा॑यसं
   इष॑म् दु॒हन् सु॒दुघा॑म् वि॒श्वधा॑यसम्
   इषं दु॒हन् सु॒दुघां वि॒श्वधा॑यसं

Halfverse: b    यज्ञ॒प्रिये॒ यज॑मानाय सुक्रतो ।
   य॑ज्ञ॒प्रिये यज॑मानाय सुक्रतो ।
   य॑ज्ञ॒प्रिये यज॑मानाय सुक्रतो ।

Halfverse: c    अग्ने॑ घृ॒तस्नु॒स्त्रिरृ॒तानि॒ दीद्य॑द्व॒र्तिर्य॒ज्ञम्प॑रि॒यन्सु॑क्रतूयसे ।।
   अग्ने॑ घृ॒तस्नु॒स्त्रिरृ॒तानि॒ दीद्य॑द्
   अग्ने घृ॒तस्नुः त्रिः ऋ॒तानि दीद्य॑त्
   अग्ने घृ॒तस्नु॑स् त्रिर् ऋ॒तानि दीदि॑यद्

Halfverse: d    व॒र्तिर्य॒ज्ञम्प॑रि॒यन्सु॑क्रतूयसे ।।
   व॒र्तिः य॒ज्ञम् परि॒यन् सुक्रतूयसे ।।
   व॒र्तिर् य॒ज्ञम् परि॒यन् सुक्रतूयसे ।।


Verse: 7 
Halfverse: a    त्वामिद॒स्या उ॒षसो॒ व्यु॑ष्टिषु दू॒तं कृ॑ण्वा॒ना अ॑यजन्त॒ मानु॑षाः ।
   त्वामिद॒स्या उ॒षसो॒ व्यु॑ष्टिषु
   त्वाम् इत् अ॒स्याः उ॒षसः व्यु॑ष्टिषु
   तु॒वाम् इद् अ॒स्या उ॒षसो विउष्टिषु

Halfverse: b    दू॒तं कृ॑ण्वा॒ना अ॑यजन्त॒ मानु॑षाः ।
   दू॒तम् कृण्वा॒नाः अ॑यजन्त मानु॑षाः ।
   दू॒तं कृ॑ण्वा॒ना अ॑यजन्त मानु॑षाः ।

Halfverse: c    त्वां दे॒वा म॑ह॒याय्या॑य वावृधु॒राज्य॑मग्ने निमृ॒जन्तो॑ अध्व॒रे ।।
   त्वां दे॒वा म॑ह॒याय्या॑य वावृधुर्
   त्वाम् दे॒वाः म॑ह॒याय्या॑य वावृधुः
   त्वां दे॒वा म॑ह॒यायि॑याय वावृधुर्

Halfverse: d    आज्य॑मग्ने निमृ॒जन्तो॑ अध्व॒रे ।।
   आज्य॑म् अग्ने निमृ॒जन्तः अध्व॒रे ।।
   आजि॑यम् अग्ने निमृ॒जन्तो अध्व॒रे ।।


Verse: 8 
Halfverse: a    नि त्वा॒ वसि॑ष्ठा अह्वन्त वा॒जिनं॑ गृ॒णन्तो॑ अग्ने वि॒दथे॑षु वे॒धसः॑ ।
   नि त्वा॒ वसि॑ष्ठा अह्वन्त वा॒जिनं
   नि त्वा वसि॑ष्ठाः अह्वन्त वा॒जिन॑म्
   नि त्वा वसि॑ष्ठा अहुवन्त वा॒जिनं

Halfverse: b    गृ॒णन्तो॑ अग्ने वि॒दथे॑षु वे॒धसः॑ ।
   गृ॒णन्तः अग्ने वि॒दथे॑षु वे॒धसः ।
   गृ॒णन्तो अग्ने वि॒दथे॑षु वे॒धसः ।

Halfverse: c    रा॒यस्पोषं॒ यज॑मानेषु धारय यू॒यम्पा॑त स्व॒स्तिभिः॒ सदा॑ नः ।।
   रा॒यस्पोषं॒ यज॑मानेषु धारय
   रा॒यः पोष॑म् यज॑मानेषु धारय
   रा॒यस् पोषं यज॑मानेषु धारय

Halfverse: d    यू॒यम्पा॑त स्व॒स्तिभिः॒ सदा॑ नः ।।
   यू॒यम् पात स्व॒स्तिभिः सदा नः ।।
   यू॒यम् पात सुअ॒स्तिभिः सदा नः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.