TITUS
Rg-Veda: Rg-Veda-Samhita
Part No. 958
Previous part

Hymn: 121_(947) 
Verse: 1 
Halfverse: a    हि॑रण्यग॒र्भः सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत् ।
   हि॑रण्यग॒र्भः सम॑वर्त॒ताग्रे
   हिरण्यग॒र्भः सम् अवर्तत अग्रे
   हिरण्यग॒र्भः सम् अवर्त॒ताग्रे

Halfverse: b    भू॒तस्य॑ जा॒तः पति॒रेक॑ आसीत् ।
   भू॒तस्य जा॒तः पतिः एकः आसीत् ।
   भू॒तस्य जा॒तः पति॑र् एक आसीत् ।

Halfverse: c    स दा॑धार पृथि॒वीं द्यामु॒तेमां कस्मै॑ दे॒वाय॑ ह॒विषा॑ विधेम ।।
   स दा॑धार पृथि॒वीं द्यामु॒तेमां
   स दा॑धार पृथि॒वीम् द्याम् उ॒त इ॒माम्
   स दा॑धार पृथि॒वीं द्याम् उ॒तेमां

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 2 
Halfverse: a    य आ॑त्म॒दा ब॑ल॒दा यस्य॒ विश्व॑ उ॒पास॑ते प्र॒शिषं॒ यस्य॑ दे॒वाः ।
   य आ॑त्म॒दा ब॑ल॒दा यस्य॒ विश्व
   यः आ॑त्म॒दाः ब॑ल॒दाः यस्य विश्वे
   य आ॑त्म॒दा ब॑ल॒दा यस्य विश्व

Halfverse: b    उ॒पास॑ते प्र॒शिषं॒ यस्य॑ दे॒वाः ।
   उ॒पास॑ते प्र॒शिष॑म् यस्य दे॒वाः ।
   उ॒पास॑ते प्र॒शिषं यस्य दे॒वाः ।

Halfverse: c    यस्य॑ छा॒यामृतं॒ यस्य॑ मृ॒त्युः कस्मै॑ दे॒वाय॑ ह॒विषा॑ विधेम ।।
   यस्य॑ छा॒यामृतं॒ यस्य॑ मृ॒त्युः
   यस्य छा॒या अ॒मृत॑म् यस्य मृ॒त्युः
   यस्य छा॒या अमृतं यस्य मृ॒त्युः

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 3 
Halfverse: a    यः प्रा॑ण॒तो नि॑मिष॒तो म॑हि॒त्वैक॒ इद्राजा॒ जग॑तो ब॒भूव॑ ।
   यः प्रा॑ण॒तो नि॑मिष॒तो म॑हि॒त्वा
   यः प्रा॑ण॒तः नि॑मिष॒तः म॑हि॒त्वा
   यः प्रा॑ण॒तो नि॑मिष॒तो म॑हि॒त्वा

Halfverse: b     एक॒ इद्राजा॒ जग॑तो ब॒भूव॑ ।
   एकः इत् राजा जग॑तः ब॒भूव ।
   एक इद् राजा जग॑तो ब॒भूव ।

Halfverse: c    य ईशे॑ अ॒स्य द्वि॒पद॒श्चतु॑ष्पदः॒ कस्मै॑ दे॒वाय॑ ह॒विषा॑ विधेम ।।
   य ईशे॑ अ॒स्य द्वि॒पद॒श्चतु॑ष्पदः
   यः ईशे अ॒स्य द्वि॒पदः चतु॑ष्पदः
   य ईशे अ॒स्य द्वि॒पद॑श् चतु॑ष्पदः

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 4 
Halfverse: a    यस्ये॒मे हि॒मव॑न्तो महि॒त्वा यस्य॑ समु॒द्रं र॒सया॑ स॒हाहुः ।
   यस्ये॒मे हि॒मव॑न्तो महि॒त्वा
   यस्य इ॒मे हि॒मव॑न्तः महि॒त्वा
   यस्य इ॒मे हि॒मव॑न्तो महि॒त्वा

Halfverse: b    यस्य॑ समु॒द्रं र॒सया॑ स॒हाहुः ।
   यस्य समु॒द्रम् र॒सया स॒ह आ॒हुः ।
   यस्य समु॒द्रं र॒सया स॒हाहुः ।

Halfverse: c    यस्ये॒माः प्र॒दिशो॒ यस्य॑ बा॒हू कस्मै॑ दे॒वाय॑ ह॒विषा॑ विधेम ।।
   यस्ये॒माः प्र॒दिशो॒ यस्य॑ बा॒हू
   यस्य इ॒माः प्र॒दिशः यस्य बा॒हू
   यस्य इ॒माः प्र॒दिशो यस्य बा॒हू

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 5 
Halfverse: a    येन॒ द्यौरु॒ग्रा पृ॑थि॒वी च॑ दृ॒ऴा येन॒ स्व॑ स्तभि॒तं येन॒ नाकः॑ ।
   येन॒ द्यौरु॒ग्रा पृ॑थि॒वी च॑ दृ॒ऴा
   येन द्यौः उ॒ग्रा पृ॑थि॒वी च दृ॒ऴा
   येन द्यौर् उ॒ग्रा पृ॑थि॒वी च दृ॒ऴा

Halfverse: b    येन॒ स्व॑ स्तभि॒तं येन॒ नाकः॑ ।
   येन स्व॑र् स्तभि॒तम् येन नाकः ।
   येन सुव स्तभि॒तं येन नाकः ।

Halfverse: c    यो अ॒न्तरि॑क्षे॒ रज॑सो वि॒मानः॒ कस्मै॑ दे॒वाय॑ ह॒विषा॑ विधेम ।।
   यो अ॒न्तरि॑क्षे॒ रज॑सो वि॒मानः
   यः अ॒न्तरि॑क्षे रज॑सः वि॒मानः
   यो अ॒न्तरि॑क्षे रज॑सो वि॒मानः

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 6 
Halfverse: a    यं क्रन्द॑सी॒ अव॑सा तस्तभा॒ने अ॒भ्ऐक्षे॑ता॒म्मन॑सा॒ रेज॑माने ।
   यं क्रन्द॑सी॒ अव॑सा तस्तभा॒ने
   यम् क्रन्द॑सी अव॑सा तस्तभा॒ने
   यं क्रन्द॑सी अव॑सा तस्तभा॒ने

Halfverse: b    अ॒भ्ऐक्षे॑ता॒म्मन॑सा॒ रेज॑माने ।
   अ॒भि ऐक्षे॑ताम् मन॑सा रेज॑माने ।
   अ॑भ्य् ऐक्षे॑ताम् मन॑सा रेज॑माने ।

Halfverse: c    यत्राधि॒ सूर॒ उदि॑तो वि॒भाति॒ कस्मै॑ दे॒वाय॑ ह॒विषा॑ विधेम ।।
   यत्राधि॒ सूर॒ उदि॑तो वि॒भाति
   यत्र अधि सूरः उदि॑तः वि॒भाति
   यत्राधि सूर उदि॑तो वि॒भाति

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 7 
Halfverse: a    आपो॑ ह॒ यद्बृ॑ह॒तीर्विश्व॒माय॒न्गर्भं॒ दधा॑ना ज॒नय॑न्तीर॒ग्निम् ।
   आपो॑ ह॒ यद्बृ॑ह॒तीर्विश्व॒माय॑न्
   आपः ह यत् बृह॒तीः विश्व॑म् आय॑न्
   आपो ह यद् बृह॒तीर् विश्व॑म् आय॑न्

Halfverse: b    गर्भं॒ दधा॑ना ज॒नय॑न्तीर॒ग्निम् ।
   गर्भ॑म् दधा॑नाः ज॒नय॑न्तीः अ॒ग्निम् ।
   गर्भं दधा॑ना ज॒नय॑न्तीर् अ॒ग्निम् ।

Halfverse: c    ततो॑ दे॒वानां॒ सम॑वर्त॒तासु॒रेकः॒ कस्मै॑ दे॒वाय॑ ह॒विषा॑ विधेम ।।
   ततो॑ दे॒वानां॒ सम॑वर्त॒तासु॒रेकः
   ततः दे॒वाना॑म् सम् अवर्तत असुः एकः
   ततो दे॒वानां सम् अवर्त॒तासु॑र् एकः

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 8 
Halfverse: a    यश्चि॒दापो॑ महि॒ना प॒र्यप॑श्य॒द्दक्षं॒ दधा॑ना ज॒नय॑न्तीर्य॒ज्ञम् ।
   यश्चि॒दापो॑ महि॒ना प॒र्यप॑श्यद्
   यः चि॑त् आपः महि॒ना प॒र्यप॑श्यत्
   यश् चिद् आपो महि॒ना प॒र्यप॑श्यद्

Halfverse: b    दक्षं॒ दधा॑ना ज॒नय॑न्तीर्य॒ज्ञम् ।
   दक्ष॑म् दधा॑नाः ज॒नय॑न्तीः य॒ज्ञम् ।
   दक्षं दधा॑ना ज॒नय॑न्तीर् य॒ज्ञम् ।

Halfverse: c    यो दे॒वेष्वधि॑ दे॒व एक॒ आसी॒त्कस्मै॑ दे॒वाय॑ ह॒विषा॑ विधेम ।।
   यो दे॒वेष्वधि॑ दे॒व एक॒ आसी॑त्
   यः दे॒वेषु अधि दे॒वः एकः आसी॑त्
   यो दे॒वेष्व् अधि दे॒व एक आसी॑त्

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 9 
Halfverse: a    मा नो॑ हिंसीज्जनि॒ता यः पृ॑थि॒व्या यो वा॒ दिवं॑ स॒त्यध॑र्मा ज॒जान॑ ।
   मा नो॑ हिंसीज्जनि॒ता यः पृ॑थि॒व्या
   मा नः हिंसीत् जनि॒ता यः पृ॑थि॒व्याः
   मा नो हिंसीज् जनि॒ता यः पृ॑थि॒व्या

Halfverse: b    यो वा॒ दिवं॑ स॒त्यध॑र्मा ज॒जान॑ ।
   यः वा दिव॑म् स॒त्यध॑र्मा ज॒जान ।
   यो वा दिवं स॒त्यध॑र्मा ज॒जान ।

Halfverse: c    यश्चा॒पश्च॒न्द्रा बृ॑ह॒तीर्ज॒जान॒ कस्मै॑ दे॒वाय॑ ह॒विषा॑ विधेम ।।
   यश्चा॒पश्च॒न्द्रा बृ॑ह॒तीर्ज॒जान
   यः च अ॒पः च॒न्द्राः बृ॑ह॒तीः ज॒जान
   यश् चा॒पश् च॒न्द्रा बृ॑ह॒तीर् ज॒जान

Halfverse: d    कस्मै॑ दे॒वाय॑ ह॒विषा॑ विधेम ।।
   कस्मै दे॒वाय ह॒विषा विधेम ।।
   कस्मै दे॒वाय ह॒विषा विधेम ।।


Verse: 10 
Halfverse: a    प्रजा॑पते॒ न त्वदे॒तान्य॒न्यो विश्वा॑ जा॒तानि॒ परि॒ ता ब॑भूव ।
   प्रजा॑पते॒ न त्वदे॒तान्य॒न्यो
   प्रजा॑पते न त्वत् ए॒तानि अ॒न्यः
   प्रजा॑पते न त्वद् ए॒तानि अ॒न्यो

Halfverse: b    विश्वा॑ जा॒तानि॒ परि॒ ता ब॑भूव ।
   विश्वा जा॒तानि परि ता ब॑भूव ।
   विश्वा जा॒तानि परि ता ब॑भूव ।

Halfverse: c    यत्का॑मास्ते जुहु॒मस्तन्नो॑ अस्तु व॒यं स्या॑म॒ पत॑यो रयी॒णाम् ।।
   यत्का॑मास्ते जुहु॒मस्तन्नो॑ अस्तु
   यत्का॑माः ते जुहु॒मः तत् नः अस्तु
   यत्का॑मास् ते जुहु॒मस् तन् नो अस्तु

Halfverse: d    व॒यं स्या॑म॒ पत॑यो रयी॒णाम् ।।
   व॒यम् स्याम पत॑यः रयी॒णाम् ।।
   व॒यं सि॑याम पत॑यो रयी॒णाम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.