TITUS
Rg-Veda: Rg-Veda-Samhita
Part No. 957
Previous part

Hymn: 120_(946) 
Verse: 1 
Halfverse: a    तदिदा॑स॒ भुव॑नेषु॒ ज्येष्ठं॒ यतो॑ ज॒ज्ञ उ॒ग्रस्त्वे॒षनृ॑म्णः ।
   तदिदा॑स॒ भुव॑नेषु॒ ज्येष्ठं
   तत् इत् आस भुव॑नेषु ज्येष्ठ॑म्
   तद् इद् आस भुव॑नेषु ज्ययि॑ष्ठं

Halfverse: b    यतो॑ ज॒ज्ञ उ॒ग्रस्त्वे॒षनृ॑म्णः ।
   यतः ज॒ज्ञे उ॒ग्रः त्वे॒षनृ॑म्णः ।
   यतो ज॒ज्ञ ? उ॒ग्रस् त्वे॒षनृ॑म्णः ।

Halfverse: c    स॒द्यो ज॑ज्ञा॒नो नि रि॑णाति॒ शत्रू॒ननु॒ यं विश्वे॒ मद॒न्त्यूमाः॑ ।।
   स॒द्यो ज॑ज्ञा॒नो नि रि॑णाति॒ शत्रू॑न्
   स॒द्यः ज॑ज्ञा॒नः नि रि॑णाति शत्रू॑न्
   स॒द्यो ज॑ज्ञा॒नो नि रि॑णाति शत्रू॑न्

Halfverse: d    अनु॒ यं विश्वे॒ मद॒न्त्यूमाः॑ ।।
   अनु यम् विश्वे मद॑न्ति ऊमाः ।।
   अनु यं विश्वे मद॑न्ति ऊमाः ।।


Verse: 2 
Halfverse: a    वा॑वृधा॒नः शव॑सा॒ भूर्यो॑जाः॒ शत्रु॑र्दा॒साय॑ भि॒यसं॑ दधाति ।
   वा॑वृधा॒नः शव॑सा॒ भूर्यो॑जाः
   वावृधा॒नः शव॑सा भूर्यो॑जाः
   वावृधा॒नः शव॑सा भूरिओ॑जाः

Halfverse: b    शत्रु॑र्दा॒साय॑ भि॒यसं॑ दधाति ।
   शत्रुः दा॒साय भि॒यस॑म् दधाति ।
   शत्रु॑र् दा॒साय भि॒यसं दधाति ।

Halfverse: c    अव्य॑नच्च व्य॒नच्च॒ सस्नि॒ सं ते॑ नवन्त॒ प्रभृ॑ता॒ मदे॑षु ।।
   अव्य॑नच्च व्य॒नच्च॒ सस्नि
   अव्य॑नत् च व्य॒नत् च सस्नि
   अविअ॑नच् च विअ॒नच् च सस्नि

Halfverse: d    सं ते॑ नवन्त॒ प्रभृ॑ता॒ मदे॑षु ।।
   सम् ते नवन्त प्रभृ॑ता मदे॑षु ।।
   सं ते नवन्त प्रभृ॑ता मदे॑षु ।।


Verse: 3 
Halfverse: a    त्वे क्रतु॒मपि॑ वृञ्जन्ति॒ विश्वे॒ द्विर्यदे॒ते त्रिर्भव॒न्त्यूमाः॑ ।
   त्वे क्रतु॒मपि॑ वृञ्जन्ति॒ विश्वे
   त्वे क्रतु॑म् अपि वृञ्जन्ति विश्वे
   तु॒वे क्रतु॑म् अपि वृञ्जन्ति विश्वे

Halfverse: b    द्विर्यदे॒ते त्रिर्भव॒न्त्यूमाः॑ ।
   द्विः यत् ए॒ते त्रिः भव॑न्ति ऊमाः ।
   दु॒विर् यद् ए॒ते त्रिर् भव॑न्ति ऊमाः ।

Halfverse: c    स्वा॒दोः स्वादी॑यः स्वा॒दुना॑ सृजा॒ सम॒दः सु मधु॒ मधु॑ना॒भि यो॑धीः ।।
   स्वा॒दोः स्वादी॑यः स्वा॒दुना॑ सृजा॒ सम्
   स्वा॒दोः स्वादी॑यः स्वा॒दुना सृज+ सम्
   स्वा॒दोः स्वादी॑यः स्वा॒दुना सृजा सम्

Halfverse: d    अ॒दः सु मधु॒ मधु॑ना॒भि यो॑धीः ।।
   अ॒दः सु मधु मधु॑ना अ॒भि यो॑धीः ।।
   अ॒दः सु मधु मधु॑ना॒भि यो॑धीः ।।


Verse: 4 
Halfverse: a    इति॑ चि॒द्धि त्वा॒ धना॒ जय॑न्त॒म्मदे॑मदे अनु॒मद॑न्ति॒ विप्राः॑ ।
   इति॑ चि॒द्धि त्वा॒ धना॒ जय॑न्तम्
   इति चित् हि त्वा धना जय॑न्तम्
   इति चिद् धि त्वा धना जय॑न्तम्

Halfverse: b    मदे॑मदे अनु॒मद॑न्ति॒ विप्राः॑ ।
   मदे॑मदे अनु॒मद॑न्ति विप्राः ।
   मदे॑मदे अनु॒मद॑न्ति विप्राः ।

Halfverse: c    ओजी॑यो धृष्णो स्थि॒रमा त॑नुष्व॒ मा त्वा॑ दभन्यातु॒धाना॑ दु॒रेवाः॑ ।।
   ओजी॑यो धृष्णो स्थि॒रमा त॑नुष्व
   ओजी॑यः धृष्णो स्थि॒रम् आ त॑नुष्व
   ओजी॑यो धृष्णो स्थि॒रम् आ त॑नुष्व

Halfverse: d    मा त्वा॑ दभन्यातु॒धाना॑ दु॒रेवाः॑ ।।
   मा त्वा दभन् यातु॒धानाः दु॒रेवाः ।।
   मा त्वा दभन् यातु॒धाना दु॒रेवाः ।।


Verse: 5 
Halfverse: a    त्वया॑ व॒यं शा॑शद्महे॒ रणे॑षु प्र॒पश्य॑न्तो यु॒धेन्या॑नि॒ भूरि॑ ।
   त्वया॑ व॒यं शा॑शद्महे॒ रणे॑षु
   त्वया व॒यम् शाशद्महे रणे॑षु
   त्वया व॒यं शा॑शद्महे रणे॑षु

Halfverse: b    प्र॒पश्य॑न्तो यु॒धेन्या॑नि॒ भूरि॑ ।
   प्र॒पश्य॑न्तः यु॒धेन्या॑नि भूरि ।
   प्र॒पश्य॑न्तो यु॒धेनि॑यानि भूरि ।

Halfverse: c    चो॒दया॑मि त॒ आयु॑धा॒ वचो॑भिः॒ सं ते॑ शिशामि॒ ब्रह्म॑णा॒ वयां॑सि ।।
   चो॒दया॑मि त॒ आयु॑धा॒ वचो॑भिः
   चो॒दया॑मि ते आयु॑धा वचो॑भिः
   चो॒दया॑मि त आयु॑धा वचो॑भिः

Halfverse: d    सं ते॑ शिशामि॒ ब्रह्म॑णा॒ वयां॑सि ।।
   सम् ते शिशामि ब्रह्म॑णा वयां॑सि ।।
   सं ते शिशामि ब्रह्म॑णा वयां॑सि ।।


Verse: 6 
Halfverse: a    स्तु॒षेय्य॑म्पुरु॒वर्प॑स॒मृभ्व॑मि॒नत॑ममा॒प्त्यमा॒प्त्याना॑म् ।
   स्तु॒षेय्य॑म्पुरु॒वर्प॑स॒मृभ्व॑म्
   स्तु॒षेय्य॑म् पुरु॒वर्प॑सम् ऋभ्व॑म्
   स्तु॒षेयि॑यम् पुरु॒वर्प॑सम् ऋभ्व॑म्

Halfverse: b    इ॒नत॑ममा॒प्त्यमा॒प्त्याना॑म् ।
   इ॒नत॑मम् आ॒प्त्यम् आ॒प्त्याना॑म् ।
   इ॒नत॑मम् आप्ति॒यम् आप्ति॒याना॑म् ।

Halfverse: c    आ द॑र्षते॒ शव॑सा स॒प्त दानू॒न्प्र सा॑क्षते प्रति॒माना॑नि॒ भूरि॑ ।।
   आ द॑र्षते॒ शव॑सा स॒प्त दानू॑न्
   आ द॑र्षते शव॑सा स॒प्त दानू॑न्
   आ द॑र्षते शव॑सा स॒प्त दानू॑न्

Halfverse: d    प्र सा॑क्षते प्रति॒माना॑नि॒ भूरि॑ ।।
   प्र सा॑क्षते प्रति॒माना॑नि भूरि ।।
   प्र सा॑क्षते प्रति॒माना॑नि भूरि ।।


Verse: 7 
Halfverse: a    नि तद्द॑धि॒षे ऽव॑र॒म्परं॑ च॒ यस्मि॒न्नावि॒थाव॑सा दुरो॒णे ।
   नि तद्द॑धि॒षे ऽव॑र॒म्परं॑ च
   नि तत् दधिषे अव॑रम् पर॑म् च
   नि तद् दधिषे अव॑रम् परं च

Halfverse: b    यस्मि॒न्नावि॒थाव॑सा दुरो॒णे ।
   यस्मि॑न् आवि॑थ अव॑सा दुरो॒णे ।
   यस्मि॑न्न् आवि॑थ अव॑सा दुरो॒णे ।

Halfverse: c    आ मा॒तरा॑ स्थापयसे जिग॒त्नू अत॑ इनोषि॒ कर्व॑रा पु॒रूणि॑ ।।
   आ मा॒तरा॑ स्थापयसे जिग॒त्नू
   आ मा॒तरा स्थापयसे जिग॒त्नू
   आ मा॒तरा स्थापयसे जिग॒त्नू

Halfverse: d    अत॑ इनोषि॒ कर्व॑रा पु॒रूणि॑ ।।
   अतः इनोषि कर्व॑रा पु॒रूणि ।।
   अत इनोषि कर्व॑रा पु॒रूणि ।।


Verse: 8 
Halfverse: a    इ॒मा ब्रह्म॑ बृ॒हद्दि॑वो विव॒क्तीन्द्रा॑य शू॒षम॑ग्रि॒यः स्व॒र्षाः ।
   इ॒मा ब्रह्म॑ बृ॒हद्दि॑वो विवक्ति
   इ॒मा ब्रह्म बृ॒हद्दि॑वः विवक्ति
   इ॒मा ब्रह्म बृ॒हद्दि॑वो विवक्ति

Halfverse: b     इन्द्रा॑य शू॒षम॑ग्रि॒यः स्व॒र्षाः ।
   इन्द्रा॑य शू॒षम् अग्रि॒यः स्व॒र्षाः ।
   इन्द्रा॑य शू॒षम् अग्रि॒यः सुअ॒र्षाः ।

Halfverse: c    म॒हो गो॒त्रस्य॑ क्षयति स्व॒राजो॒ दुर॑श्च॒ विश्वा॑ अवृणो॒दप॒ स्वाः ।।
   म॒हो गो॒त्रस्य॑ क्षयति स्व॒राजो
   म॒हः गो॒त्रस्य क्षयति स्व॒राजः
   म॒हो गो॒त्रस्य क्षयति स्व॒राजो

Halfverse: d    दुर॑श्च॒ विश्वा॑ अवृणो॒दप॒ स्वाः ।।
   दुरः च विश्वाः अवृणोत् अप स्वाः ।।
   दुर॑श् च विश्वा अवृणोद् अप स्वाः ।।


Verse: 9 
Halfverse: a    ए॒वा म॒हान्बृ॒हद्दि॑वो॒ अथ॒र्वावो॑च॒त्स्वां त॒न्व॒मिन्द्र॑मे॒व ।
   ए॒वा म॒हान्बृ॒हद्दि॑वो॒ अथ॑र्वा
   ए॒व+ म॒हान् बृ॒हद्दि॑वः अथ॑र्वा
   ए॒वा म॒हान् बृ॒हद्दि॑वो अथ॑र्वा

Halfverse: b     अवो॑च॒त्स्वां त॒न्व॒मिन्द्र॑मे॒व ।
   अवो॑चत् स्वाम् त॒न्व॑म् इन्द्र॑म् ए॒व ।
   अवो॑चत् स्वां त॒नुव॑म् इन्द्र॑म् ए॒व ।

Halfverse: c    स्वसा॑रो मात॒रिभ्व॑रीररि॒प्रा हि॒न्वन्ति॑ च॒ शव॑सा व॒र्धय॑न्ति च ।।
   स्वसा॑रो मात॒रिभ्व॑रीररि॒प्रा
   स्वसा॑रः मात॒रिभ्व॑रीः अरि॒प्राः
   स्वसा॑रो मात॒रिभ्व॑रीर् अरि॒प्रा

Halfverse: d    हि॒न्वन्ति॑ च॒ शव॑सा व॒र्धय॑न्ति च ।।
   हि॒न्वन्ति च शव॑सा व॒र्धय॑न्ति च ।।
   हि॒न्वन्ति च शव॑सा व॒र्धय॑न्ति च ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.