TITUS
Rg-Veda: Rg-Veda-Samhita
Part No. 954
Previous part

Hymn: 117_(943) 
Verse: 1 
Halfverse: a    न वा उ॑ दे॒वाः क्षुध॒मिद्व॒धं द॑दुरु॒ताशि॑त॒मुप॑ गछन्ति मृ॒त्यवः॑ ।
   न वा उ॑ दे॒वाः क्षुध॒मिद्व॒धं द॑दुर्
   न वै उ दे॒वाः क्षुध॑म् इत् व॒धम् ददुः
   न वा उ दे॒वाः क्षुध॑म् इद् व॒धं द॑दुर्

Halfverse: b    उ॒ताशि॑त॒मुप॑ गछन्ति मृ॒त्यवः॑ ।
   उ॒त आशि॑तम् उप गछन्ति मृ॒त्यवः ।
   उ॒ताशि॑तम् उप गछन्ति मृ॒त्यवः ।

Halfverse: c    उ॒तो र॒यिः पृ॑ण॒तो नोप॑ दस्यत्यु॒तापृ॑णन्मर्डि॒तारं॒ न वि॑न्दते ।।
   उ॒तो र॒यिः पृ॑ण॒तो नोप॑ दस्यत्य्
   उ॒त उ र॒यिः पृ॑ण॒तः न उप दस्यति
   उ॒तो र॒यिः पृ॑ण॒तो नोप दस्यति

Halfverse: d    उ॒तापृ॑णन्मर्डि॒तारं॒ न वि॑न्दते ।।
   उ॒त अपृ॑णन् मर्डि॒तार॑म् न वि॑न्दते ।।
   उ॒तापृ॑णन् मर्डि॒तारं न वि॑न्दते ।।


Verse: 2 
Halfverse: a    य आ॒ध्राय॑ चकमा॒नाय॑ पि॒त्वो ऽन्न॑वा॒न्सन्र॑पि॒तायो॑पज॒ग्मुषे॑ ।
   य आ॒ध्राय॑ चकमा॒नाय॑ पि॒त्वो
   यः आ॒ध्राय चकमा॒नाय पि॒त्वः
   य आ॒ध्राय चकमा॒नाय पि॒त्वो

Halfverse: b    ऽन्न॑वा॒न्सन्र॑पि॒तायो॑पज॒ग्मुषे॑ ।
   अन्न॑वान् सन् रपि॒ताय उपज॒ग्मुषे ।
   अन्न॑वान् सन् रपि॒तायो॑पज॒ग्मुषे ।

Halfverse: c    स्थि॒रम्मनः॑ कृणु॒ते सेव॑ते पु॒रोतो चि॒त्स म॑र्डि॒तारं॒ न वि॑न्दते ।।
   स्थि॒रम्मनः॑ कृणु॒ते सेव॑ते पु॒रा
   स्थि॒रम् मनः कृणु॒ते सेव॑ते पु॒रा
   स्थि॒रम् मनः कृणु॒ते सेव॑ते पु॒रा

Halfverse: d     उ॒तो चि॒त्स म॑र्डि॒तारं॒ न वि॑न्दते ।।
   उ॒त उ चित् स म॑र्डि॒तार॑म् न वि॑न्दते ।।
   उ॒तो चि॑त् स म॑र्डि॒तारं न वि॑न्दते ।।


Verse: 3 
Halfverse: a    स इद्भो॒जो यो गृ॒हवे॒ ददा॒त्यन्न॑कामाय॒ चर॑ते कृ॒शाय॑ ।
   स इद्भो॒जो यो गृ॒हवे॒ ददा॑त्य्
   सः ।!। इत् भो॒जः यः गृ॒हवे ददा॑ति
   स इद् भो॒जो यो गृ॒हवे ददा॑ति

Halfverse: b    अन्न॑कामाय॒ चर॑ते कृ॒शाय॑ ।
   अन्न॑कामाय चर॑ते कृ॒शाय ।
   अन्न॑कामाय चर॑ते कृ॒शाय ।

Halfverse: c    अर॑मस्मै भवति॒ याम॑हूता उ॒ताप॒रीषु॑ कृणुते॒ सखा॑यम् ।।
   अर॑मस्मै भवति॒ याम॑हूता
   अर॑म् अस्मै भवति याम॑हूतौ
   अर॑म् अस्मै भवति याम॑हूता

Halfverse: d    उ॒ताप॒रीषु॑ कृणुते॒ सखा॑यम् ।।
   उ॒त अ॑प॒रीषु कृणुते सखा॑यम् ।।
   उ॒ताप॒रीषु कृणुते सखा॑यम् ।।


Verse: 4 
Halfverse: a    न स सखा॒ यो न ददा॑ति॒ सख्ये॑ सचा॒भुवे॒ सच॑मानाय पि॒त्वः ।
   न स सखा॒ यो न ददा॑ति॒ सख्ये
   न स सखा यः न ददा॑ति सख्ये
   न स सखा यो न ददा॑ति सख्ये

Halfverse: b    सचा॒भुवे॒ सच॑मानाय पि॒त्वः ।
   स॑चा॒भुवे सच॑मानाय पि॒त्वः ।
   स॑चा॒भुवे सच॑मानाय पि॒त्वः ।

Halfverse: c    अपा॑स्मा॒त्प्रेया॒न्न तदोको॑ अस्ति पृ॒णन्त॑म॒न्यमर॑णं चिदिछेत् ।।
   अपा॑स्मा॒त्प्रेया॒न्न तदोको॑ अस्ति
   अप अस्मात् प्र इ॑यात् न तत् ओकः अस्ति
   अपा॑स्मात् प्रेया॑न् न तद् ओको अस्ति

Halfverse: d    पृ॒णन्त॑म॒न्यमर॑णं चिदिछेत् ।।
   पृ॒णन्त॑म् अ॒न्यम् अर॑णम् चित् इछेत् ।।
   पृ॒णन्त॑म् अ॒न्यम् अर॑णं चिद् इछेत् ।।


Verse: 5 
Halfverse: a    पृ॑णी॒यादिन्नाध॑मानाय॒ तव्या॒न्द्राघी॑यांस॒मनु॑ पश्येत॒ पन्था॑म् ।
   पृ॑णी॒यादिन्नाध॑मानाय॒ तव्या॑न्
   पृणी॒यात् इत् नाध॑मानाय तव्या॑न्
   पृणी॒याद् इन् नाध॑मानाय तव्या॑न्

Halfverse: b    द्राघी॑यांस॒मनु॑ पश्येत॒ पन्था॑म् ।
   द्राघी॑यांसम् अनु पश्येत पन्था॑म् ।
   द्राघी॑यांसम् अनु पश्येत पन्था॑म् ।

Halfverse: c    ओ हि वर्त॑न्ते॒ रथ्ये॑व च॒क्रान्यम्॑न्य॒मुप॑ तिष्ठन्त॒ रायः॑ ।।
   ओ हि वर्त॑न्ते॒ रथ्ये॑व च॒क्रा
   आ उ हि वर्त॑न्ते रथ्या इव च॒क्रा
   ओ हि वर्त॑न्ते रथि॑येव च॒क्रा

Halfverse: d     अ॒न्यम्॑न्य॒मुप॑ तिष्ठन्त॒ रायः॑ ।।
   अ॒न्यम्॑न्यम् उप तिष्ठन्त रायः ।।
   अ॒न्यम्॑न्यम् उप तिष्ठन्त रायः ।।


Verse: 6 
Halfverse: a    मोघ॒मन्नं॑ विन्दते॒ अप्र॑चेताः स॒त्यम्ब्र॑वीमि व॒ध इत्स तस्य॑ ।
   मोघ॒मन्नं॑ विन्दते॒ अप्र॑चेताः
   मोघ॑म् अन्न॑म् विन्दते अप्र॑चेताः
   मोघ॑म् अन्नं विन्दते अप्र॑चेताः

Halfverse: b    स॒त्यम्ब्र॑वीमि व॒ध इत्स तस्य॑ ।
   स॒त्यम् ब्रवीमि व॒धः इत् स तस्य ।
   स॒त्यम् ब्रवीमि व॒ध इत् स तस्य ।

Halfverse: c    नार्य॒मण॒म्पुष्य॑ति॒ नो सखा॑यं॒ केव॑लाघो भवति केवला॒दी ।।
   नार्य॒मण॒म्पुष्य॑ति॒ नो सखा॑यं
   न अ॑र्य॒मण॑म् पुष्य॑ति न उ सखा॑यम्
   नार्य॒मण॑म् पुष्य॑ति नो सखा॑यं

Halfverse: d    केव॑लाघो भवति केवला॒दी ।।
   केव॑लाघः भवति केवला॒दी ।।
   केव॑लाघो भवति केवला॒दी ।।


Verse: 7 
Halfverse: a    कृ॒षन्नित्पाल॒ आशि॑तं कृणोति॒ यन्नध्वा॑न॒मप॑ वृङ्क्ते च॒रित्रैः॑ ।
   कृ॒षन्नित्पाल॒ आशि॑तं कृणोति
   कृ॒षन् इत् पालः आशि॑तम् कृणोति
   कृ॒षन्न् इत् पाल आशि॑तं कृणोति

Halfverse: b    यन्नध्वा॑न॒मप॑ वृङ्क्ते च॒रित्रैः॑ ।
   यन् अध्वा॑नम् अप वृङ्क्ते च॒रित्रैः ।
   यन्न् अध्वा॑नम् अप वृङ्क्ते च॒रित्रैः ।

Halfverse: c    वद॑न्ब्र॒ह्माव॑दतो॒ वनी॑यान्पृ॒णन्ना॒पिरपृ॑णन्तम॒भि ष्या॑त् ।।
   वद॑न्ब्र॒ह्माव॑दतो॒ वनी॑यान्
   वद॑न् ब्र॒ह्मा अव॑दतः वनी॑यान्
   वद॑न् ब्र॒ह्मा अव॑दतो वनी॑यान्

Halfverse: d    पृ॒णन्ना॒पिरपृ॑णन्तम॒भि ष्या॑त् ।।
   पृ॒णन् आ॒पिः अपृ॑णन्तम् अ॒भि स्या॑त् ।।
   पृ॒णन्न् आ॒पिर् अपृ॑णन्तम् अ॒भि ष्या॑त् ।।


Verse: 8 
Halfverse: a    एक॑पा॒द्भूयो॑ द्वि॒पदो॒ वि च॑क्रमे द्वि॒पात्त्रि॒पाद॑म॒भ्ये॑ति प॒श्चात् ।
   एक॑पा॒द्भूयो॑ द्वि॒पदो॒ वि च॑क्रमे
   एक॑पात् भूयः द्वि॒पदः वि च॑क्रमे
   एक॑पाद् भूयो द्वि॒पदो वि च॑क्रमे

Halfverse: b    द्वि॒पात्त्रि॒पाद॑म॒भ्ये॑ति प॒श्चात् ।
   द्वि॒पात् त्रि॒पाद॑म् अ॒भि ए॑ति प॒श्चात् ।
   द्वि॒पात् त्रि॒पाद॑म् अ॒भि ए॑ति प॒श्चात् ।

Halfverse: c    चतु॑ष्पादेति द्वि॒पदा॑मभिस्व॒रे स॒म्पश्य॑न्प॒ङ्क्तीरु॑प॒तिष्ठ॑मानः ।।
   चतु॑ष्पादेति द्वि॒पदा॑मभिस्व॒रे
   चतु॑ष्पात् एति द्वि॒पदा॑म् अभिस्व॒रे
   चतु॑ष्पाद् एति द्वि॒पदा॑म् अभिस्व॒रे

Halfverse: d    स॒म्पश्य॑न्प॒ङ्क्तीरु॑प॒तिष्ठ॑मानः ।।
   स॒म्पश्य॑न् प॒ङ्क्तीः उ॑प॒तिष्ठ॑मानः ।।
   स॒म्पश्य॑न् प॒ङ्क्तीर् उप॒तिष्ठ॑मानः ।।


Verse: 9 
Halfverse: a    स॒मौ चि॒द्धस्तौ॒ न स॒मं वि॑विष्टः सम्मा॒तरा॑ चि॒न्न स॒मं दु॑हाते ।
   स॒मौ चि॒द्धस्तौ॒ न स॒मं वि॑विष्टः
   स॒मौ चि॑त् हस्तौ न स॒मम् विविष्टः
   स॒मौ चि॑द् धस्तौ न स॒मं वि॑विष्टः

Halfverse: b    सम्मा॒तरा॑ चि॒न्न स॒मं दु॑हाते ।
   स॑म्मा॒तरा चित् न स॒मम् दुहाते ।
   स॑म्मा॒तरा चिन् न स॒मं दु॑हाते ।

Halfverse: c    य॒मयो॑श्चि॒न्न स॒मा वी॒र्या॑णि ज्ञा॒ती चि॒त्सन्तौ॒ न स॒मम्पृ॑णीतः ।।
   य॒मयो॑श्चि॒न्न स॒मा वी॒र्या॑णि
   य॒मयोः चित् न स॒मा वी॒र्या॑णि
   य॒मयो॑श् चिन् न स॒मा वी॒रिया॑णि

Halfverse: d    ज्ञा॒ती चि॒त्सन्तौ॒ न स॒मम्पृ॑णीतः ।।
   ज्ञा॒ती चि॑त् सन्तौ न स॒मम् पृणीतः ।।
   ज्ञा॒ती चि॑त् सन्तौ न स॒मम् पृणीतः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.