TITUS
Rg-Veda: Rg-Veda-Samhita
Part No. 952
Previous part

Hymn: 115_(941) 
Verse: 1 
Halfverse: a    चि॒त्र इच्छिशो॒स्तरु॑णस्य व॒क्षथो॒ न यो मा॒तरा॑व॒प्येति॒ धात॑वे ।
   चि॒त्र इच्छिशो॒स्तरु॑णस्य व॒क्षथो
   चि॒त्रः इत् शिशोः तरु॑णस्य व॒क्षथः
   चि॒त्र इच् छिशो॑स् तरु॑णस्य व॒क्षथो

Halfverse: b    न यो मा॒तरा॑व॒प्येति॒ धात॑वे ।
   न यः मा॒तरौ अ॒प्येति धात॑वे ।
   न यो मा॒तरा॑व् अ॒पिएति धात॑वे ।

Halfverse: c    अ॑नू॒धा यदि॒ जीज॑न॒दधा॑ च॒ नु व॒वक्ष॑ स॒द्यो महि॑ दू॒त्यं॒ चर॑न् ।।
   अ॑नू॒धा यदि॒ जीज॑न॒दधा॑ च॒ नु
   अ॑नू॒धाः यदि जीज॑नत् अध+ च नु
   अ॑नू॒धा यदि जीज॑नद् अधा च नु

Halfverse: d    व॒वक्ष॑ स॒द्यो महि॑ दू॒त्यं॒ चर॑न् ।।
   व॒वक्ष स॒द्यः महि दू॒त्य॑म् चर॑न् ।।
   व॒वक्ष स॒द्यो महि दू॒तियं चर॑न् ।।


Verse: 2 
Halfverse: a    अ॒ग्निर्ह॒ नाम॑ धायि॒ दन्न॒पस्त॑मः॒ सं यो वना॑ यु॒वते॒ भस्म॑ना द॒ता ।
   अ॒ग्निर्ह॒ नाम॑ धायि॒ दन्न॒पस्त॑मः
   अ॒ग्निः ह नाम धायि दन् अ॒पस्त॑मः
   अ॒ग्निर् ह नाम धायि दन्न् अ॒पस्त॑मः

Halfverse: b    सं यो वना॑ यु॒वते॒ भस्म॑ना द॒ता ।
   सम् यः वना यु॒वते भस्म॑ना द॒ता ।
   सं यो वना यु॒वते भस्म॑ना द॒ता ।

Halfverse: c    अ॑भिप्र॒मुरा॑ जु॒ह्वा॑ स्वध्व॒र इ॒नो न प्रोथ॑मानो॒ यव॑से॒ वृषा॑ ।।
   अ॑भिप्र॒मुरा॑ जु॒ह्वा॑ स्वध्व॒र
   अ॑भिप्र॒मुरा जु॒ह्वा स्वध्व॒रः
   अ॑भिप्र॒मुरा जु॒हुवा सुअध्व॒र

Halfverse: d    इ॒नो न प्रोथ॑मानो॒ यव॑से॒ वृषा॑ ।।
   इ॒नः न प्रोथ॑मानः यव॑से वृषा ।।
   इ॒नो न प्रोथ॑मानो यव॑से वृषा ।।


Verse: 3 
Halfverse: a    तं वो॒ विं न द्रु॒षदं॑ दे॒वमन्ध॑स॒ इन्दु॒म्प्रोथ॑न्तम्प्र॒वप॑न्तमर्ण॒वम् ।
   तं वो॒ विं न द्रु॒षदं॑ दे॒वमन्ध॑स
   तम् वः विम् न द्रु॒षद॑म् दे॒वम् अन्ध॑सः
   तं वो विं न द्रु॒षदं दे॒वम् अन्ध॑स

Halfverse: b    इन्दु॒म्प्रोथ॑न्तम्प्र॒वप॑न्तमर्ण॒वम् ।
   इन्दु॑म् प्रोथ॑न्तम् प्र॒वप॑न्तम् अर्ण॒वम् ।
   इन्दु॑म् प्रोथ॑न्तम् प्र॒वप॑न्तम् अर्ण॒वम् ।

Halfverse: c    आ॒सा वह्निं॒ न शो॒चिषा॑ विर॒प्शिन॒म्महि॑व्रतं॒ न स॒रज॑न्त॒मध्व॑नः ।।
   आ॒सा वह्निं॒ न शो॒चिषा॑ विर॒प्शिन॑म्
   आ॒सा वह्नि॑म् न शो॒चिषा विर॒प्शिन॑म्
   आ॒सा वह्निं न शो॒चिषा विर॒प्शिन॑म्

Halfverse: d    महि॑व्रतं॒ न स॒रज॑न्त॒मध्व॑नः ।।
   महि॑व्रतम् न स॒रज॑न्तम् अध्व॑नः ।।
   महि॑व्रतं न स॒रज॑न्तम् अध्व॑नः ।।


Verse: 4 
Halfverse: a    वि यस्य॑ ते ज्रयसा॒नस्या॑जर॒ धक्षो॒र्न वाताः॒ परि॒ सन्त्यच्यु॑ताः ।
   वि यस्य॑ ते ज्रयसा॒नस्या॑जर
   वि यस्य ते ज्रयसा॒नस्य अजर
   वि यस्य ते ज्रयसा॒नस्य अजर

Halfverse: b    धक्षो॒र्न वाताः॒ परि॒ सन्त्यच्यु॑ताः ।
   धक्षोः न वाताः परि सन्ति अच्यु॑ताः ।
   धक्षो॑र् न वाताः परि सन्ति अच्यु॑ताः ।

Halfverse: c    आ र॒ण्वासो॒ युयु॑धयो॒ न स॑त्व॒नं त्रि॒तं न॑शन्त॒ प्र शि॒षन्त॑ इ॒ष्टये॑ ।।
   आ र॒ण्वासो॒ युयु॑धयो॒ न स॑त्व॒नं
   आ र॒ण्वासः युयु॑धयः न स॑त्व॒नम्
   आ र॒ण्वासो युयु॑धयो न स॑त्व॒नं

Halfverse: d    त्रि॒तं न॑शन्त॒ प्र शि॒षन्त॑ इ॒ष्टये॑ ।।
   त्रि॒तम् नशन्त प्र शि॒षन्तः इ॒ष्टये ।।
   त्रि॒तं न॑शन्त प्र शि॒षन्त इ॒ष्टये ।।


Verse: 5 
Halfverse: a    स इद॒ग्निः कण्व॑तमः॒ कण्व॑सखा॒र्यः पर॒स्यान्त॑रस्य॒ तरु॑षः ।
   स इद॒ग्निः कण्व॑तमः॒ कण्व॑सखा
   सः ।!। इत् अ॒ग्निः कण्व॑तमः कण्व॑सखा
   स इद् अ॒ग्निः कण्व॑तमः कण्व॑सखा

Halfverse: b     अ॒र्यः पर॒स्यान्त॑रस्य॒ तरु॑षः ।
   अ॒र्यः पर॑स्य अन्त॑रस्य तरु॑षः ।
   अ॒र्यः पर॑स्य अन्त॑रस्य तरु॑षः ।

Halfverse: c    अ॒ग्निः पा॑तु गृण॒तो अ॒ग्निः सू॒रीन॒ग्निर्द॑दातु॒ तेषा॒मवो॑ नः ।।
   अ॒ग्निः पा॑तु गृण॒तो अ॒ग्निः सू॒रीन्
   अ॒ग्निः पा॑तु गृण॒तः अ॒ग्निः सू॒रीन्
   अ॒ग्निः पा॑तु गृण॒तो अ॒ग्निः सू॒रीन्

Halfverse: d    अ॒ग्निर्द॑दातु॒ तेषा॒मवो॑ नः ।।
   अ॒ग्निः द॑दातु तेषा॑म् अवः नः ।।
   अ॒ग्निर् ददातु तेषाअ॑म् अवो नः ।।


Verse: 6 
Halfverse: a    वा॒जिन्त॑माय॒ सह्य॑से सुपित्र्य तृ॒षु च्यवा॑नो॒ अनु॑ जा॒तवे॑दसे ।
   वा॒जिन्त॑माय॒ सह्य॑से सुपित्र्य
   वा॒जिन्त॑माय सह्य॑से सुपित्र्य
   वा॒जिन्त॑माय सह्य॑से सुपित्रिय

Halfverse: b    तृ॒षु च्यवा॑नो॒ अनु॑ जा॒तवे॑दसे ।
   तृ॒षु च्यवा॑नः अनु जा॒तवे॑दसे ।
   तृ॒षु च्यवा॑नो अनु जा॒तवे॑दसे ।

Halfverse: c    अ॑नु॒द्रे चि॒द्यो धृ॑ष॒ता वरं॑ स॒ते म॒हिन्त॑माय॒ धन्व॒नेद॑विष्य॒ते ।।
   अ॑नु॒द्रे चि॒द्यो धृ॑ष॒ता वरं॑ स॒ते
   अ॑नु॒द्रे चि॑त् यः धृ॑ष॒ता वर॑म् स॒ते
   अ॑नु॒द्रे चि॑द् यो धृ॑ष॒ता वरं स॒ते

Halfverse: d    म॒हिन्त॑माय॒ धन्व॒नेद॑विष्य॒ते ।।
   म॒हिन्त॑माय धन्व॑ना इत् अविष्य॒ते ।।
   म॒हिन्त॑माय धन्व॒नेद् अविष्य॒ते ।।


Verse: 7 
Halfverse: a    ए॒वाग्निर्मर्तैः॑ स॒ह सू॒रिभि॒र्वसु॑ ष्टवे॒ सह॑सः सू॒नरो॒ नृभिः॑ ।
   ए॒वाग्निर्मर्तैः॑ स॒ह सू॒रिभि॑र्
   ए॒व अ॒ग्निः मर्तैः स॒ह सू॒रिभिः
   ए॒व अ॒ग्निर् मर्तिअैः % स॒ह सू॒रिभि॑र्

Halfverse: b    वसु॑ ष्टवे॒ सह॑सः सू॒नरो॒ नृभिः॑ ।
   वसुः स्तवे सह॑सः सू॒नरः नृभिः ।
   वसु ष्टवे सह॑सः सू॒नरो नृभिः ।

Halfverse: c    मि॒त्रासो॒ न ये सुधि॑ता ऋता॒यवो॒ द्यावो॒ न द्यु॒म्नैर॒भि सन्ति॒ मानु॑षान् ।।
   मि॒त्रासो॒ न ये सुधि॑ता ऋता॒यवो
   मि॒त्रासः न ये सुधि॑ताः ऋता॒यवः
   मि॒त्रासो न ये सुधि॑ता ऋता॒यवो

Halfverse: d    द्यावो॒ न द्यु॒म्नैर॒भि सन्ति॒ मानु॑षान् ।।
   द्यावः न द्यु॒म्नैः अ॒भि सन्ति मानु॑षान् ।।
   द्यावो न द्यु॒म्नैर् अ॒भि सन्ति मानु॑षान् ।।


Verse: 8 
Halfverse: a    ऊर्जो॑ नपात्सहसाव॒न्निति॑ त्वोपस्तु॒तस्य॑ वन्दते॒ वृषा॒ वाक् ।
   ऊर्जो॑ नपात्सहसाव॒न्निति॑ त्वा
   ऊर्जः नपात् सहसावन् इति त्वा
   ऊर्जो नपात् सहसावन्न् इति त्वा

Halfverse: b     उपस्तु॒तस्य॑ वन्दते॒ वृषा॒ वाक् ।
   उ॑पस्तु॒तस्य वन्दते वृषा वाक् ।
   उ॑पस्तु॒तस्य वन्दते वृषा वाक् ।

Halfverse: c    त्वां स्तो॑षाम॒ त्वया॑ सु॒वीरा॒ द्राघी॑य॒ आयुः॑ प्रत॒रं दधा॑नाः ।।
   त्वां स्तो॑षाम॒ त्वया॑ सु॒वीरा
   त्वाम् स्तोषाम त्वया सु॒वीराः
   तु॒वां स्तो॑षाम तु॒वया सु॒वीरा

Halfverse: d    द्राघी॑य॒ आयुः॑ प्रत॒रं दधा॑नाः ।।
   द्राघी॑यः आयुः प्रत॒रम् दधा॑नाः ।।
   द्राघी॑य आयुः प्रत॒रं दधा॑नाः ।।


Verse: 9 
Halfverse: a    इति॑ त्वाग्ने वृष्टि॒हव्य॑स्य पु॒त्रा उ॑पस्तु॒तास॒ ऋष॑यो ऽवोचन् ।
   इति॑ त्वाग्ने वृष्टि॒हव्य॑स्य पु॒त्रा
   इति त्वा अग्ने वृष्टि॒हव्य॑स्य पु॒त्राः
   इति त्वाग्ने वृष्टि॒हव्य॑स्य पु॒त्रा

Halfverse: b    उ॑पस्तु॒तास॒ ऋष॑यो ऽवोचन् ।
   उ॑पस्तु॒तासः ऋष॑यः अवोचन् ।
   उ॑पस्तु॒तास ऋष॑यो अवोचन् ।

Halfverse: c    तांश्च॑ पा॒हि गृ॑ण॒तश्च॑ सू॒रीन्वष॒ड्वष॒ळित्यू॒र्ध्वासो॑ अनक्ष॒न्नमो॒ नम॒ इत्यू॒र्ध्वासो॑ अनक्षन् ।।
   तांश्च॑ पा॒हि गृ॑ण॒तश्च॑ सू॒रीन्
   तान् च पा॒हि गृ॑ण॒तः च सू॒रीन्
   तांश् च पा॒हि ? गृ॑ण॒तश् च सू॒रीन्

Halfverse: d    वष॒ड्वष॒ळित्यू॒र्ध्वासो॑ अनक्षन्
   वष॑ट् वष॑ट् इति ऊ॒र्ध्वासः अनक्षन्
   वष॑ड् वष॑ळ् इत्य् ऊ॒र्ध्वासो अनक्षन्

Halfverse: e    नमो॒ नम॒ इत्यू॒र्ध्वासो॑ अनक्षन् ।।
   नमः नमः इति ऊ॒र्ध्वासः अनक्षन् ।।
   नमो नम इत्य् ऊ॒र्ध्वासो अनक्षन् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.