TITUS
Rg-Veda: Rg-Veda-Samhita
Part No. 951
Previous part

Hymn: 114_(940) 
Verse: 1 
Halfverse: a    घ॒र्मा सम॑न्ता त्रि॒वृतं॒ व्या॑पतु॒स्तयो॒र्जुष्टि॑म्मात॒रिश्वा॑ जगाम ।
   घ॒र्मा सम॑न्ता त्रि॒वृतं॒ व्या॑पतुस्
   घ॒र्मा सम॑न्ता त्रि॒वृत॑म् वि आ॑पतुः
   घ॒र्मा सम॑न्ता त्रि॒वृतं वि आ॑पतुस्

Halfverse: b    तयो॒र्जुष्टि॑म्मात॒रिश्वा॑ जगाम ।
   तयोः जुष्टि॑म् मात॒रिश्वा जगाम ।
   तयो॑र् जुष्टि॑म् मात॒रिश्वा जगाम ।

Halfverse: c    दि॒वस्पयो॒ दिधि॑षाणा अवेषन्वि॒दुर्दे॒वाः स॒हसा॑मानम॒र्कम् ।।
   दि॒वस्पयो॒ दिधि॑षाणा अवेषन्
   दि॒वः पयः दिधि॑षाणाः अवेषन्
   दि॒वस् पयो दिधि॑षाणा अवेषन्

Halfverse: d    वि॒दुर्दे॒वाः स॒हसा॑मानम॒र्कम् ।।
   वि॒दुः दे॒वाः स॒हसा॑मानम् अ॒र्कम् ।।
   वि॒दुर् दे॒वाः स॒हसा॑मानम् अ॒र्कम् ।।


Verse: 2 
Halfverse: a    ति॒स्रो दे॒ष्ट्राय॒ निरृ॑ती॒रुपा॑सते दीर्घ॒श्रुतो॒ वि हि जा॒नन्ति॒ वह्न॑यः ।
   ति॒स्रो दे॒ष्ट्राय॒ निरृ॑ती॒रुपा॑सते
   ति॒स्रः दे॒ष्ट्राय निरृ॑तीः उप आसते
   ति॒स्रो दे॒ष्ट्राय निरृ॑तीर् उपा॑सते

Halfverse: b    दीर्घ॒श्रुतो॒ वि हि जा॒नन्ति॒ वह्न॑यः ।
   दी॑र्घ॒श्रुतः वि हि जा॒नन्ति वह्न॑यः ।
   दी॑र्घ॒श्रुतो वि हि जा॒नन्ति वह्न॑यः ।

Halfverse: c    तासां॒ नि चि॑क्युः क॒वयो॑ नि॒दान॒म्परे॑षु॒ या गुह्ये॑षु व्र॒तेषु॑ ।।
   तासां॒ नि चि॑क्युः क॒वयो॑ नि॒दान॑म्
   तासा॑म् नि चि॑क्युः क॒वयः नि॒दान॑म्
   तासां नि चि॑क्युः क॒वयो नि॒दान॑म्

Halfverse: d    परे॑षु॒ या गुह्ये॑षु व्र॒तेषु॑ ।।
   परे॑षु याः गुह्ये॑षु व्र॒तेषु ।।
   परे॑षु या गुहि॑येषु व्र॒तेषु ।।


Verse: 3 
Halfverse: a    चतु॑ष्कपर्दा युव॒तिः सु॒पेशा॑ घृ॒तप्र॑तीका व॒युना॑नि वस्ते ।
   चतु॑ष्कपर्दा युव॒तिः सु॒पेशा
   चतु॑ष्कपर्दा युव॒तिः सु॒पेशाः
   चतु॑ष्कपर्दा युव॒तिः सु॒पेशा

Halfverse: b    घृ॒तप्र॑तीका व॒युना॑नि वस्ते ।
   घृ॒तप्र॑तीका व॒युना॑नि वस्ते ।
   घृ॒तप्र॑तीका व॒युना॑नि वस्ते ।

Halfverse: c    तस्यां॑ सुप॒र्णा वृष॑णा॒ नि षे॑दतु॒र्यत्र॑ दे॒वा द॑धि॒रे भा॑ग॒धेय॑म् ।।
   तस्यां॑ सुप॒र्णा वृष॑णा॒ नि षे॑दतुर्
   तस्या॑म् सुप॒र्णा वृष॑णा नि से॑दतुः
   तस्यां सुप॒र्णा वृष॑णा नि षे॑दतुर्

Halfverse: d    यत्र॑ दे॒वा द॑धि॒रे भा॑ग॒धेय॑म् ।।
   यत्र दे॒वाः द॑धि॒रे भा॑ग॒धेय॑म् ।।
   यत्र दे॒वा द॑धि॒रे भा॑ग॒धेय॑म् ।।


Verse: 4 
Halfverse: a    एकः॑ सुप॒र्णः स स॑मु॒द्रमा वि॑वेश॒ स इ॒दं विश्व॒म्भुव॑नं॒ वि च॑ष्टे ।
   एकः॑ सुप॒र्णः स स॑मु॒द्रमा वि॑वेश
   एकः सुप॒र्णः स स॑मु॒द्रम् आ वि॑वेश
   एकः सुप॒र्णः स स॑मु॒द्रम् आ वि॑वेश

Halfverse: b    स इ॒दं विश्व॒म्भुव॑नं॒ वि च॑ष्टे ।
   सः ।!। इ॒दम् विश्व॑म् भुव॑नम् वि च॑ष्टे ।
   स इ॒दं विश्व॑म् भुव॑नं वि च॑ष्टे ।

Halfverse: c    तम्पाके॑न॒ मन॑सापश्य॒मन्ति॑त॒स्तम्मा॒ता रे॑ऴि॒ स उ॑ रेऴि मा॒तर॑म् ।।
   तम्पाके॑न॒ मन॑सापश्य॒मन्ति॑तस्
   तम् पाके॑न मन॑सा अपश्यम् अन्ति॑तः
   तम् पाके॑न मन॑सापश्यम् अन्ति॑तस्

Halfverse: d    तम्मा॒ता रे॑ऴि॒ स उ॑ रेऴि मा॒तर॑म् ।।
   तम् मा॒ता रे॑ऴि सः ।!। उ रेऴि मा॒तर॑म् ।।
   तम् मा॒ता रे॑ऴि स उ रेऴि मा॒तर॑म् ।।


Verse: 5 
Halfverse: a    सु॑प॒र्णं विप्राः॑ क॒वयो॒ वचो॑भि॒रेकं॒ सन्त॑म्बहु॒धा क॑ल्पयन्ति ।
   सु॑प॒र्णं विप्राः॑ क॒वयो॒ वचो॑भिर्
   सुप॒र्णम् विप्राः क॒वयः वचो॑भिः
   सुप॒र्णं विप्राः क॒वयो वचो॑भिर्

Halfverse: b    एकं॒ सन्त॑म्बहु॒धा क॑ल्पयन्ति ।
   एक॑म् सन्त॑म् बहु॒धा क॑ल्पयन्ति ।
   एकं सन्त॑म् बहु॒धा क॑ल्पयन्ति ।

Halfverse: c    छन्दां॑सि च॒ दध॑तो अध्व॒रेषु॒ ग्रहा॒न्सोम॑स्य मिमते॒ द्वाद॑श ।।
   छन्दां॑सि च॒ दध॑तो अध्व॒रेषु
   छन्दां॑सि च दध॑तः अध्व॒रेषु
   छन्दां॑सि च दध॑तो अध्व॒रेषु

Halfverse: d    ग्रहा॒न्सोम॑स्य मिमते॒ द्वाद॑श ।।
   ग्रहा॑न् सोम॑स्य मिमते द्वाद॑श ।।
   ग्रहा॑न् सोम॑स्य मिमते दु॒वाद॑श ।।


Verse: 6 
Halfverse: a    ष॑ट्त्रिं॒शांश्च॑ च॒तुरः॑ क॒ल्पय॑न्त॒श्छन्दां॑सि च॒ दध॑त आद्वाद॒शम् ।
   ष॑ट्त्रिं॒शांश्च॑ च॒तुरः॑ क॒ल्पय॑न्तश्
   षट्त्रिं॒शान् च च॒तुरः क॒ल्पय॑न्तः
   षट्त्रिं॒शांश् च च॒तुरः क॒ल्पय॑न्तश्

Halfverse: b    छन्दां॑सि च॒ दध॑त आद्वाद॒शम् ।
   छन्दां॑सि च दध॑तः आद्वाद॒शम् ।
   छन्दां॑सि च दध॑त आदुवाद॒शम् ।

Halfverse: c    य॒ज्ञं वि॒माय॑ क॒वयो॑ मनी॒ष ऋ॑क्सा॒माभ्या॒म्प्र रथं॑ वर्तयन्ति ।।
   य॒ज्ञं वि॒माय॑ क॒वयो॑ मनी॒ष
   य॒ज्ञम् वि॒माय क॒वयः मनी॒षा
   य॒ज्ञं वि॒माय क॒वयो मनी॒ष

Halfverse: d    ऋ॑क्सा॒माभ्या॒म्प्र रथं॑ वर्तयन्ति ।।
   ऋ॑क्सा॒माभ्या॑म् प्र रथ॑म् वर्तयन्ति ।।
   ऋ॑क्सा॒माभ्या॑म् प्र रथं वर्तयन्ति ।।


Verse: 7 
Halfverse: a    चतु॑र्दशा॒न्ये म॑हि॒मानो॑ अस्य॒ तं धीरा॑ वा॒चा प्र ण॑यन्ति स॒प्त ।
   चतु॑र्दशा॒न्ये म॑हि॒मानो॑ अस्य
   चतु॑र्दश अ॒न्ये म॑हि॒मानः अस्य
   चतु॑र्दशा॒न्ये म॑हि॒मानो अस्य

Halfverse: b    तं धीरा॑ वा॒चा प्र ण॑यन्ति स॒प्त ।
   तम् धीराः वा॒चा प्र न॑यन्ति स॒प्त ।
   तं धीरा वा॒चा प्र ण॑यन्ति स॒प्त ।

Halfverse: c    आप्ना॑नं ती॒र्थं क इ॒ह प्र वो॑च॒द्येन॑ प॒था प्र॒पिब॑न्ते सु॒तस्य॑ ।।
   आप्ना॑नं ती॒र्थं क इ॒ह प्र वो॑चद्
   आप्ना॑नम् ती॒र्थम् कः इ॒ह प्र वो॑चत्
   आप्ना॑नं ती॒र्थं क इ॒ह प्र वो॑चद्

Halfverse: d    येन॑ प॒था प्र॒पिब॑न्ते सु॒तस्य॑ ।।
   येन प॒था प्र॒पिब॑न्ते सु॒तस्य ।।
   येन प॒था प्र॒पिब॑न्ते सु॒तस्य ।।


Verse: 8 
Halfverse: a    स॑हस्र॒धा प॑ञ्चद॒शान्यु॒क्था याव॒द्द्यावा॑पृथि॒वी ताव॒दित्तत् ।
   स॑हस्र॒धा प॑ञ्चद॒शान्यु॒क्था
   स॑हस्र॒धा प॑ञ्चद॒शानि उ॒क्था
   स॑हस्र॒धा प॑ञ्चद॒शानि उ॒क्था

Halfverse: b    याव॒द्द्यावा॑पृथि॒वी ताव॒दित्तत् ।
   याव॑त् द्यावा॑पृथि॒वी ताव॑त् इत् तत् ।
   याव॑द् द्यावा॑पृथि॒वी ताव॑द् इत् तत् ।

Halfverse: c    स॑हस्र॒धा म॑हि॒मानः॑ स॒हस्रं॒ याव॒द्ब्रह्म॒ विष्ठि॑तं॒ ताव॑ती॒ वाक् ।।
   स॑हस्र॒धा म॑हि॒मानः॑ स॒हस्रं
   सहस्र॒धा म॑हि॒मानः स॒हस्र॑म्
   सहस्र॒धा म॑हि॒मानः स॒हस्रं

Halfverse: d    याव॒द्ब्रह्म॒ विष्ठि॑तं॒ ताव॑ती॒ वाक् ।।
   याव॑त् ब्रह्म विष्ठि॑तम् ताव॑ती वाक् ।।
   याव॑द् ब्रह्म विष्ठि॑तं ताव॑ती वाक् ।।


Verse: 9 
Halfverse: a    कश्छन्द॑सां॒ योग॒मा वे॑द॒ धीरः॒ को धिष्ण्या॒म्प्रति॒ वाच॑म्पपाद ।
   कश्छन्द॑सां॒ योग॒मा वे॑द॒ धीरः
   कः छन्द॑साम् योग॑म् आ वे॑द धीरः
   कश् छन्द॑सां योग॑म् आ वे॑द धीरः

Halfverse: b    को धिष्ण्या॒म्प्रति॒ वाच॑म्पपाद ।
   कः धिष्ण्या॑म् प्रति वाच॑म् पपाद ।
   को धिष्णि॑याम् प्रति वाच॑म् पपाद ।

Halfverse: c    कमृ॒त्विजा॑मष्ट॒मं शूर॑माहु॒र्हरी॒ इन्द्र॑स्य॒ नि चि॑काय॒ कः स्वि॑त् ।।
   कमृ॒त्विजा॑मष्ट॒मं शूर॑माहुर्
   कम् ऋ॒त्विजा॑म् अष्ट॒मम् शूर॑म् आहुः
   कम् ऋ॒त्विजा॑म् अष्ट॒मं शूर॑म् आहुर्

Halfverse: d    हरी॒ इन्द्र॑स्य॒ नि चि॑काय॒ कः स्वि॑त् ।।
   हरी इन्द्र॑स्य नि चि॑काय कः स्वि॑त् ।।
   हरी इन्द्र॑स्य नि चि॑काय कः स्वि॑त् ।।


Verse: 10 
Halfverse: a    भूम्या॒ अन्त॒म्पर्येके॑ चरन्ति॒ रथ॑स्य धू॒र्षु यु॒क्तासो॑ अस्थुः ।
   भूम्या॒ अन्त॒म्पर्येके॑ चरन्ति
   भूम्याः अन्त॑म् परि एके चरन्ति
   भूम्या अन्त॑म् परि एके चरन्ति

Halfverse: b    रथ॑स्य धू॒र्षु यु॒क्तासो॑ अस्थुः ।
   रथ॑स्य धू॒र्षु यु॒क्तासः अस्थुः ।
   रथ॑स्य धू॒र्षु यु॒क्तासो अस्थुः ।

Halfverse: c    श्रम॑स्य दा॒यं वि भ॑जन्त्येभ्यो य॒दा य॒मो भव॑ति ह॒र्म्ये हि॒तः ।।
   श्रम॑स्य दा॒यं वि भ॑जन्त्येभ्यो
   श्रम॑स्य दा॒यम् वि भ॑जन्ति एभ्यः
   श्रम॑स्य दा॒यं वि भ॑जन्ति एभियो

Halfverse: d    य॒दा य॒मो भव॑ति ह॒र्म्ये हि॒तः ।।
   य॒दा य॒मः भव॑ति ह॒र्म्ये हि॒तः ।।
   य॒दा य॒मो भव॑ति हर्मि॒ये हि॒तः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.