TITUS
Rg-Veda: Rg-Veda-Samhita
Part No. 948
Previous part

Hymn: 111_(937) 
Verse: 1 
Halfverse: a    मनी॑षिणः॒ प्र भ॑रध्वम्मनी॒षां यथा॑यथा म॒तयः॒ सन्ति॑ नृ॒णाम् ।
   मनी॑षिणः॒ प्र भ॑रध्वम्मनी॒षां
   मनी॑षिणः प्र भ॑रध्वम् मनी॒षाम्
   मनी॑षिणः प्र भ॑रध्वम् मनी॒षां

Halfverse: b    यथा॑यथा म॒तयः॒ सन्ति॑ नृ॒णाम् ।
   यथा॑यथा म॒तयः सन्ति नृ॒णाम् ।
   यथा॑यथा म॒तयः सन्ति नॄ॒णाम् ।

Halfverse: c    इन्द्रं॑ स॒त्यैरेर॑यामा कृ॒तेभिः॒ स हि वी॒रो गि॑र्वण॒स्युर्विदा॑नः ।।
   इन्द्रं॑ स॒त्यैरेर॑यामा कृ॒तेभिः
   इन्द्र॑म् स॒त्यैः आ ई॑रयाम+ कृ॒तेभिः
   इन्द्रं स॒त्यैर् एर॑यामा कृ॒तेभिः

Halfverse: d    स हि वी॒रो गि॑र्वण॒स्युर्विदा॑नः ।।
   स हि वी॒रः गि॑र्वण॒स्युः विदा॑नः ।।
   स हि वी॒रो गि॑र्वण॒स्युर् विदा॑नः ।।


Verse: 2 
Halfverse: a    ऋ॒तस्य॒ हि सद॑सो धी॒तिरद्यौ॒त्सं गा॑र्ष्टे॒यो वृ॑ष॒भो गोभि॑रानट् ।
   ऋ॒तस्य॒ हि सद॑सो धी॒तिरद्यौ॑त्
   ऋ॒तस्य हि सद॑सः धी॒तिः अद्यौ॑त्
   ऋ॒तस्य हि सद॑सो धी॒तिर् अद्यौ॑त्

Halfverse: b    सं गा॑र्ष्टे॒यो वृ॑ष॒भो गोभि॑रानट् ।
   सम् गार्ष्टे॒यः वृ॑ष॒भः गोभिः आनट् ।
   सं गा॑र्ष्टे॒यो वृ॑ष॒भो गोभि॑र् आनट् ।

Halfverse: c    उद॑तिष्ठत्तवि॒षेणा॒ रवे॑ण म॒हान्ति॑ चि॒त्सं वि॑व्याचा॒ रजां॑सि ।।
   उद॑तिष्ठत्तवि॒षेणा॒ रवे॑ण
   उत् अतिष्ठत् तवि॒षेण+ रवे॑ण
   उद् अतिष्ठत् तवि॒षेणा रवे॑ण

Halfverse: d    म॒हान्ति॑ चि॒त्सं वि॑व्याचा॒ रजां॑सि ।।
   म॒हान्ति चित् सम् विव्याच+ रजां॑सि ।।
   म॒हान्ति चित् सं वि॑व्याचा रजां॑सि ।।


Verse: 3 
Halfverse: a    इन्द्रः॒ किल॒ श्रुत्या॑ अ॒स्य वे॑द॒ स हि जि॒ष्णुः प॑थि॒कृत्सूर्या॑य ।
   इन्द्रः॒ किल॒ श्रुत्या॑ अ॒स्य वे॑द
   इन्द्रः किल श्रुत्यै अ॒स्य वे॑द
   इन्द्रः किल श्रुति॑या अ॒स्य वे॑द

Halfverse: b    स हि जि॒ष्णुः प॑थि॒कृत्सूर्या॑य ।
   स हि जि॒ष्णुः प॑थि॒कृत् सूर्या॑य ।
   स हि जि॒ष्णुः प॑थि॒कृत् सूरि॑याय ।

Halfverse: c    आन्मेनां॑ कृ॒ण्वन्नच्यु॑तो॒ भुव॒द्गोः पति॑र्दि॒वः स॑न॒जा अप्र॑तीतः ।।
   आन्मेनां॑ कृ॒ण्वन्नच्यु॑तो॒ भुव॒द्गोः
   आत् मेना॑म् कृ॒ण्वन् अच्यु॑तः भुव॑त् गोः
   आन् मेनां कृ॒ण्वन् अच्यु॑तो भुव॑द् गोः

Halfverse: d    पति॑र्दि॒वः स॑न॒जा अप्र॑तीतः ।।
   पतिः दि॒वः स॑न॒जाः अप्र॑तीतः ।।
   पति॑र् दि॒वः स॑न॒जा अप्र॑तीतः ।।


Verse: 4 
Halfverse: a    इन्द्रो॑ म॒ह्ना म॑ह॒तो अ॑र्ण॒वस्य॑ व्र॒तामि॑ना॒दङ्गि॑रोभिर्गृणा॒नः ।
   इन्द्रो॑ म॒ह्ना म॑ह॒तो अ॑र्ण॒वस्य
   इन्द्रः म॒ह्ना म॑ह॒तः अ॑र्ण॒वस्य
   इन्द्रो म॒ह्ना म॑ह॒तो अ॑र्ण॒वस्य

Halfverse: b    व्र॒तामि॑ना॒दङ्गि॑रोभिर्गृणा॒नः ।
   व्र॒ता अ॑मिनात् अङ्गि॑रोभिः गृणा॒नः ।
   व्र॒तामि॑नाद् अङ्गि॑रोभिर् गृणा॒नः ।

Halfverse: c    पु॒रूणि॑ चि॒न्नि त॑ताना॒ रजां॑सि दा॒धार॒ यो ध॒रुणं॑ स॒त्यता॑ता ।।
   पु॒रूणि॑ चि॒न्नि त॑ताना॒ रजां॑सि
   पु॒रूणि चित् नि त॑तान+ रजां॑सि
   पु॒रूणि चिन् नि त॑ताना रजां॑सि

Halfverse: d    दा॒धार॒ यो ध॒रुणं॑ स॒त्यता॑ता ।।
   दा॒धार यः ध॒रुण॑म् स॒त्यता॑ता ।।
   दा॒धार यो ध॒रुणं स॒त्यता॑ता ।।


Verse: 5 
Halfverse: a    इन्द्रो॑ दि॒वः प्र॑ति॒मान॑म्पृथि॒व्या विश्वा॑ वेद॒ सव॑ना॒ हन्ति॒ शुष्ण॑म् ।
   इन्द्रो॑ दि॒वः प्र॑ति॒मान॑म्पृथि॒व्या
   इन्द्रः दि॒वः प्र॑ति॒मान॑म् पृथि॒व्याः
   इन्द्रो दि॒वः प्र॑ति॒मान॑म् पृथि॒व्या

Halfverse: b    विश्वा॑ वेद॒ सव॑ना॒ हन्ति॒ शुष्ण॑म् ।
   विश्वा वेद सव॑ना हन्ति शुष्ण॑म् ।
   विश्वा वेद सव॑ना हन्ति शुष्ण॑म् ।

Halfverse: c    म॒हीं चि॒द्द्यामात॑नो॒त्सूर्ये॑ण चा॒स्कम्भ॑ चि॒त्कम्भ॑नेन॒ स्कभी॑यान् ।।
   म॒हीं चि॒द्द्यामात॑नो॒त्सूर्ये॑ण
   म॒हीम् चित् द्याम् आ अ॑तनोत् सूर्ये॑ण
   म॒हीं चि॑द् द्याम् आत॑नोत् सूरि॑येण

Halfverse: d    चा॒स्कम्भ॑ चि॒त्कम्भ॑नेन॒ स्कभी॑यान् ।।
   चा॒स्कम्भ चित् स्कम्भ॑नेन स्कभी॑यान् ।।
   चा॒स्कम्भ चित् कम्भ॑नेन स्कभी॑यान् ।।


Verse: 6 
Halfverse: a    वज्रे॑ण॒ हि वृ॑त्र॒हा वृ॒त्रमस्त॒रदे॑वस्य॒ शूशु॑वानस्य मा॒याः ।
   वज्रे॑ण॒ हि वृ॑त्र॒हा वृ॒त्रमस्त॑र्
   वज्रे॑ण हि वृ॑त्र॒हा वृ॒त्रम् अस्त॑र्
   वज्रे॑ण हि वृ॑त्र॒हा वृ॒त्रम् अस्त॑र्

Halfverse: b    अदे॑वस्य॒ शूशु॑वानस्य मा॒याः ।
   अदे॑वस्य शूशु॑वानस्य मा॒याः ।
   अदे॑वस्य शूशु॑वानस्य मा॒याः ।

Halfverse: c    वि धृ॑ष्णो॒ अत्र॑ धृष॒ता ज॑घ॒न्थाथा॑भवो मघवन्बा॒ह्वो॑जाः ।।
   वि धृ॑ष्णो॒ अत्र॑ धृष॒ता ज॑घन्थ
   वि धृ॑ष्णो अत्र धृष॒ता ज॑घन्थ
   वि धृ॑ष्णो अत्र धृष॒ता ज॑घन्थ

Halfverse: d     अथा॑भवो मघवन्बा॒ह्वो॑जाः ।।
   अथ अभवः मघवन् बा॒ह्वो॑जाः ।।
   अथा॑भवो मघवन् बाहुओजाः ।।


Verse: 7 
Halfverse: a    सच॑न्त॒ यदु॒षसः॒ सूर्ये॑ण चि॒त्राम॑स्य के॒तवो॒ राम॑विन्दन् ।
   सच॑न्त॒ यदु॒षसः॒ सूर्ये॑ण
   सच॑न्त यत् उ॒षसः सूर्ये॑ण
   सच॑न्त यद् उ॒षसः सूरि॑येण

Halfverse: b    चि॒त्राम॑स्य के॒तवो॒ राम॑विन्दन् ।
   चि॒त्राम् अस्य के॒तवः राम् अविन्दन् ।
   चि॒त्राम् अस्य के॒तवो राम् अविन्दन् ।

Halfverse: c    आ यन्नक्ष॑त्रं॒ ददृ॑शे दि॒वो न पुन॑र्य॒तो नकि॑र॒द्धा नु वे॑द ।।
   आ यन्नक्ष॑त्रं॒ ददृ॑शे दि॒वो न
   आ यत् नक्ष॑त्रम् ददृ॑शे दि॒वः न
   आ यन् नक्ष॑त्रं ददृ॑शे दि॒वो न

Halfverse: d    पुन॑र्य॒तो नकि॑र॒द्धा नु वे॑द ।।
   पुन॑र् य॒तः नकिः अ॒द्धा नु वे॑द ।।
   पुन॑र् य॒तो नकि॑र् अ॒द्धा नु वे॑द ।।


Verse: 8 
Halfverse: a    दू॒रं किल॑ प्रथ॒मा ज॑ग्मुरासा॒मिन्द्र॑स्य॒ याः प्र॑स॒वे स॒स्रुरापः॑ ।
   दू॒रं किल॑ प्रथ॒मा ज॑ग्मुरासाम्
   दू॒रम् किल प्रथ॒माः ज॑ग्मुः आसाम्
   दू॒रं किल प्रथ॒मा ज॑ग्मुर् आसाम्

Halfverse: b    इन्द्र॑स्य॒ याः प्र॑स॒वे स॒स्रुरापः॑ ।
   इन्द्र॑स्य याः प्र॑स॒वे स॒स्रुः आपः ।
   इन्द्र॑स्य याः प्र॑स॒वे स॒स्रुर् आपः ।

Halfverse: c    क्व॑ स्वि॒दग्रं॒ क्व॑ बु॒ध्न आ॑सा॒मापो॒ मध्यं॒ क्व॑ वो नू॒नमन्तः॑ ।।
   क्व॑ स्वि॒दग्रं॒ क्व॑ बु॒ध्न आ॑साम्
   क्व स्वित् अग्र॑म् क्व बु॒ध्नः आ॑साम्
   कुव स्विद् अग्रं कुव बु॒ध्न आ॑साम्

Halfverse: d    आपो॒ मध्यं॒ क्व॑ वो नू॒नमन्तः॑ ।।
   आपः मध्य॑म् क्व वः नू॒नम् अन्तः ।।
   आपो मध्यं कुव वो नू॒नम् अन्तः ।।


Verse: 9 
Halfverse: a    सृ॒जः सिन्धूँ॒रहि॑ना जग्रसा॒नाँ आदिदे॒ताः प्र वि॑विज्रे ज॒वेन॑ ।
   सृ॒जः सिन्धूँ॒रहि॑ना जग्रसा॒नाँ
   सृ॒जः सिन्धू॑न् अहि॑ना जग्रसा॒नान्
   सृ॒जः सिन्धूँ॑र् अहि॑ना जग्रसा॒नाँ

Halfverse: b    आदिदे॒ताः प्र वि॑विज्रे ज॒वेन॑ ।
   आत् इत् ए॒ताः प्र वि॑विज्रे ज॒वेन ।
   आद् इद् ए॒ताः प्र वि॑विज्रे ज॒वेन ।

Halfverse: c    मुमु॑क्षमाणा उ॒त या मु॑मु॒च्रे ऽधेदे॒ता न र॑मन्ते॒ निति॑क्ताः ।।
   मुमु॑क्षमाणा उ॒त या मु॑मु॒च्रे
   मुमु॑क्षमाणाः उ॒त याः मु॑मुच्रे
   मुमु॑क्षमाणा उ॒त या मु॑मु॒च्रे

Halfverse: d    ऽधेदे॒ता न र॑मन्ते॒ निति॑क्ताः ।।
   अध इत् ए॒ताः न र॑मन्ते निति॑क्ताः ।।
   अधेद् ए॒ता न र॑मन्ते निति॑क्ताः ।।


Verse: 10 
Halfverse: a    स॒ध्रीचीः॒ सिन्धु॑मुश॒तीरि॑वायन्स॒नाज्जा॒र आ॑रि॒तः पू॒र्भिदा॑साम् ।
   स॒ध्रीचीः॒ सिन्धु॑मुश॒तीरि॑वायन्
   स॒ध्रीचीः सिन्धु॑म् उश॒तीः इ॑व आयन्
   स॒ध्रीचीः सिन्धु॑म् उश॒तीर् इवायन्

Halfverse: b    स॒नाज्जा॒र आ॑रि॒तः पू॒र्भिदा॑साम् ।
   स॒नात् जा॒रः आ॑रि॒तः पू॒र्भित् आसाम् ।
   स॒नाज् जा॒र आ॑रि॒तः पू॒र्भिद् आसाम् ।

Halfverse: c    अस्त॒मा ते॒ पार्थि॑वा॒ वसू॑न्य॒स्मे ज॑ग्मुः सू॒नृता॑ इन्द्र पू॒र्वीः ।।
   अस्त॒मा ते॒ पार्थि॑वा॒ वसू॑न्य्
   अस्त॑म् आ ते पार्थि॑वा वसू॑नि
   अस्त॑म् आ ते ? पार्थि॑वा वसू॑नि

Halfverse: d    अ॒स्मे ज॑ग्मुः सू॒नृता॑ इन्द्र पू॒र्वीः ।।
   अ॒स्मे ज॑ग्मुः सू॒नृताः इन्द्र पू॒र्वीः ।।
   अ॒स्मे ज॑ग्मुः सू॒नृता इन्द्र पू॒र्वीः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.