TITUS
Rg-Veda: Rg-Veda-Samhita
Part No. 943
Previous part

Hymn: 106_(932) 
Verse: 1 
Halfverse: a    उ॒भा उ॑ नू॒नं तदिद॑र्थयेथे॒ वि त॑न्वाथे॒ धियो॒ वस्त्रा॒पसे॑व ।
   उ॒भा उ॑ नू॒नं तदिद॑र्थयेथे
   उ॒भौ उ नू॒नम् तत् इत् अर्थयेथे
   उ॒भा उ नू॒नं तद् इद् अर्थयेथे

Halfverse: b    वि त॑न्वाथे॒ धियो॒ वस्त्रा॒पसे॑व ।
   वि त॑न्वाथे धियः वस्त्रा अ॒पसा इव ।
   वि त॑न्वाथे धियो वस्त्रा॒पसे॑व ।

Halfverse: c    स॑ध्रीची॒ना यात॑वे॒ प्रेम॑जीगः सु॒दिने॑व॒ पृक्ष॒ आ तं॑सयेथे ।।
   स॑ध्रीची॒ना यात॑वे॒ प्रेम॑जीगः
   सध्रीची॒ना यात॑वे प्र ई॑म् अजीगर्
   सध्रीची॒ना यात॑वे प्रेम् अजीगः

Halfverse: d    सु॒दिने॑व॒ पृक्ष॒ आ तं॑सयेथे ।।
   सु॒दिना इव पृक्षः आ तं॑सयेथे ।।
   सु॒दिने॑व पृक्ष आ तं॑सयेथे ।।


Verse: 2 
Halfverse: a    उ॒ष्टारे॑व॒ पर्व॑रेषु श्रयेथे प्रायो॒गेव॒ श्वात्र्या॒ शासु॒रेथः॑ ।
   उ॒ष्टारे॑व॒ पर्व॑रेषु श्रयेथे
   उ॒ष्टारा इव पर्व॑रेषु श्रयेथे
   उ॒ष्टारे॑व पर्व॑रेषु श्रयेथे

Halfverse: b    प्रायो॒गेव॒ श्वात्र्या॒ शासु॒रेथः॑ ।
   प्रा॑यो॒गा इ॑व श्वात्र्या शासुः आ इ॑थः ।
   प्रा॑यो॒गेव श्वात्रि॑या शासु॑र् एथः ।

Halfverse: c    दू॒तेव॒ हि ष्ठो य॒शसा॒ जने॑षु॒ माप॑ स्थातम्महि॒षेवा॑व॒पाना॑त् ।।
   दू॒तेव॒ हि ष्ठो य॒शसा॒ जने॑षु
   दू॒ता इ॑व हि स्थः य॒शसा जने॑षु
   दू॒तेव हि ष्ठो य॒शसा जने॑षु

Halfverse: d    माप॑ स्थातम्महि॒षेवा॑व॒पाना॑त् ।!। ।।
   मा अप स्थातम् महि॒षा इ॑व अव॒पाना॑त् ।।
   माप स्थातम् महि॒षेवा॑व॒पाना॑त् ।।


Verse: 3 
Halfverse: a    सा॑कं॒युजा॑ शकु॒नस्ये॑व प॒क्षा प॒श्वेव॑ चि॒त्रा यजु॒रा ग॑मिष्टम् ।
   सा॑कं॒युजा॑ शकु॒नस्ये॑व प॒क्षा
   सा॑कं॒युजा शकु॒नस्य इव प॒क्षा
   सा॑कं॒युजा शकु॒नस्ये॑व प॒क्षा

Halfverse: b    प॒श्वेव॑ चि॒त्रा यजु॒रा ग॑मिष्टम् ।
   प॒श्वा इ॑व चि॒त्रा यजुः आ ग॑मिष्टम् ।
   प॒श्वेव चि॒त्रा यजु॑र् आ ग॑मिष्टम् ।

Halfverse: c    अ॒ग्निरि॑व देव॒योर्दी॑दि॒वांसा॒ परि॑ज्मानेव यजथः पुरु॒त्रा ।।
   अ॒ग्निरि॑व देव॒योर्दी॑दि॒वांसा
   अ॒ग्निः इ॑व देव॒योः दी॑दि॒वांसा
   अ॒ग्निर् इव देव॒योर् दीदि॒वांसा

Halfverse: d    परि॑ज्मानेव यजथः पुरु॒त्रा ।।
   परि॑ज्माना इव यजथः पुरु॒त्रा ।।
   परि॑ज्मानेव यजथः पुरु॒त्रा ।।


Verse: 4 
Halfverse: a    आ॒पी वो॑ अ॒स्मे पि॒तरे॑व पु॒त्रोग्रेव॑ रु॒चा नृ॒पती॑व तु॒र्यै ।
   आ॒पी वो॑ अ॒स्मे पि॒तरे॑व पु॒त्रा
   आ॒पी वः अ॒स्मे पि॒तरा इव पु॒त्रा
   आ॒पी वो अ॒स्मे पि॒तरे॑व पु॒त्रा

Halfverse: b     उ॒ग्रेव॑ रु॒चा नृ॒पती॑व तु॒र्यै ।
   उ॒ग्रा इ॑व रु॒चा नृ॒पती इव तु॒र्यै ।
   उ॒ग्रेव रु॒चा नृ॒पती॑व तु॒र्यै ।

Halfverse: c    इर्ये॑व पु॒ष्ट्यै कि॒रणे॑व भु॒ज्यै श्रु॑ष्टी॒वाने॑व॒ हव॒मा ग॑मिष्टम् ।।
   इर्ये॑व पु॒ष्ट्यै कि॒रणे॑व भु॒ज्यै
   इर्या इव पु॒ष्ट्यै कि॒रणा इव भु॒ज्यै
   इर्ये॑व पु॒ष्ट्यै कि॒रणे॑व भु॒ज्यै

Halfverse: d    श्रु॑ष्टी॒वाने॑व॒ हव॒मा ग॑मिष्टम् ।।
   श्रु॑ष्टी॒वाना इव हव॑म् आ ग॑मिष्टम् ।।
   श्रु॑ष्टी॒वाने॑व हव॑म् आ ग॑मिष्टम् ।।


Verse: 5 
Halfverse: a    वंस॑गेव पूष॒र्या॑ शि॒म्बाता॑ मि॒त्रेव॑ ऋ॒ता श॒तरा॒ शात॑पन्ता ।
   वंस॑गेव पूष॒र्या॑ शि॒म्बाता
   वंस॑गा इव पूष॒र्या शि॒म्बाता
   वंस॑गेव पूष॒रिया शि॒म्बाता

Halfverse: b    मि॒त्रेव॑ ऋ॒ता श॒तरा॒ शात॑पन्ता ।
   मि॒त्रा इ॑व ऋ॒ता श॒तरा शात॑पन्ता ।
   मि॒त्रेव र्ता श॒तरा शात॑पन्ता ।

Halfverse: c    वाजे॑वो॒च्चा वय॑सा घर्म्ये॒ष्ठा मेषे॑वे॒षा स॑प॒र्या॒ पुरी॑षा ।।
   वाजे॑वो॒च्चा वय॑सा घर्म्ये॒ष्ठा
   वाजा इव उ॒च्चा वय॑सा घर्म्ये॒ष्ठा
   वाजे॑वो॒च्चा वय॑सा घर्मिये॒ष्ठा

Halfverse: d    मेषे॑वे॒षा स॑प॒र्या॒ पुरी॑षा ।।
   मेषा इव इ॒षा स॑प॒र्या पुरी॑षा ।।
   मेषे॑वे॒षा स॑प॒रिया पुरी॑षा ।।


Verse: 6 
Halfverse: a    सृ॒ण्ये॑व ज॒र्भरी॑ तु॒र्परी॑तू नैतो॒शेव॑ तु॒र्परी॑ पर्प॒रीका॑ ।
   सृ॒ण्ये॑व ज॒र्भरी॑ तु॒र्परी॑तू
   सृ॒ण्या इव ज॒र्भरी तु॒र्परी॑तू
   सृ॒णिये॑व ज॒र्भरी तु॒र्परी॑तू

Halfverse: b    नैतो॒शेव॑ तु॒र्परी॑ पर्प॒रीका॑ ।
   नै॑तो॒शा इ॑व तु॒र्परी पर्प॒रीका ।
   नै॑तो॒शेव तु॒र्परी पर्प॒रीका ।

Halfverse: c    उ॑दन्य॒जेव॒ जेम॑ना मदे॒रू ता मे॑ ज॒राय्व॒जर॑म्म॒रायु॑ ।।
   उ॑दन्य॒जेव॒ जेम॑ना मदे॒रू
   उ॑दन्य॒जा इ॑व जेम॑ना मदे॒रू
   उ॑दन्य॒जेव जेम॑ना मदे॒रू

Halfverse: d    ता मे॑ ज॒राय्व॒जर॑म्म॒रायु॑ ।।
   ता मे ज॒रायु अ॒जर॑म् म॒रायु ।।
   ता मे ज॒रायु अ॒जर॑म् म॒रायु ।।


Verse: 7 
Halfverse: a    प॒ज्रेव॒ चर्च॑रं॒ जार॑म्म॒रायु॒ क्षद्मे॒वार्थे॑षु तर्तरीथ उग्रा ।
   प॒ज्रेव॒ चर्च॑रं॒ जार॑म्म॒रायु
   प॒ज्रा इ॑व चर्च॑रम् जार॑म् म॒रायु
   प॒ज्रेव चर्च॑रं जार॑म् म॒रायु

Halfverse: b    क्षद्मे॒वार्थे॑षु तर्तरीथ उग्रा ।
   क्षद्म इव अर्थे॑षु तर्तरीथः उग्रा ।
   क्षद्मे॒वार्थे॑षु तर्तरीथ उग्रा ।

Halfverse: c    ऋ॒भू नाप॑त्खरम॒ज्रा ख॒रज्रु॑र्वा॒युर्न प॑र्परत्क्षयद्रयी॒णाम् ।।
   ऋ॒भू नाप॑त्खरम॒ज्रा ख॒रज्रु॑र्
   ऋ॒भू न आ॑पत् खरम॒ज्रा ख॒रज्रुः
   ऋ॒भू नाप॑त् खरम॒ज्रा ख॒रज्रु॑र्

Halfverse: d    वा॒युर्न प॑र्परत्क्षयद्रयी॒णाम् ।।
   वा॒युः न प॑र्परत् क्षयत् रयी॒णाम् ।।
   वा॒युर् न प॑र्परत् क्षयद् रयी॒णाम् ।।


Verse: 8 
Halfverse: a    घ॒र्मेव॒ मधु॑ ज॒ठरे॑ स॒नेरू॒ भगे॑विता तु॒र्परी॒ पारि॒वार॑म् ।
   घ॒र्मेव॒ मधु॑ ज॒ठरे॑ स॒नेरू
   घ॒र्मा इ॑व मधु ज॒ठरे स॒नेरू
   घ॒र्मेव मधु ज॒ठरे स॒नेरू

Halfverse: b    भगे॑विता तु॒र्परी॒ पारि॒वार॑म् ।
   भगे॑विता तु॒र्परी पारि॑वा अर॑म् ।
   भगे॑विता तु॒र्परी पारि॒वार॑म् ।

Halfverse: c    प॑त॒रेव॑ चच॒रा च॒न्द्रनि॑र्णि॒ङ्मनऋ॑ङ्गा मन॒न्या॒ न जग्मी॑ ।।
   प॑त॒रेव॑ चच॒रा च॒न्द्रनि॑र्णिङ्
   पत॒रा इ॑व चच॒रा च॒न्द्रनि॑र्णिक्
   पत॒रेव चच॒रा च॒न्द्रनि॑र्णिङ्

Halfverse: d    मनऋ॑ङ्गा मन॒न्या॒ न जग्मी॑ ।।
   मनऋ॑ङ्गा मन॒न्या न जग्मी ।।
   मनऋ॑ङ्गा मन॒निया न जग्मी ।।


Verse: 9 
Halfverse: a    बृ॒हन्ते॑व ग॒म्भरे॑षु प्रति॒ष्ठाम्पादे॑व गा॒धं तर॑ते विदाथः ।
   बृ॒हन्ते॑व ग॒म्भरे॑षु प्रति॒ष्ठाम्
   बृ॒हन्ता इव ग॒म्भरे॑षु प्रति॒ष्ठाम्
   बृ॒हन्ते॑व ग॒म्भरे॑षु प्रति॒ष्ठाम्

Halfverse: b    पादे॑व गा॒धं तर॑ते विदाथः ।
   पादा इव गा॒धम् तर॑ते विदाथः ।
   पादे॑व गा॒धं तर॑ते विदाथः ।

Halfverse: c    कर्णे॑व॒ शासु॒रनु॒ हि स्मरा॒थो ऽं॑शेव नो भजतं चि॒त्रमप्नः॑ ।।
   कर्णे॑व॒ शासु॒रनु॒ हि स्मरा॒थो
   कर्णा इव शासुः अनु हि स्मरा॑थः
   कर्णे॑व शासु॑र् अनु हि स्मरा॑थो

Halfverse: d    ऽंशेव नो भजतं चि॒त्रमप्नः॑ ।।
   अंशा इव नः भजतम् चि॒त्रम् अप्नः ।।
   अंशे॑व नो भजतं चि॒त्रम् अप्नः ।।


Verse: 10 
Halfverse: a    आ॑रङ्ग॒रेव॒ मध्वेर॑येथे सार॒घेव॒ गवि॑ नी॒चीन॑बारे ।
   आ॑रङ्ग॒रेव॒ मध्वेर॑येथे
   आरङ्ग॒रा इ॑व मधु आ ई॑रयेथे
   आरङ्ग॒रेव मधु एर॑येथे

Halfverse: b    सार॒घेव॒ गवि॑ नी॒चीन॑बारे ।
   सा॑र॒घा इ॑व गवि नी॒चीन॑बारे ।
   सा॑र॒घेव गवि नी॒चीन॑बारे ।

Halfverse: c    की॒नारे॑व॒ स्वेद॑मासिष्विदा॒ना क्षामे॑वो॒र्जा सू॑यव॒सात्स॑चेथे ।।
   की॒नारे॑व॒ स्वेद॑मासिष्विदा॒ना
   की॒नारा इव स्वेद॑म् आसिष्विदा॒ना
   की॒नारे॑व स्वेद॑म् आसिष्विदा॒ना

Halfverse: d    क्षामे॑वो॒र्जा सू॑यव॒सात्स॑चेथे ।।
   क्षाम इव ऊ॒र्जा सू॑यव॒सात् सचेथे ।।
   क्षामे॑वो॒र्जा सू॑यव॒सात् सचेथे ।।


Verse: 11 
Halfverse: a    ऋ॒ध्याम॒ स्तोमं॑ सनु॒याम॒ वाज॒मा नो॒ मन्त्रं॑ स॒रथे॒होप॑ यातम् ।
   ऋ॒ध्याम॒ स्तोमं॑ सनु॒याम॒ वाज॑म्
   ऋ॒ध्याम स्तोम॑म् सनु॒याम वाज॑म्
   ऋ॒ध्याम स्तोमं सनु॒याम वाज॑म्

Halfverse: b    आ नो॒ मन्त्रं॑ स॒रथे॒होप॑ यातम् ।
   आ नः मन्त्र॑म् स॒रथा इ॒ह उप यातम् ।
   आ नो मन्त्रं स॒रथे॒होप यातम् ।

Halfverse: c    यशो॒ न प॒क्वम्मधु॒ गोष्व॒न्तरा भू॒तांशो॑ अ॒श्विनोः॒ काम॑मप्राः ।।
   यशो॒ न प॒क्वम्मधु॒ गोष्व॒न्तर्
   यशः न प॒क्वम् मधु गोषु अ॒न्तर्
   यशो न प॒क्वम् मधु गोषु अ॒न्तर्

Halfverse: d    आ भू॒तांशो॑ अ॒श्विनोः॒ काम॑मप्राः ।।
   आ भू॒तांशः अ॒श्विनोः काम॑म् अप्राः ।।
   आ भू॒तांशो अ॒श्विनोः काम॑म् अप्राः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.