TITUS
Rg-Veda: Rg-Veda-Samhita
Part No. 940
Previous part

Hymn: 103_(929) 
Verse: 1 
Halfverse: a    आ॒शुः शिशा॑नो वृष॒भो न भी॒मो घ॑नाघ॒नः क्षोभ॑णश्चर्षणी॒नाम् ।
   आ॒शुः शिशा॑नो वृष॒भो न भी॒मो
   आ॒शुः शिशा॑नः वृष॒भः न भी॒मः
   आ॒शुः शिशा॑नो वृष॒भो न भी॒मो

Halfverse: b    घ॑नाघ॒नः क्षोभ॑णश्चर्षणी॒नाम् ।
   घ॑नाघ॒नः क्षोभ॑णः चर्षणी॒नाम् ।
   घ॑नाघ॒नः क्षोभ॑णश् चर्षणी॒नाम् ।

Halfverse: c    सं॒क्रन्द॑नो ऽनिमि॒ष ए॑कवी॒रः श॒तं सेना॑ अजयत्सा॒कमिन्द्रः॑ ।।
   सं॒क्रन्द॑नो ऽनिमि॒ष ए॑कवी॒रः
   सं॒क्रन्द॑नः अनिमि॒षः ए॑कवी॒रः
   सं॒क्रन्द॑नो ऽनिमि॒ष ए॑कवी॒रः

Halfverse: d    श॒तं सेना॑ अजयत्सा॒कमिन्द्रः॑ ।।
   श॒तम् सेनाः अजयत् सा॒कम् इन्द्रः ।।
   श॒तं सेना अजयत् सा॒कम् इन्द्रः ।।


Verse: 2 
Halfverse: a    सं॒क्रन्द॑नेनानिमि॒षेण॑ जि॒ष्णुना॑ युत्का॒रेण॑ दुश्च्यव॒नेन॑ धृ॒ष्णुना॑ ।
   सं॒क्रन्द॑नेनानिमि॒षेण॑ जि॒ष्णुना
   सं॒क्रन्द॑नेन अनिमि॒षेण जि॒ष्णुना
   सं॒क्रन्द॑नेनानिमि॒षेण जि॒ष्णुना

Halfverse: b    युत्का॒रेण॑ दुश्च्यव॒नेन॑ धृ॒ष्णुना॑ ।
   यु॑त्का॒रेण दुश्च्यव॒नेन धृ॒ष्णुना ।
   यु॑त्का॒रेण दुश्च्यव॒नेन धृ॒ष्णुना ।

Halfverse: c    तदिन्द्रे॑ण जयत॒ तत्स॑हध्वं॒ युधो॑ नर॒ इषु॑हस्तेन॒ वृष्णा॑ ।।
   तदिन्द्रे॑ण जयत॒ तत्स॑हध्वं
   तत् इन्द्रे॑ण जयत तत् सहध्वम्
   तद् इन्द्रे॑ण जयत तत् सहध्वं

Halfverse: d    युधो॑ नर॒ इषु॑हस्तेन॒ वृष्णा॑ ।।
   युधः नरः इषु॑हस्तेन वृष्णा ।।
   युधो नर इषु॑हस्तेन वृष्णा ।।


Verse: 3 
Halfverse: a    स इषु॑हस्तैः॒ स नि॑ष॒ङ्गिभि॑र्व॒शी संस्र॑ष्टा॒ स युध॒ इन्द्रो॑ ग॒णेन॑ ।
   स इषु॑हस्तैः॒ स नि॑ष॒ङ्गिभि॑र्व॒शी
   सः ।!। इषु॑हस्तैः स नि॑ष॒ङ्गिभिः व॒शी
   स इषु॑हस्तैः स नि॑ष॒ङ्गिभि॑र् व॒शी

Halfverse: b    संस्र॑ष्टा॒ स युध॒ इन्द्रो॑ ग॒णेन॑ ।
   संस्र॑ष्टा स युधः इन्द्रः ग॒णेन ।
   संस्र॑ष्टा स युध इन्द्रो ग॒णेन ।

Halfverse: c    सं॑सृष्ट॒जित्सो॑म॒पा बा॑हुश॒र्ध्यु॒ग्रध॑न्वा॒ प्रति॑हिताभि॒रस्ता॑ ।।
   सं॑सृष्ट॒जित्सो॑म॒पा बा॑हुशर्ध्य्
   संसृष्ट॒जित् सोम॒पाः बा॑हुश॒र्धी
   सं॑सृष्ट॒जित् सोम॒पा बा॑हुश॒र्धी

Halfverse: d    उ॒ग्रध॑न्वा॒ प्रति॑हिताभि॒रस्ता॑ ।।
   उ॒ग्रध॑न्वा प्रति॑हिताभिः अस्ता ।।
   उ॒ग्रध॑न्वा प्रति॑हिताभिर् अस्ता ।।


Verse: 4 
Halfverse: a    बृह॑स्पते॒ परि॑ दीया॒ रथे॑न रक्षो॒हामित्राँ॑ अप॒बाध॑मानः ।
   बृह॑स्पते॒ परि॑ दीया॒ रथे॑न
   बृह॑स्पते परि दीय+ रथे॑न
   बृह॑स्पते परि दीया रथे॑न

Halfverse: b    रक्षो॒हामित्राँ॑ अप॒बाध॑मानः ।
   र॑क्षो॒हा अ॒मित्रा॑न् अप॒बाध॑मानः ।
   र॑क्षो॒हामित्राँ अप॒बाध॑मानः ।

Halfverse: c    प्र॑भ॒ञ्जन्सेनाः॑ प्रमृ॒णो यु॒धा जय॑न्न॒स्माक॑मेध्यवि॒ता रथा॑नाम् ।।
   प्र॑भ॒ञ्जन्सेनाः॑ प्रमृ॒णो यु॒धा जय॑न्न्
   प्रभ॒ञ्जन् सेनाः प्रमृ॒णः यु॒धा जय॑न्
   प्रभ॒ञ्जन् सेनाः प्रमृ॒णो यु॒धा जय॑न्न्

Halfverse: d    अ॒स्माक॑मेध्यवि॒ता रथा॑नाम् ।।
   अ॒स्माक॑म् एधि अवि॒ता रथा॑नाम् ।।
   अ॒स्माक॑म् एधि अवि॒ता रथा॑नाम् ।।


Verse: 5 
Halfverse: a    ब॑लविज्ञा॒य स्थवि॑रः॒ प्रवी॑रः॒ सह॑स्वान्वा॒जी सह॑मान उ॒ग्रः ।
   ब॑लविज्ञा॒य स्थवि॑रः॒ प्रवी॑रः
   बलविज्ञा॒यः स्थवि॑रः प्रवी॑रः
   बलविज्ञा॒य स्थवि॑रः प्रवी॑रः

Halfverse: b    सह॑स्वान्वा॒जी सह॑मान उ॒ग्रः ।
   सह॑स्वान् वा॒जी सह॑मानः उ॒ग्रः ।
   सह॑स्वान् वा॒जी सह॑मान उ॒ग्रः ।

Halfverse: c    अ॒भिवी॑रो अ॒भिस॑त्वा सहो॒जा जैत्र॑मिन्द्र॒ रथ॒मा ति॑ष्ठ गो॒वित् ।।
   अ॒भिवी॑रो अ॒भिस॑त्वा सहो॒जा
   अ॒भिवी॑रः अ॒भिस॑त्वा सहो॒जाः
   अ॒भिवी॑रो अ॒भिस॑त्वा सहो॒जा

Halfverse: d    जैत्र॑मिन्द्र॒ रथ॒मा ति॑ष्ठ गो॒वित् ।।
   जैत्र॑म् इन्द्र रथ॑म् आ ति॑ष्ठ गो॒वित् ।।
   जैत्र॑म् इन्द्र रथ॑म् आ ति॑ष्ठ गो॒वित् ।।


Verse: 6 
Halfverse: a    गो॑त्र॒भिदं॑ गो॒विदं॒ वज्र॑बाहुं॒ जय॑न्त॒मज्म॑ प्रमृ॒णन्त॒मोज॑सा ।
   गो॑त्र॒भिदं॑ गो॒विदं॒ वज्र॑बाहुं
   गोत्र॒भिद॑म् गो॒विद॑म् वज्र॑बाहुम्
   गोत्र॒भिदं गो॒विदं वज्र॑बाहुं

Halfverse: b    जय॑न्त॒मज्म॑ प्रमृ॒णन्त॒मोज॑सा ।
   जय॑न्तम् अज्म प्रमृ॒णन्त॑म् ओज॑सा ।
   जय॑न्तम् अज्म प्रमृ॒णन्त॑म् ओज॑सा ।

Halfverse: c    इ॒मं स॑जाता॒ अनु॑ वीरयध्व॒मिन्द्रं॑ सखायो॒ अनु॒ सं र॑भध्वम् ।।
   इ॒मं स॑जाता॒ अनु॑ वीरयध्वम्
   इ॒मम् सजाताः अनु वीरयध्वम्
   इ॒मं स॑जाता अनु वीरयध्वम्

Halfverse: d    इन्द्रं॑ सखायो॒ अनु॒ सं र॑भध्वम् ।।
   इन्द्र॑म् सखायः अनु सम् रभध्वम् ।।
   इन्द्रं सखायो अनु सं र॑भध्वम् ।।


Verse: 7 
Halfverse: a    अ॒भि गो॒त्राणि॒ सह॑सा॒ गाह॑मानो ऽद॒यो वी॒रः श॒तम॑न्यु॒रिन्द्रः॑ ।
   अ॒भि गो॒त्राणि॒ सह॑सा॒ गाह॑मानो
   अ॒भि गो॒त्राणि सह॑सा गाह॑मानः
   अ॒भि गो॒त्राणि सह॑सा गाह॑मानो

Halfverse: b    ऽद॒यो वी॒रः श॒तम॑न्यु॒रिन्द्रः॑ ।
   अ॑द॒यः वी॒रः श॒तम॑न्युः इन्द्रः ।
   अ॑द॒यो वी॒रः श॒तम॑न्युर् इन्द्रः ।

Halfverse: c    दु॑श्च्यव॒नः पृ॑तना॒षाळ॑यु॒ध्यो॒ ऽस्माकं॒ सेना॑ अवतु॒ प्र यु॒त्सु ।।
   दु॑श्च्यव॒नः पृ॑तना॒षाळ॑यु॒ध्यो
   दुश्च्यव॒नः पृ॑तना॒षाट् अयु॒ध्यः
   दु॑श्च्यव॒नः पृ॑तना॒षाळ् अयु॒ध्यो

Halfverse: d    ऽस्माकं॒ सेना॑ अवतु॒ प्र यु॒त्सु ।।
   अ॒स्माक॑म् सेनाः अवतु प्र यु॒त्सु ।।
   अ॒स्माकं सेना अवतु प्र यु॒त्सु ।।


Verse: 8 
Halfverse: a    इन्द्र॑ आसां ने॒ता बृह॒स्पति॒र्दक्षि॑णा य॒ज्ञः पु॒र ए॑तु॒ सोमः॑ ।
   इन्द्र॑ आसां ने॒ता बृह॒स्पति॑र्
   इन्द्रः आसाम् ने॒ता बृह॒स्पतिः
   इन्द्र आसां नयि॒ता बृह॒स्पति॑र्

Halfverse: b    दक्षि॑णा य॒ज्ञः पु॒र ए॑तु॒ सोमः॑ ।
   दक्षि॑णा य॒ज्ञः पु॒रः ए॑तु सोमः ।
   दक्षि॑णा य॒ज्ञः पु॒र ए॑तु सोमः ।

Halfverse: c    दे॑वसे॒नाना॑मभिभञ्जती॒नां जय॑न्तीनाम्म॒रुतो॑ य॒न्त्वग्र॑म् ।।
   दे॑वसे॒नाना॑मभिभञ्जती॒नां
   दे॑वसे॒नाना॑म् अभिभञ्जती॒नाम्
   देवसे॒नाना॑म् अभिभञ्जती॒नां

Halfverse: d    जय॑न्तीनाम्म॒रुतो॑ य॒न्त्वग्र॑म् ।।
   जय॑न्तीनाम् म॒रुतः यन्तु अग्र॑म् ।।
   जय॑न्तीनाम् म॒रुतो यन्तु अग्र॑म् ।।


Verse: 9 
Halfverse: a    इन्द्र॑स्य॒ वृष्णो॒ वरु॑णस्य॒ राज्ञ॑ आदि॒त्याना॑म्म॒रुतां॒ शर्ध॑ उ॒ग्रम् ।
   इन्द्र॑स्य॒ वृष्णो॒ वरु॑णस्य॒ राज्ञ
   इन्द्र॑स्य वृष्णः वरु॑णस्य राज्ञः
   इन्द्र॑स्य वृष्णो वरु॑णस्य राज्ञ

Halfverse: b    आदि॒त्याना॑म्म॒रुतां॒ शर्ध॑ उ॒ग्रम् ।
   आ॑दि॒त्याना॑म् म॒रुता॑म् शर्धः उ॒ग्रम् ।
   आ॑दि॒त्याना॑म् म॒रुतां शर्ध उ॒ग्रम् ।

Halfverse: c    म॒हाम॑नसाम्भुवनच्य॒वानां॒ घोषो॑ दे॒वानां॒ जय॑ता॒मुद॑स्थात् ।।
   म॒हाम॑नसाम्भुवनच्य॒वानां
   म॒हाम॑नसाम् भुवनच्य॒वाना॑म्
   म॒हाम॑नसाम् भुवनच्य॒वानां

Halfverse: d    घोषो॑ दे॒वानां॒ जय॑ता॒मुद॑स्थात् ।।
   घोषः दे॒वाना॑म् जय॑ताम् उत् अस्थात् ।।
   घोषो दे॒वानां जय॑ताम् उद् अस्थात् ।।


Verse: 10 
Halfverse: a    उद्ध॑र्षय मघव॒न्नायु॑धा॒न्युत्सत्व॑नाम्माम॒काना॒म्मनां॑सि ।
   उद्ध॑र्षय मघव॒न्नायु॑धान्य्
   उत् हर्षय मघवन् आयु॑धानि
   उद् धर्षय मघवन्न् आयु॑धानि

Halfverse: b    उत्सत्व॑नाम्माम॒काना॒म्मनां॑सि ।
   उत् सत्व॑नाम् माम॒काना॑म् मनां॑सि ।
   उत् सत्व॑नाम् माम॒काना॑म् मनां॑सि ।

Halfverse: c    उद्वृ॑त्रहन्वा॒जिनां॒ वाजि॑ना॒न्युद्रथा॑नां॒ जय॑तां यन्तु॒ घोषाः॑ ।।
   उद्वृ॑त्रहन्वा॒जिनां॒ वाजि॑नान्य्
   उत् वृत्रहन् वा॒जिना॑म् वाजि॑नानि
   उद् वृत्रहन् वा॒जिनां वाजि॑नानि

Halfverse: d    उद्रथा॑नां॒ जय॑तां यन्तु॒ घोषाः॑ ।।
   उत् रथा॑नाम् जय॑ताम् यन्तु घोषाः ।।
   उद् रथा॑नां जय॑तां यन्तु घोषाः ।।


Verse: 11 
Halfverse: a    अ॒स्माक॒मिन्द्रः॒ समृ॑तेषु ध्व॒जेष्व॒स्माकं॒ या इष॑व॒स्ता ज॑यन्तु ।
   अ॒स्माक॒मिन्द्रः॒ समृ॑तेषु ध्व॒जेष्व्
   अ॒स्माक॑म् इन्द्रः समृ॑तेषु ध्व॒जेषु
   अ॒स्माक॑म् इन्द्रः समृ॑तेषु ध्व॒जेषु

Halfverse: b    अ॒स्माकं॒ या इष॑व॒स्ता ज॑यन्तु ।
   अ॒स्माक॑म् याः इष॑वः ताः ज॑यन्तु ।
   अ॒स्माकं या इष॑वस् ता ज॑यन्तु ।

Halfverse: c    अ॒स्माकं॑ वी॒रा उत्त॑रे भवन्त्व॒स्माँ उ॑ देवा अवता॒ हवे॑षु ।।
   अ॒स्माकं॑ वी॒रा उत्त॑रे भवन्त्व्
   अ॒स्माक॑म् वी॒राः उत्त॑रे भवन्तु
   अ॒स्माकं वी॒रा उत्त॑रे भवन्तु

Halfverse: d    अ॒स्माँ उ॑ देवा अवता॒ हवे॑षु ।।
   अ॒स्मान् उ देवाः अवत+ हवे॑षु ।।
   अ॒स्माँ उ देवा अवता हवे॑षु ।।


Verse: 12 
Halfverse: a    अ॒मीषां॑ चि॒त्तम्प्र॑तिलो॒भय॑न्ती गृहा॒णाङ्गा॑न्यप्वे॒ परे॑हि ।
   अ॒मीषां॑ चि॒त्तम्प्र॑तिलो॒भय॑न्ती
   अ॒मीषा॑म् चि॒त्तम् प्रतिलो॒भय॑न्ती
   अ॒मीषां चि॒त्तम् प्रतिलो॒भय॑न्ती

Halfverse: b    गृहा॒णाङ्गा॑न्यप्वे॒ परे॑हि ।
   गृ॑हा॒ण अङ्गा॑नि अप्वे परा इहि ।
   गृ॑हा॒णाङ्गा॑नु अपुवे परे॑हि ।

Halfverse: c    अ॒भि प्रेहि॒ निर्द॑ह हृ॒त्सु शोकै॑र॒न्धेना॒मित्रा॒स्तम॑सा सचन्ताम् ।।
   अ॒भि प्रेहि॒ निर्द॑ह हृ॒त्सु शोकै॑र्
   अ॒भि प्र इ॑हि निः द॑ह हृ॒त्सु शोकैः
   अ॒भि प्रेहि निर् दह हृ॒त्सु शोकै॑र्

Halfverse: d    अ॒न्धेना॒मित्रा॒स्तम॑सा सचन्ताम् ।।
   अ॒न्धेन अ॒मित्राः तम॑सा सचन्ताम् ।।
   अ॒न्धेना॒मित्रा॑स् तम॑सा सचन्ताम् ।।


Verse: 13 
Halfverse: a    प्रेता॒ जय॑ता नर॒ इन्द्रो॑ वः॒ शर्म॑ यछतु ।
   प्रेता॒ जय॑ता नर
   प्र इ॑त+ जय॑त+ नरः
   प्र इ॑ता जय॑ता नर

Halfverse: b    इन्द्रो॑ वः॒ शर्म॑ यछतु ।
   इन्द्रः वः शर्म यछतु ।
   इन्द्रो वः शर्म यछतु ।

Halfverse: c    उ॒ग्रा वः॑ सन्तु बा॒हवो॑ ऽनाधृ॒ष्या यथास॑थ ।।
   उ॒ग्रा वः॑ सन्तु बा॒हवो
   उ॒ग्राः वः सन्तु बा॒हवः
   उ॒ग्रा वः सन्तु बा॒हवो

Halfverse: d    ऽनाधृ॒ष्या यथास॑थ ।।
   अ॑नाधृ॒ष्याः यथा अस॑थ ।।
   अ॑नाधृ॒ष्या यथास॑थ ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.