TITUS
Rg-Veda: Rg-Veda-Samhita
Part No. 939
Previous part

Hymn: 102_(928) 
Verse: 1 
Halfverse: a    प्र ते॒ रथ॑म्मिथू॒कृत॒मिन्द्रो॑ ऽवतु धृष्णु॒या ।
   प्र ते॒ रथ॑म्मिथू॒कृत॑म्
   प्र ते रथ॑म् मिथू॒कृत॑म्
   प्र ते रथ॑म् मिथू॒कृत॑म्

Halfverse: b    इन्द्रो॑ ऽवतु धृष्णु॒या ।
   इन्द्रः अवतु धृष्णु॒या ।
   इन्द्रो अवतु धृष्णु॒या ।

Halfverse: c    अ॒स्मिन्ना॒जौ पु॑रुहूत श्र॒वाय्ये॑ धनभ॒क्षेषु॑ नो ऽव ।।
   अ॒स्मिन्ना॒जौ पु॑रुहूत श्र॒वाय्ये
   अ॒स्मिन् आ॒जौ पु॑रुहूत श्र॒वाय्ये
   अ॒स्मिन्न् आ॒जौ पु॑रुहूत श्र॒वायि॑ये

Halfverse: d    धनभ॒क्षेषु॑ नो ऽव ।।
   ध॑नभ॒क्षेषु नः अव ।।
   ध॑नभ॒क्षेषु नो अव ।।


Verse: 2 
Halfverse: a    उत्स्म॒ वातो॑ वहति॒ वासो॑ ऽस्या॒ अधि॑रथं॒ यदज॑यत्स॒हस्र॑म् ।
   उत्स्म॒ वातो॑ वहति॒ वासो॑ ऽस्या
   उत् स्म वातः वहति वासः अस्याः
   उत् स्म वातो वहति वासो अस्या

Halfverse: b    अधि॑रथं॒ यदज॑यत्स॒हस्र॑म् ।
   अधि॑रथम् यत् अज॑यत् स॒हस्र॑म् ।
   अधि॑रथं यद् अज॑यत् स॒हस्र॑म् ।

Halfverse: c    र॒थीर॑भून्मुद्ग॒लानी॒ गवि॑ष्टौ॒ भरे॑ कृ॒तं व्य॑चेदिन्द्रसे॒ना ।।
   र॒थीर॑भून्मुद्ग॒लानी॒ गवि॑ष्टौ
   र॒थीः अ॑भूत् मुद्ग॒लानी गवि॑ष्टौ
   र॒थीर् अभून् मुद्ग॒लानी गवि॑ष्टौ

Halfverse: d    भरे॑ कृ॒तं व्य॑चेदिन्द्रसे॒ना ।।
   भरे कृ॒तम् वि अ॑चेत् इन्द्रसे॒ना ।।
   भरे कृ॒तं वि अ॑चेद् इन्द्रसे॒ना ।।


Verse: 3 
Halfverse: a    अ॒न्तर्य॑छ॒ जिघां॑सतो॒ वज्र॑मिन्द्राभि॒दास॑तः ।
   अ॒न्तर्य॑छ॒ जिघां॑सतो
   अ॒न्तर् यछ जिघां॑सतः
   अ॒न्तर् यछ जिघां॑सतो

Halfverse: b    वज्र॑मिन्द्राभि॒दास॑तः ।!। ।
   वज्र॑म् इन्द्र अभि॒दास॑तः ।
   वज्र॑म् इन्द्राभि॒दास॑तः ।

Halfverse: c    दास॑स्य वा मघव॒न्नार्य॑स्य वा सनु॒तर्य॑वया व॒धम् ।।
   दास॑स्य वा मघव॒न्नार्य॑स्य वा
   दास॑स्य वा मघवन् आर्य॑स्य वा
   दास॑स्य वा मघवन्न् आरि॑यस्य वा

Halfverse: d    सनु॒तर्य॑वया व॒धम् ।।
   स॑नु॒तर् यवय+ व॒धम् ।।
   स॑नु॒तर् यवया व॒धम् ।।


Verse: 4 
Halfverse: a    उ॒द्नो ह्र॒दम॑पिब॒ज्जर्हृ॑षाणः॒ कूटं॑ स्म तृं॒हद॒भिमा॑तिमेति ।
   उ॒द्नो ह्र॒दम॑पिब॒ज्जर्हृ॑षाणः
   उ॒द्नः ह्र॒दम् अपिबत् जर्हृ॑षाणः
   उ॒द्नो ह्र॒दम् अपिबज् जर्हृ॑षाणः

Halfverse: b    कूटं॑ स्म तृं॒हद॒भिमा॑तिमेति ।
   कूट॑म् स्म तृं॒हत् अ॒भिमा॑तिम् एति ।
   कूटं स्म तृं॒हद् अ॒भिमा॑तिम् एति ।

Halfverse: c    प्र मु॒ष्कभा॑रः॒ श्रव॑ इ॒छमा॑नो ऽजि॒रम्बा॒हू अ॑भर॒त्सिषा॑सन् ।।
   प्र मु॒ष्कभा॑रः॒ श्रव॑ इ॒छमा॑नो
   प्र मु॒ष्कभा॑रः श्रवः इ॒छमा॑नः
   प्र मु॒ष्कभा॑रः श्रव इ॒छमा॑नो

Halfverse: d    ऽजि॒रम्बा॒हू अ॑भर॒त्सिषा॑सन् ।।
   अ॑जि॒रम् बा॒हू अ॑भरत् सिषा॑सन् ।।
   अ॑जि॒रम् बा॒हू अ॑भरत् सिषा॑सन् ।।


Verse: 5 
Halfverse: a    न्य॑क्रन्दयन्नुप॒यन्त॑ एन॒ममे॑हयन्वृष॒भम्मध्य॑ आ॒जेः ।
   न्य॑क्रन्दयन्नुप॒यन्त॑ एनम्
   नि अ॑क्रन्दयन् उप॒यन्तः एनम्
   नि अ॑क्रन्दयन्न् उप॒यन्त एनम्

Halfverse: b    अमे॑हयन्वृष॒भम्मध्य॑ आ॒जेः ।
   अमे॑हयन् वृष॒भम् मध्ये आ॒जेः ।
   अमे॑हयन् वृष॒भम् मध्य आ॒जेः ।

Halfverse: c    तेन॒ सूभ॑र्वं श॒तव॑त्स॒हस्रं॒ गवा॒म्मुद्ग॑लः प्र॒धने॑ जिगाय ।।
   तेन॒ सूभ॑र्वं श॒तव॑त्स॒हस्रं
   तेन सूभ॑र्वम् श॒तव॑त् स॒हस्र॑म्
   तेन सूभ॑र्वं श॒तव॑त् स॒हस्रं

Halfverse: d    गवा॒म्मुद्ग॑लः प्र॒धने॑ जिगाय ।।
   गवा॑म् मुद्ग॑लः प्र॒धने जिगाय ।।
   गवा॑म् मुद्ग॑लः प्र॒धने जिगाय ।।


Verse: 6 
Halfverse: a    क॒कर्द॑वे वृष॒भो यु॒क्त आ॑सी॒दवा॑वची॒त्सार॑थिरस्य के॒शी ।
   क॒कर्द॑वे वृष॒भो यु॒क्त आ॑सीद्
   क॒कर्द॑वे वृष॒भः यु॒क्तः आ॑सीत्
   क॒कर्द॑वे वृष॒भो यु॒क्त आ॑सीद्

Halfverse: b    अवा॑वची॒त्सार॑थिरस्य के॒शी ।
   अवा॑वचीत् सार॑थिः अस्य के॒शी ।
   अवा॑वचीत् सार॑थिर् अस्य के॒शी ।

Halfverse: c    दुधे॑र्यु॒क्तस्य॒ द्रव॑तः स॒हान॑स ऋ॒छन्ति॑ ष्मा नि॒ष्पदो॑ मुद्ग॒लानी॑म् ।।
   दुधे॑र्यु॒क्तस्य॒ द्रव॑तः स॒हान॑स
   दुधेः यु॒क्तस्य द्रव॑तः स॒ह अन॑सा
   दुधे॑र् यु॒क्तस्य द्रव॑तः स॒हान॑स

Halfverse: d    ऋ॒छन्ति॑ ष्मा नि॒ष्पदो॑ मुद्ग॒लानी॑म् ।।
   ऋ॒छन्ति स्म+ नि॒ष्पदः मुद्ग॒लानी॑म् ।।
   ऋ॒छन्ति ष्मा नि॒ष्पदो मुद्ग॒लानी॑म् ।।


Verse: 7 
Halfverse: a    उ॒त प्र॒धिमुद॑हन्नस्य वि॒द्वानुपा॑युन॒ग्वंस॑ग॒मत्र॒ शिक्ष॑न् ।
   उ॒त प्र॒धिमुद॑हन्नस्य वि॒द्वान्
   उ॒त प्र॒धिम् उत् अहन् अस्य वि॒द्वान्
   उ॒त प्र॒धिम् उद् अहन्न् अस्य वि॒द्वान्

Halfverse: b    उपा॑युन॒ग्वंस॑ग॒मत्र॒ शिक्ष॑न् ।
   उप अयुनक् वंस॑गम् अत्र शिक्ष॑न् ।
   उपा॑युनग् वंस॑गम् अत्र शिक्ष॑न् ।

Halfverse: c    इन्द्र॒ उदा॑व॒त्पति॒मघ्न्या॑ना॒मरं॑हत॒ पद्या॑भिः क॒कुद्मा॑न् ।।
   इन्द्र॒ उदा॑व॒त्पति॒मघ्न्या॑नाम्
   इन्द्रः उत् आवत् पति॑म् अघ्न्या॑नाम्
   इन्द्र उद् आवत् पति॑म् अघ्नि॑यानाम्

Halfverse: d    अरं॑हत॒ पद्या॑भिः क॒कुद्मा॑न् ।।
   अरं॑हत पद्या॑भिः क॒कुद्मा॑न् ।।
   अरं॑हत पदि॑याभिः क॒कुद्मा॑न् ।।


Verse: 8 
Halfverse: a    शु॒नम॑ष्ट्रा॒व्य॑चरत्कप॒र्दी व॑र॒त्रायां॒ दार्वा॒नह्य॑मानः ।
   शु॒नम॑ष्ट्राव्य् ।!। अ॑चरत्कप॒र्दी
   शु॒नम् अष्ट्रा॒वी अ॑चरत् कप॒र्दी
   शु॒नम् अष्ट्रा॒वि अ॑चरत् कप॒र्दी

Halfverse: b    व॑र॒त्रायां॒ दार्वा॒नह्य॑मानः ।
   व॑र॒त्राया॑म् दारु आ॒नह्य॑मानः ।
   व॑र॒त्रायां दारु आ॒नह्य॑मानः ।

Halfverse: c    नृ॒म्णानि॑ कृ॒ण्वन्ब॒हवे॒ जना॑य॒ गाः प॑स्पशा॒नस्तवि॑षीरधत्त ।।
   नृ॒म्णानि॑ कृ॒ण्वन्ब॒हवे॒ जना॑य
   नृ॒म्णानि कृ॒ण्वन् ब॒हवे जना॑य
   नृ॒म्णानि कृ॒ण्वन् ब॒हवे जना॑य

Halfverse: d    गाः प॑स्पशा॒नस्तवि॑षीरधत्त ।।
   गाः प॑स्पशा॒नः तवि॑षीः अधत्त ।।
   गाः प॑स्पशा॒नस् तवि॑षीर् अधत्त ।।


Verse: 9 
Halfverse: a    इ॒मं तम्प॑श्य वृष॒भस्य॒ युञ्जं॒ काष्ठा॑या॒ मध्ये॑ द्रुघ॒णं शया॑नम् ।
   इ॒मं तम्प॑श्य वृष॒भस्य॒ युञ्जं
   इ॒मम् तम् पश्य वृष॒भस्य युञ्ज॑म्
   इ॒मं तम् पश्य वृष॒भस्य युञ्जं

Halfverse: b    काष्ठा॑या॒ मध्ये॑ द्रुघ॒णं शया॑नम् ।
   काष्ठा॑याः मध्ये द्रुघ॒णम् शया॑नम् ।
   काष्ठा॑या मध्ये द्रुघ॒णं शया॑नम् ।

Halfverse: c    येन॑ जि॒गाय॑ श॒तव॑त्स॒हस्रं॒ गवा॒म्मुद्ग॑लः पृत॒नाज्ये॑षु ।।
   येन॑ जि॒गाय॑ श॒तव॑त्स॒हस्रं
   येन जि॒गाय श॒तव॑त् स॒हस्र॑म्
   येन जि॒गाय श॒तव॑त् स॒हस्रं

Halfverse: d    गवा॒म्मुद्ग॑लः पृत॒नाज्ये॑षु ।।
   गवा॑म् मुद्ग॑लः पृत॒नाज्ये॑षु ।।
   गवा॑म् मुद्ग॑लः पृत॒नाजि॑येषु ।।


Verse: 10 
Halfverse: a    आ॒रे अ॒घा को न्वि॒त्था द॑दर्श॒ यं यु॒ञ्जन्ति॒ तम्वा स्था॑पयन्ति ।
   आ॒रे अ॒घा को न्वि॒त्था द॑दर्श
   आ॒रे अ॒घा कः नु इ॒त्था द॑दर्श
   आ॒रे अ॒घा को नु इ॒त्था द॑दर्श

Halfverse: b    यं यु॒ञ्जन्ति॒ तम्वा स्था॑पयन्ति ।
   यम् यु॒ञ्जन्ति तम् उ आ स्था॑पयन्ति ।
   यं यु॒ञ्जन्ति तम् उ आ स्था॑पयन्ति ।

Halfverse: c    नास्मै॒ तृणं॒ नोद॒कमा भ॑र॒न्त्युत्त॑रो धु॒रो व॑हति प्र॒देदि॑शत् ।।
   नास्मै॒ तृणं॒ नोद॒कमा भ॑रन्त्य्
   न अ॑स्मै तृण॑म् न उ॑द॒कम् आ भ॑रन्ति
   नास्मै तृणं नोद॒कम् आ भ॑रन्ति

Halfverse: d    उत्त॑रो धु॒रो व॑हति प्र॒देदि॑शत् ।।
   उत्त॑रः धु॒रः व॑हति प्र॒देदि॑शत् ।।
   उत्त॑रो धु॒रो व॑हति प्र॒देदि॑शत् ।।


Verse: 11 
Halfverse: a    प॑रिवृ॒क्तेव॑ पति॒विद्य॑मान॒ट्पीप्या॑ना॒ कूच॑क्रेणेव सि॒ञ्चन् ।
   प॑रिवृ॒क्तेव॑ पति॒विद्य॑मानट्
   परिवृ॒क्ता इ॑व पति॒विद्य॑म् आनट्
   परिवृ॒क्तेव पति॒विद्य॑म् आनट्

Halfverse: b    पीप्या॑ना॒ कूच॑क्रेणेव सि॒ञ्चन् ।
   पीप्या॑ना कूच॑क्रेण इव सि॒ञ्चन् ।
   पीपि॑याना कूच॑क्रेणेव सि॒ञ्चन् ।

Halfverse: c    ए॑षै॒ष्या॑ चिद्र॒थ्या॑ जयेम सुम॒ङ्गलं॒ सिन॑वदस्तु सा॒तम् ।।
   ए॑षै॒ष्या॑ चिद्र॒थ्या॑ जयेम
   एषै॒ष्या चित् र॒थ्या जयेम
   एषै॒षिया चिद् र॒थिया जयेम

Halfverse: d    सुम॒ङ्गलं॒ सिन॑वदस्तु सा॒तम् ।।
   सु॑म॒ङ्गल॑म् सिन॑वत् अस्तु सा॒तम् ।।
   सु॑म॒ङ्गलं सिन॑वद् अस्तु सा॒तम् ।।


Verse: 12 
Halfverse: a    त्वं विश्व॑स्य॒ जग॑त॒श्चक्षु॑रिन्द्रासि॒ चक्षु॑षः ।
   त्वं विश्व॑स्य॒ जग॑तश्
   त्वम् विश्व॑स्य जग॑तः
   तु॒वं विश्व॑स्य जग॑तश्

Halfverse: b    चक्षु॑रिन्द्रासि॒ चक्षु॑षः ।
   चक्षुः इन्द्र असि चक्षु॑षः ।
   चक्षु॑र् इन्द्रासि चक्षु॑षः ।

Halfverse: c    वृषा॒ यदा॒जिं वृष॑णा॒ सिषा॑ससि चो॒दय॒न्वध्रि॑णा यु॒जा ।।
   वृषा॒ यदा॒जिं वृष॑णा॒ सिषा॑ससि
   वृषा यत् आ॒जिम् वृष॑णा सिषा॑ससि
   वृषा यद् आ॒जिं वृष॑णा सिषा॑ससि

Halfverse: d    चो॒दय॒न्वध्रि॑णा यु॒जा ।।
   चो॒दय॑न् वध्रि॑णा यु॒जा ।।
   चो॒दय॑न् वध्रि॑णा यु॒जा ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.