TITUS
Svan Prose Texts II (Lower Bal)
Part No. 45
Previous part

Text: 45 
Page of edition: 83 
Line of edition: 24 
XLV. მეთხვა̈რ


Line of edition: 25       ირჰალდა, ეჯჟი მეთხვა̈რ ქა ათაგან ქორხენქა ლა̈თხვართე.
Line of edition: 26    მეთხვა̈რ მჷჟემ ლიწდალდ ლა̈თხვარ კოჯა̈რისგა ა̈რი. ასჷნჯა̈ვი
Line of edition: 27    ნა̈თხვრას, მარე დემგვაშ ხოსგდი ღვაშრე ნაზვა̈რჷნქა. მეთხვა̈რს
Line of edition: 28    დეშომა ხაშყიდ ქორთე ჰა̈რიდ ლიტეხ ი ამღა ლა̈დიი დემ იკვშე
Line of edition: 29    გვის.

Line of edition: 30       მიჟ ჟი ა̈ნჴამშან, ეჩქას მეთხვა̈რ ჩუ ადყურდა ბაჩა̈რ ჩუქვაჲსგა.
Line of edition: 31    ეჯჟი მასა̈რდ ნა̈ზელალ მა̈ფშა̈რ ლა̈სვ ი შიშდ ჩუ ა̈თუჟდა. მეთხვა̈რს
Line of edition: 32    ამჟი ჰისტამ ლა̈ჰისტამ:

Line of edition: 33       ეშხუ მეჩი მარემ ჟა̈გ ი ცხვი ლახვემ. ალ მარემ ხა̈ქვე, ერე
Line of edition: 34    "ალი ესერ მიჩეშდოღვ ხოჩქვარან ი ჟი ესეროღვ ანჷგან". ამჟი
Line of edition: 35    მეთხვა̈რს ჟი ლა̈ხეცხჷნ.

Page of edition: 84 
Line of edition: 1    ჟ'ანჷგან მეთხვა̈რ, ჟ'ა̈ნკიდ მიჩა ბარგა̈რ, სგა ლა̈იბ თვეფ ი
Line of edition: 2    შიჲსგა მჷჯროშ ლა̈ჲბინე კოჯქა ლიზი. ამჟი ჟიქამშხენჩუ ბაჩა̈რ
Line of edition: 3    ანშყადხ. ლახად თე მეთხვა̈რს ჟიბოვ ი მიჩა ჟიქან სემი ღვაშ
Line of edition: 4    ესღრიხ. მეთხვა̈რდ ჟი ოსესვ მჷჯრა კოჯჟი ი მჷჯრაქა თვეფ ქა
Line of edition: 5    ლახდე. ათღანდა თვეფს ჰერ ი ეშხუ ღვაშ ჩუ ადგა̈რ, მარე მეთხვა̈რ
Line of edition: 6    ამის გარ მადე ესსკაბ ი მერმე ღვაშ ადა̈იდ ჩვადგა̈რ ღვაშა̈რს
Line of edition: 7    ხოშა კჷლთხი კოჯქა ხადხ ლაშყად ი მეთხვა̈რს მასა̈რდ ჩუ
Line of edition: 8    ხად ლეტეხ. ჩვა̈თჭამ მეთხვა̈რ ღვაშრე ნა̈შყედს ი იმგვალეგ ჩუბ
Line of edition: 9    ტვიბისგა ჲორი ღვაშ უშხვარ ხეყვრეხ. ღვაშა̈რს მჷჭა̈რ ქა
Line of edition: 10    ლუყჩურე ხარხ კოჯქა ნა̈შყედ, თვეფიშ ნა̈ყირქა ზისხ ჟი ხაღფახ.

Line of edition: 11       მეთხვა̈რდ ეშხუ ღვაშ ქადტუმურე ი ლეღვა̈რ მიჩა გა̈ნხენჩუ
Line of edition: 12    მუსჟი ესდე. მერმე ღვაშა̈შ ლიტმურე ქა ულია ხად, ეჯჟი მარემ
Line of edition: 13    ჰერ ლახსჷმდა. ჲერდვალემ ხა̈ქვე: "ხოჩ' ესეროღვ ლადეღ ხარ
Line of edition: 14    მეთხვა̈რს!" მეთხვა̈რდ ეჯის "ხოჩა ლადეღ" ლახტიხ ი ჩუ ა̈ხშჷმ.

Line of edition: 15       მეთხვარას ამჯი წეს ხუღვეხ, ერე ლახა ნა̈თხვრას ადგა̈რნეხ ი
Line of edition: 16    ეჩქას ჲერვალე ესჰელიხ, ეჯისი მინეშშალ წილს ხაჰვდიხ მინე
Line of edition: 17    ნადგარ ნა̈თხვრახენქა. ამღა ალ მეთხვა̈რდ ალ მარა ეშხუ ღვაშ ჩუ
Line of edition: 18    ოთმეზრე ი ქა ლახვემ, მარე თხვიმ ჲექდაშმია ჯინემ ადჲე, ეჯღა
Line of edition: 19    ერე თხვიმ ხეკვეს მჷდგა̈რია̈შ ლესეს, -- ამჟი წეს ხუღვეხ
Line of edition: 20    მეთხვარას. ათხე მეთხვა̈რდ ლემესგ ადაშვე ი ღვაშრე ყვიჟე ჟი ანტყაბე
Line of edition: 21    ი ჟი ლახმეზრე ლითხვარა̈შ ღერმათ. ეჩქანღვე მეთხვა̈რ ი მახე
Line of edition: 22    ნა̈ჴედ მარე, ღვაშა̈შ ლაღვშვ ლჷქა̈ფ, ქორთე ანჴადხ.


(ვარლამ საღლიანი. ლეზგარა. თ. შარაშენიძე. VIII.1949)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.