TITUS
Svan Prose Texts II (Lower Bal)
Part No. 46
Previous part

Text: 46 
Page of edition: 84 
Line of edition: 24 
XLVI. იმჟი ოდაგრ ჰერსკნა̈რ


Line of edition: 25       აშხვ ნებოზს მა̈გ ჩუ ლუყვნე ლა̈სვ, ეჩქას მი ი ვა̈სილ ოთაგანდ
Line of edition: 26    ლა̈თხვართე. ეჯ ლეთ ლეჰჷრმაშ ჩიქდ ხვარდად თეკრიშ კარა̈ვისგა.
Line of edition: 27    ალ კარა̈ვ ლჷგ ლახვს. ალი ლი გვიანდ მუჟხურხენ ი კარა̈ვისგა
Line of edition: 28    მასა̈რდ მჷცხი ნად. ლეჰჷრმაშთე ოთაგანდ შუკვს. ლა̈ლდესგალა̈რთეჟი
Line of edition: 29    ოჩადდ ი ჩუ ედრჷჰან. ამხენჟი მუს ხა̈ზ ჟიბოვ. ამეჩუ მახად
Line of edition: 30    ოხჷლდესგანდ. ოსღვრიდ ჩიშდითეჟი ი მასა̈რდ გარჯ ნად მუსჟი
Line of edition: 31    ლიზი. მჷცხი მასა̈რდ ლა̈სვ, მიჟ დემეგ ხა̈წდა ჩიქი. ჴარჴთეჟი
Line of edition: 32    ჟ'ოჩადდ ჩიშდია̈შ, ეჩქას ეხწად მიჟ. მარე ეჯღა̈ი მჷცხი ნად, ტა̈ნ
Line of edition: 33    აშ ნირკუნა.

Line of edition: 34       ალ ჴარჴხენჩუ ლა̈წვე ლი ლა̈თხვარა̈რთე. ამეჩუ ჩოსგურდად
Line of edition: 35    მი იმიშგუ აფხნეგ ი ხვასჷნჯა̈ვიდად ქვინჷმგენოლს. დემგვაშ
Line of edition: 36    ხვეწადდ ჟვანა̈რჷნქა, მარე ჟვანა̈რს დემეგ ოთტჷრხნედ ეჯღ', ერე
Line of edition: 37    ნა̈თხროლე ქა ლიბა̈ჟინედ ნაყვლენივ. ჩუ ოჩადდ
Page of edition: 85 Line of edition: 1    მჷჰჷლდა̈რთე. ამეჩუ ოხშვემდ ი ხვასჷნჯა̈ვიდ ნა̈თხროლს ჩითე, მარე
Line of edition: 2    დემგვაშიდ ხვეწადდ.

Line of edition: 3       ათხხე ნებოზ ლი სერ. ქორთე დეშ ხვა̈ჰიესგდ, ხეკვეს ჩუ ოსედ
Line of edition: 4    ბა̈ზი ქა̈მ. მუს ხასდა ჟიბოვ ლახვა̈რს ი მასა̈რდ მჷცხი ლა̈სვ, ამღა
Line of edition: 5    სურუ გარჯ ლა̈სვ ქა̈მ ლილეთე.

Line of edition: 6       ქორთე ლახ დეშ ხვა̈ჰიასგვდ, ეჩქას სუფრე კარა̈ვთე ოთაგანდ.
Line of edition: 7    სუფრე კარა̈ვ ლჷგ ლჷთლერ ი ხოშილ ფედიას ნად ნა̈. ნიშგე კარა̈ვ
Line of edition: 8    სურუ ჯოდიას ლი ი დეშ ხვა̈ჰიასგვდ ლიბვრალდ, ოთაგანდ სუფრე
Line of edition: 9    კარა̈ვთე.

Line of edition: 10       ოსღვრიდ ყორვა̈რიშ ძირ ლექვა, მარე გიმ კვარემ ლი, ჩაფლა̈რ
Line of edition: 11    ჩუ ენჴაჩ ი ჭჷშხა̈რს მასა̈რდ მჷცხი ნად. სგოჩადდ კარა̈ვთეჲსგა ი
Line of edition: 12    ჩუ ედბურან. ამეჩუ მი ლემესგ ოხვა̈შვ. მი ადა̈იდ მუღვანდ ეშხუ
Line of edition: 13    ბაკლაშკა ლჷჴმა̈შ ა̈რა̈ყ. მიშგუ აფხნეგდ ჟი ლახმეზრე ზედა̈შ ი
Line of edition: 14    ეჩქანღვე ჩუ ლოხვიშდ. მი მოლიდ გარ ლოხუშ, ხოშა წილ (\ ნა̈თი)
Line of edition: 15    აფხნეგს ლოხვაშ. მოლა ხა̈ნუნღვე ჩუ ოთყურდად ი ჩოთუჟდად.
Line of edition: 16    მიშგუ აფხნეგს დემეგ ეხეჲცხჷნ ჰამდ, მაშდმა̈რ ლა̈სვ ეჯღა. მჷცხის
Line of edition: 17    დემეგ იბჟენივ. მი, ლემესგ ჩუ დეგნივ, ეჩქას შიშდ ჟი მეჲცხჷნივ
Line of edition: 18    მჷცხიშვ. ჟი ხვიგნალდა̈ს ი ლემასგვ ჟი ხვაშვა̈ს. ეჩქანღვე ჩუიდ
Line of edition: 19    ხვიყვნალდა̈ს.

Line of edition: 20       ლეჰჷრმაშთე, ხოჩამდ რჷჰი დეს ლა̈სვ, ეჯჟი ჟი ოხვაგანდ ჩიშდითეჟი
Line of edition: 21    ი ჯოდიათე კოჯრე ძირქა (\ კოჯა̈შ ძირისგა) ხვეწდ მეშხე
Line of edition: 22    წერტილს. მი ი მიშგუ აფხნეგ (\ ნეპოლ -- ამჟი ხვატულიდ აფხნეგ
Line of edition: 23    მეთხვა̈რ მარა) ჩოსგურდად ი ხვასჷნჯა̈ვივდ ალის. ამნემ ლიქთუნალ
Line of edition: 24    ლეჲბინე (\ ედბინე). ათხე სერ ჩოთჯჷრვედ, ერე ალ მეშხე
Line of edition: 25    წერტილ ქვინჷმგენე ლჷმა̈რ.

Line of edition: 26       მიშგუ აფხნეგ მა̈ქვე: -- ემოშ ესერ მა̈მედა ნიშგვე ნაზიმჟი
Line of edition: 27    ზაგა̈რთეჟი ჩქა̈რდ ლიზი, ეჩქას იშგენ ბარგა̈რ მიჩოღ ლოხო.

Line of edition: 28       ქა ლოხო ბარგა̈რ მიჩ ი ჟ'ოთაგნ მი. ეჯ ღა̈რჟი მუს ხასდა მასა̈რდ,
Line of edition: 29    ქუთულთეჟი მაგან. გიმ ჩუქაქა კვარემ ხონხახ. სურუ ლემყა̈ლ
Line of edition: 30    ლა̈სვ მარემ ლიდვა̈ში. ჟიქაქა ოხცად ჰერსკნს. ნა̈ ეშხუ გარ
Line of edition: 31    ნიხალდ, ესნა̈რი არა ლჷმა̈რელიხ. მა̈ნკუ ეშხუს გარ ხვეწდ მი ი ქა
Line of edition: 32    ოთტჷრხნ ეჯის. ჰერსკნ კოჯხენქა ქანშყად ი ჩუ ედკჷრანკან დერათეჩუ.
Line of edition: 33    თვეფიშ ჰერ ქაჲ ხასჷმდხ მერმოლუს ი ლა̈ქინოშ ეშ-ი-აშ
Line of edition: 34    ათშჷდხ ეჩხავ-ამხავ. ჯოდიათე ოთტჷრხნ ეჯჲა̈რს, მარე დეშ ხვაჴდ.

Line of edition: 35       ჲორი ქვინჷმგენე მერმე ნეპოლს ლახასდხ, მარე ეჯის ხოლა
Line of edition: 36    ტარხან ხუღვანდ ი მამაგვეშმოშ ხა̈ყერ. ათხე ალ ნეპოლს დემეგ
Line of edition: 37    ხოხა, მი ოდაგრ ეჯი (\ ეშხუ ქა მეკარდ ეჯი) ი, ტა̈ნ ჩუ ლჷდგა̈რ
Line of edition: 38    ხად, ეჯჟი ანღჷრდა მიშგვათეჟი. ჟ'ანჴად მიშგვათეჟი ი ქა ლჷკა̈რქს


Page of edition: 86 
Line of edition: 1    ქაჲ ხეწად ი მა̈ხჲადშვ ჩიქი მი მეყჰალდა, ღვე ჰერსკნს. ალის ძიკვ
Line of edition: 2    ქა ათფიშგ ი ჟი ადმეზრე.

Line of edition: 3       ამჟი ლოხვსგი ჟიბოვ ი ნიშგე ჟიქაქა ჲორი ჰერსკნა̈რ არდახ.
Line of edition: 4    მი ტარხან ჟი ოხვიკდ ი ქა ოთქინ დერაქა. მი ქაჲ მეწადხ ჰერსკნა̈რ
Line of edition: 5    ი ლიქინე ლეჲბინეხ. ლა̈ქინათეჲსგა ოთტჷრხნ ეშხუს ი ქა
Line of edition: 6    ახსიპჷდ. ჩვენკჷრანკან ნიშგეშთეჩუ. ალის ქაჲ ხეწად მიშგუ აფხნეგ
Line of edition: 7    ი ლა̈იდ სურუ ათხიდჷნ. სგანჩუშ მადა ქა ოხკიდდ ექჷრდას
Line of edition: 8    (\ ექჷდას\ ექდას) ი ჟი ოხსყედ ქაფა̈რდ. ხოხრა ქაფ აფხნეგდ
Line of edition: 9    ენიცვ ი ხოშა -- მი. ამჟი ოხვაგანდ ჟი ჩიშდითეში, მარე სურუ
Line of edition: 10    მუს ხასდა ი გარჯ ნად ლიბა̈ჴი. ალ ა̈დგილს ხაჟხა ყორვა̈რ.
Line of edition: 11    ჟ'ონჴვადდ ჩიშდია̈შ ჴარჴთეჟი ი ჩუ ედბურან. ამხენჩუ ფელტჩუ ქაფა̈რ
Line of edition: 12    ლა̈თრიშვ ონჴვიდდ ლა̈ლდესგალა̈რთეჩუ.

Line of edition: 13       ო, ტკიცდ (\ ტკისდ), ეშხუ გვეშ ჩვემეშდჷნ. ღვეშგიმ ოდაგრ,
Line of edition: 14    ეჯი ლა̈სვ ფჷთ (ნეჴშდ). მიჩა დის ქა უყვილა ხად. ჩუ ანშყად,
Line of edition: 15    ეჩქას მიჩა დიდ ლიყჷლელ ლოხბინე ი ქა ლიყველ ხამჭინდა, მარე ჯოდიათე მი
Line of edition: 16    ოთტჷრხნ ეჯის ი ეჩქანღვე აჩად ლატვთე.

Line of edition: 17       ლა̈ლდესგალა̈რხენჩუ ჩუ ონჴვადდ ლა̈შერაშ კარა̈ვთეჩუ ი ჩუ
Line of edition: 18    ოთჷლმესგედ. ეჩქანღვე ყვიჟე-პერშვდა ჟი ოხტყაბედ ი ჩუ
Line of edition: 19    ოთდირანდ. მოლა ხა̈ნუნღვე ჩუ ონჴვადდ ქორთე ლეთშვ.
Line of edition: 20    ამჟი ხა̈მთქვახ მეთხვარას.


(ბიძინა საღლიანი. ლეზგარა. მაია მაჭავარიანი. VIII.1948)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.