TITUS
Svan Prose Texts II (Lower Bal)
Part No. 42
Previous part

Text: 42 
Page of edition: 81 
Line of edition: 1 
გადმოცემანი, ამბები
Line of edition: 2 
XL. რიჩგანა̈შ ხვეტა


Line of edition: 3       რიჩგან ლჷმზიგხ ეშხუ ლაღა̈ლ ლეზგარას, მერმე ლაღა̈ლ მაგარდელ
Line of edition: 4    ი მესმა ლაღა̈ლ ჩაგაშ მურყვამჟი. ამა̈რე ნა̈მხვიტჟი მურყვმა̈რე
Line of edition: 5    ი ქორრე ნა̈მხვირ მა̈გ ამჟიიდ სიდ.

Line of edition: 6       მერმე ნა̈თი ი ლაღალა̈რ ბეჩვის ი ფა̈რს ლჷმზიგხ. ალა̈რ გარ
Line of edition: 7    ლჷმა̈რდხ ცხჷმრიშ ფუსდდ. ეცერ-ცხჷმრიშ ლიფუსდს ლჷმღეშგა̈ლხ
Line of edition: 8    რიჩგანა̈რ ი და̈ჩქელანა̈რ.

Line of edition: 9       რიჩგანრე ხოშამ ხა̈შხენა გუგჩა̈, მიჩა ხახვ -- იმახათ. გუგჩა̈
Line of edition: 10    ხოშა ტა̈ნიშ მარე ლჷმა̈რ, მარე უთვრა მარე [ლჷმა̈რ]. თხუმემ
Line of edition: 11    ლა̈ლჩად ზარბუზან ხა̈გნენახ. ზარბუზან ალი ოხჴიდახ უსურმა̈ნხენ.
Line of edition: 12    ალი ეჯგვა̈რ მეცხუალ ლჷმა̈რ, ერე ჯოდიაშ მურყვმა̈რე
Line of edition: 13    სა̈ნცხვრა̈რისგა ისგა ლუმკვარნელიხ.

Line of edition: 14       სამ მურყვამჟი თა̈ვითალჟი თვით სუმინერვეშდ მარე ხა̈რდენახ
Line of edition: 15    მჷლჩად ი ყარვილდ.

Line of edition: 16       ეშხუ ნა̈მჩედვ მჷლზეგრა̈ლი მარე ლახმუშგვრენა. ალის ობა̈შ
Line of edition: 17    ხა̈ნ ახად ამეჩუ. გვი ჩვესდისგვნე ი ეზარ ხოსგდივხ, მარე
Line of edition: 18    ლიზელალ ხემთქუნ უშდილ ოთარიშთე.

Line of edition: 19       ოთარს ჩოთქჷრთამა: -- ალ ზარბუზანს ესერ ჩვ ემოშ ხოდვა̈ში.

Line of edition: 20       ალის ალა̈რ დემეგ ხაჰვდიხ ჩიქი გუ. იშგენ მამაგვეშმოშ
Line of edition: 21    ანსახთე მჷლზეგრა̈ლიდ ი აშხვ ლადეღ ხა̈ქვე გუგჩა̈ს ი მიჩა ხახვ
Line of edition: 22    იმახათს: -- იმნა̈რ ხამნედ ალიმა̈გ მარა ამზუ ქონებას? ქა̈მრაშვდ
Line of edition: 23    ალ ზარბუზან, აშხვ მარემ ლეჴმა̈რიდ იმარგჷდეს, ეჯჟი, ი მი გარ ჟი
Line of edition: 24    ხვილჩე ისგუ ლა̈ზგას.

Line of edition: 25       გუგჩა̈დ ი იმახათდ ედხიდეხ: -- ალი ესერ მასა̈რდ ტკიც ხოქვა.

Line of edition: 26       ამის მჷშკდა̈რ არდახ ბეჩვის, ბეჩვია̈შ რიჩგანა̈რმჷყ. ალა̈რ ენჴერნე
Line of edition: 27    ლექვა გუგჩა̈დ, ჟი ათგენე ზარბუზანიშ ლარშვის. ამიშ ლარშვის
Line of edition: 28    ეშხუ ნაზგი ახადხ ვოშთხვ მარა. ამჟი აშხვ ლადეღ ადკუჰურეხ,
Line of edition: 29    მარე ათხე მურყვამსი დემეგ ოხრაკ. მერმა̈შჟი ლა̈იდ ხოშაიდ ა̈თქად.

Line of edition: 30       მჷლზეგრა̈ლი ალ დრევჟი ქოხჩად ამხენქა ი ოთარშერ
Line of edition: 31    ოთარიშთეჲსგა ისგადჲე ალ ამბა̈ვ: -- აშ-აშ, ალ ზარბუზან ესერ
Line of edition: 32    ჩოთდავშუნა მიჩ ი ლა̈დი მიჩ' ესერ გამარჯვ ლი.

Page of edition: 82 
Line of edition: 1    ამჟი ოთარდ ლეჲჴერნე აფხნეგა̈რ ლაჭკვითე. ბოგს ჩჲა̈გ ყარვილ
Line of edition: 2    ხაგან. ლაშდაბ ლეთშვ გარ ხად.

Line of edition: 3       ამჟი გუგჩა̈ს ოთჴად ბა̈ჟინ: -- ერვალ' ესერ ლჷცქა ჭოკა̈რს
Line of edition: 4    ხა̈დისგ.

Line of edition: 5       იმახათს ხა̈ქვე გუგჩა̈დ: -- ალი ოთარიშ ნა̈ჴერჴვ ესერ ლი. მინე
Line of edition: 6    გვეშ ხოლამდ ესერ ლი, ზარბუზანი ჩვ ესერ ლუდვაშე ხარხ. ჯი
Line of edition: 7    ესერ მჷმა̈რჯვია̈შ ლაკარქათე ღჷრი, ოდო მინ გარ ესერ
Line of edition: 8    დემგვაშმოშ იჩოხ.

Line of edition: 9       ლეჟ' ათაგან კა̈რქა ლატლითე. ალი მუჟღურ ხოლა კვარმარობ
Line of edition: 10    ქა ლი. კა̈რს ლოხქაფ ჟი კვარემჟი ი ნენსგა რიენისგა ხევახ.

Line of edition: 11       ამ დრევქა ოთარ ი მიჩ' აფხნეგა̈რ ჭოკა̈რს ხაშდბახ. ამჟი
Line of edition: 12    ოთარიშ აფხნეგა̈რ ხეწადხ: მოლე მეშხე ახღვანდა რიენს. ოთარიშ
Line of edition: 13    აფხნეგა̈რს ათხადხ: -- მა̈ლდია̈ნ ხოშა ღერმეთ, ალი გუგჩ' ოღ ჩემინ!

Line of edition: 14       ამჟი ლექვ' ანჴიდ გაზიმდ. ოსჭჷრჭკინე ოთარდ: -- ქოღ ენტიხხ!

Line of edition: 15       ალი ქენტიხხ ი ადსჷნჯავეხ ი ნა̈მდვილდ გუგჩა̈ ლი. ოთარდ
Line of edition: 16    რა̈ქვე: -- ლა̈დი გვიშგე გვეშ ხოჩამდ ლი.

Line of edition: 17       ოთარიშ ჯა̈რ ისგა ხევახ "უროშ". იმახათ ქოთჩადხ, ლეჟ' აჩად
Line of edition: 18    ლატლითე. მერმოლუ მა̈გ ჟ'ანხვიტხ ი რიჩგანრე ლა̈ზგოლს ჟი
Line of edition: 19    ესფუსდანხ ოთარშერა̈რ.


(კოსტა ქალდანი. ტვიბერი. მ.ქალდანი. 27.VIII. 1951)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.