TITUS
Svan Prose Texts II (Lower Bal)
Part No. 41
Previous part

Text: 41 
Page of edition: 71 
Line of edition: 1 
ზნე-ჩვეულება
Line of edition: 2 
XLI. ღჷნა̈რ


Line of edition: 3       1 ეშხვამ. კანდა სგვებნე ლადეღ ეშხვამ ლი. ეშხვამ ლადეღ
Line of edition: 4    ლირჰალდ ეშხუ ქორა̈შ ბეფშვ ლემასგვ აშვე კვა̈ჭილრე
Line of edition: 5    (ლემზჷრრე) ლანყად. ალ ლემსგემ მუშვე ბეფშვს ლემსგემ ნაშვერ
Line of edition: 6    ეშხუ ლემზჷრს ქამასა̈რს ხონყეხ. ლემზჷრს ქორა̈შ ხოშა
Line of edition: 7    ღვაჟმარე ჟი ხა̈მზჷრი და̈ლ ეშხვმა̈შს. ალი ლირჰალდ ხეკვეს ქანნაყახ,
Line of edition: 8    ა ლემზჷრა̈რ, ი ლა̈მზჷრჟი გარ აკრეხ ლაჴვრას ი ალის ტაბლა̈შდ
Line of edition: 9    იზბიხ.

Line of edition: 10       ეშხვამ ლადეღ ლეკლა̈ნდ გვეჭს ა̈ჲსენი მა̈გ. მუჭდურას ხოკედხ
Line of edition: 11    გვეჭს, კაპრა̈ სგა ხაყა, ეჯჟი. სგაშირს ზისხოროლდ ა̈სყიხ. ა გვეჭს
Line of edition: 12    ჩვაშდბჷნეხ, ეჩქანღო ეშხუ ღვაჟმარე ღჷრი ი გვიზს ჴიდე. ალი
Line of edition: 13    შდჷხჷნდიშ კვაფხ ლი. ნებოზს ჩუ ლუბრაუნღვე (ლუბირუნღვე)
Line of edition: 14    ლეკლა̈ნდიშ მუჭდურას ი სგაშირს ჟ'აჯა̈ბხ. ლემზჷრა̈რს ანყეხ.
Line of edition: 15    ბოფშა̈რ ვეთხმალე ლალდია̈რ ლექვა ვეთხმალე ნამსვედ ნამშიშ
Line of edition: 16    ითქა̈რს იქუნცა̈ლიხ ლა̈ში ითქა̈რთეჲსგა ლეშდად, -- ხოჩ' ესერ ზა̈
Line of edition: 17    ხოხალ ეჯის.

Line of edition: 18       ეჯ ლეთ ალი უწონა̈შ ლი -- ტაბლა̈შ. მერმა და̈ს ხოშიდ ამიშ
Line of edition: 19    ლიზვებ. დისხა̈ლ ეშხუ ლემზჷრს ანყე. ალი ჭურუა̈შ ლი. ა
Line of edition: 20    ლემზჷრს კჷრკა̈ნდ ჩჲა̈გ ჰედურდ ლემზჷრს ხა̈გნე შივშ ი ნენსგაჩუ
Line of edition: 21    ჴურუს ხა̈ყენეხ ჟი ლა̈წბინად. ლემზჷრი{შ} ლა̈გნაჟი დირიშ მჷნყე
Line of edition: 22    დისხა̈ლ, ესვა̈ჲშდ ხაკა̈ფ ნა̈თი-ნა̈თსა̈ვა̈შდ ტაბლა̈შიშ ლიმნე, ეჯის
Line of edition: 23    ჟახოშ ყჷლე ქა: -- ამის ტაბლა̈შ შემინდუ̈ლოღ ხარ, ამი{შ}
Line of edition: 24    ლიზვებ, -- ი ჟახალჷნდირ ქა რექინე. ეჩქანღვე მერმე ერვა ა̈ხკა̈ფი, ეჯის
Line of edition: 25    ადა̈იდ ამჟი [რექინე] ი კჷრკა̈ნდ ქა ხა̈ცხპე. ამის კათეჟი ხა̈დისგ ი
Line of edition: 26    ქა ა̈ჭი. ამცახა̈ნ ანყეხ კანდა ლადღიშ ლა̈შჲა̈შიდ ხოშა ლემზჷრს --
Line of edition: 27    ქუთს, ეჯ ლეთიშ დირობჟიშ ნეცინ ლემზჷრა̈რს ადა̈იდ.

Line of edition: 28       ლეკლა̈ნდიშ თხვიმს ჟჲაჯა̈ბხ ი ლა̈შჲა̈ში ლემზჷრცახა̈ნ კვიდოლთეჲსგა
Line of edition: 29    ა̈დისგხ ი გვის ადა̈იდ ამთეჲსგა ა̈დისგხ ი წერქვა̈შ ლიბს,
Line of edition: 30    ეშხუ ნა̈ყელ თა̈შს, ეშხუ ლჷგრეს, ეშხუ ბოთლიკ თვირს ი ალის
Line of edition: 31    ჩი კვიდოლთეჲსგა ა̈დისგხ. ეჩქას ტაბლა̈შიშ ლემზჷრს ჟი ხა̈მზჷრი
Line of edition: 32    დისხა̈ლ ზურალ გარ: -- მიშგვა როქ ნარშონს ამეჲსგა, ა ლემზჷრისგაშ,
Line of edition: 33    და̈ლ ეშხვმა̈შ, შემინდუ̈ლ ხა̈ყრ ტაბლა̈შიშ ლიზვებ ჩი.

Page of edition: 72 
Line of edition: 1    ლჷბლადს ხა̈ბემ სგა ი ჩუ ხორკინე კორთა̈მჷყ. ბა̈ზი ჩუ
Line of edition: 2    იდარალხ ი ჩუ იყვნალხ.

Line of edition: 3       2. კანდა. მერმე ლადეღ ჰამს ლირჰალთე ქორა̈შ ღვაჟმარე ი ეშხუ
Line of edition: 4    ბეფშვ დოსდ ჟი იგნალხ. ეშხუ ჴა̈ნს გვალხენქა ქა ჴიდეხ ი ა
Line of edition: 5    კვიდოლს, ა ლა̈შჲა̈ში ჟი ლჷმარე ხარხ, ჟი იცვემ. ჴა̈ნს ლებს ხა̈ბემ ი
Line of edition: 6    ა ბეფშვ ღვეშგიმ ხაჭიმ ჴა̈ნს მჷძხა̈ლიდ ი ჰა̈რი გა̈ბს ჟი იკედ. ქორთე
Line of edition: 7    ანტიხიხ, ეჩქას გა̈ბ გვეში სგიმს, მადეჲ ლიცს სგა იჟღვა̈ნიხ.

Line of edition: 8       ქა ღჷრიხ ლჷცთექა (აქ: სგიმთექა). ამეჩუ ჴა̈ნს სგიმს ხათრეხ.

Line of edition: 9       ათხე მერმე სოფლა̈რი ამთე ანღრიხ სგიმთეჲსგა. ამეჩუ
Line of edition: 10    ხომზჷრიხ მა̈გ უშხვარ: -- ხოჩა ზა̈მიშ ესერ ლიცადალოღ ახჴედა! --
Line of edition: 11    ა̈რყი{შ} ლათრა კათხ შიჲსგა ხუღვახ ჩი, თვირშვ გვეში ხეკვეს
Line of edition: 12    ლესეს, ი ქა ხაჰვდიხ უშხვარ ი შის იფშვდეხ ეჩეჩუ ი ხომზჷრიხ
Line of edition: 13    მა̈გ უშხვარ. ესვა̈ჲშ ხეცხენი შიმი ლიფშვდე, ეჯის ქა ხაყლე:

Line of edition: 14       -- ისგუ როქ შიმი ნა̈ფიშვდ მიცხა, -- ი ეჩქას ალ კათხ გვეში
Line of edition: 15    თვირს ქა ხაჰვდი ი ჟი ხომზჷრი:

Line of edition: 16       -- ალი როქ მი უშონად ლაჯომე, ეჯჟი ღერმეთოღ ჯაჰვდი
Line of edition: 17    ტა̈ნიშ ნა̈ჰდურის ი ხოჩა დრევს. ამჟი გვეში ზავ (ზა̈ს) ესეროღ
Line of edition: 18    ლახგენა!

Line of edition: 19       ი ეჩქას ეჯი ქა ხებიშდი ი ჩუ ჷთრე. ამჟი სერ ამეჩუ მა̈გ
Line of edition: 20    წერქოლს ჩვაცადუნეხ. თვირს ეჩეჩუ ჷთრეხ, ეჩქანღვე მოლა ქორთე
Line of edition: 21    სგა იტხეხ ლა̈შჲა̈შიდ.

Line of edition: 22       ათხ' ალარე სგიმხენისგა სგა ლიტხალდ ქორშა̈რ ჟი იგნალხ
Line of edition: 23    მა̈გ ი ყორა̈რს ქა ხოდისგხ. ალა̈ სგიმხენისგა სგა ტეხნიხ, ა
Line of edition: 24    ღვაჟმარე ი ბეფშვ, ეჩქას ყორს ხეგნიხ. ათხ' ალი კჷლთხიდ ჰერს
Line of edition: 25    იკედ, ღვაჟმარე, ყორჟი:

Line of edition: 26       -- ყოოორ ემკარედ, სგა̈ ბედნია̈რ!

Line of edition: 27       ქორხენქა ჰერს იკედ ადა̈იდ ეშხუ, ერვა დო ირი, ზურალ ირი
Line of edition: 28    ა ღვაჟმარე:

Line of edition: 29       -- მა̈ა̈ა̈ აჯღვა, სი ბედნია̈რ?

Line of edition: 30       -- ამსვალდა̈{შ} ნა̈ფშირი, ნა̈ლდერყი ი ნა̈შდვები. ყოორ ემკა̈რ,
Line of edition: 31    სი ბედნია̈რ! -- მერმად ადა̈იდ.

Line of edition: 32       -- მა̈ა̈ა̈ აჯღვა, სი ბედნია̈რ?

Line of edition: 33       -- ქვინჷმგენემ ნა̈ფშირი ი ნა̈ლდერყი ი ყოოორ ემკარედ, სგა̈
Line of edition: 34    ბედნია̈რ! -- მესმად ადა̈იდ.

Line of edition: 35       -- მა̈ა̈ა̈ აჯღვა სი ბედია̈რ? -- მესმად ადა̈იდ ქორხენქა.

Line of edition: 36       -- ხოჩა ზავემ (ზა̈ვი) მაჴად, გა̈ბ გვეში ლჷჯე მუღვა. ყოოორ
Line of edition: 37    ემკარედ, სგა̈ ბედნია̈რ!

Page of edition: 73 
Line of edition: 1    ეჩქას ხექინეხ ქორხენქა:

Line of edition: 2       -- სგგააანსგვეჯ, სი ბედნია̈რ! -- ი ხოკრეხ ყორა̈რს ჩუ ეჩქას.
Line of edition: 3    ეჯა̈რ სგა ჴედნიხ [ლა̈მზჷრშვ]:

Line of edition: 4       -- ზა̈მი მჷცა̈დი ყერ, ხოჩა ზა̈ ენცად ნა̈ქორს ხოშამ ი ხოხრამ,
Line of edition: 5    ზურალს ი ღვაჟმარა, ქვინჷმგენე ა̈ნფიშირ, ხოჩა ზავშვ ი მაჴადშვ
Line of edition: 6    ანხია̈დ! -- ი ლერსგვანთე ისპუნი კა̈ცხა̈შმჷყ ი კვიდოლს ჩუ ჷგემ.

Line of edition: 7       ქოსა̈შ მერდე ჩუ ისგვრიხ მა̈გ ი ათხ' ამხენჟიჟი იკედ ა
Line of edition: 8    ლა̈შჲა̈ში ლემზჷრს, ლეკლა̈ნ თხვიმს. თხვიმს ლემზჷრჟი ხა̈დისგ.
Line of edition: 9    კათხ გვეში თვირის ამეჟი ჷგემ ადა̈იდ, ა ლემზჷრჟი, ი მიჩეშუნღვე
Line of edition: 10    ხოშა ერვა̈ ირი, ზურალ ი ღვაჟმარე მა̈ნკუ ეშთექა ღჷრი ქა ი კაჩ
Line of edition: 11    ხეგნი ი ჩვა̈შჲა̈ში. ეჯის [ლეშჲა̈შის] შია̈რ უშხვარჟი ლჷდე ქა ხოხლა
Line of edition: 12    ი ხომზჷრი ათხე [მჷშჲა̈ში]:

Line of edition: 13       -- ხოჩა ზა̈ ესეროღ ესცადენა, ტა̈ნიშ ნა̈ჰდური ესეროღ
Line of edition: 14    ლაჰოდენა!

Line of edition: 15       ზურალ ახა ლი ლეშჲა̈ში, ეჩქას ეჯის ხაყლე, ერე:

Line of edition: 16       -- თეთნაჲსგა გარ ესეროღ ა̈რი ლა̈მთილა̈შ ი ლამვარა̈შ ნენსგა.
Line of edition: 17    ნა̈თსა̈ვშვ ი ჩივშ ხოჩა გვი ესეროღ ხოზ. ხოჩა ლჷხჲადე ზა̈
Line of edition: 18    ესეროღ ესცადენა. ალ' ესერ ჯინემ უშონად ლახომეს, ეჯჟი
Line of edition: 19    ესეროღ ლოჰოდა ღერმათ მიჩეშდ ტა̈ნიშ ნა̈ჰდური ი შვიდბა ი
Line of edition: 20    ხოჩერება.

Line of edition: 21       ი ა̈ლის ა̈სპუნე ამჟი ლერსგვანთე, ლემზჷრს. შიდქს ხა̈გმუნავნე
Line of edition: 22    ლეშჲა̈შის ლემზჷრჟი ი გვეჭიშ შდჷმჟი ი კათხს ა̈რა̈ყს ქა ხაჰვდი
Line of edition: 23    ეჩქანღვე. ახა ხექინე: -- ჩუ როქოღ ლაიშ ალი, -- მჷთრე ირი ა
Line of edition: 24    მადე ა̈რყიშ, ვა̈რიშ ლიქვისგ მადე შიდ. ამჟი ქა ხეჭმენი სერ, ჩუ
Line of edition: 25    სგურხ, ალა̈რას ი ჩვა̈შჲა̈ში ჩი.

Line of edition: 26       ა მჷშჲა̈შის ხაშხა ქორა̈შ მჷჭშხი. ამ ლადეღ ლეღვჟმარე ერვა
Line of edition: 27    ჩუ ირდი, ხოხრა ი ხოშა, ქორისგა, წერქვა̈რს ჩაფლა̈რხენქა
Line of edition: 28    ქა̈მშხენჩუ იწბინეხ, -- ხოჩა ზა̈ როქ ხოხალ, -- ეჯღა. ეჩქანღვე ჩუ
Line of edition: 29    ისგვრიხ მა̈გ ი ლემზჷრა̈რს ანყე დისხა̈ლ ი ინცელალხ. ხომზჷრიხ
Line of edition: 30    მა̈გ უშხვარ.

Line of edition: 31       ნა̈შჲაშ ლემზჷრს ი გვეჭს თხვიმს ადა̈იდ კვიდოლთეჲსგა სგაიდ
Line of edition: 32    ტიხე, ჟიქაქა გვიზს ხა̈ქვემ.

Line of edition: 33       ჩუ ინცელალხ, ეჩქანღვე ქამე მჷჭშხი ქა ხოთრახ ი ეჩხავ ქა
Line of edition: 34    ღჷრი ეშხუ ი ხოკფხჷნე ყორისგა მინე მჷჭშხის. ლიტულის ეჯ
Line of edition: 35    ლადეღ დემეგ ხაყა. ხოჩა ნაჭჷშხ ახა ხერი, ეჩქას დემის აცა̈დიხ ქამე
Line of edition: 36    მჷჭშხის ი სგა ინჴრინეხ ყორთეჲსგა. ყორმჷყ ჩვა̈გნეხ ეჯის. ა მჷჭშხიდ
Line of edition: 37    წერქვა ხეკვეს ა̈ნჟოღვნას მიჩა ქორხენქა. ყორთექა კვიდოლს ქა

Page of edition: 74 
Line of edition: 1    ხოჴდეხ ი ჟი ხა̈ცვემხ ბეფშვს (ქამე მჷჭშხის) ყორჟი ი სგა ინჴრინეხ
Line of edition: 2    ქორთე ი ეჯიი იმზჷრი, ქამე მჷჭშხი:

Line of edition: 3       -- ხოჩა ჭიშხ ესეროღ ოხჴიდა, ქვინჷმგენე ი მარე მა̈გ ესეროღ
Line of edition: 4    ჩოლფიშრელი.

Line of edition: 5       კა̈ცხა̈შმჷყ ლერსგვანთე ისპუნი ი ჩუ იგვრანალ ი ეჩეჩუ ყჷლე:
Line of edition: 6    -- ზა̈ა̈ჲ გურან!

Line of edition: 7       ეჩქას სერ ა კვიდოლს ქა ხებიშდიხ ი ჩუ ჷგემხ. ამჟი მერმა
Line of edition: 8    მჷჭშხის ჴიდეხ ადა̈იდ. ღეშგმე მჷჭშხი ხაშხა ეჯის. ეჩქანღვე ჩუ
Line of edition: 9    ისგვრიხ ი ალა̈რს მასა̈რდ აშდმეხ ჩუ, ა მჷჭშხას. მაშდმა̈რ
Line of edition: 10    ხეკვეს აფუშდეხ, ხოშა ირი ა ხოხრა. ეჯ ლადეღ ლჷჴმა̈შ ა̈რა̈ყ გარ
Line of edition: 11    ხუღვა ჩი, -- ეჯღა.

Line of edition: 12       ალა̈რ (მჷჭშხა) ესიზინიხ ქ', ეჩქას ჰა̈რიდ დემის ფიშვდეხ.
Line of edition: 13    ა̈ნთროლჟი (სანაფჟი) თეთნე ვარჩხლიშ აბაზა̈რს ხოსვემხ ი ეჯის
Line of edition: 14    ხაჰვდიხ, ეჯჟი ფიშვდეხ ქა მაშდმა̈რს.

Line of edition: 15       ნებზვა̈შ მეჴრახენ ეშხუ ბეფშვ ა ქორა̈შ, მადეჲ ღვაჟმარე, ქა ღჷრი
Line of edition: 16    ი უცხემ ჴულს იქჩე ი სგა ჴიდე ქორთე. ნებოზს მუბირჟი სოფლიშ
Line of edition: 17    ბოფშა̈რ ი მახეღვაჟა̈რ ინზორალხ ი ხეჭმენიხ ბომბღას. ხეგნიხ
Line of edition: 18    მეზგა ყორს ი ჴულს ქა ხოჴდე ეჯ მეზგე ი ბოფშა̈რს ქა ხაჰვდი.
Line of edition: 19    ეჩქას აშხვ ჟი ხასგვრეხ ეჩეჟი ჩაჟვშალ, ეჩხენ-ამხენ ხებერგიხ ი
Line of edition: 20    ყვერბ კჷრკა̈ნდ ქა ხა̈ჭმინეხ ი იღრალხ: "ბოოომბღა, ბოოომბღა,
Line of edition: 21    გვემიშ ყორჟი ხარგელია, ბოომბღა, ბოოომბღა!" ასხვ ა̈გის
Line of edition: 22    ჩვაკვანეხ ალის ბომბღახენჩუ. ა ჴულა̈რს კერა̈მჷყ ღეშგმე ფოყხენ
Line of edition: 23    კერა̈ ჩუქაჲსგა თხუმა̈რს სგა ხოდისგხ ი ჟიქაქა ხოშა ლემზჷრს ხა̈დისგ
Line of edition: 24    ქორა̈შ ღვაჟმარე. გაჩვ იყდა̈ნი შიჲსგა ლათგჷნად კა̈ცხხენ ი
Line of edition: 25    ხათგჷნე ლემზჷრს ი ყჷლე მა̈ნკუ:

Line of edition: 26       -- ჴანრე ნა̈ფშირი, ალი ჴა̈ნ, ალი ჴა̈ნ... ალი ფირვ, ალი ფირვ,
Line of edition: 27    ალი ფირვ... ალი დაჴჷლ, ალი დაჴჷლ... ალი ღოლა̈ქ,
Line of edition: 28    ალი ღოლა̈ქ...

Line of edition: 29       ღეშგიმპილს ჟ'აკვანე ლემზჷრს ჟიბოვ ი ბომბღაშ მუჩვმ ბოფშა̈რ
Line of edition: 30    იღეშგა̈ლიხ. ეჩქაღვ' ა ბოფშა̈რს მერმა ლემზჷრა̈რს ადა̈იდ ხაჰვდიხ.
Line of edition: 31    ა̈რყიშ მჷთრა ახა ლიხ, ეჩქას ა̈რა̈ყსი ხათრეხ. ა ბოფშა̈რ იღრალხ
Line of edition: 32    ი იშდრალხ.

Line of edition: 33       ამჟი მეზგა ჩუ და̈ს ცვირეხ, ეჯჟი ქა ხეჭმენიხ ი მეზგე მა̈გ
Line of edition: 34    ხოღლიხ ბომბღაშ მეჭმას ი ჟი ხომარეხ ლემზჷრა̈რს ეჯა̈რს.

Line of edition: 35       ალი, კანდა, ქა ლჷზგჷრე სერ.

Line of edition: 36       3. კვიმტა̈რ. კანდა მერმა ლადეღ კვიმტა̈რ ლი ი ესღრი მა̈გ
Line of edition: 37    უშხვართე შიმი ლა̈ფშვდად ი შის ხოფშვდე მა̈გ უშხვარ. იმჟი
Page of edition: 75 Line of edition: 1    ლა̈შჲა̈შიჟი, ა̈რა̈ყს ი დია̈რს ხოჴდეხ, ჩვაშდმეხ ი ეჯჟი ქა ფიშვდეხ. ამჟი
Line of edition: 2    იზელალ მა̈გ უშხვართე ეჯ ლადეღ ი შიმი ჟი უფიშვდად და̈რ
Line of edition: 3    სედნი.

Line of edition: 4       4. ლიფანა̈ლი. ადგომ ხეხელი კანდაუნღვე მევხუშდე ლადეღჟი.
Line of edition: 5    ამ ლადეღ ლჷშრავა და̈რ იზბი. მჷფანე მარე, ხოშა მარე, ალი
Line of edition: 6    მჷტმე ლი ა ლადეღ. ეჯ ლადეღ ნებოზდ ქა და̈რ იმარალ.

Line of edition: 7       ადგომ ლადეღ, მა̈ შედ-მაკვედ ჩუ ლჷგ ქორისგა, ალის ქაშყვდი
Line of edition: 8    ი ქა აფუ̈ნე მა̈გ. ტაბგა̈რს ი სკამა̈რს ჰა̈ზვთექა ჴიდეხ ი ჰა̈ზვისგა
Line of edition: 9    ქაშყვდიხ. ნებოზს მჷჟემ ლიჰვრალჟი დისხა̈ლ ლამარალს ხეგნი ი
Line of edition: 10    ანყე ლჷგიმბა̈შ ლემზჷრა̈რს ი სა̈ვიჭმ ლეყი-ნაყუნ გარ იმა̈რი ადგომ
Line of edition: 11    ლადეღ. ა ლემზჷრა̈რს ხოშა მჷტმე ღვაჟმარე კარვათეჲსგა ა̈დისგ.
Line of edition: 12    კანდა ლადღიშ ნაჭჷშხ წერქვაშ ლიბს ლემზჷრა̈რს ჯიქაქა ხა̈დისგ ი
Line of edition: 13    ქა ღჷრი ლაჴვმითექა. ეჩეჩუ ლაჴვმია̈შ ყორჟი ლასფლავა̈რმჷყ ჟი
Line of edition: 14    ხა̈მზჷრი. წერქვას მოლა ქა ხა̈ბრე ი ლაჴვმია̈შ ყორს სგა ხა̈ჩხინე ი
Line of edition: 15    ხეჴჷრალ ქუნა̈რს, ერე "იშგედღოხ მიჩა ლიწცი ი მა̈ლდიანუ სგოღ
Line of edition: 16    ანსგვეჯდახ ქორთე".

Line of edition: 17       ალი სგა ჴედნი ქორთე ი ლემზჷრა̈რსი სგა იტხე ი ეჩქას მახე
Line of edition: 18    ლუშყვედ ტაბა̈გს კა̈ცხა̈შ ლეჟა ჩუ ჷგემხ ი ლასგვრა ბანდა̈რს სგა
Line of edition: 19    ხა̈გემხ. ათხე ალ მარე ბა̈ჴს სგა ჷგემ ქორთეჲსგა, ეჩქას ყჷლე:
Line of edition: 20    -- მა̈ლდიანუს ხოჩა ჭიშხ ესეროღ ოხჴიდახ! -- ი ქორისგა ერვა ჩვა̈რიხ,
Line of edition: 21    მა̈გ ჟი იგნალხ ეჩქას ი "ქუნა̈ ესეროღ ოლსგვეჯნელიხ" ი ამარეხ
Line of edition: 22    ტაბა̈გს ი თამა̈შდ გარ რაგდი მა̈გ, კჷლთხი ჰერს და̈რ იკედ. ა
Line of edition: 23    ტაბა̈გ ლეჟა ადაწყეხ სა̈ვიჭმ ლეყი-ნაყუნს, ლეტვროლს ატვრეხ ი
Line of edition: 24    დია̈რჟი ჟი ხოსვემხ, ა̈რა̈ყს ჷგემხ ი ა ხოშა ჩუ ხოფანე, რაგდი, ერე:
Line of edition: 25    -- მა̈ლდიანუს ხოჩა ჭიშხ ესეროღ ოხჴიდახ ი ხოჩა გარ ესეროღ
Line of edition: 26    ოთთიალახ, ჯვინელს ი მახა ჩი ხოჩა ლაქუნ ესეროღ
Line of edition: 27    ხარხ! -- ი ა̈რა̈ყს ჟი ხოშუნდები კათხშვ ჩი.

Line of edition: 28       ეჩქანღვე ა ტაბა̈გს ჟი იკედხ ი ჩუ ისგვრიხ მა̈გ. ხოშემიშ
Line of edition: 29    ლასგვრად ჰასკამს ამარეხ ი ჩუ ჷგემხ ბანდა̈რცახა̈ნ.

Line of edition: 30       კანდა ლადღიშ ნა̈ჴიდ ჴულა̈რს ღეშჵგიმხენ კერა̈მჷყ თხუმა̈რს სგა
Line of edition: 31    ხოჩდიხ კერა̈ ჩუქათეჲსგა, ეჩეჟი ა̈დისგხ, ოხორა ბეფშვილდა̈რ ახა
Line of edition: 32    ა̈თდაგრივხ, ეჯარე ლეფანე ხოხორა დირილდა̈რს ი ლეტვრა ატვრეხ
Line of edition: 33    ეჩეჩუ. [ამიშ] მჷფანე ლი ეჯ ქორა̈შ ბეფშვ. ეჩქანღვე ჩუ
Line of edition: 34    ისგვრიხ ქორშა̈რ ი ჩუ იდარალხ.

Line of edition: 35       ნადარალუნღვე ლიყვნალალდ ხოლგენიხ ქუნა̈რს ი იცინგლავალხ.
Line of edition: 36    ლა̈ცინგლავალჟი კანდაშ ნაჭჷშხ გვიზს ლემასგვჟი ხოჩდიხ: -- ნა̈რჰი
Line of edition: 37    ლაქუნ ესეროღ ხარხ მინე ლჷდგარუს!

Line of edition: 38       ეჩქანღვე სერ ჩუ იყვნალხ ბა̈ზი. ალი ადგომ ლი.

Page of edition: 76 
Line of edition: 1    5. განცხდა̈ბ. მერმა ლადეღ განცხდა̈ბ ლი. განცდა̈ბ ლადეღ
Line of edition: 2    ლა̈ჲსას ა̈ჲსენიხ. დაჴჷლ ხოცხახ ლეჲსენიდ. ლაღვშვ ი დია̈რშვ ჩუიდ
Line of edition: 3    ხოფანეხ ადა̈ჲდ. სა̈ერთოდ ლიფანა̈ლიჲსგა ტაბა̈გს ჟი იკედხ
Line of edition: 4    ბანდა̈რხენჟი ი ლჷმარე ხა̈რჯს ჩვა̈დისგხ. ნაფანუნღვე ჟიიდ ხანჴვეხ
Line of edition: 5    ტაბა̈გს ბანდა̈რჟი.

Line of edition: 6       ათხა' ა ლიფანა̈ლის სამტინ ა̈ხჭემნი, ეჩქას სამტინ ნებოზხენ
Line of edition: 7    დოსდ ჩუ ხოფანეხ ი ლალხორთე მეზი ლიხ ქუნა̈რ: -- ლალხორისგა
Line of edition: 8    ქუნა̈რ ესერ ჟი ინზორა̈ლხ მა̈გ ი, მა̈ ესერ ხეკფიხ ეჯ მეზგემიშდ,
Line of edition: 9    ეჯის ესერ ეჯაბასვდ ალხვერიხ ხოჩამ ი ხოლამ.

Line of edition: 10       ჯვინალდ ესერ ამჟი ლჷა̈რდ ესერ ოლმა̈ზნელიხ ქუნა̈რ ქორთე
Line of edition: 11    ლიფანელისგა ი აშხვ ზურალს გეზალ ათდაგრა ი ლიფანელისგა
Line of edition: 12    მიჩა გეზალ ომჴედელი, ეჩქას მიჩა დის სგა ხოფხჭა ი დემ
Line of edition: 13    ლუმფიშვდინ. ეჩქას ეჯი ოთსისტკახ ქუნა̈რს ი ხოქვახ, ერე:

Line of edition: 14       -- ათხენღვ' ესერ მინს დემის ესერ ხეწდენიხ ლჷა̈რდ.

Line of edition: 15       ეჩქანღვ' ესერ და̈რმოშ ხა̈წდა ქუნა̈რს ლჷა̈რს ი ამჟი ხოფანეხ მა̈გ.

Line of edition: 16       მჷშლადეღ ნებოზს ხონკი მუთურას ა̈სყი მა̈გ ი ეჯის ფაკნა̈რთე
Line of edition: 17    ქა̈დისგხ, -- ათხ' ესერ მა̈ჲდა̈რ ლიხ ქუნა̈რ, -- ი დოსდ ჩუ
Line of edition: 18    ხოფანეხ. ტებდი მუთურა ხეკვეს ესხუახ ლალხორხენ მეჴდა ქუნა̈რს.
Line of edition: 19    ეჯ ლეთ ვახშა̈მდ ჩუიდ ხოფანეხ.

Line of edition: 20       მერმა ლადეღ დეშდშიშ ჰამს ჯოდი ჰამ ხაშხა. დოსდ მამლა̈რ
Line of edition: 21    ყჷლეხ, ეჩქას იგნალ მა̈გ მეზგე, ხარხ ხა̈რჯიშ ლამარას. ტებდი
Line of edition: 22    ლეზობ ამარე მა̈გ. მა̈ნკუშ ნამარს ტაბა̈გ ლეჟა ადწყეხ ი ჩუ ხოფანეხ.
Line of edition: 23    ალა̈რ ჩუ ისტჷნიხ, ეჩქას მერმა ლჷმარე ტებდი ხა̈რჯსიდ ხოქმეხ.
Line of edition: 24    ამჟი მესმად ადა̈იდიდ ამარეხ ი ხოქმეხ ტაბა̈გჟი ი ჴულჟი.
Line of edition: 25    ჴულმჷყ ეშხუ ფაკნილ ლჷჯე ლაშუნდებიდ ხეკვეს ლჷგენეს ი
Line of edition: 26    ბოფშა̈რს ეჯნოშ ხოშუნდებიხ, ლჷჯოშ.

Line of edition: 27       ლაფანაჟი ღვაჟა̈რ ფაყვს მა̈გ ქა იკედხ, ხეხვა̈რ ჩუ იქქვიხ. ათხე
Line of edition: 28    ალ ლეტვროლ მუტვა̈რ გარ ხეკვეს ლესეს ჩუ უდიგად.

Line of edition: 29       მესმა ნაფანუნღვე ყორა̈რს ჩვაკრეხ. ქამე ი სგამე ყორა̈რჟი
Line of edition: 30    ლეტვროლს ხალწიხ ეჩხავ-ამხავ ი მუშუნდები მარე შიჲსგა ლეტვრა
Line of edition: 31    იყდა̈ნი ი მერმა შივშ არა̈ყს ხოშუნდები:

Line of edition: 32       -- ხოჩა ჭიშხ ესეროღ ხოცვირახ. დ' ესერ ხოკჷლდინეხ ი
Line of edition: 33    დ' ესერ ხარაგვნეხ.

Line of edition: 34       ი ხობჷრდა̈გი ამჟი ლაშუნდვებიშვ ყორა̈რქა. ქამე ყორმჷყ ჟი
Line of edition: 35    ხოჭვენი ი სგა ტეხნი ქორთეჲსგა. ეჩქანღვე ჩუ ისგვრიხ ი ჩუ
Line of edition: 36    იდარალხ. ა̈რა̈ყს ჷთრეხ მა̈გ ი იმზჷრა̈ლიხ.

Line of edition: 37       ჩუ ნადარალჷნღვე ინზორალხ სიმაქ ი მახეღვა̈ჟ მა̈გ ი იგუნაშალხ.
Line of edition: 38    ლიგუნაშალ ლი ეჯ ლადეღ.

Page of edition: 77 
Line of edition: 1    დეშდიშს ცა̈შ ა̈ხჭემნი, ეჩქას ნა̈ლტეხურას ხაყლეხ. ეჯ
Line of edition: 2    ლეთ, ცა̈ ლეთ ლიფანეიდ ლი. -- მჷკლია̈რ ეჯ ლეთ გარ როქ
Line of edition: 3    ა̈ჰიესგხ ქორთეჲსგა -- ი ჩუ ხოფანეხ ადა̈იდ ჩიგარიშშალ
Line of edition: 4    მჷკლია̈რს გარ.

Line of edition: 5       6. ლიჩედურალ. ლეჲღა̈ბდ კერა̈რს ა̈ნშყე მა̈გ ი
Line of edition: 6    ლელღულდა̈შ კერ ხაშხა ალის. ლიჩედურალ მჷშლადეღ ხეხელი ჩიგარ.
Line of edition: 7    ნამპრობა̈შ მუჟეღვ მჷშლადეღს ხაშხა ლა̈ლჩა. ლა̈ლჩა ლადღიშდ
Line of edition: 8    ჩი მეზგა ჯით ხორი ლა̈ჲსად ი მამილ ადა̈იდ. ლა̈ლჩა ლადეღ ა
Line of edition: 9    ჯითს ჩვა̈ჲსენი მა̈გ ი მუჭდურას ხოკედხ, კაპრა̈ სგა ხაყა, ეჯჟი.
Line of edition: 10    ჯითიშ სგაშირს ზისხოროლდ ა̈სყიხ.
Line of edition: 11    ლა̈ლჩა ლადეღ ლიჩედურალა̈შ ნამპრა̈რს ჩვაჟჟჷნეხ მა̈გ. ეშხუ
Line of edition: 12    ხოშა ნამპა̈რს ხოშა ღერთემ ლეტვრად ა̈სყიხ, ეჩჷნქა, ოშა
Line of edition: 13    ღვაჟმარე ირდი ქორისგა ხოშა ი ხოხრა, ეჯა̈რე შელდს. ნამპრა̈რს
Line of edition: 14    ლჷკერა̈ქა ა̈დისგხ ლაფრად.

Line of edition: 15       ჯითიშ სგაშირს ი მუჭდურას ჟ'აჯა̈ბხ ი ტაბლა̈შდ ჩუ იზბიხ
Line of edition: 16    ეჯ ლეთ. ა ჯითს ჟი ხორკინეხ ი ეჯ მჷიშ ლილჩალისგა ხამემ ლეღვს
Line of edition: 17    და̈რ იზბი: -- ქუხვა̈რ ესერ ხოხალ.

Line of edition: 18       მამილს ჩვა̈ჲსენიხ ი ყვიჟა ჟი ხა̈მზჷრიხ. ხვა̈ჲ ლ' ეჯი მეზგაჲსგა,
Line of edition: 19    ერე მამლიშ ყვიჟ ადა̈იდ ხაგა̈დხ ჲორი ღეთ ი სემი. ეშხუ მამილ
Line of edition: 20    ეჯღა̈ი ხეკვეს ჩვადზიჰენეს ლა̈ლჩა ლეთ. მამლა̈რ მამა ხერდიხ, ეჩქას
Line of edition: 21    მამლიშ მჷქაფდ სემი ლჷგრე ი ლემზჷრ ხეკვეს ლახმეზრახ.
Line of edition: 22    ლა̈ლჩას ვებიშ ხაჭიმ, ამის ხაშხა კერრე ვებიშ ი კერა̈რს
Line of edition: 23    ა̈ჲსენი მა̈გ ეჯ ლადეღ. მუჭდურას ხოკედ მა̈გ კერა̈რს. კერიშ
Line of edition: 24    მა̈ჭიკს ნა̈ნკდ ა̈სყიხ. ამთეჲსგა ა̈დისგხ ლჷკპჷნა ნეცინ ჭინჭლა̈რს ი
Line of edition: 25    ამის იშხვნიხ ლიღმესა̈რია̈შდ. სგაშირს ი მუჭდურას, ყვიჟა ი
Line of edition: 26    პერშვდას ჟი აწლა̈ვიხ ბა̈ზი ი ჩვაშხვნიხ.

Line of edition: 27       მერმა ლადეღ, სამტინ ლადეღს ხაშხა მერსანა̈ბ. მერსანა̈ბ
Line of edition: 28    ლადეღ დოსდ იგნალხ, სგაშირს ი ზისხოროლს ი ყვიჟეს ი
Line of edition: 29    პერშვდას ხოჩამდ ჟ'აჯა̈ბხ ი ლემზჷრა̈რს ანყეხ. ჟი ნაჯაბუნღვე
Line of edition: 30    ფიჩქთეჟი იკედხ ჩი, ლემზჷრა̈რსი ჟიქაქა ქა̈დისგხ, ხოხრა ნამპა̈რს
Line of edition: 31    ჟ'ატვრეხ ი ქა̈ისგხ ფიჩქს კვეშკთექა. ნამპა̈რს ყორმჷყ მუსისგა
Line of edition: 32    ხოყერხ. ფიჩქშვ ა ქორა̈შ ხოშა კვეშკისგა ჟი ხა̈მზჷრი ჯგჷრა̈გ
Line of edition: 33    უღვლა̈შს. ეჩქანღვე სგა იტხე ფიჩქს ქორთე ი ჩუ იდარალხ მა̈გ.

Line of edition: 34       მერმა ლადეღ მჷშლადეღ ლი ლიჩედურალ. ღვაჟმარე დოსდ
Line of edition: 35    იგნალ მა̈გ. მა̈ნკუ ხოშა ღერთემ ნამპა̈რს ატვრეხ ი ყორჟი მუსისგა
Line of edition: 36    ჟი ხოყერხ. ეჩქანღვე ღვაჟმარე მა̈გ, ხოშა ი ხოხრა, ატვრეხ
Line of edition: 37    ნამპრა̈რს ჟი ლემასგვჟი ი, მა̈ნკუ ხოსა ერვა ირი ქორისგა ღვაჟმარე,

Page of edition: 78 
Line of edition: 1    ეჯი ხოჟეღვ სგვებინ; ეჩქანღვე, მერმე ხოშა ერვა ირი, ეჯი ხაჭიმ
Line of edition: 2    ი ამჟი ხოხროლუ მა̈გ ი ლჷჭარად ჟი მუტვა̈რ ნამპრა̈რს ქა̈ისგ
Line of edition: 3    მა̈გ სვიფთექა. ეჩეჩუ აშხვ მა̈დგის ჩვა̈დისგხ ნამპრა̈რს მა̈გ აშხვ
Line of edition: 4    ა̈დგის ი ლა̈დისგჟი მა̈გ უშხვარ ხაყლეხ: -- ჯგჷრა̈გ ლიჩედურალა̈შ,
Line of edition: 5    მჷნჷმპა̈რი მარე ჩვ ესეროღ ოთფიშრე მინე ქორისგა ი მინე
Line of edition: 6    სოფელისგა.

Line of edition: 7       სოფელ მა̈გ სგა ჴიდე ნამპა̈რს. ეჩქას ა̈რა̈ყს ჴიდეხ ეჩხავ,
Line of edition: 8    ლემზჷრა̈რს ჴიდეხ ღვაჟმარემ შელდს ქორხენქა, ჟი ხა̈მზჷრიხ
Line of edition: 9    ეჩეჩუ ლემზჷრა̈რს. ისგვრიხ ეჩეჩუ ნამპრა̈რე კჷრკა̈ნდ ი ა̈რა̈ყს
Line of edition: 10    ჷთრეხ ი ჩუ იდარალხ ეჩეჩუ.

Line of edition: 11       ეჩქანღვე ა̈სყიხ ლამურგვა̈ლს ი ლაღრალს. ლიღრალ ესვა
Line of edition: 12    ხეხლი, ეჯი, მახე ნადგარ ახა ჲა̈რ ხერი, ეჯღა̈ი ქა მეღრალ ლი, მა̈ნკუ
Line of edition: 13    ეჯნემ ხეკვეს ა̈ნბინას ლიღრალ.

Line of edition: 14       ეჩქანღვე ქორთე ტეხნი მა̈გ ი ქორს ეჯ ლადეღ ჩი ხოჩა
Line of edition: 15    ლადეღ ი ხინ ხარ.

Line of edition: 16       7. ლიღმესა̈რი. ა ლიჩედურალს სამტინ ხაჭიმ, ალის ხაშხა
Line of edition: 17    ლიღმესა̈რი. ა ლადეღ ჴიდე მა̈გ გოგლა̈ნდი{შ} მეგამ ი ა
Line of edition: 18    ლიღმესა̈რი ქვინჷმგენახენქა ლი.

Line of edition: 19       ლიღმესა̈რი ლეთ მჷნნის მა̈ჭიკს ჟი ხოჯა̈ბხ მურგვა̈ლდ,
Line of edition: 20    ხონყეხ ლესკა̈რს (ქუთს ი მადეჲ კუბა̈დს). ალის მურგვა̈ლ ფიჩქჟი
Line of edition: 21    ჩვა̈დისგხ, მა̈ჭიკს ჟიქაქა ჟი ხოდისგხ, ა̈რა̈ყს ხაჰვდიხ ადა̈იდ მჷნნის ი
Line of edition: 22    აშ ლემზჷრა̈რს ადა̈იდ ფიშირს.

Line of edition: 23       მჷნნი ჩვაქცურე გოგლა̈ნდიშ ცილს, ჩვაჭკვრე ი სგა ხა̈ჩდინე
Line of edition: 24    ვეთხმალე ლეზვებს ი ჩუ ხოდისგ ქვინჷმგენოლს.

Line of edition: 25       ათხ' ალ დარბა̈ზთე ჟ'ა̈ისგ ფიჩქს, ლესკა̈რს ი ლემზჷრა̈რს.
Line of edition: 26    ეჩეჩუ ჟიბ ჟი ხა̈მზჷრი დარბა̈ზს ი ლეტვრე ხეკვეს ხუღვანდეს
Line of edition: 27    ნა̈რჰიდ. ა ნეცინ ლემზჷრა̈რს ჟი ნა̈მზჷრუნღვე ლა̈ნნი ჰულდუმჩუ ჩუ
Line of edition: 28    შიდე ი ჩუქაქა ბოფშა̈რ, მახეღვაჟა̈რ ი სიმქა̈რ იღეშგალხ, მა̈
Line of edition: 29    მოშ ხოშამ ჲა̈რ ა̈თხუესგხ, ეჯჟი. ი ოშამ ა̈თხუესგ ეჯი, ეჩა
Line of edition: 30    ლეზვებ გარ ლი. ახა და̈რმოშ ათხუესგხ ბოფშა̈რ, ხოხროლუ, ეჯის
Line of edition: 31    ქა ხოთეხ.

Line of edition: 32       ათხ' ალი დარბა̈ზს ჩუ ისგვრი, ა მჷნნი, ი ჯი გარ ლი ი ეჩა
Line of edition: 33    მეცლაველ და̈რ ლი.

Line of edition: 34       ეჯ ლეთ ღემესა̈რ ხეკვეს ანნაყახ ჩიემ. ქვინჷმგენემ
Line of edition: 35    ნა̈შდობახენქა ჟი ხა̈მზჷრიხ ეჯ ლეთ.

Page of edition: 79 
Line of edition: 1    8. ლიჴვდიში. მერმა ლადეღ ლიჴვდიში ლი. ლიჴვდიში
Line of edition: 2    ლადეღ სკარ ნა̈მთქვა. მეხელი მეზგა ყვიჟ ხეკვეს ხორდეს ხაბნაშ. ალი
Line of edition: 3    ეშხუ ნამაზ გარ ახა ირი ფირვ, ეჩა გეზალს დემეგ ხაყა ეჯ
Line of edition: 4    ლადღიშ ყვიჟდ. ა̈რა̈ყ ი ყვიჟ ალი მეხელი მეზგემ ლი. ლენყე
Line of edition: 5    დია̈რჲაქს ჟი ხვიზვრიდ თვით ტურფა̈ს მეზგახენქა. ლიჴვდიშია̈შ ლაზვრი
Line of edition: 6    ამჟი ქა ლჷთნად ნიგ.

Line of edition: 7       ეჯ ლადეღ მეზგახენქა ეშხუ ღვაჟმარე ჴანა̈რს ა̈ისგ სგიმთექა
Line of edition: 8    ჰამს დოსდ ი ჴანა̈რს სგიმს ხათრე ი ჯა იქნალ სგიმშვ, --
Line of edition: 9    ჴამშა ესერ ლა̈ხქემნი, -- ეჯღა.

Line of edition: 10       ეჯ ლადეღ სგა ღურიდ ეჯ მეზგათეჲსგა ჰამხენ. ა ყვიჟს ჟი
Line of edition: 11    ხვა̈მზჷრიდ ლასკრიშ ნა̈შდობახენქა. ეჩქანღვე ყვიჟს ჩვა̈ჲსენიხ ი
Line of edition: 12    ყვიჟა ი გვის ჟ'ატყბეხ. ლემზჷრა̈რს ანყეხ ი ა ყვიჟა ი ლემზჷრა̈რს
Line of edition: 13    ჟი ხა̈მზჷრიხ. ნა̈მზჷრუნღვე ყვიჟა ი გვის ჩვახტურეხ ი თვით ნა̈პუ

Line of edition: 14       ზურალს ი ღვაჟმარა ჩი ხეკვეს ერე ქა ხა̈ხვიდეს ი თვით ლემზჷრს
Line of edition: 15    ხაჰვდიხ ადა̈იდ ჩი. ეჩქანღვე კობა̈რშვ ა̈რყიშ ლითვნა̈ლი ლი.

Line of edition: 16       ეჩქანღვე ანყეხ ლემზჷრა̈რს, დია̈რს ი სა̈დილ გვიან ქეხნი. ლირბელ
Line of edition: 17    ქა ახა იზგჷრი, მემზჷრა ხოშა ღვაჟა̈რ ლემზჷრა̈რს იკედხ თვით სამ
Line of edition: 18    ი მადეჲ თვით უსგვამ ი მა̈ნკუ ფუსდ დამბადებელ ხოშა ღერმათ
Line of edition: 19    ხა̈მზჷრიხ მა̈გ, ერე "მინე ლასკა̈რისგა ფაყვა̈შ მჷგემ ჩუ ესეროღ
Line of edition: 20    ადფიშრე". ეჩქანღვე მიქა̈მ თა̈რგლეზერს ხა̈მზჷრიხ, ღვე ჯგჷრა̈გს,
Line of edition: 21    ეჩქანღვე მერმა-მერმა ლაჴვმია̈რს. უშკულჷნეშდ ლალვერდ ჩჲა̈გიშ
Line of edition: 22    ლაჴვმის ჟ'არშვნიხ ი ჟი ხა̈მზჷრიხ. ნა̈მზჷრჷნღვე ჩუ ისგვრიხ.
Line of edition: 23    ტაბგა̈რჟი დია̈რს ი ლეღვს ა̈დისგა̈ლიხ. ჩუ ისგვრიხ, ეჩქას, ეშხუ
Line of edition: 24    ხოშა ერვა ირი, ჰასკა̈მჟი ასგვრეხ ეჯის. ხეხვა̈რს ნა̈ნკდ ხვასგვრედ
Line of edition: 25    ლა̈რბალ ბანდა̈რხენ, კა̈ცხა̈შ ლექვა ღვაჟმარე გარ სგურ მა̈გ.

Line of edition: 26       ა ხოშა იმზჷრა̈ლი. მა̈ნკუ ხოშა ღერმათ ა̈მზჷრა̈ლიხ, ეჩქანღვე --
Line of edition: 27    მიქა̈მ თა̈რგლეზერს, მესმა̈შ -- ჯგჷრა̈გს. ეჩქანღვე ხოშა ჟი იგნალ
Line of edition: 28    ი, მიჩ ერვა ხესგვრი ხოშილა̈რ ჲორი ადა̈იდ, ეჯა̈რ ქა ღჷრიხ
Line of edition: 29    ყორქა ი ალა̈რს ხაყლეხ ათხე, ჩუ მესგვრა, ერე:

Line of edition: 30       -- მინს ესეროღ ხოჩა ლეთ ხარხ ი ხოჩა ჭიშხ ესეროღ
Line of edition: 31    ხოცვირხ, მინ ესერ დემის ტეხნიხ სგა.

Line of edition: 32       ეჩქას ლაცვ ხოთხრენიხ ჩი ი ხაყლეხ, ერე:

Line of edition: 33       -- მინ ესერ ანტეხეხ, ეჩქად გარ ესეროღ ა̈რი მინე ამახვ.

Line of edition: 34       ალა̈რ შიშდ წა̈მჟი სგა ხოჭვენიხ ი ჴედნიხ კა̈ცხა̈შ ლექვა ი
Line of edition: 35    კა ღეშგიმ ჟი ლჷმარე ლი ხოხრა ტაბა̈გ (ფიჩქ), ეჩეჟი ლჷგ სემი
Line of edition: 36    კათხ ლჷჴმა̈შ ა̈რა̈ყშვ გვეში, ნა̈ჭმუნდ პერშვდა მჷტყა̈ბ ი ლუხტურე
Line of edition: 37    თა̈შ. ალა̈რ სგა ხეგნიხ ტაბა̈გს კაჩუშ ფაყვა̈რ მეკდე, ჟი იკედხ
Line of edition: 38    კათხა̈რს ა̈რა̈ყშვ [გვეში] ი იმზჷრა̈ლიხ:

Page of edition: 80 
Line of edition: 1    -- საყნი{შ} მა̈ლდშვ ესეროღ ლჷმზჷრე ლიხ მინე ლასკა̈რ ი მინე
Line of edition: 2    მუშგვრი. ლისყანალ ესერ ჟ'ოლბინელესეს ეჩა ი ლა̈დიშ უშხვარ
Line of edition: 3    ნენსგა, მაჩენამდ ლისყანალ ჩუ ა̈ს ხამურჯვენეს, ეჯი მერმად მინს
Line of edition: 4    ესეროღ ათჯვარახ.

Line of edition: 5       ამჷნქა იშგენ ღერთემ ლირშვნი ახა ჲა̈ს ლა̈ხქა̈დი, ეჩქას შიშდ
Line of edition: 6    შტრა̈ფს ხათრეხ. ჩუ ჷთრეხ ა̈რა̈ყს, ქა ხოჴვა̈მიხ გვეში კათხა̈რს
Line of edition: 7    კა̈ცხა̈შთე. ესვა ქოსჴვა̈მნეხ, ეჯა̈რ ფაყვა̈რს ჩუ იკედხ მა̈გ. ალა̈რ
Line of edition: 8    ქა ჴედნიხ საყანხენქა ლერსგვანთე. ლერთანთე ახა ლა̈ხქა̈დიხ
Line of edition: 9    ლიჴედ, შიშდ ღეშდ იტხეხ ი შტრა̈ფსიდ ხათრეხ ადა̈იდ. ალა̈რ
Line of edition: 10    მინე ლასგვრაჟი ჩუ ისგვრიხ ათხე. მინე შელდ ქა ხეცა̈დიხ
Line of edition: 11    საყანთექა. ეჩეჩუ ეჯა̈რ ამჟ' იმზჷრა̈ლიხ ადა̈იდ. ალა̈რ ჩუ ჷთრეხ არა̈ყს,
Line of edition: 12    ეჩქანღვე მინე მუჴვა̈მია̈რს ხაყლეხ, ერე:

Line of edition: 13       -- მინე ფაყვა̈რს ჟი გარ ესეროღ ხარხ.

Line of edition: 14       ეჩქას ეჯა̈რ ფაყვა̈რს ჟი იგემხ. ალა̈რ მერმოლუს ხოჴვა̈მიხ. მა̈ნკუ
Line of edition: 15    კა̈ცხა̈შ ლექვა ხეკვეს ა̈დზჷგრენეს ლიჴვა̈მი.

Line of edition: 16       ეჩქანღვე სერ ზურალს ი ბეფშვს და̈ს ცვირეხ უჴვამად ი
Line of edition: 17    საყანთექა ხეკვეს მა̈გ ქაჩეს ი ჩუ ლაჷშეს ა̈რა̈ყ. ეჩეჩუ ერვა ა̈რყიშ
Line of edition: 18    მჷთრე მამა ლი, საყანთექა ადრინ' ეჯი, ხეკვეს ა̈ნმეზრას ჟი ი
Line of edition: 19    მიჩა აფხნეგდ ეში ხეკვეს ქა ლაჷშეს   ეჩა ნა̈თი ა̈რა̈ყ. ამჟი ქა
Line of edition: 20    ხეშთხენი ლისყანალ ი და̈რ სედნი საყანთექა უზად.

Line of edition: 21       ეჩქანღვე ანყეხ ქუთა̈რს ი მადეჲ ჭიშდვარა̈რს ი ლეცვმა̈რს
Line of edition: 22    იჩოხ ი ჩვა̈დისგა̈ლიხ ტაბგა̈რ ლეჟა. ეჩქას ტოლიბა̈შ იმზჷრა̈ლი:

Line of edition: 23       -- ბა̈რბოლს ესერ ძღვერ ი ბერექეთ ესეროღ ლოჰოდა მინე
Line of edition: 24    ლასკა̈რდ!


(კოსტა ჯაჭვლიანი. სვიფი. თინათინ შარაძენიძე. VIII.1949)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.