TITUS
Svan Prose Texts II (Lower Bal)
Part No. 40
Previous part

Text: 40 
Page of edition: 69 
Line of edition: 1 
II. ცხუმარული
Line of edition: 2 
XL. ცხჷმა̈რ


Line of edition: 3       ცხჷმა̈რ ლი უსგვა სოფელ. ნენსგა̈შ სოფელ ლი სვიფ. ალი ლი
Line of edition: 4    ხოშა სოფელ. ალ სოფელისგა იზგეხ ვოშთხვ გვა̈რიშ მეზგოლ:
Line of edition: 5    არღვლანა̈რ, ჯა̈ჭვლანა̈რ, შამფრანა̈რ ი გურჩანა̈რ. ნენსგა სოფელისგა
Line of edition: 6    თემსაბჭო ლი, კლუბ, ქოხსამკითხველო ი არაზა̈იან კლას,
Line of edition: 7    კოლმეურნეობაშ კატორა, საწყობ ი მაღაზია. კოლმეურნეობა ლი
Line of edition: 8    აფხნეგ შვერნიკიშ ჟახაჟი. ალ კოლმეურნეობას ფერმა ხოგ
Line of edition: 9    მანგრემ ი დაჴლა̈შ.

Line of edition: 10       ლიჴნი-ლილა̈ში ლი კვეცნემ, სიმინდიშ, ჭჷმნიშ, მანშიშ, ფეტვეშ,
Line of edition: 11    ლებიაშ, კობეშიაშ, კარტობილიშ: ჰარტმა̈რისგა ალა̈შიხ
Line of edition: 12    ლახანას, ხა̈ხვს, ჭაგვს, ძაფანას, კინტვრის, კამას, ქინზს, ოხვრახვს,
Line of edition: 13    ქვანდარს, ნივრას, შა̈ბლიკა̈ს, ქანს. ქანს ა̈ლაშიხ ლალქანისგა.

Line of edition: 14       ნენსგა სოფელისგა ხაზვიბ სგიმ. ალ სგიმ ლეთრად ხუღვა ჩი,
Line of edition: 15    სგიმჷნქა ლიცს და̈რ ჷთრე.

Line of edition: 16       ლა̈ხილ მასა̈რდ ლი: კაკ, ქილვა̈რდ, ბა̈რყვენ, ჰებ, უსგა̈რ, უცხა̈რ.
Line of edition: 17    უსგა̈რხენ მაჩენე ლიხ სანაფ ი ა̈ნთროლ, უცხა̈რხენ მაჩენე ლიხ
Line of edition: 18    ნა̈ლყინ ლჷლყინ, მალუ̈ნთ, გიმბრ, კაცისთავ, ფხანჭა̈შ ი მერმე
Line of edition: 19    მეგრე უცხა̈რ.

Line of edition: 20       ჲერხ' ა̈გის ყუნზელ ხარხ. ალ ყუნზელ ლი ა̈დესა, ალექსანდროულ
Line of edition: 21    ი იშგენ.

Line of edition: 22       სვიფს მჷჟლაჰვარხენ ხა̈ზ სოფელ ღვებალდ. ამეჩუ იზგე ეშდეშხუ
Line of edition: 23    მეზგე, მა̈გ ლიხ ეშხუ გვა̈რიშ -- გერლიანა̈რ.

Line of edition: 24       სვიფს ჟა̈ბშხენ ხა̈ზ ეშხუ სოფელ -- ტვიბერ. ამეჩუ იზგეხ ჲორი
Line of edition: 25    გვა̈რიშ მეზგოლ -- ქალდანა̈რ ი გოშვანა̈რ.

Line of edition: 26       ტვიბერიშ ნა̈ფდიას ჟა̈ბშხენ ლი სოფელ ლეზგარა. ამეჩუ იზგე
Line of edition: 27    ეშდორითექა მეზგე, მა̈გ ლიხ ეშხუ გვა̈რიშ -- საღლიანა̈რ. ლეზგარას
Line of edition: 28    ჩუხიჲსგა ხაზვიბ ხოჩა სგიმ. ალ სგიმს ჷთრე სოფელ
Line of edition: 29    მა̈გ.

Line of edition: 30       ლეზგარა ჩუქა მჷჟლაწადხენ ლი სოფელ მაგარდელ. ალი ლი
Line of edition: 31    ხოხრა სოფელ. ეჩეჩუ იზგეხ ჲორი გვა̈რიშ მეზგოლ: მილდიანა̈რ ი
Line of edition: 32    იჲრი მეზგე სუბელანა̈რ. ამეჩუ ლი ვოშთხვზა̈იან კლას. ალ კლასთე
Line of edition: 33    იზელალხ (\ კლასისგა ითვრიხ) მაგარდელრე, ლეზგაროლე ი
Line of edition: 34    ლაფსყალდრე ბოფშა̈რ.

Page of edition: 70 
Line of edition: 1    სემი კილომეტრ ჟიხიქა ლი სოფელ ლაფსყალდ. ამეჩუ იზგე
Line of edition: 2    მა̈გ ეშხუ გვა̈რიშ იშგვიდ მეზგე -- გუგვესიანა̈რ. ალ სოფელისგა
Line of edition: 3    ლჷგ ჯვინელ ლაჴვმი თა̈რგლეზერიშ ჟახაჟი. ლა̈მზჷრთე ცხჷმა̈რ მა̈გ
Line of edition: 4    ეჩხავ ესღრივხ მუჟღურხენ. ამეჲსგა ჯვინელ ხატა̈რ მასა̈რდ ზჷხ,
Line of edition: 5    ამეჩუ ლჷშხვინ ლა̈სვხ ძვინელ ლა̈ირა̈ლ. ეშხუ ლა̈ირ ოთხთავ
Line of edition: 6    მეეშდორე საუკუნეშ ხეშხვნან ამეჩუ ი ათხე ეჯი ზჷ მესტიას
Line of edition: 7    მუზეუმისგა.

Line of edition: 8       ლაფსყალდჷნქა მერმა სოფლა̈რისგა ჩჲა̈გ ეშხუ შვიმიშ
Line of edition: 9    ლიჴნი-ლილა̈ში ი ლა̈ხილ ლი. ლაფსყალდ ლი ლახვა̈ნი ი ამეჩუ ჴედნი
Line of edition: 10    ჭჷმინ, კარტობილ, როგვ ი მანა̈შ გარ.

Line of edition: 11       ფერმა̈შ ნა̈წილ ლჷგ ლაფსყალდს ი ჲერხი ქვინჷმგენოლ ლინთვისგა
Line of edition: 12    ეჩეჩუ ხაყახ, ღუნა̈რ ხაყახ ღვებალდს ლინთვ ი ზავ. ქვინჷმგენე
Line of edition: 13    ჩჲა̈გ ფერმას მასა̈რდ ხაყახ, ხოჩამდ ხოსგდიხ ი ლაშგ-ლა̈ყელი
Line of edition: 14    მასა̈რდ ხარხ.

Line of edition: 15       ცხჷმრიშ ფერმა ბა̈ჲ ფერმა ლი.

Line of edition: 16       ღვებალდა̈შ ი სვიფიშ ნენსგა ანღრი ტვიბრა ჴა̈ლრა. ამნოშ
Line of edition: 17    ლაროლს ი დაბა̈რს ალცუნეხ სვიფ ი ღვებალდ. ლეზგარას ი
Line of edition: 18    მაგარდელს ნენსგაჩუ ოსოზიხ ტვიბრა ქვანდარ. ალის ისჷრგებიხ
Line of edition: 19    დაბრე ი ლაროლე ლალცუნად.

Line of edition: 20       ჴა̈ლრა̈შ ი ქვანდრაშ ტვიბროლისგა ხოგხ ლექვერა̈რ. ალ
Line of edition: 21    ტვიბროლ ხეჩდინიხ ჭალა̈ რიენს (ენგურს).

Line of edition: 22       რიენ (ენგურ) ლი ხოშა ჭალა̈ ი ჲარდვ ყვილე ჟიბე შვა̈ნს.

Line of edition: 23       ცხჷმრიშ სოფლა̈რს კჷრკანდ ხაცხიპ მეშხე ლემგემ ცხეკ.
Line of edition: 24    ცხეკისგა ხაგ ხოშა ლაღა̈ლდ ღუმირ, ნენზ ი გჷგიბ. ლაფსყალდს ნა̈ნკდ
Line of edition: 25    ხა̈ზ ხოჩა ლეგგჷბ. ამჷნქა ხოჩამდ იცხემხ წიფრა, ცხვიმრა, ჟა̈ჴვრა,
Line of edition: 26    თეკრა, ერხვლა, ბალყეჩ, ცა̈ჲრა, მჷლჯერა, ლა̈ჯრა (იფ).

Line of edition: 27       ცხეკისგა ჩუბოვ მჷნწირდ ხაგ შდჷხჷნდ, ცინყა, გოწხირ, გოგლა̈ნდ,
Line of edition: 28    მენცხულდ, და̈შდვრა, მურგვი, ჴვა̈რი, გვიჯრა ი იშგენ.
Line of edition: 29    ალა̈რს მაშან ხეშა̈ნხ ი და̈შდვრაჷნქა იჴმა̈რიხ ლეზობდ.

Line of edition: 30       ცხეკისგა ა̈რი ნა̈დირ, ხოშა ლაღა̈ლდ და̈შდვ, თხერე, მალვ ი
Line of edition: 31    რა̈ჭვ.

Line of edition: 32       ლეჭმე ლაროლისგა ჴედნი პირპილ, წილამ, მუნთჴვა̈რი,
Line of edition: 33    გიცრულ, ჩიჩვლა, ტელეფი ი იშგენ ფიშირ შვიმიშ მელ. ამის ა̈ჭმეხ,
Line of edition: 34    აფრეხ ი იშხვიხ ქვინჷმგენემ ლეზობდ.


(კოსტა ჯაჭვლიანი. სვიფი. ვ.თოფურია. 16.VIII.1955)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.