TITUS
Svan Prose Texts II (Lower Bal)
Part No. 39
Previous part

Text: 39 
Page of edition: 66 
Line of edition: 1 
XXXIX. დაჩვირ ი მიჩა ჩხარა ჯიმილ


Line of edition: 2       არდახ ეშხუ ხეხვ-ჭა̈შ. ალა̈რს ხორდახ ჩხარა ნაღვჟურგეზალ.
Line of edition: 3    მეეშდეშდ ღანავ ლა̈სვ.

Line of edition: 4       ლახვბად ლა̈თხვართე ლაზჟი ხა̈ქვეხ მინე დის: -- ათხეშ როქ
Line of edition: 5    გეზალ დინა ლესეს ე, ტელა̈ფჟი ჯა̈რ როქუ ლოხრეკ ი,
Line of edition: 6    ნაღვჟურ ლესეს ე, -- უღვა.

Line of edition: 7       ედღვაჟან ჩუ ი დინ' ანთავე. ჯა̈რ ოხრეკ ტელა̈ფჟი. ანჴად
Line of edition: 8    უშდილ ეშხუ ზურალ ი უღვა ლოხცა̈დ ჯა̈რიშ მჷქაფდ. ენსგიდდახ
Line of edition: 9    ლახვბა ი უღვას ხეწადხ ი სგა დემეგ ანჴადხ ქორთე.

Line of edition: 10       ალა̈რდ ნივრა ლაირმხ ი: -- შუკვს როქ იდასგუნიხ. ალის
Line of edition: 11    როქუ ა̈ხჭამ ნაღვჟურ, ჟი ლახ ა̈ნიცხეს.

Line of edition: 12       ტკისდ ჟ'ენიცხ, ეჩქას ხა̈რჯ ადჲე ალ შუკვს. ომჴედ ეშხუ
Line of edition: 13    ვობურ დადა ი ა[ლ] ნივრა მერმე შუკვს აშიდ ი დინა ალი შუკვს
Line of edition: 14    ესჭიმ.

Line of edition: 15       ესხრი, ესხრი ი და̈ვა̈შ ლარდათ' ა̈თჴედჷნ. ათხე დადად ხა̈ქვე:

Line of edition: 16       -- სგა ნომეგუ ანჴად, ედო მიჩა გეზალ როქ ჩვაცრჷლე.

Line of edition: 17       ათხე ალი ხეწად აშხვ მა̈დგის მოლე მჷჭკჷვეს ი ამთე ოთმეწვნე.
Line of edition: 18    სგაჩად ი ხეწად: ჩხარა ლახვბა მა̈გ უშხვარ ხასგურდახ. ალა̈რ
Line of edition: 19    ლა̈ხჭვედდახ დინას ი: -- იმხენიშ როქ ლი, იშა როქ გეზალ ლი?

Line of edition: 20       ამნემ მა̈გ ქოხუმბავე. ეჯა̈რს მასა̈რდ ათჩონხ. ეჩქანღო მინ
Line of edition: 21    ლა̈თხვართ აჩადხ ი დინა ჩვაცვირხ კარა̈ვისგა: ხვა̈დინას
Line of edition: 22    ლემესგ როქ ნომეგ ადჷგეს, ედო ეჩქანღო როქ დეშ იკარხექ.
Line of edition: 23    ეჯი დერ-ი' ა[ლ] დინას ლემესგ ჩოთდაგ ი აჩად ეჯი დადაშთე ე,
Line of edition: 24    მა̈ნკუ ერ მიჩ ა̈თჴედჷნ. ალ დადად ცხჷრილშვ ლახვემ ცხჷნდა̈რ. ალ
Line of edition: 25    ცხჷნდა̈რ შუკვჟი მა̈გ ჩოთშჷდდა ი ჟიიდ ესჭვენ დადაშთე. დადად
Line of edition: 26    ქა ლახვემ წეს შედშვ ცხჷნდა̈რ ი მოლემ ლა̈შიი ლახევმ: -- ალი
Line of edition: 27    როქ ლა̈ში ჩუ როქუ ალა̈შ მინე ლარდაჲსგა ი ეჯი როქ ჟ'ა̈ნცხემ,
Line of edition: 28    ეჩქას ეჯის როქუ ხეჩმუდ ნაყუნთე.

Line of edition: 29       სგანჴად დინა ქორთე ი ჟ'ანაშვე ლემესგ. ალ ლა̈ში ქალა̈შ
Line of edition: 30    მინე ლარდაჲსგა ი ჟ'ახაგან, ეჩქას მა̈ნკუშჟი შიშდ ნაყუნთე ხა̈ყერ.
Line of edition: 31    ჩოსეგ ალ ლეზვებ მიჩა ლაჯმილას. ალი ჩუჲ ლეემხ (\ ლა̈ჲემხ) ი
Line of edition: 32    შიშდ ლა̈ჩვა̈რდ ესსიპდახ. ალის ქაჲ ხეწად დინა ი ლიგვნი
Line of edition: 33    ლა̈ჲბინე. ჩი ლადეღ ქესყადდა ლალდაღთე ი ჰამუნღო ნებოზდ სგა
Line of edition: 34    ხეჭამ.

Line of edition: 35       აშხვ ლადეღ ანჴად ხელწიფეშ გეზალ ლა̈თხვართე ი ქა ხეწად
Line of edition: 36    ლა̈ჩვა̈რს ი ქოთმეწვნე თვეფ. ეჩქას დინად ოსჭყილ: -- ნომეგ როქუ
Line of edition: 37    ადგა̈რ, ალა̈რ როქ მიჩა ლაჯმილა ლიხ!

Page of edition: 67 
Line of edition: 1    ხელწიფეშ გეზალს გუნ ლახლატჷნ ალ დინა ი ხეხვდ ესყედნე.
Line of edition: 2    ალა̈რ აჩადხ ქორთე ი ლა̈ჩვა̈რ სგა ლა̈ჲჴერნეხ.

Line of edition: 3       ქორა̈შ ფედილს ალი დინა ჩვაცვირ ქამ ი ჯი სგაჩად ქორთე
Line of edition: 4    ლერქვა̈რე ლა̈ჴდათე.

Line of edition: 5       ათხე შუკვქ' ანჴად ეშხუ დინა. ამნემ ხა̈ქვე ალ ხელწიფეშ
Line of edition: 6    ლეჲხურის: -- ქა როქუ ანჴად მიჩა მიჩეშთე. -- ალი ქაჩად ამთექა ი ეჯნემ
Line of edition: 7    ტობთეჲსგ' ადსგიდნე. ეჯი დინად ხა̈ქვე: -- ქა როქუ ლახწონე მიჩა
Line of edition: 8    ლერქვა̈რ ი ჯი როქ იქვემ.

Line of edition: 9       ამნემ ტკისდ ქედშყვიჟ ი ქა ლახწონე მიჩა ლერქვა̈რ ი ეჩა
Line of edition: 10    ლერქვა̈რ ჯინემ ლეიქვ. ათხე ეჯი დინად სგოთჯვირე ი
Line of edition: 11    ტობთეჲსგ' ატკვა̈რ.

Line of edition: 12       ქანტახ ხელწიფხე ი ალი ეჩქადიშრიგ თვალა̈შდ დეშ ლახწვანდა,
Line of edition: 13    მარ' ეჯღაჲ სგა̈დჴერნე ქორთე.

Line of edition: 14       ათხე ე ტობთეჲსგა ნაკვარ დინა კალმახდ ესსიპდა. აშხვხენიშ
Line of edition: 15    ფოყ ვოქრეშ ხად.

Line of edition: 16       აშხვ ლადეღ ქანჴად ეშხუ მიჩა ჯიმილ ლა̈ჩვ ი დინას ლახტვილ
Line of edition: 17    ტობთეჲსგა: -- ისგუ ჯიმილ ვაშლას თხუმ როქ ჟი ხა̈ქვცეხ ლა̈დი!

Line of edition: 18       ეჩქას ხა̈ქვე დინად: -- აჩად როქუ ხელწიფეშთე ი ეჯი როქ
Line of edition: 19    ნაბა̈ნს დემის კვიშე.

Line of edition: 20       მარე ხელწიფეშ ხეხვდ ეჯღაჲ ჩვათჷჲსენნე ეჯი ლა̈ჩვ.

Line of edition: 21       მერმა ლადეღ ხელწიფხეშ ხახვემ ხა̈ქვე: -- ტობისგა როქ კალმახ
Line of edition: 22    ა̈რი, ეჯი როქ ჟ'ოვ ოხჴიდხ ი კინჩხ როქ ჟ'ახყვიფხ ეჯჟი
Line of edition: 23    როქ, ერე ეშხუ ღალეჲ მად' ოთშყეს ჩუ! -- მარე ეშხუ ღალიდ
Line of edition: 24    ჩოთშყადხ. ამეჟი ახაგან ხოშა ჭანდა̈რ.

Line of edition: 25       მესმა ლადეღ ხელწიფეშ ხახვემ ხა̈ქვე: -- ალი ჭანდა̈რ როქუ
Line of edition: 26    ჟ'ანქა̈ჩხ, ედო ჯი როქ ჩუ იდგა̈რი. ლაქჩაჟი ეშხუ როქ ნა̈თი
Line of edition: 27    ნომეგ ოთშყეხ გა̈ნთე! -- მარე ეშხუ ნა̈თ ჯოდიათე აშყად ი ჟი დეშ
Line of edition: 28    ა̈ნთხეხ.

Line of edition: 29       აშვ ლადეღ ეშხუ დადა ლა̈მზჷრხენ ანღჷრდა ი ეჯის ახხვიდა
Line of edition: 30    ალი ნა̈თ. სგადჲე ალი ი ლასფაურის ესლაფრე. ვოშელდ დადა
Line of edition: 31    ლა̈მზჷრთე ღჷრდა, ეჩშელდჷნ ქორ ქა ლჷჯელვე ხეხოლიდა ი ჯი
Line of edition: 32    სოფლა̈რს ჩი ლადეღ ხოლა სა̈ხმა̈ხს ხოსყიდა: ამიშ მუჩვემ სოფლა̈რ
Line of edition: 33    ხოხალდ.

Line of edition: 34       აშხვ ლადეღ ჩოსდარჯე დადად ი ალი ნა̈თ დინად ესსიპდა,
Line of edition: 35    ლა̈ჯელვას ლოხოგან. დადად ჩვადირმ ალი დინა ი გეზალდ
Line of edition: 36    ესგენე. ალი დინად დადას მა̈გ ქოხუმბავე მინე გაჭირება.

Line of edition: 37       დადა ქა დემის იკვშა, იმხენ ანჴად ალ დინა ი ჩუ ხორდა
Line of edition: 38    გეზალდ.

Page of edition: 68 
Line of edition: 1    აშხვ ზავ ხელწიფხეს ნა̈ჲნური ხად ი ალ დინად ხა̈ქვე დადას:
Line of edition: 2    -- ეშხუ როქ რა̈შ ქა როქუ ახჴვიდნე ხელწიფეს ი ღო მინ ქა როქ
Line of edition: 3    ა̈ჩფეხ.

Line of edition: 4       ალ დინას ხუღვანდ ეშხუ მჷსკა̈დ. ეჯის ჟ'ესსიპასგვ, მიჩ იმეგ
Line of edition: 5    ხეკვდოლ, ეჩეჩუ მუწვალ ხეგნივ.

Line of edition: 6       ალი რა̈შ ეჯჟი ადჩიფეხ, ერე დეცთე მჷჭკმა̈რს ხეშდრალდა.
Line of edition: 7    ალი რა̈შ ჩვადშგურანე დინად ი: -- ხელწიფეშ ყორჟი ჩუ როქუ
Line of edition: 8    ადყურდა ი ჟი როქუ ნომეგ ანჷგან მიჩა ლიჴდალდ.

Line of edition: 9       ალი რა̈შ ტკისდ დინაშ ნა̈ქვ ჩვემინ: ჩვადყურდა ხელწიფეშ
Line of edition: 10    ყორჟი. ხაყლახ ლიგნალს, მარე ჟი მად' ანჷგან. ანჴად ათხე ალ დინა
Line of edition: 11    ი ხა̈ქვე რა̈შს: ჟეღ როქ მიჩა პატრონ, ჟი როქუ ანჷგან!

Line of edition: 12       რა̈შ ტკისდ ჟ'ანჷგან.

Line of edition: 13       დინად ქოხუმბავე ხელწიფეს ძგიდიშ-პილიშ ნენსგა მიჩა
Line of edition: 14    გაჭირება. ეჩქას ხელწიფედ მიჩა ხეხვ ჩაჟვემ ჰაკვა̈დს ლახა̈ბ ი ეჯჟი
Line of edition: 15    ჩა̈ჟ ქაფიშვდ.

Line of edition: 16       ეჩქანღო ხელწიფხედ ჩვესყედნე ალი დინა ხეხვდ ი ხოჩა ლიზგ'
Line of edition: 17    ა̈ნსყეხ.

Line of edition: 18       ეჩეგიშ ხოჩა ამეჩუ, ამგიშ ხოლა ეჩეჩუ.


(ამირან სუბელიანი. ჰებუდი. მ.ქალდანი. 28.VIII.1954)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.