TITUS
Svan Prose Texts II (Lower Bal)
Part No. 38
Previous part

Text: 38 
Page of edition: 63 
Line of edition: 27 
XXXVIII. ვაშლა ი კამინჩირხა̈


Line of edition: 28       არდახ ეშხუ ხეხვ-ჭა̈შ. ეჯა̈რს ეხწესანხ სემი ნაღვჟურ ი სემი
Line of edition: 29    დინა. დი ხოხრობჟი ათდაგანხ ჩუ. მინე მუ იდგა̈რიდა, ეჩქას
Line of edition: 30    ეჯნემ ხა̈ქვე მიჩა ნაღვჟურგეზლირს: -- ქა 'სერ ნა̈სუ ოსდერვეხ
Line of edition: 31    დინოლ, ერდვა̈დ დო ხა̈ჰრიხ.

Line of edition: 32       მინე მუ იდგა̈რიდა, ეჩქას ჯინემ ჩვადშგურანე მიჩა ნაღვჟურა̈რ:
Line of edition: 33    -- სემი ლეთს ჟ' ესერუ ესლაჩხ საფლა̈ვჟი.

Line of edition: 34       მა̈ნკუშ ლეთ ესლაჩ ხოშა ნაღვჟურგეზალ, მერმა ლეთ -- ნენსგა̈შ
Line of edition: 35    გეზალ ი მესმა ლეთ -- მაჰრენე ნაღვჟურ.

Page of edition: 64 
Line of edition: 1    აშხვ ლადეღ ანჴად ეშხუ ღუჰ. ეჯნემ ხა̈ჰერ ხოშა ნაღვჟურს,
Line of edition: 2    ქოსდერვე ამნემ. ხა̈ჰერ ნენსგა̈შს ი ეჯნემი ქოსდერვე. ხა̈ჰერ
Line of edition: 3    მაჰრენილს ი ეჯნემ ქა ლახვემ.

Line of edition: 4       ანჴად მერმა ლადეღ ღვემალ. ხა̈ჰერ ეჯნემ ხოშა ნაღვჟურს ი
Line of edition: 5    ნენსგა̈შს ი ლექდად ქოსდერვეხ. ხა̈ჰერ ხოხვრა ნაღვჟურს ი ეჯნემ
Line of edition: 6    ქა ლახვემ.

Line of edition: 7       მესმა ლადეღ ანჴად გველეშა̈პ. ეჯნემი ხა̈ჰერ ხოშა ნაღვჟურს
Line of edition: 8    ი ნენსგა̈შს. ეჯა̈რდ ლექდად ქაიდ ოსდერვეხ. ხა̈ჰერ ხოხვრა ნაღვჟურს
Line of edition: 9    ი ეჯნემ ქა ლახვემ.

Line of edition: 10       აშხუნღო ხოხვრა მუხვბემ ქა ლიჩიჟალ ხა̈ქვე ხოშა ლახვბას.
Line of edition: 11    ეჯა̈რდ ლიცვნალ ლოხბინეხ ხოხვრა მუხვბეს ი უ̂ა̈რია ხა̈ქვეხ.

Line of edition: 12       აჩად ხოხვრა მუხვბილ ჯი გარ ი ეთჴედჷნ ეშხუ მურყვამთეჲსგა.
Line of edition: 13    ალ მურყვამისგ' არდახ სემი მიჟ-დოშდვლა̈შ უწდუნა სიმაქა̈რ.
Line of edition: 14    აჩად ჟი ხოხვრა მუხვბე ვაშლა ი ჩვანჴიდ სემი სიმაქ. ეჩქანღო
Line of edition: 15    აჩად ქორთე ი მაშენე სიმაქ ხოშა მუხვბა ლახვემ, ნენსგა̈შ ეჯი --
Line of edition: 16    ნენსგა̈შ მუხვბა, მაჰრენ ეჯი ჯინემ ესყედნე.

Line of edition: 17       აშხვ ლადეღ ვაშლა ქორს დემეგ არდა ი ანჴად ეშხუ კამინჩირხა̈
Line of edition: 18    ი ვაშლაშ ხეხვ ადჲე. ქორთ' ანტახ ვაშლა ი ხეხვ დემეგ
Line of edition: 19    ესხვიდ.

Line of edition: 20       ესხრი ლა̈თხელითე. ჩჲა̈გიშ ნენსგა ხეთხელიდა. ღეშგიმ ჟ'ენთხე
Line of edition: 21    კამინჩირხა̈იშ ქორს. კამინჩირხა̈ ლა̈თხვარს არდა ი მიჩა ხეხვ გარ
Line of edition: 22    არდა ქორს.

Line of edition: 23       აჩად ჟი ვაშლა ეშთეჟილა ი ჟ'ესსგვირე მიჩა ხეხვ ჩაჟჟი ი
Line of edition: 24    ახაგან ქორთე.

Line of edition: 25       კამინჩირხა̈ ქორთ' ანტახ, ეჩქას მიჩა ხეხვ დემეგ ესხვიდდა ი
Line of edition: 26    მიჩა რა̈შს ლა̈ხჭვედდა: -- ხეჰელიხ ესერ მოშ ვაშლას ი მიჩა ხეხვს?

Line of edition: 27       რა̈შდ ეჯი იმედ ხა̈ქვე. ახსგურდა ჟი კამინჩირხა̈ რა̈შს ი შიშდ
Line of edition: 28    სგეჰიდდა ეჯა̈რს. ვაშლას ქა ლა̈ხბიშდდა ხეხვს.

Line of edition: 29       მერმა ლადეღ ადა̈იდ ატახ ვაშლა მიჩა ხახვემ ლა̈ნჴრინათე.
Line of edition: 30    მა̈ნკუ ეჯი, მიჩა დაჩვირ ხეწვილან, ეჯა̈რთეჲსგ' აჩად. მიჩა ჩიჟე
Line of edition: 31    დემეგ არდა ქორს. მიჩა დაჩვირდ ეჯი ჯი კეც ჩუქაქ' ადპა̈ჟვნე.
Line of edition: 32    ნებოზს ანჴად ვაშლაშ ჩიჟე ი ვაშლაშ დაჩვირ ლა̈ხჭვედდა: -- ათხე
Line of edition: 33    მიჩ' ესერ ხოშა ჯიმილ ირდი ამეჩუ, იმ ესერ ხეჩო?

Line of edition: 34       -- ჯიჯვს ესერ ყა̈ლდ ხა̈გნე.

Line of edition: 35       -- ნენსგა̈შ ესერ ჯიმილ ირდი, ეჯის ესერ იმ ხეჩო?

Line of edition: 36       -- ეჯის ესერი ეჯჟი ხეჩო.

Line of edition: 37       -- ხოხვრ' ესერ ირდი, ეჯის იმ ესერ ხეჩო?

Line of edition: 38       -- ეჯის მაჴვამს ესერ ხაყლე ი ბჷგიდ ესერ ხეყჰალ.

Page of edition: 65 
Line of edition: 1    ეჩქანღო ვაშლა ქანჴად ეჩხენქა ი მიჩა დაჩვირს ჭიქ გვეში ლიც
Line of edition: 2    ესგემვნე ლაჴვრაჟი.

Line of edition: 3       -- ალ ესერ ლიცს ჰამაშა̈რს აშგარუ ასჷნჯა̈ვიდა. ალი ლიც
Line of edition: 4    ესერ ზისხიშ ფერიშდ ენსყი, ეჩქას ესერ ჯი ჩუ ლჷდგა̈რ ლი.

Line of edition: 5       ეჩქანღო აჩად მერმა დაჩვირ-შერთეჲსგა. ეჩეჩუი ამჟი ადშგურანე.
Line of edition: 6    აჩად მესმე/ა მიჩა დაჩვირთეჲსგა ი ეჯიი ამჟიიდ ადშგურანე.
Line of edition: 7    ეჩქანღო ჯი აჩად მიჩა ხახვემ ლა̈ნჴრინათე. მიჩა ხეხვ ქანჴიდ
Line of edition: 8    ეჩხენქა, ჩაჟვ ახსგურდახ ი ანჴადხ.

Line of edition: 9       ანტახ ნებოზს კამინჩირხა̈ ლა̈თხვარხენ ი ლა̈ხჭვედდა მიჩა
Line of edition: 10    რა̈შს: -- ეჰელიხ ესერ მოშ სგა?

Line of edition: 11       რა̈შდ იმედიდ ხა̈ქვე. ეჩქანღო ეთღვაჭ კამინჩირხა̈ ვაშლას ი
Line of edition: 12    სგა̈ჰიდდა ი ნა̈კიცდ ადგენე.

Line of edition: 13       ჰამს ეჯი ლაჲსჷნჯავეხ მიჩა ლაჩჩურად (ლადჩურად), ჭიქშვ ლიც
Line of edition: 14    ლჷგან, ეჯი ი ზისხიშ ფერიშ ლა̈სვ.

Line of edition: 15       აჩადხ მიჩა ლა̈ჩჟა ი ჟ'ენთხეხ ვაშლა.

Line of edition: 16       ეშხუ ჩიჟედ რა̈ქვე: ალის ესერ ჯი ჟ' ესერ აჭანჭე; მერმედ
Line of edition: 17    რა̈ქვე: ზისხს ესერ სგა ხოგნე; მესმედ: ქვინს სგა ხოგნე.

Line of edition: 18       ამჟი ჩემინხ ი ვაშლ' ეჯი ჟ'ანჰედვრეხ.

Line of edition: 19       ვაშლა აჩადიდ მიჩა ხახვთე ი ხა̈ქვე: -- კამინჩირხა̈ს ესერ იმხენ
Line of edition: 20    ოხჴიდა ამგვა̈რ რა̈შ, ეჯი ქ' ესერუ ახკვიშნე.

Line of edition: 21       კამინჩირხა̈ს ხა̈ქვე ა{ლ} ზურალდ: -- იმხენ ესერ ოხჴიდა ამგვა̈რ
Line of edition: 22    რა̈შ?

Line of edition: 23       ეჯნემ ქოხუმბავე: -- მიჩ ესერ ზუღვათ' ესერ ოთხია სემი დუმა̈ჲ.
Line of edition: 24    ლიხჷრჯინ' ესერ ლოხბინა ეჩეჩუ ბაჩა̈რჟილა, ეჩქას რა̈შს ესერ
Line of edition: 25    ოხსკინა ზუღვახენქა ი სემი ესერ თხერად ქა ლოხკვარა დუმა̈ ი
Line of edition: 26    მეუშთხვე თხერეს ეჯი რა̈შიშ ჭიშხდ ესერ ხოფხჭა. ალი ესერ
Line of edition: 27    ვოშთხვ ლჷჭიშხ ჩუ ირი, ჰედურდ მამაგვეშ ესერ ხესრუნი ქა.

Line of edition: 28       ალი ვაშლას ქოხუმბავე მიჩა ხეხვდ. ვაშლად ფიშირ დუმა̈რ
Line of edition: 29    ლაირმ ი აჩად ზუღვათე. ეჩეჩულა ლიხჷრჯინე ლა̈ჲბინე დუმა̈რე
Line of edition: 30    ი რა̈შდ ანსკინე. ვაშლა ჟ'ახსგურდა რა̈შჟი ი ამჟი თხეროლ
Line of edition: 31    ანჴად. ვაშლად ქა ლოხკვა̈რ დუმა̈რ ი ამიშ ლაზობს ქა ლა̈ხსადხ.

Line of edition: 32       ჯი აჩად მიჩა ხეხვთე ი ჟ'ახსგურე რა̈შჟი ი აჩადხ მინე ქორთე.

Line of edition: 33       ანჴად ნებოზს კამინჩირხა̈ ქორთე. ლა̈ხჭვედდა მიჩა რა̈შს:
Line of edition: 34    -- ეჰელიხ ესერ მოშ სგა?

Line of edition: 35       რაშდ ხა̈ქვე ი: -- ეჯის ესერ ეჯგვა̈რ რა̈შ ხაყა ათხე, ერე
Line of edition: 36    მადმაგვეშმოშ ესერ ხეჰელი.

Line of edition: 37       ეჯა̈რდ ხოჩა ლიზგ' ა̈ნსყეხ.


(ანზორ სუბელიანი. ჰებუდი. მ.ქალდანი. 28.VIII.1954)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.