TITUS
Svan Prose Texts II (Lower Bal)
Part No. 37
Previous part

Text: 37 
Page of edition: 61 
Line of edition: 13 
XXXVII. უსმართულ-სამჷრთა̈ლ


Line of edition: 14       ლიხ სემი ლახვბა. მა̈გ ლჷხეხვ ლიხ. ლამშავთე ქა და̈რ ღჷრიხ.
Line of edition: 15    მა̈გ მინე ლა̈ჲხვას ხასგურხ სგა, უშხვარ დემ ხამუნდა̈ნიხ მინე
Line of edition: 16    ლა̈ჲხვას.

Line of edition: 17       ხოხვრა მუხვბემ ხახვემ ხა̈ქვე: -- ლახა როქ ამჟი ხარხ ი უშხვარ
Line of edition: 18    დემ ხემინდვხ, ეჩქას უშხუდუ აჩადხ ლამშავთე, ედო ამჟი
Line of edition: 19    როქ მა̈გ ჩუ იჴციხ ი მინ როქ მინე ლამუართე ტეხნიხ.

Line of edition: 20       ალი ტკისდ ა̈დსიმნეხ ი ლევიზ ოხმარეხ თვით ქაფ.

Line of edition: 21       ესხრიხ, ესხრიხ, უშხვარ და̈რ ხარგა̈დიხ, ეჯჟი. მა̈ჲდ ხოჴდენიხ
Line of edition: 22    ი იდარელხ. აშხუნღო ქორთ' ანტახხ.

Line of edition: 23       -- იმღა როქ ომტეხხ ქორთე? -- ლა̈ხჭვედდახ.

Line of edition: 24       -- იმღა ი ლევიზ როქ ჩვათშდეხახ.

Line of edition: 25       ხოხვრა მუხვბემ ხახვემ ხა̈ქვე: -- ჰა, მინ ესერ წელა̈რ! ათხე როქ
Line of edition: 26    ეშხუ გარ ქაფ ლევიზს ხომარეხ. ლიმბუალუ ოხბინეხ შუკვჟი უშხვარ,
Line of edition: 27    ღვე (\ ღო) ლეზობ გარ როქ დემ ხისკორუნიდ.

Line of edition: 28       ჩოთჯჷრვეხ ალი. ქაიდ ა̈დჷნგზარვანხ. მა̈ჲ ხუღვახ, ამიშ ხჷნსგა
Line of edition: 29    დემეგ ა̈ხკვადხ: ლამბუალს ლა̈ხსადხ ქა. ამჟი მერმე სა̈ხელწიფხთე
Line of edition: 30    ა̈თჴედჷნხ. ამეჩუ ლიმბუალ ხარხ, ერე მერმე სა̈ხელწიფიშ ხა̈ლხ
Line of edition: 31    ანჴადხ. ხელწიფხედ ხა̈ქვე: -- მი ა̈მჴიდდ ეჯ მაროლ! -- ა̈დჴერნეხ
Line of edition: 32    ალა̈რ ხელწიფხეშთეჲსგა.

Line of edition: 33       -- მა̈ჲ ლი, მა̈ ჯეკვადხ სგა̈ ამხავ?

Line of edition: 34       -- მა̈, ისგუ მა̈ზიგ მი, ფუსდ, ი ლემშა̈ჲ ემაგვეშ ნეკჷრქი.

Line of edition: 35       -- ჯა̈მედახ მ' ეჯკა̈ლიბ ლიმშავ, ერე ლუმურყვა̈მ ქორს
Line of edition: 36    ჩვა̈მგემდ?


Page of edition: 62 
Line of edition: 1    -- იე, ისგვა̈მი, ედო ამჟი ჯოდიათე იმჟი ონჴვდენოლდ ნა̈ჲ!
Line of edition: 2    ოხოგანხ ალა̈რ სგა ლაშდაბს. ეჯგვა̈რ ქორ ადიგხ ლუმურყვა̈მ
Line of edition: 3    -ლუძღვიდ, ერე ამგვა̈რ ქორ დემეგ ლჷგ სა̈ხელწიფა̈რისგა. ზა̈ჲ
Line of edition: 4    ქადსრულეხ. ათხე ლჷხიადე ლიხ ალ ლახვბა.

Line of edition: 5       -- ლჷკჩე გვიშგვე ბედ, ათხე შვიდებდ ოლღრინედ ი გვიშგე
Line of edition: 6    ლა̈ჲხვას ნა̈ქიმვს ოლჴიდედ.

Line of edition: 7       ამჟი ჩვაყვრეხ ბაზი. ხელწიფხე ვა̈ზრა̈რს ა̈თშჷმ მიჩეშთე.

Line of edition: 8       -- მიშგუ ვა̈ზრა̈რ, იმჟი ჯაკა̈ფხ სგა̈, ამგვა̈რ ქორ ი მურყვამ
Line of edition: 9    დემეგ ლჷგ. ალის მერმ' ა̈დგისი ადგემხ, ეჯღა მი მაკა̈ფ,
Line of edition: 10    ლერსგვენ მეჴრა̈რ ქოლქუცურად ალა̈რს.

Line of edition: 11       -- ეზერ როქ', -- თანახმას ოხჴადხ ვა̈ზრა̈რ.

Line of edition: 12       ხოხვრა მუხვბემ ჟ'ა̈ნჰუნრე ალი. ჰამს ჟ'ანჷგან დოსდ, ქაჩად
Line of edition: 13    მურყვამთექა, შია̈რ ჴვენჟა̈რ ლექვ' ესდე ი ჯიკისგა ხაგ მურყვამს,
Line of edition: 14    ხოსგდი თხუმთე. ამჟი ხელწიფხეს ხაკუ ამა̈რე სგა ლიტული
Line of edition: 15    მეჴრა̈რე ქა ლაქცურათე.

Line of edition: 16       ეშხუ ვა̈ზირდ ხა̈ქვე: -- ფუსდ, ისგუ მა̈ზიგ მი, ხოხვრა მუხვბე
Line of edition: 17    ჰამს ანჷგან ჟი, მურყვამს ჟიკისგა ხაგ, იშგანთე დემთე ისგდი,
Line of edition: 18    ეჯჟი მურყვამს გარ ხოსგდი ჟიბოვ.

Line of edition: 19       -- ქა̈მჴიდდ ეჯი მი!

Line of edition: 20       ჟ'ა̈დჴერნეხ ალი ხელწიფხეშთე.

Line of edition: 21       -- მა̈ჲ ლი, ჰამს ჟ'ახგე ი მურყვამს ჯიკისგა ხაგ ი ხოსგდი ჟიბოვ?

Line of edition: 22       -- მა̈ ი, ისგუ მა̈ზიგ მი, მახვში, ზა̈ჲ ლი, ნიშგე ქორშა̈რ დემეგ
Line of edition: 23    ნიწვახ. ლა̈დი ნიშგე ნა̈ჭირ ლჷცთე ნიშყდენი მა̈გ.

Line of edition: 24       -- იმღა როქ? -- ხელწიფხე ლა̈ხჭვედდა.

Line of edition: 25       -- იმღა ი მურყვამ როქ ხვერნი.

Line of edition: 26       -- იმჟი როქ ხვერნი?

Line of edition: 27       -- იმჟი ი ლიჰამბუნალ ჟი როქ ლჷბნე ხარ.

Line of edition: 28       -- აჰ, ამიშ მა̈შედ ღო მამაგვეშ ჯიხალხა?

Line of edition: 29       -- ამიშ მა̈შედ ამეჩუ მამაგვეშ გვაწვა. ქორს ჩუ ნიზ, მარე
Line of edition: 30    ისგვა თხვიმ გეზალჷნქა ი თხვიმ ვა̈ზირჷნქა ეჯის ქა და̈ს ხემინდვხ.
Line of edition: 31    ნა̈ჲ ლა̈ირს ლოჰვედნედ, ლჷკილ მარა̈ნისგა უსმართულ-სამჷრთა̈ლ
Line of edition: 32    ნიგ, ეჯი ქა ლაჯომეხ. ალი ხოხვრა მუხვბემ ხეხვს ხა̈ქვედ.
Line of edition: 33    კჷლა̈რ ეჯის ხუღვა.

Line of edition: 34       შიშდ მიჩა გეზალს ი მიჩა ვა̈ზირს ოთთონე ხელწიფხედ. ყორს
Line of edition: 35    ლახაგანხ, ლა̈ხშჷმხ, ქა̈ნსგიდდ' ეშხუ ზურალ.

Line of edition: 36       -- მინე როქ ღვაჟა̈რს ოხთონახ. ეჯა̈რს ნამშავ ხოჩა ხუღვახ,
Line of edition: 37    მარე უსმართულ-სამჷრთა̈ლ ლჷკილ მარა̈ნისგა როქ ჯიზხ, ეჯი
Line of edition: 38    როქ ქოვ ლანვემდ. იშგან და̈სმოშ ა̈თმუნდდახ ნიშგეშჷნქა.

Page of edition: 63 
Line of edition: 1    -- აღო, ისგე მა̈ზიგ მი, სგა̈ჲ ქა ჯემინდვდ, ედო ამიშ ყორქა
Line of edition: 2    ლიფშდვე დემჟი ნა̈მედა. ა, ისგე მა̈ზიგ მი, სგანჴად აღო!

Line of edition: 3       ყორ ჩავდკარე ზურალდ, სგაჩად სგაშხენთე, ალა̈რ სგანჴადხ
Line of edition: 4    მარა̈ნთე. ზურალ ყორთეშალ ლახაგან.

Line of edition: 5       -- აღო კუთხისგა ლჷგ ეჩეჩუ. ლა̈ხჷნთხილალედ, ედო ხოლა
Line of edition: 6    ნომაგვეშ ხეყერს.

Line of edition: 7       ქაჩადხ კუთხთექა ალა̈რ, ამჟი ზურალდ ყორ ქა იყირ, კჷლ ჟი
Line of edition: 8    ხაჴიდ ი ქა̈ნკილ.

Line of edition: 9       -- მა̈ჲ ამბა̈ვ ლი? -- ხელიწფხეშ გეზალდ ხა̈ქვე.

Line of edition: 10       -- ნიშგე უსმართულ-სამჷრთა̈ლ ალი ლი. შომა̈ჲ ნიშგე ღვაჟა̈რ
Line of edition: 11    შვიდებდ ქორთ' ა̈ნჴდენიხ, ეჩქას ქა ჯუფშვდე, ეჩქად -- დემის.

Line of edition: 12       ხელწიფხეშ გეზალდ ხა̈ქვე: -- მა̈დილ ჯერი, მი ლა̈ირს ლაჯჰვედნე,
Line of edition: 13    ეჯი ქათზჷზ.

Line of edition: 14       ხელწიფხეშ გეზალდ ლა̈ირ ა̈ირ: -- ბუა, ნა̈ჲ ლუნტყოვნე ხვიდ.
Line of edition: 15    ემმა გეზალ ჯაკუ სი, ვა̈ზირ ემმა ჯაკუ, გალტზა̈რ შვიდებდ სგანფუ!

Line of edition: 16       ქოთჴიდ ხელწიფხეს ალ ლა̈ირ. ათხ' ალ ლახვბას ა̈ხშჷმ ხელწიფხე:
Line of edition: 17    -- მა̈ ლა̈სვ, მა̈ ახსახთედ სგა̈?

Line of edition: 18       მა̈ ხეკუთნივხ ალა̈რს ნამშავ, მერმ' ეჯიცა̈ლ სგა ლოხტყუბეხ
Line of edition: 19    ადა̈იდ.

Line of edition: 20       აჩადხ ალ ლახვბა, სგანჴადხ ქორთე შვიდებდ. ლჷხიადე ლიხ
Line of edition: 21    მინე ლა̈იხვა ი მინ მა̈გ. ალა̈რ ქაფიშვდხ ეჩქას ი ქორთ' აჩადხ.

Line of edition: 22       -- მა̈ როქ ამსვალდა̈რ ლჷმა̈რხ, იმნოშ როქ ოთცხირახ, მეჴრა̈რე
Line of edition: 23    ლიქვცურე ხოპირანხ, ეჯი?! მა̈ როქ ჩივშვ ხოჩა ლჷხა̈ლ
Line of edition: 24    ლჷმა̈რხ!

Line of edition: 25       ეჩგიშ ხოჩა ამეგ ი ამგიშ ხოლა ეჩეგ.


(შავგენ გაბულდანი. ლანხვრი. მ.ქალდანი. 13.VIII.1955)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.