TITUS
Svan Prose Texts II (Lower Bal)
Part No. 36
Previous part

Text: 36 
Page of edition: 55 
Line of edition: 30 
XXXVI. ბერჯა̈შტურა


Link to spto2g
Line of edition: 31       იმეგ ა̈რი ეშხუ ხელწიფხე. გეზალ დემ ხეთნი. ღერმათ ი მარა
Line of edition: 32    ჩი ხეჴჷრალ გეზლა̈შ ლითნეს. აჩად აშხვ მელთერთე ი მელთერდ
Line of edition: 33    ლოხთირ, ერე მიჩა ჰა̈ზვისგ' ესერ ჰალვიშ მეგემ ხაგ, ეჯის კა̈ცხქა
Line of edition: 34    ჲორ' ესერ ვისგ ხეშა̈ნ. ეჯ უსგა̈რ ჩვავ ოხშიდ, ხედვა̈ჲ ესერ ლჷცთ'
Line of edition: 35    აშყეს, ეჯი ნომოვ ა̈ნკიდ ი ხედვა̈ჲ ესერ მადმა აშყეს ლჷცთე, ეჯი
Line of edition: 36    ჟავ ა̈ნკიდ ი ჩვავ ხამნე მიჩა ხახვ.

Link to spto2g
Page of edition: 56 
Line of edition: 1    ანჴად ალ ხელწიფხ ი ჟ'ანჷნზორე ხა̈ლხ ი ოხბინეხ ლიტჷრხანელ
Line of edition: 2    ალ უსგა̈რს. ხეტჷრხანელხ ჰამუნღო ნებოზდ, მარე ჩუ და̈რმოშ
Line of edition: 3    ხოკვანე. ანჴად ნებოზს ეშხუ მჷლქვერი ი ა̈ხფიშვდ ხვარტან (\ ტარხან)
Line of edition: 4    ი ჩოხკვა̈რ ეშხუ ვისგ. ალ ვისგ ლექვერიშ ლა̈ლჰნა̈რთეჲსგა
Line of edition: 5    აშყად. ა̈ხფიშვდ მერმე ი ჩუად ოხკვა̈რ ვისგ ი ჰა̈ზვისგა ხევახ.
Line of edition: 6    ალი ჟ'ა̈ნკიდ ხელწიფხედ ი ჩუ ხამნე მიჩა ხახვ. მჷლქვერი ლექვერთე
Line of edition: 7    აჩად, ეჩქას ლა̈ხვტა̈რმჷყ ხეწად ვისგს, ჟ'ა̈ნკიდ ი ქორთ' ადჲე, ქა
Line of edition: 8    ლახვემ მიჩა ხახვ ი ჩუ ლა̈ემ.

Link to spto2g
Line of edition: 9       აჩად ხა̈ნ ი დრევ, ხელწიფხიშ ხახვემ ი მჷლქვერია̈შ ხახვემ ექდად
Line of edition: 10    ნაღვჟურა̈რ ანთავეხ. ალ ბოფშა̈რ აშხუდ გარ იშდრალდახ ი მასა̈რდ
Line of edition: 11    ხალტჷნხ უშხვრეიშ თხვიმ.

Link to spto2g
Line of edition: 12       ხელწიფხეშ ნაღვჟურ ხოშა ვისია̈შ ლა̈სვ. აშხვ ლადეღ ლჷცჟი
Line of edition: 13    ეშხუ ზურალს შედა̈რ ჩოთკუშურე. ალ ზურალდ ათჭათე: მა̈გ ესერ
Line of edition: 14    ჟავ ახშდეხა ხეხვჲაქდ, სემი ლახვბა და̈ვა̈რს ესერ ეშხუ დაჩვირ
Line of edition: 15    ხორიხ, ეჩჷნქა.

Link to spto2g
Line of edition: 16       აჩად ხა̈ნ ი ხელწიფხიშ გეზალ ლეგდ ადჷრდდა. ცა და ქვეყანა
Line of edition: 17    ქა̈ნცხიპხ ი ამიშ მა̈შედ მადმაგევშ ა̈ნთხეხ. აშხუნღო ალ ნაღვჟურდ
Line of edition: 18    მიჩო მუს ხა̈ქვე: -- მიჩა მა̈შედ ესერ მიჩა მუხვბაჷნქა (\ მუხვბეჷნქა)
Line of edition: 19    და̈რ ლი.

Link to spto2g
Line of edition: 20       მიჩო მუდ ოსცა̈დ: -- მუხვბე ესერ დემეგ ხორი მიჩ, იმხენ ესერ
Line of edition: 21    ლა̈ხშედნი?!
Line of edition: 22    ნაღვჟურდ ეჯღაჲ მად ჩვემინ ი ხა̈ქვე: -- ჟავ ანჷნზორეხ მა̈გ ი
Line of edition: 23    ჯ' ესერ ჩუთერ მიჩა მუხვბეს.

Link to spto2g
Line of edition: 24       ანჴად ხელწიფხე ი ჟ'ანჷნზორე მა̈გ ი თა̈ვითალჟი მიჩა ლაცლა
Line of edition: 25    მა̈გ ქა ხა̈წვენე, მარე ნაღვჟურდ ხა̈ქვე: -- ალა̈რ ესერ და̈რ ლიხ
Line of edition: 26    მიჩა მუხვბე.

Link to spto2g
Line of edition: 27       ანჴად ათხე ი: -- აღო და̈რ ესერ ხოსიდხ მჷლქვერია̈შ ნაღვჟურჷნქა,
Line of edition: 28    ეჯის ესერი ა̈ნჴერნისხ.

Link to spto2g
Line of edition: 29       მჷლქვერია̈შ ნაღვჟურს ქაჲ ხეწა̈დ ლეგმერდე ი შიშდ რა̈ქვე:
Line of edition: 30    -- ალ' ესერ ლი მიჩა მუხვბე.

Link to spto2g
Line of edition: 31       ხელწიფხეს ათჷნბაჟჷნ (\ ათჷმბაჟჷნ), მარე ხა̈ქვეხ, ერე მჷლქვერის
Line of edition: 32    ესერ ალ ნაღვჟურ ეჯ ვისგხენქ' ესერ ახწესენა, ხედვა̈ჲ ესერ
Line of edition: 33    ლჷლჰანთეჲსგა ომშყედელი.

Link to spto2g
Line of edition: 34       ლეგმერდე/ა ნაღვჟურს ხა̈ქვე მჷლქვერია̈შ ნაღვჟურდ: -- აღო,
Line of edition: 35    ჯ' ესერ მჷშკიდთე ადრჷნე ი ახშკადნის ბერჯა̈შ ცხვი ცჷჴემდს ი
Line of edition: 36    ეჩქანღო ადჷრნეხ ესერ ლა̈თხვართე.

Link to spto2g
Line of edition: 37       ანჴად მჷლქვერია̈შ ნაღვჟურ ი ალი ამჟი ჩვემინ. ლა̈ხფხანგანხ
Line of edition: 38    უშხვარ ხელწიფხიშ ნაღვჟურ ი ჯი ი აჩადხ ჯოდიათე. ხელწიფხეს

Link to spto2g
Page of edition: 57 
Line of edition: 1    მასა̈რდ ხამჭირჷნ გეზლა̈შ ლიფშვდე, მარეყ მავ ხოჩვმინან: ეჯურ
Line of edition: 2    ესერ დეშ იჰვდირი.

Link to spto2g
Line of edition: 3       ესღრიხ, ესღრიხ ალ ბოფშა̈რ ი ათასდდახ და̈ვრე სადგვემს.
Line of edition: 4    ჰა̈ზვთეჲსგა სგა ლიზალდ და̈ვა̈რდ ლახტვილხ: -- ჲა̈რ ესერ ლიხ,
Line of edition: 5    იმჟ' ესერ ოთბედვახ მინე ჰა̈ზვთეჲსგა ლიჴედ?

Link to spto2g
Line of edition: 6       და̈ვრე მაჰრენე მუხვბედ (\ მუხვბემ) რა̈ქვე: -- ეზერ ესერ ხა̈ნ
Line of edition: 7    ხარ, მარემ ლეღვ ესერ დემეგ ხომა, ლა̈დი ესერ ლა̈ჲზვებნე.

Link to spto2g
Line of edition: 8       ხოშა მუხვბე ა̈თცუდდა: -- ჩიგარ ქამასა̈რ ნომუ ლი!
Line of edition: 9    ალა̈რს ესერ ხეურდ ჩუ ხა̈მედახ მინე ლიხოლი, ედო დემ ესერ
Line of edition: 10    ა̈ნჴდენოლხ.

Link to spto2g
Line of edition: 11       და̈ვრე ხოშა მუხვბემ ალ ბოფშა̈რს ხა̈ქვე: -- ლიმკეთჟ' ესერ ლიხ
Line of edition: 12    მეჴდე ა ლიჲმახვჟი?

Link to spto2g
Line of edition: 13       ალა̈რდ ოსცა̈დხ: -- მინ ესერ ლიმკეთჟი ლიხ მეჴდე.

Link to spto2g
Line of edition: 14       -- აღო სგავ ანჴადხ ი მინ ესერი მჷკეთდ ესხოლიხ.

Link to spto2g
Line of edition: 15       სგაჩადხ ალა̈რ ი ჩუ ლუსგვრე მად ლიხ, ეჯჟი ხოშა და̈ვდ
Line of edition: 16    ხა̈ქვე: -- აღო ხედვა̈ჲ ესერ ხონკი ადტუმურისხ ნა̈თხვრას, ჩვავ
Line of edition: 17    ა̈დმჷქრანხ!

Link to spto2g
Line of edition: 18       მჷლქვერია̈შ ნაღვჟურს ლუვრე გა̈ჩ ლახვემხ ი და̈ვს -- ლჷშერე.
Line of edition: 19    ატმურეხ ნა̈თხვროლს ი და̈ვს ჭჷშხა̈რ სგა უტმურა ხარ, ეჯჟი
Line of edition: 20    მჷლქვერია̈შ ნაღვჟურს ქა ლჷზგჷრე ხარ ლიტმურე.

Link to spto2g
Line of edition: 21       ათხე ხა̈ქვე და̈ვდ: -- იმემ ესერ ბედჟი ლიხ მინ მეჴდე?

Link to spto2g
Line of edition: 22       მჷლქვერია̈შ გეზალდ ოსცა̈დ: -- მინს ესერ დაჩვირ ხორიხ,
Line of edition: 23    ეჯ' ესერ ქავ ლახვემხ მიჩა მუხვბემ ხახვდ.

Link to spto2g
Line of edition: 24       და̈ვდ ხა̈ქვე, ერე: -- მიჩეშდ ესერ ავ ხა̈კვდან, ხოხრა ესერ ხემჭიროლ,
Line of edition: 25    მარე ლახ ესერ ამჟი ლი, ქ' ესერ ლაჰვედნეხ.

Link to spto2g
Line of edition: 26       და̈ვრე დაჩვირს ლჷმჰერინ ბერჯა̈შტურა ი ალ ტურა ჩუ ხოჭბიდახ
Line of edition: 27    ეშდჲორი ყორ ლჷკილ ლარდაჲსგა. მჷლქვერია̈შ ნაღვჟურ ი
Line of edition: 28    და̈ვა̈რ აჩადხ ლა̈თხვართე. ქორს აცვირხ ხელწიფხეშ გეზალ ი მიჩა

Link to spto2g
Line of edition: 29       ლეჲხური. ალ დინას ხუღვა კჷლა̈რ ლარდაშ, ხედვა̈ჲსგა ბერჯა̈შტურა
Line of edition: 30    ხა̈ჭბიდა. ნაღვჟურდ ქახჴვიდნე ლარდაშ კჷლა̈რ.
Line of edition: 31    და̈ვა̈რდ ადშგურანეხ, ერე ლარდაშ ყორა̈რ ნომეგ ესერუ ადკარეხ, ედო
Line of edition: 32    ბერჯა̈შტურა ქ' ესერ ა̈სკნე ი ჩუ ესერ ადვა̈ში. ნაღვჟურდ მად ჩვემინ
Line of edition: 33    და̈ვრე ნა̈ქვ ი ჩვადკარე ეშდჲორი ყორ მა̈გ. ანსკინე ქა ბერჯა̈შტურად,
Line of edition: 34    ხაჴიდ ტვეტ ნაღვჟურს ი ჩვესდე ლჷჰლამე, ხა̈ფხეჭ
Line of edition: 35    დინას ი კვა̈მდ ლახთვიფ.

Link to spto2g
Line of edition: 36       ანჴადხ ნებოზს ლა̈თხვარხენ და̈ვა̈რ ი მჷლქვერია̈შ გეზალ ი
Line of edition: 37    ხეწადხ ხელწიფხეშ გეზალს ლჷჰლამა ი და̈ვრე დაჩვირ დემეგ
Line of edition: 38    ესხვიდდახ ქორს. ალა̈რ გუდ აჴადხ შიშდ, ერე ალი ბერჯა̈შტურაშ ნაჩომლი.

Link to spto2g
Page of edition: 58 
Line of edition: 1    ანჴად მჷლქვერია̈შ ნაღვჟურ ი ხა̈ქვე დავა̈რს: -- აღო, ჯი ესერ
Line of edition: 2    ადრჷნე დინაშ ლა̈თხელითე. ა̈თრა̈გი ესერ ვოხუშდ ზა̈ჲ, ვოხუშდ
Line of edition: 3    ნაგზი ი ვოხუშდ ლადეღ. ამზუ ხა̈ნისგ' ესერ მადმ' ანტეხეს, ეჩქას
Line of edition: 4    ლჷდგა̈რ ესერ ირი. მიჩ' ესერ მუხვბეს (ხელწიფხეშ გეზალს) მინეშმჷყ
Line of edition: 5    ცვირე. მინ ესერ ი მინე სვინდ, მიჩ' ესერ ლიჴდალდ მაგვა̈რდ
Line of edition: 6    ხეშდბიხ! ლჷჲა̈რ ესერ ე ა̈ნტხენი ი მიჩა მუხვბა ხოლამდ ესერ
Line of edition: 7    ესხვიესგხ, ეჩქას ხოლა ლადეღს ესერ ოსცა̈დნე მინს. ვადა ქ' ესერ
Line of edition: 8    ოთჩედნი, ეჩქანღო მინს ესერ ხოხახ, მა̈ჲ ესერ ხოცხონეხ, ეჯავ
Line of edition: 9    ხა̈ყერხ.

Link to spto2g
Line of edition: 10       აჩა̈დ მჷლქვერია̈შ გეზალ. ესღრი, ესღრი ი ათასდდა ეშხუ ლიცს.
Line of edition: 11    ამხენჟი ესღვა ლიც ზურალს. ალ ნაღვჟურ ლა̈ხჭვედდა: -- იმთ'
Line of edition: 12    ესერ (\ იშეშდ ესერ) ესღვა ლიც?

Link to spto2g
Line of edition: 13       ალ ზურალდ ხა̈ქვე: -- ბერჯა̈შტურას ესერ ოხჴიდა და̈ვრე დაჩვირ,
Line of edition: 14    ეჯის ესერ წა̈მნირა̈კს ესერ გვი ხესუსტი ი ეჩჲაქდ ესერ
Line of edition: 15    (ეჩეშდ ესერ) ესღვა ლიც.

Link to spto2g
Line of edition: 16       ალ ნაღვჟურდ ხა̈ქვე: -- ჲაღო, ჯ' ესერ მჷსკა̈დს ადკვანე თვინგთეჲსგა
Line of edition: 17    ი, ვოდ ესერ მჷსკა̈დ თვინგხენქა ქანშყეს, ეჩქად ხა̈გვშაუ
Line of edition: 18    ლიცს.

Link to spto2g
Line of edition: 19       ანჴად ალ ზურალ ი ამჟი ჩვემინ. მჷსკა̈დ ქაჲ ანშყად თვინგხენქა,
Line of edition: 20    და̈ვრე დაჩვირდ ჟ'ესფხიჭე მჷსკა̈დს ი ლა̈ხჭვედდა ზურალს: -- იმხენ
Line of edition: 21    ესერ ოხჴიდა ალი? ალ მჷსკა̈დ ესერ მიჩა ჭაშვემ მუხვბემ ლი.

Link to spto2g
Line of edition: 22       ზურალდ ხა̈ქვე: -- ამჟი-ამჟი, ეშხუ მარე ესერ ომჴედ მიჩეშთექა,
Line of edition: 23    ეჯის ესერ ოთკვარა ალ მჷსკა̈დ თვინგთეჲსგა.

Link to spto2g
Line of edition: 24       -- ქავ აჩად ი სგავ ა̈ხშჷმ.

Link to spto2g
Line of edition: 25       ანჴა̈დ მელქვერია̈შ გეზალ სგა ი ალ დინას მასა̈რდ ათჩონ. ათხე
Line of edition: 26    ლირაგემიშ (\ ლირაგემ) დრევ დემეგ ხუღვახ, -- ღჷრდახუ შიშდ.

Link to spto2g
Line of edition: 27       ბერჯა̈შტურა ლა̈თხვარს ა̈რი. ანტახ ნებოზს ქორთე ი ხეხვ
Line of edition: 28    დემეგ ესხვიდდა ქორს. ათხე გუდ აჴად, ერე ალი ხედ მიჩა ლაჯმილაშ
Line of edition: 29    ნაჩომ ლი, მადეჲ მიჩა მა̈ნკუშ ჭაშვემ. ა̈თღვაჭ ქა-ჲ სგა̈ჰიდდა,
Line of edition: 30    ჩვათცვირნე დინა ი ღვეშდ ა̈ნტიხ.

Link to spto2g
Line of edition: 31       მერმა ლადეღ მჷლქვერია̈შ ნაღვჟურდ ქაიდ ა̈ნცხვა̈პ, მარე
Line of edition: 32    ბერჯა̈შტურას მადმაგვეშმოშ ხა̈წრე. ნაღვჟურდ ხა̈ქვე დინას: -- ქავ
Line of edition: 33    ახკვიშნე, იმეჲსგა ესერ ხოგ ტურას ქვინ.

Link to spto2g
Line of edition: 34       ანჴად ნებოზს ქორთე ტურა ი მიჩა ხეხვ ალი აშ ნახუნცერ
Line of edition: 35    ხოჩა გუჟი ესხვიდდა. ალი ათჷნბაჟჷნ ტურას. ათხე ხა̈ქვე დინად:
Line of edition: 36    -- ჯ' ესერ ჩი ლადეღ ლა̈თხვარს ა̈რი ი მიჩ ესერ გონა̈ბშვ ჟი ხებიდ.
Line of edition: 37    ქ' ესერუ ხა̈ქვე ეჯღაჲ, ქვინ ესერ იმეჲსგა ხოგ, ღო გონა̈ბ მადმა
Line of edition: 38    ხერი.

Link to spto2g
Page of edition: 59 
Line of edition: 1    ტურად ხა̈ქვე: -- მიჩ' ესერ ქვინ მინე ციცვისგა ლჷგ.

Link to spto2g
Line of edition: 2       ანჴად დინა მერმა ლადეღ ი, ტურა ლა̈თხვართ'აჩად, ეჩქას
Line of edition: 3    ციცვს თხვიმ ჟღა̈ბდ ოთგენე. ათხე ა̈ნჭირდა, ერე ტურა ჩვა̈დდაგროლ.
Line of edition: 4    ნებოზს ჩიგარიშშალ ყორსიდ ლახაგან ტურა. დინა მეგვნი
Line of edition: 5    ესხვიდდა.

Link to spto2g
Line of edition: 6       -- იმღ' ესერ იგვნი? -- ლა̈ხჭვედდა ტურა.

Link to spto2g
Line of edition: 7       -- იმღ' ესერ-ი ხეღვროვალ ჩიგარ, ქ' ესერ დემ ხატული ტკიცდ,
Line of edition: 8    იმეჲსგა ესერ ხოგ ქვინ. ციცვ ესერ ჩოლდაგა̈რ ლა̈დი, მარე ჯი
Line of edition: 9    ლჷჲა̈რ ესერ ომტეხ. ქ' ესერუ ხა̈ქვე ტკიცდ, იმეჲსგა ესერ ხოგ ქვინ.

Link to spto2g
Line of edition: 10       ტურად ხა̈ქვე: -- ჲაღო მიჩა ესერ-ი მიჩა ცოდ მა̈გ მიჩუ ხარ ი
Line of edition: 11    მიჩ' ესერ ქვინ ჩხარა თანა̈ღ ეჩხენჩუ აშხვ ლახვისგ' ესერ ჴა̈ნ
Line of edition: 12    ა̈რი, ეჩა ჴადვისგა კოლეფ ლჷგ, ეჯ კოლეფისგა სემი შდავალ ესერ
Line of edition: 13    ა̈რი, მიჩა ქვინ ესერ ეჯა̈რისგა ლჷგ.

Link to spto2g
Line of edition: 14       ანჴად ალი დინა ი მჷლქვერია̈შ ნაღვჟურს ქა ხა̈ქვე, იმჟი ტურად
Line of edition: 15    ოხუმბავე, ეჯჟი.

Link to spto2g
Line of edition: 16       აჩად ალ ნაღვჟურ ათხე ეჯ ლახვთე, ჟ'ა̈ნთხე ჴა̈ნ, ა̈ხფიშვდ
Line of edition: 17    ცხვი-ცჷჴემდ ი ნენსგაქა ხაჴიდ. აჩად სგა ი ქოხკიდ ჴადვხენქა კოლეფ,
Line of edition: 18    შხუნ (\ შჷნ) ლაირმ ალი ი ანჴად ალ დინათეჲსგა.

Link to spto2g
Line of edition: 19       -- აღო ათხე ტურაშ ქვინ შჷჲსგა ესერ ხაყა, ათხენღო მაყალვ
Line of edition: 20    დემემ ესერ ხერიხ ი ღჷრდახუ!

Link to spto2g
Line of edition: 21       ბერჯა̈ტურად ჟ'ა̈ნმეჴრე, ერე მიჩა ჴა̈ნს ესერ მოლე ხა̈ყრა. ანჴად
Line of edition: 22    ქორთე ი დინა დემეგ ესხვიდდა ქორს. ა̈თღვა̈ჭ ღვეშგიმ ი
Line of edition: 23    ხეჰოლალ, ეჯჟი კოლეფისგა ეშხუ შდავალ ჩვადყიმეხ. ტურა ეჯღაჲ
Line of edition: 24    ახღვიჭ ლაფორთხალშვ. მერმე შდავალ ჩვად ადყიმეხ. ტურად ხა̈ქვე:
Line of edition: 25    -- ქვინ ესერ ნომოვ ოხქვიცხ ხა̈დურდ ჟი! -- მარე ნაღვჟურდ დემეგ
Line of edition: 26    ოსჰუნრე ი მესმეი ჩვადყიმე. ტურას ქვინ ჟ'ოხჩად.

Link to spto2g
Line of edition: 27       ალიმა̈გ ხა̈ნისგა ქაჩად ვოხვუშდ ზა̈ჲ ი ვოხუშდ ნაგზი. და̈ვრე
Line of edition: 28    ხოხვრა (\ ხოხრა) მუხვბე აშ ხოკჷლკჷნე დვრევიშ ქა ლიზის.
Line of edition: 29    ვოხუშდ ლადეღ გარ ხოკლი ვადას, ეჯჟი ანჴად და̈ვ ი ხელწიფხეშ
Line of edition: 30    გეზალს ხა̈ქვე: -- ჲაღო, თხუმჟი სა̈ინშვ ლიცუ ესიგ, ეჯჟი მეგმა̈შ
Line of edition: 31    კა̈ცხთეჟი ჟავ ა̈დკარჩხან, ლიც ესერ ეშხუ წვეთ ნომოვ აბიდ, ედო
Line of edition: 32    ჩუ ესერ ე ხობჷდნი, ეჩქას ჩუ ესერ იზბი.

Link to spto2g
Line of edition: 33       ალ ნაღვჟურს მიჩა ლეჲხურიდ, ადნიშნე ეჯ ლადეღ, ლახვემ
Line of edition: 34    ფა̈თვ ი ხა̈ქვე: -- ალ ფა̈თვ ესერ კვარემს ლჷცდ ა̈სპე ი ლჷც
Line of edition: 35    (\ ლიც) -- კვარემდ. შომა̈ჲ ესერ სა̈ჭირო ხადეს, ჟავ ა̈ნჴჷმრე!

Link to spto2g
Line of edition: 36       ანჴად ათხე ი მეგამთეჟი ლაკარჩხჟი ლიც კვარემდ ესსიპე,
Line of edition: 37    კა̈ცხთეჟი აჩად, ეჩქას ა̈დსგიდდა კა̈ცხხენქა ი მიჩა მუეშ ქორ ი ჰა̈ზვ
Line of edition: 38    ლასტვია̈რშვ ლა̈სვ ლჷჯიშ. ალის ხეწად, ეჩქას ქჷმრა̈რ ოხშყად.

Link to spto2g
Page of edition: 60 
Line of edition: 1    ჩვანტახ მეგამხენჩუ ი კვარემ ლჷცდიდ ესსიპე. და̈ვა̈რდ ხა̈ქვეხ:
Line of edition: 2    -- ეშხუ ესერ წვეთ ახბჷდა ი ათხე ჩუ ესერ იზბიხ მიჩ!

Link to spto2g
Line of edition: 3       ნაღვჟურდ ხა̈ქვე: -- ეჯ' ესერ ქიმ ლჷმა̈რ. ამჟი-ამჟი, მინე ქორს
Line of edition: 4    ესერ ხა̈წდა ი ლიგვნი ესერ ოთბინა.

Link to spto2g
Line of edition: 5       ა̈ნკჷმრეხ და̈ვა̈რდ ალ წვეთ ი ტკისდ ჯიმმიშ (\ ჯიმიშ\ ჯჷმემ)
Line of edition: 6    გა̈მ ხად. ამჟი ანშყად იმხვალეხენ ცხვი-ცჷჴემდ ი და̈ვრე ქორა̈შ
Line of edition: 7    ჭვედს ლა̈ხშდჷკნან. ალი ანკვა̈რ მჷლქვერია̈შ ნაღვჟურდ. და̈ვა̈რ გუდ
Line of edition: 8    აჴა̈დხ ალის ი ხელწიფხეშ ნაღვჟურს ხეჴჷრალხ: -- ხოჩა გარ ესერუ
Line of edition: 9    ოსტჷხნე მა̈გ, ედო მინს ესერ კინჩხა̈რს ჟი ხაქვცურე ჩი.

Link to spto2g
Line of edition: 10       ანჴად მჷლქვერია̈შ ნაღვჟურ, სგოხჴიდ ხეხვ მიჩა მუხვბა, ხოჩა
Line of edition: 11    ქვერწილ აჩვმინხ ი ანღრიხ ხელწიფხეშ ქორთე. შუკვჟი აშხვ ნენზ
Line of edition: 12    ჩუქან ჩვადჷგანხ. ხელწიფხეშ გეზალს ი მიჩა ხახვ ჩვა̈თუჟდახ.
Line of edition: 13    ისგლეთი ონაქა ნენზხენჩუ ქაჯრე რაგა̈დ ხესმი მჷლქვერია̈შ
Line of edition: 14    ნაღვჟურს. აშხვემ რა̈ქვე: -- ეჯგვა̈რ ესერუ უჩხე ომჴედ, ერე ცა და
Line of edition: 15    ქვეყანა ლჷცშვ ესერ ადლაფრას.

Link to spto2g
Line of edition: 16       მერმემ რა̈ქვე: -- ეჯ უჩხანღო ესერ ეჯგვა̈რუ ა̈თუ ომჴედ, ერე
Line of edition: 17    ხა̈ბდინადეს ჩიგვაშ. ალი ესერ ერდვა̈ჲდ (\ ერვა̈ჲდ) ქა რექეს, ეჯ'
Line of edition: 18    ესერ ბა̈ჩდუ ოლსიპელი!

Link to spto2g
Line of edition: 19       ალი ქაჲ რა̈ქვეხ ი ეჯგვა̈რ უჩხე ანჴად, ერე ღვარს ესღვანდა
Line of edition: 20    მა̈გ. ანჴად მჷლქვერია̈შ გეზალ ი ალ ხეხვ-ჭა̈შ ეშხუ აშხვ
Line of edition: 21    ტვეტისგა ლაირმ, მერმე -- მერმა ტვეტისგა ი ამჟი ჟი ლა̈ჲკოდე.
Line of edition: 22    მადმა ი ჩვაქვიც უჩხად (\ ჩვაქვიც უჩხა). ალა̈რს ამჟიად ხევჟეხ.
Line of edition: 23    ანჴად ათხე ეჯგვა̈რ ა̈თუ, ერე ა̈შხი ჩიგვაშ. მჷლქვერია̈შ ნაღვჟურ
Line of edition: 24    ჟიქან ა̈თლაფრან ი მიჟს დემ ხა̈ფშვდა. ამჟი ჟი ა̈ხეცხჷნ ხელწიფხეშ
Line of edition: 25    გეზალს. მიჩა მუხვბე ჟიქაქა ხელფარანხ. ალი ათჷმბაჟჷნ ი
Line of edition: 26    ხა̈ქვე: -- ჯ' ესერ მიჩა ხახვ ხეღეშგალ, ედო მა̈ჲ ესერ ლ'ალი?

Link to spto2g
Line of edition: 27       მჷლქვერია̈შ გეზალდ მადმაგვეშმოშ ხა̈ქვე. ანჰიეხ ქორთე ი
Line of edition: 28    ქორს ხელწიფხეს მასა̈რდ ათჩონ ალა̈რე შვიდებდ ლიტეხ ი ხოშა
Line of edition: 29    ლხინ (\ ხლინ) აჩვმინ. მა̈გ ა̈მზჷრა̈ლივხ მახე ხეხვ-ჭა̈შს. ღვეშგიმპილს
Line of edition: 30    მჷლქვერია̈შ ნაღვჟურიშ ლა̈მზჷრა̈ლი ახჭემხ. ხელწიფხეშ
Line of edition: 31    ნაღვჟურდ რა̈ქვე, ერე: -- ალ' ესერ მიჩ ხახვ ხაღეშგალა შუკვჟი.

Link to spto2g
Line of edition: 32       მჷლქვერია̈შ ნაღვჟურდ ხა̈ქვე, ერე: -- ჲაღო მიჩ' ესერ-ი მიჩა
Line of edition: 33    ცოდ მა̈გუ მიჩ ხარ-ი ჯ' ესერ ხახვდ მად ესერ ხაღეშგალა; ჯ' ესერ
Line of edition: 34    ავ დო ლჷმა̈რლა̈სვ, მინ ესერ ლჷჲა̈რ დეხდა იროლ{ხ} ლა̈დი, -- ი
Line of edition: 35    ამჟი ქოხუმბავე ქაჯრე ნამბუ̂ალ. ალი ქაჲ რა̈ქვე ი ხოშა ბა̈ჩდ
Line of edition: 36    ა̈სიპდა. ალ ბა̈ჩ ჭალიშ რიყჟი ესდეხ ი ალ ბაჩვჟი ჩი ლადეღ
Line of edition: 37    ხელწიფხეშ გეზლა̈შ ხეხვ ხეგვანე.

Link to spto2g
Page of edition: 61 
Line of edition: 1    აშხვ ლადეღ იგვნი, ეჯჟი იმხვალეხენ შდუგვდ ანსკინე: -- იმღ'
Line of edition: 2    ესერ იგვნი ამჟი?

Link to spto2g
Line of edition: 3       ამნემ ქოხუმბავე მა̈გ: -- ამჟ' ესერ-ი ამჟი ხა̈ყრა.

Link to spto2g
Line of edition: 4       შდუგვდ ხა̈ქვე: -- ჲაღო, მიჩა ნაღვჟურგეზალ ესერ ალ ბაჩვჟი
Line of edition: 5    ჩვავ ადჷჲსენე, ეჩქას ესერ ბა̈ჩ მარად ესერ ა̈დსიპი.

Link to spto2g
Line of edition: 6       ალ დინად ალი ამჟი ჩვემინ ი მჷლქვერია̈შ გეზალ ხემა̈ჲ შომა̈ჲ,
Line of edition: 7    ამჟი ა̈დსიპდა (\ ა̈სიპდა). მჷლქვერია̈შ ნაღვჟურს დინად ქოხუმბავე,
Line of edition: 8    იმჟი ანცოცხლე. ამუნღო მჷლქვერია̈შ გეზალდ ალ დინაშ გეზალი
Line of edition: 9    ჟ'ანცოცხლე (\ დინაშ გეზალს ქვინ ლოხგენე) ი ალა̈რდ ხოჩა
Line of edition: 10    ლირდე ა̈დჴიდხ.

Link to spto2g
Line of edition: 11       ვოდ ეჯა̈რ ანჴეხ, ეჩქადუ ლა̈რიდ.


(ერმენტო კვიციანი. დოლი. ვ.თოფურია. 6.VI.1940)




Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.